Gilead 22 November 2009 (advance Christmas Issue)

Volume No. VIII Issue No. 22

Hyderabad

Dt. 22 -November - 2009

(Pathianni)

KRISMAS LEH MIZO FATE

Mizo te’n ‘Favang awllen lai ‘kan tih September thla a ral a, Khuangchawithla (October) chawhnu lam a ral dawn meuh chuan kan rilru ah hian enge maw zun hian min phuar tan a, rilru in a pianna lam kan dap tan thin. Sahmulphahthla (November) kan chuangkai a boruak a lo vawt tan a, thla chanve a lo nih tawh chuan kan hlasak leh ngaihthlak duhzawng pawh “Kum Sul liam hnu kan nun ngaihlai tho leh thin” tih te anih loh pawn tunlai mi te chuan “O Holy Night” tih te hian awmzia a nei ruih tawh zel a ni. He hunpui lo thleng tur hian kan nun a nghawng a- Pitar Putar, Nu leh Pa, Nula Tlangval, Tleirawl/Rawlthar leh Naupang chenin kan nghakhlel thin. Kan suangtuahna leh ngaihtuahna pawhin atam zawkin ataka kan la hmuh loh leh kal ngai lohna ram ‘Bethlehem tlangpui’ min ngaihtir a, chu hmun chuan kan lung a len thin a ni. Mizo Kristian te tan hian Krismas hi Kristiante ni pawimawh dang- Good friday leh Easter Sunday ai mah hian ngaihpawimawh leh nghahhlelh a hlawh zawk ti ila kan sawi sual em bik lo mai thei a ni. Mizoram pawn lamah te hlei hlei hian he Krismas lo thleng tur hi Mizofate nunah hian awmzia a nei nasa em aw tih pawh ngaihtuah theih tak a ni. Phairam emaw khawi hmunah pawh Mizo leh Mizo inhmuh tawh chuan kan inbiakna ah pawh “Krismas ah haw i tum em?”, “Khawnge Krismas i hman dawn?”, “Krismas ah in chawl dawn em?” tih te hi kan zawhna leh chhanna dawn tam ber pawl a ni thin a ni. Mizoram chhung ah pawh a dang chuang love, mitin rilru ah engemaw ti talin Krismas hian zunzam a nei thin. Chanchintha kan dawn hnu hian Krismas hun ang em em a Zofate thinlug hmun khat a min chen tir thei tu a tam lo ngawt ang le? Engvang nge maw ni heti tak hian mitin thinglungah awmzia a neih ni le? Achhanna ah chuan eng thildang nilovin he hun lo awmtirtu leh a neitu ber Lal Isua a lo pian khan mitin huap anih tlat vang a ni. Khawvel mihring te zingah hman atanga tunlai hun thleng hian mihausa leh mirethei kan cheng za a, kan dinhmun a in chen loh avangin mirethei zawk ten mihausa te kan awt a, mihausa tam takin mirethei te an hnuai chhiah bawk thin a ni. Chutiang dinhmun in ang lo taka cheng mihringte zingah chuan a hnuai zawk a tang mirethei te pawn an ta neih theih turin Pathian fapa chuan hmun ropui leh hmun nuam zawk pawh thlang lovin hmun tlawm leh hmun reh ah he khawvel chhandam tur hian a piang ta zawk a ni.

Lal lo piang Lal Isua hi a pianna hmun a tlawm em vang in mirethei te tan chauhva lo piang bik a ni chuang lo. A pian hnu lawk a amah chibai buk tute kha mihausa leh mi thiltithei zinga mi Khawchhak Mifingte leh hna hnuaihnung zawk thawk Berampute an ni. Hei hian Lal Isua hi mi hausa leh mi rethei te tan pawh a huapzo zia leh mitin tan a lo piang a nih zia min ngaihtuah tir thei a ni. Khawvel chhandam tura lo piang si dinhmun tlawm leh hreawm zawk a bul a rawn tanna hian kan tan entawn tur leh zir tur tha tak a rawn siam ani. Tunlai hun atang pawh in thlir ta ila Lal Isua hian a pian tirh atang hian hmun ropui leh hmun sang zawk rawn thlang ta se Mizo Kristian te hian kan changpha ve ngut angem le? Khawvel pum chu sawi loh India ram ah pawh state kilkhawr ber pawl ah kan awm a, chutah kan retheih em avangin sawrkar laipuiin special category state ah min puang in central sum hmangin kan nung ve tawk tawk a ni si a. Amaherawh chu mi hausa leh mi thiltithei zawk te tan chauhva lo piang anih tlat loh avang hian, mi ngaih pawh a hnam tlem leh hriat lar pawh hlawh zo lo Mizo Kristiante hian inti ta tu takin ‘Aw Bethlehem ka ngai a che, Berampute ram tuanna, Serafim ten zai an vawrna chu Ka Lal pianna i lo ni’ tiin thlasik rim a nam tirh atanga Krismas a lo thlen thleng in Lal Isua pianna hian kan lung a len thin in kan thinlung chhungril ah hian awmzia a nei thin a nih hi. GILEAD CHHIARTU ZAWNG ZAWNG TE ADVANCE CHRISTMAS CHIBAI KAN BUK VEK A CHE U - Ed.Board

Create PDF with PDF4U. If you wish to remove this line, please click here to purchase the full version

GILEAD-Volume No.VIII Issue No.22 Hyderabad, Dt. 22- Nov- 2009 (Pathianni) P-2

Editorial: Huan enkawltute hian Rosepar kung hi engvanga tanchhum (cut) thin nge mawni le? Mawi leh nung zawka a par nan a tang sei lutukte hi tan thin a lo ni. Hei hian hmel thar pein, khawvela pangpar mawi bera ngaih a lo nih phah ta a ni. Mihring nunah hian sualna, chapona leh Pathian mamawh loa inhriatnate hi hriatloh karah a lo thang ve reng a. Heng hi kan paih zel loh chuan, nung ve reng si hian, midang tana hmuh hrehawm leh chhungrila tuihal takin kan lo awm reng thei a ni. Chuvangin, kan nun parmawi chhuahna daltu pengte hi i tanchhum zel ang u. Chutichuan, rose pawh a hling neih hmuh kana khawvela pangpar mawi bera kan chhal ang hian, kan mihring mihrinna hlingte hian keimahni leh midang a chhun lo ang a, nunmawi zawk kan nei ngei ang. A par loh lai lah hian mawina reng nei lo tih tur khawpin a khawro a, hnim hling nei satliah ang chauh a ni. Tui leh leitha tinrengin chawm mahse nun tum hmel pawh a pu chuang lo. Amaherawhchu a hun a lo thlen chuan a hma aia mawi zawkin a rawn chawrno thar leh a, a parte pawh a mawi sawt thin a ni. Hetiang bawk hian kan thlarau lam nun hian chauh chang tawkin, beiseina nei lo hial khawp pawhin chau thin mah ila, Pathian chuan kan tana hun leh hmun tha hi a lo ruat reng thin a ni. Chumi tur erawh chuan pangpar enkawltuin taima taka a chawm ang hian kan thlarau lam chawte hian kan inchawm reng a pawimawh hle awm e. Sap hla siamtu pakhat pawhin a lo hmu chiang hle a, ‘Only God knows how and when, but roses will bloom again’, a lo ti hial a ni. HMCF INKHAWM PROGRAMME Dt.29-November-2009(Pathianni), Tan Hun: 3:15 P.M. Inkhawm programme a hranpa siam a ni lova kan Vice Chairman Dr.C.Dothanga te rawngbawlna pawl VISION 2020 ASIA pualin Special Programme hun hman a ni ang. HMCF Member zawng zawngte Happy Advance Christmas Chibai kan buk vek a che u- PC Lalnghinglova & Family

Vawiin Changvawn:

“Mi thim hnuaia kalte chuan eng nasa tak an hmu ta: thihna hlim rama awmte chungah ngei chuan eng chu a lo thleng ta. Hnam chu i tam ta a, an hlimna pawh i ti pung ta : buhseng laia hlim angin i hma ah an hlim ta a, mi rallak sum an sem a an hlim ang maiin ”. Isaia 9:2,3

KAN CHHUNGKUA Nimin Dt.21.11.’09(Inrinni) khan Sainikpuri area a HMCF member awm ten chawlhkar 1 dan a inkhawm ho na an neih thin chu Pu Zohmingthanga te In-ah hlim takin an hmang. Inkhawm te hian In neitu leh HMCF Chairman Pu Zohminga Birthday lawmna chawhlui an kil ho nghal niin thu kan dawng. Tv.F.Lallawmkima, Tv.V.Vanlalropuia (Valtea), Tv.P.C Lalramsanga, Tv.Zarzosanga, Tv.Samuel Lalrinawma, Tv.R. VL Thianghlima te chuan tunkar thawhlehni hian University of Hyderabad aiawh a football khel turin Coimbatore an pan dawn. Tluang taka an inkhelh theih kan duhsak e. Loyala College, Old Alwal te chuan tunlai hian Faculty te pual a inelna leh intihhlimna hun ‘Resonance’ an hmang mek niin thu kan dawng. St.Francis College, Begumpet zirlaite pawn End Semester Holiday an zova tunkar liamta atang khan Class an tan leh tawh. Tin, Holiday hmanga Mumbai a zin Nl.Tluangpuii leh Nl.Cindy te pawh dam takin Hyderabad an lo thleng leh tawh e. Kan member Tv.K.Denver-a Pa Pu K.Amon(MPS) chu damlohna avangin Kolkata a an inentirna ah thin(liver) cancer ani tih hmuh chhuah a ni a, tunah hian Tata Memorial Cancer Hospital, Mumbai ah enkawl mek a ni. A dam that zel kan duhsak in kan tawngtaina ah kan hrereng thin dawn nia. Zichhuak/Haw: Tv.K.Malsawmdawngliana, Masab Tank chu nimin khan Krismas hmang turin Mizoram lam panin a haw. Dr. Martin Chhangte, Archaelogical Survey of India pawh tunlai hian a nau Insuarance buaipuiin Mumbai ah a zin mek. Nimin vek khan Nl.Lalrinchhani, Nl.Lalnunmawii, Nl.Lalneihzeli Sailo, Univ. of Hyderabad te pawh chawlh hmangin an haw. JNAFAU zirlai te- Nl.Sylvia Romawizuali, Nl.ST Malsawmi, Nl.Lalrinzuali te chu tunkar chho hian zirlai tul avangin Hyderabad khawpui chhuahsanin min zin bo san dawn niin thu kan dawng. Tunkar lo awm tur ah pawh hian zirlai Masi chawlh hmang tura haw tum an awm nual bawk. Mizoram atanga damlo kalthlak(Kidney transplant) tura lo kal Pu H.Lalhrilmawia, Khatla Aizawl leh a kal petu Pu Lalremsanga te pawn dam takin tunkar liamta khan Mahavir Hospital an chhuahsan ta. Pu.Hrila te hi inenkawl chhunzawm turin Hyderabad ah an cham hrih ang. An that chhoh zel kan duhsak e. Kar hmasa lama kan rawn tarlan tawh HMCF Asst.Secretary Pu PC Lalnghinglova te leh a nupui fanau te chuan nimin khan Air Force Station Hakimpet atangin Mizoram lam ah thlasik nilum ai turin min haw san ta. Tluang taka an zinkawng an zawh kan duhsak e.

Create PDF with PDF4U. If you wish to remove this line, please click here to purchase the full version

GILEAD-Volume No.VIII Issue No.22 Hyderabad, Dt. 22- Nov- 2009 (Pathianni) P-3

-Lalzarzoa HMCF executive committee meeting in ‘Advance Christmas Programme’ hman a rawt avangin vawiin hian Twin Cities(Hyderabad leh Secunderabad) a awm Mizo ten ‘Advance Christmas’ hlim takin kan hmang thei a ni. Vawiin a kan hun hman ‘Advance Christmas’ kan tih lai tak hi enge a nih chiah ngaihtuah ho dawn teh ang u. Kum tin Krismas a hnaih tawh chuan Mizoram chhung ah a ni emaw Mizoram pawn ah pawh awm ila a bikin thalai tamna ah chuan ‘Advance Christmas’ hun hman hi kan tihdan phung pangngai ah a ngaih theih tawh hial awm e. A hming (term) ‘Advance Christmas’ hi saptawng ni mahse kan tan chuan a mikhual tawh lova a awmzia leh nihphung pawh inhrilhfiah hran pawh kan ngai tawh lo. He hunah hian enge tih tur a enge kan tih thin chu kan thinlungah a chiang sa tawh a ni. Chuti taka kan hman lar leh kan tihdan phung pangngai ang hial a kan ngaih ‘Advance Christmas’ hi engtik lai atangin nge Mizo te hian kan hman tan a a hming hi tu phuah chhuah ni ta ang le? ‘Advance Christmas’ hi enge a nih chiah? tih hi in zawt ta ila in ngaihtuah buai miah lovin “Krismas lo thleng tur urlawkna leh chumi atana inbuatsaih lawkna” tiin emaw “Krismas a thlen hma a lo lawm lawkna” tih te in emaw kan sawi ngei ang. Kan tawng ani silova heti tak hian Mizo te hian kan hmang uarin kan sawi ri tam si a ‘Advance Christmas’ hi enge a nih chiah hriat tumin internet lam ah te han en lah hian chhanna mumal hmuh tur a van gem em lawi si. Search engine lar google ah meuh pawh a hrilhfiahna lam hawi hmuh tur a vang khawp mai, mak ve mai mai chu ‘Advance Christmas’ ti a zawn chuan a chhanna ah pawh Mizo website/weblog a lang nasa khawp mai. Heng te avang hian ‘Advance Christmas’ tih tawngkam hi Mizo saptawng thiamte chher chhuah emaw Mizo te duan chhuah a ni thei mai angem? tih hi ngaihtuah theih tak a ni. He tawngkam ‘Advance Christmas’ tih hi sapram lamah te an hmang ve ngai em tih te ngaihtuahna ah a awm a, vanneihthlak deuhvin United Kingdom-a awm mek Mizo pakhat Cambridge University a lehkhazir lai ka be pawp hlauh a, a ni in a sawi dan chuan Krismas lawmna programme an siam thin ah ‘Advance Chrismas’ tih kher hi chu a tawngkam lamah chuan an sawi rik a hriat ngai lo thu in min chhang a ni. U.K. tih loh khawvel hmun dang ah te ‘Advance Chrismas’ tih tawngkam hi an hmang thin em tih erawh han zawh mai tur ka hriat loh avangin chiang takin ka sawi thei lo thung. Amaherawhchu hmang thin nise internet lamah te pawh a hrilhfiahna emaw a kalphung sawina hmuh tur awm awm tak a ni a, hmuhtur mumal a awm lo viau mai. A ang teuh deuh ber chu ‘Advent Christmas’ tih hi a ni a, ‘Advent’ tih chu Latin tawng niin ‘thil lo thleng mek’ (a coming or arrival) tih na a ni mai awm e. Khawthlang rama Advent Christmas an hman thin lo chhuah chhan chu a mawl thei ang ber a sawi chuan Pathian in mihringte a hmangaih em khawvel a ah lo kal in mihringte hnenah a rawn cheng

a, chu avang chuan hlim tak a lawm hi kan tih tur a ni tih rilru pu in an hmang thin a ni. Advent Christmas hi kumtin Krismas ni a thlen hma Pathianni vawi 4-n atanga hman tan niin urlawk zan(24 Dec) ah tawp thin a ni. An hun hman dan leh lawmdan kalphung hi Good Friday leh Easter Sunday dawn a khawtlang lama ringtuten ‘Lent’ an hman thin ang deuh hian Lal Isua tan a chawnghei leh Krismas lo thleng tur a atan a in serh hranna lam hawi a ni. Mizo te’n a ‘Advance Chrismas’ kan tih ah erawh hi chuan chutianga hun hman emaw Krismas thleng daiha tur programme inchhunzawm chho zatchumi ni ah chuan chu chu tih tur ani a, a tuk ah chumi lam hawi a programme hman chhunzawm tur tih ang chi emaw inkaihhruaina engmah kan siam ngai chuang leh lawi bawk si lova. Nguntaka ngaihtuah in ‘Advance Chrismas’ tih tawngkam a kan sawi thin hi kan tawng ni lo mahse kan hman dan leh a kalphung hi a Mizo ta riau in a hriat theih! A tawngkam a kan sawi anga programme siam leh hun hmang hi khawvel hmun danga Kristiante pawh an tam lo viau mai thei a ni. A grammar zawng a chhutin a dik nge dik lo tih lam chu kan zawhna ni lo se, ngaihtuahna ti zauvah ‘Advance Chrismas’ tih loh pawh hian hming dangin ‘Pre-Christmas Celebration’ tih te, ‘Pre-Christmas Meeting’, etc. tih te pawh an hmang thin bawk. Kei ni tan chuan ‘Advance Chrismas’ chu nikhat emaw zankhat atana Krismas lo urlawk na atana programme kan siam hi a ni mai tiin a tawi zawngin kan sawi thei awm e. ‘Advance Chrismas’ tih chuan keini Mizo te thinlung ah hian inhrilhfiah leh chuan pawh angai tawh chuang lova enge a nih hi a chiangsa em em tawh a ni! Chuvangin ‘Advance Chrismas’ tih hi kan tawng em chu ni lo mahse Mizo Kristian te “concept/conceptual term”a ni ve mai ti ila a pawmawm thei khawp ang. Nang enge i ngaihdan ni ve le? (feedback pe duh tan [email protected] ah pek theih)

Create PDF with PDF4U. If you wish to remove this line, please click here to purchase the full version

GILEAD-Volume No.VIII Issue No.22 Hyderabad, Dt. 22- Nov- 2009 (Pathianni) P-4 MIZORAM KRISMAS CHANCHIN TAWI

GILEAD BIBLE PUZZLE (22nd-Nov-’09) Chhangtu Hming:……………………………………… Phone/e-mail:…………………………………………… Lawman 1-na Rs.50/-(1 ai a tam an awm in thumvawr a ni ang), Puzzle chhanna hi hemi copy chehthlak emaw mahni a plain paper a ziak chhuak in(table ang thlap in) emaw e-mail ([email protected]) in kan dawng thei e. Thehluh hun tawp: Dt.29.11.’09.(4pm) thleng. A hnuaia ah hian Bible a Daniela bu atangin mihring hming/ khua/ ram/ hnam hming 10 dah a ni a, thai chhuak rawh le. J u D A R I A L N O A

E

L

S

A

D

R

A

K

A

N

E

H

E

M

I

A

K

L

B

U

A

I

O

L

B

E

A

K

E

A

Z

A

R

I

A

T

L

I

D

R

U

I

H

L

A

D

L

N

I

I

M

E

S

A

K

A

T

E

O

T

U

A

C

H

A

I

A

G

K

H

A

S

U

R

I

A

M

O

A

U

L

M

I

S

A

E

L

A

8 November 2009 Puzzle chhanna: 1.Troas 2.Beroia 3.Antiokei 4.Lustra 5.Paphos 6.Mileti 7.Samothraki 8.Neapoli 9.Ephesi 10.Atheni Lawmman dawngtu: Nl.Nelida Lalthafeli, Masab Tank I HRE TAWH NGAI EM? Krismas Ruai: Kum 379 A.D khan Battle of Adrianople a Emperor Valens a thih hnu in Constantinople khawpui ah Krismas ruai theh hi chin tan a ni a, a kum leh 380 A.D ah Antiokei (Antioch) khawpui ah pawh theh a ni. Kum 381 A.D a Gregory of Nazianzus Bishop atanga a ban hnu in Krismas ruai theh hi tih tawp a ni a. Kum 400 A.D khan John Chrysostom hmalakna in thar thawh leh a ni. Heng hun lai hi Roman Cotholic kohhran Europe khawchhak lama a indin thar leh hunlai vel a ni.

Mizoram ah hian chanchintha lo luh (1884) khan krismas hi hman tan nghal a ni lo a, an hman hmasak ber chu kum 1903 khan a ni. Hetihlai hian kristian 30 vel bawr an awm ve tawh nain krismas hmangtute hi 20 chuang zet chauh an ni a, an zingah chuan Khuma, Khara, Dala, Chhinga leh Thanga te hi a langsar zual an ni. Biak in an la neih loh avangin Aizawla hmeichhe sikul ( tuna P.C. Girls sikul ni ta) ah an hmang a, tuna Synod Office bul kawt vel khi nia sawi a ni. Hemi ni hian Sawrkar pisa kharin sawrkar hnathawkte pawh chawlh pek vek an ni. Inkhawmah hian Zosaphluia leh Zosapthara ten thu an sawiin Sap ho, mipa 4 leh hmeichhe 3, an zai bawk. Tin, inkhawm banah naupang hote fu, balhla, ser leh chithlum sem an ni. Zaipawl intihsiak: Zofate zinga zaipawl intihsiak hmasa ber ni turin ‘Mizo kan nih lawm ilangin’ tih hla hmangin an intihsiak a, Mizo chanchina hun chhinchhiahtlak tak a ni. He hla hi Zosapthara phuah a ni a, a krismas hla lem lo hle. Zaipawl pathumTlangval Zaipawl , Tleirawl zaipawl leh Naupang zaipawl intihsiak zingah Tlangval Zaipawl ten pakhatna an la a, Mizoram Zaipawl intihsiak lawmman pakhatna la hmasa ber an ni ta a ni. Tin, ruai theh hmain naupang an infiamtir a, a tithei ber hnenah eng lo (lawmman) an pe bawk. Ruai: Mizote krismas hman hmasak ber tum hian bawng talhin ruai an theh a,kristian ho ten tlai takin an ei. Amaherawhchu Missionary sap te chuan an theh ve lo a, a hrangin an ei thung. Ruaitheh zawh lamah thingpui an sem leh bawk. Tunlaia Mizoten krismas ti krismas tu bera kan ngaih zaikhawm erawh an nei lo tlat thung. Mizote zinga Krismas carol hmasa ber chu kum 1933-a neih kha nia hriat a ni. Khami kum krismas khan Rev. P.D.Sena huaihawtna hnuaiah neih a niin sap ho leh chutih laia Mizo mi lian leh mitha deuhte inah vak kualin vehbur an khawn a, an thilpek dawn tlingkhawmin Mission Veng Biak in Gate pillar an siam nghe nghe.

Published & Edited by Lalzarzoa for and on behalf of Hyderabad Mizo Christian Fellowship

Create PDF with PDF4U. If you wish to remove this line, please click here to purchase the full version