Gilead 17.may.2009

Volume No. VIII. Issue No. 05.

Hyderabad

Dt. 17. May. 2009

(Pathianni)

VAN TAKSA ROPUINAN - HZ Siama Aw, Ka hun hi a tawiturzia hrereng la, Mihring fate zawng zawng hi i va siam engmah lo em! Eng mi nge thihni hmel hmu lova nunga Seol kut atanga a nunna chhanhim tur chu. Sam 89:47-48. ‘.. Lalpa Pathianin leia vaivutin mihring a siam a,…’(Gen 2:7) Chungnungbera thiltihtheihna kut chhuak, a duh anga din leh siam niin, a nunna thaw avang chuan minung a lo ni ta. Tin, heti hi ani a, hlum atanga dinchhuah ve mai chuan a siamtu chu engmahlo a ngaiin ‘..vaivut i ni a, vaivutah i kir leh tur ani’ (Gen 3:19) tih anchhia chu ama duhthu ngeiin a lo rochung ta a. Mahse, kan mihring taksa; vaivuta din leh vaivuta chang leh mai tur atan hian kan va thawkrim thin si em! ‘Mi zawng zawng hlobet ang an ni a, an ropuina pawh hlobet par ang ani’( I Peter 1:24) tihte hi a taka hmuh fiah a har thin anih hi!. Naupang kan nihlai atangin kan chenna khawvela kan lo dinchhuah ve theih nan nu leh paten sum leh tha tamtak an seng a, ‘Naupang chu a kalna awm kawngah zirtir ula, a puitlin hun pawhin a thlah lovang’ tihte chu he kan lei taksa tanah hian min zirtir niber hian ahriat. Chutah vanglai hunin min rawn nang ching a, nula in khawvel hmachhawn tura a incheimawina sen ral zawng zawngte, mipain anihna aia ropui duhna avanga a insenso na zawng zawngte hi ngaihtuah teh! ‘Ngaizawngtu hmuh theihna turin I awmdan I va uluk ve’ (Jeremia 2:32) tia Jeremia zilhna awka hi kan tunlai hun nen hian a inrem ngawt lovem ni?. Ngaihtuah teh ‘Lawilo’ dawrah ‘Thil Lawilo’ buaipui hian kan hmanhlelh ani ber lo maw?!

Atawp berah chuan unaute u.. vaivuta din mai mah ni ila, keini Krista ringtu te chuan amah Krista avang chuan beisei tur kan nei ani.‘Kan awmna leia in hi thiat mah sela, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a’ (II Kor 5:1). Chumi beisei tur nei kan ni hi kan va nihlawh em!

Chhungkua dinin damlai ni chu thlantui nena chhiar liam hnu leh, ‘zingtakah intho a, tlai takah in chawl a, in thawhrim rah in ei thin hi a thlawn ani’.(Sam 127:2) tih chu nunin ataka alo dai hnu meuh chuan alo tlai zo tawh lawi si thin. Zirtirtu zirtirna ‘Leiah intan rote khawlkhawm suh u, vanah intan rote klhawlkhawm zawk rawh u. In ro awmna apiangah in rilru pawh a awm ang’ tih thu te chu ataka nunpui ngam har mahse, amah Lal Isua zilhna ‘..., fimkhur rawh u....damchhung khawsak ngaihtuahna nen, in rilru a khat lutuk hlauh ang a, chumi ni chuan thang awk angin thawkkhatan inchungah alo thleng phut ang. Chutiang tak chuan lei chung zawng zawnga awmte chungah chuan a thleng theuh dawn ani’ (Luka 21:34-35). tih hmangaihna awka hi I zir nawn leh ang u. Chutiang chuan he kan lei taksa, vaivuta din leh vaivuta kir leh mai tur atan hian eng ang takin nge kan inchhek dawn tih hi kan ngaihtuah fo atan leh kan nun kaihruaitu atan hman tum thin ang hmiang.

Dt.24.May.2009 (Pathianni)

Chutih avang chuan hawh u, kan lei taksa ‘vaivut’a din ni lo, kan van taksa ‘thlarau’ chatuan ami tur tan; kan lei in ‘ropuina lem’ atan ni lo, kuta sak loh ‘vankhawpui’ tan hian i in khawlkhawm zawk ang u.

INKHAWM

PROGRAMME

Hruaitu: Pu.Lalvuana Tantu:

Nl.R.Lalruatfela

Bible chhiartu:(1) Tv.Simon Lalremruata Fanai (2) Nl.Gladys Lalneihkimi Thawhlawm lakhawmtu: (1) Tv. Lalnunfela Chawngthu (2) Nl.Hmangaihzuali(VL-i) Sermon: Pu.Zohmingthanga Special Item: Tv.Christopher Zodintluanga Dt.31.May.2009(Pathianni) Hruaitu: Tv.Benjamin Lalremsanga. Fellowship hun a ni a HMCF Andria Bial ten hun an rawn hmang ang

GILEAD -Volume No. VIII. Issue No. 05.

Hyderabad

Dt. 17. May. 2009 (Pathianni) P-2 KAN CHHUNGKUA

HMCF member tam takin mahni zirlaite zir zovin haw hlen turin Hyderabad an chhuahsan mek a. Hetia ‘dam takin’ ti a kan inthen mek lai hian ngaihtuahna a thil lo lang ve nghal chu kumin hian zirlai lo kal thar tur engzat tak awm ang maw? tih hi a ni. A kum telin Hyderabad khawpui ah hian Mizo kan pung ve zel a. Tun kum hnih chhung hian kan pung nasa zualin a hriat nghe nghe. Mithar lo lawm chungchang ah hian member lo awm tawh sa te hian tihtur pawimawh tak kan nei ve ani tih hi kan ngaihtuah thin a pawimawh khawp mai. HMCF inkhawmna a kan vawikhat inkhawm hun lai te ngaihtuah let leh ila theuh ila, member lo awm tawh sa te, kan hmelhriat miah loh ten kan tlangnel theih nana min be hmasa min lo chiauau thin lai te kha kan hrereng thin in a rinawm. Tuna member awmsa te pawh hian kumin session thar ah hian mithar tam tak an lo kal leh ngei ang a, an mahni lo chiau-auva Biak In leh HMCF rawngbawlna peng hrang hrang ah te tlangnel tak an tel ve theih nan a hawihawm kan lo chhuah hram hram a pawimawh a ni tih i hre thar leh theuh ila. Midangte chunga that kan chhuah hian kan rawngbawlna ah pawh inlungrualna leh inpumkhatna tha a piang chhuak thin a ni. HMCF rawngbawlna a than chhoh zel theih nan hian enge ka tih ve theih tih ngun takin tuna tang hian i ngaihtuah theuh ang u.

THUTHAR Nimin khan India ram pumah Lok Sabha inthlan result puan a ni a. Mizoram ah chuan Pu CL Ruala INC candidate chu hneh taka thlantlin a ni a, vote 209055 hmuin a mah hnaih bertu Dr H.Lallungmuana Independent candidate chuan Vote 103907 a hmu a, vote nuai 1 sang 5 leh 148 in a hneh a, Pu Rualpawla Ind candidate in Vote 4032 a hmu a, Pu Lalawmpuia Chhangte nationalist congress party candidate chuan Vote 3252 a hmu bawk a ni. Mizoram ah MP inthlan Vote tla chhiar a nih rual hian South Tuipui Bial MLA Bye-Election a vote tla te chu chhiar nghal a ni a, Pu john Siamkunga INC chuan Vote 6774 a hmu Pu K.Lalsanga Independent chuan vote 2268 a hmu thung a, Pu John Siamkunga hian Vote 4505 in a hneh a ni. Tin, Pu.HT Sangliana chu Bangalore Central bial atangin a tling zo ta lo a ni.

Kan Hruaitute Dr.C.Dothanga lehPi.Chawngmawii te nupa pawh nipui chawlh hmang turin tunkar chhovah hian Mizoram lamah haw chhoh an tum. Tin, Pu.Vannuntluanga Pachuau, Sainikpuri te chhungkua pawh nipui chawlh hmangin Aizawl lamah an awm mek. Dam taka Hyderabad an lo let leh thuai kan beisei. Kan Chanchinbu Circulation Manager leh HMCF Executive Committee Member ni bawk Tv.Benjamin Lalremsanga, Sainikpuri chuan Mizoram lamah tunkar Thawhlehni hian min haw bo san dawn ta a, A thawhpui te leh HMCF member ten kan ui dawn hle mai. A hmalam hun lo kal zel tur ah Pathian in a hruaizel theih nan duhsakna kan hlan e. Gilead Circulation Manager hlui Nl.Vanlalveni leh Nl.Zothansangi, JNTU te pawh an zirlai zir zovin tunkar Thawhlehni hian Aizawl lamah an haw chhuak dawn. Tin, tukinzing ah khan Nl.Jessie Rualkhumi, UoH pawh Mizoram lam panin a haw ta bawk. Kan Member thahnemngai tak tak te an zirlai te tha taka an zawh theih avangin kan lawmpui em em a, Hyderabad an awm chhunga HMCF rawngbawlna atan thahnem ngai taka an thawh thin avang pawh in kan ngaiin kan ui dawn hle mai. An hmalam hun lo kal zel tur atan Pathian in hruaizel se tih hi kan duhsakna a ni e. Nikum lama Mahavir Hospital a kalthlak(Kidney Trasplant) Pu.Lalbiakthuama, Lunglei te unau thum Hyderabad ah in chek up in an awm mek a, an dam tha zel niin thu kan dawng a, Pathian hnenah lawmthu i sawipui ang u. Tv.Samuel Zodinsanga B.Tech(Civil) JNTU a zirlai chuan IIT-Madras ah M.Tech zir zawm a tum fel ta. Ani hian IIT a zir thei turin GATE hlawhtling takin a lo in ziak tling tawh a ni. Tin, tunlai hian JNTU,Kukatpally zirlai ten end-semester exam an nei mek a, kar leh lamah a tam zawkin exam an zovang. Result tha tak an neih theih duhsakna kan hlan e. Nl.V.Sawmveli (Nunu-i), NPS Leader chu tunlai hian a naute tlawh in Chennai khawpui ah a thangbo mek. Dam taka alo haw leh kan beisei. Tv.H.Lalhruaitluanga(Mahruaia),UoH, Philipa Bial Asst.Leader tunah hian Guwahati ah Passport buapui in a thang mek, Aizawl lamah rei vak lo cham turin a tlang chho nghal dawn niin thu kan dawng. Tv.Lalduhawma (Indian Missionary Association) chuan tunhnai mai khan Scooty mawi leh tha tak a lei thar. A duh apiang in inkhawm banah inphurh tir theih tih Pu.PC-a hnen atangin thu kan dawng. Kan lawmpuiin a hnunga chuang tur pawh an awm thuai kan beisei.

Published & Edited by Lalzarzoa for and behalf of Hyderabad Mizo Christian Fellowship