Ccc Thanglawi (september 2008)

CCC Thanglawi A Living Sacrifice Rom. 12:1 Vol. 4. No. 2

September 2008

Edittha Sin in “Na thazaang a tlawm nain kan cawnpiakmi na zulh le ka cungah zumhawk tlak na si kha ka hngalh. Innka pakhat kan hunpiak i a hohmanh nih an khar kho lai lo” tiah Johan nih a ti (Biathlam 3:8). Cucu CCC caah thazaang a si. Kan thazaang a tlawm nain kan tha a der lo. A ruangcu CCC caah zumhawk tlak lawng te nan si. Bawipa nih a hohmanh nih an khar khawh lomi innka a hun cang. Cu innka cu Pathian nih pakhat cio nan dihlak hmang in a hunmi a si. A tu liote hi CCC hmun chungah pangpar an par cingling a si. Hmanthlaknak a phunphun he rak thlak khawh a si. Nan dihlak cungah kan i lawm.

Bible Conference CACC ram cu siangbawite chan in kumtin Baibal cawnnak a ngeimi kan si. Tukum October sianginn khar chungah CCC lei in i tel ding ah timhlamhnak kan ngeih mi cu 1. H. Siang Kung - ZPBA, Calthawng, 2. W. Khen Chum Bik - GBA, Muihle, 3. Sayama Siang Zi - HBA, Hakha, le 4. Rev. Za Mang - TABC, Thantlang an si. 2% THAWHVO September 22, 2008 tiang ah 2% thawhvo a pe cangmi: CBA - Ks. 500,000/HBA - Ks. 2,900,000/TBA - Ks. 500,000/LABC - Ks. 250,000/A pe cangmi cungah kan i lawm ngaingai. A pe rih lomi zong tuan ah nan pek khawh nakhnga kan in nawl hna. “CCC cu an rum tuk ko” tiah a hngallo mi nih an ceih tawn. Rian kan tuan tikah CCC caah zeidah ka ti khawh ve lai? ti lei silo in CCC in zeidah ka hmuh lai? a ti mi zong zumlo tu chung in an um. “Dollar in pei lahkhah an ei cu” tiah a kan timi an um. A taktak ahcun tukum ka sining hi kan har ngaingai. Thlahlawh zong hi ti ning in cun i pek khawh lo caan kan tong men lai. Nain kan lung a dong bal lo. Zeicatiah CCC a dawtu lawngte nan si pinah Pathian nih a dawt fawn. KAN NGAIHCHIAT PI A tanglei siangngakchia chungkhar chungin thihnak a tongmi an ngaihchiatnak ah kan i hrawm ve. 1. Thangmana (B.Th. I) i a nu Daw Khei Ling (Kum 45), Khelawng khua, Kanpalet peng, nih July 20, 2008;

2. Run Ling Thang (B Th III) i a nu Pi Tial Kep (kum 49), Hantawady, Gangaw peng nih August 29, 2008 ah an kan liam tak. Kaltak mi chungkhar caah thlacam cio u sih. Mizaw Caah Thlacam U Si 1. CCC Rawlchuang Naw De De cu pawfah in sizung ah a um. Sept. 24, 2008 ah operation tuah an timh. 2. Ral Pel khua ah Pastor a tuanmi Rev. Dam Duh Thang (CCC siangngakchia hlun) cu pawfah nakin sizung ah a um. Operation an tuah nain hnabei sei a si lo an ti. Sept. 21, 2008 ni tiang ahcun a tthit an phoih rih lo. A hmurka cu a panh ngai ko.

REV. BIL HMUNG HE BIARUAHNAK 1. Na chungkhar kong a tawinak in na kan chim kho hnga maw?  Nupi pakhat ka ngei. Kan nu ka rak thit hi ka chir lomi a si. Fapa pathum le fanu te pakhat kan ngei. Kan fa le pali an si. 2. Na cacawnnak tah?  Primary hi ka chuahnak khua Vanzang ah ka cawng. Tang 5 hi Farawn S.M.S ah ka cawng Tangruk in tanghrang tiang hi SHS Thantlang ah ka kai. 1978 ah Tanghra ka awng. 1985 ah BA ka awng. 1996 ah BD ka awng. 2006 MTh (Taiwan) 3. CCC ah zeitik in dah na tuan?  CCC riantuan hi 1998 August 13th in ka thok. Kum hra khengte ka um ko hih!. 4. CCC hi lungtatchiah rawn ah rak i thial ding ah rethei ngai in innsak nakah tlangtlatu bik a si tiah kan in theih. CCC i i thialnak i na hmuh tonmi kan chim kho law kan duh ko.  Theipalh mi a si Dr. Hla Aung (Mahlio Principal) hruainak tu a si deuh. Kei hi kai manh deuh caah a herhmi ah an rak ka hman tu a si. Riantuan tti mi dihlak cungah ka lawm. Raktonmi harnak cu Cozah nih innsak nak nawl pek lo ruangah innsak kan duhmi kan sak khawh lo dah tilo kan tuarmi harnak a um loh. 5. CCC ah zeirian (Post) hna dah na tlaih bal?  CCC ah hin riantuan ka thok in cachimh cu ka rian biapi a si ko. CCC chung i hruainak ah rian i phawtmi ah hin Chaplain, Student Dean, Vice Principal le Registrar ka tuan bal. 6. Yangon Lai Baptist Church (Dagon) i naa thial ding cu CCC nih kan in siang lo ngai. Nangmah nih tah zeitin dah na ruah?  Pathian riantuan hi 1996 April 1st in ka thok. Ka Mother Church hi Johnson Baptist Church, Khampat (No. 4) a si. CCC ka phaknak hi ka Khrihfabu hna tlak nak in a si ko. Ka Khrihfabu hi ka nun a ka sersiamtu an si ka ti zungzal. A pahnihnak ah CCC hi kum 10 ka um ve cang. Hakha zong hi ka fa le nih cun an khua ah an ruah cang. Keimah le ka innchungnu zong kan i ziakngai cang. CCC hi kan i sersiamnak hmun a si ve ko. Kan tlaihchan tukmi a si. CCC family pumh i kan chung kurun in kan i tel lengmang mi zong hi mah caah cun a si.

A tu YLBC ah thialding zong hi JBC hnatlaknak in a si. Pathian riantuan ah hin duhmi i thim siloin a herh ti nak hmun tuan hi ka duhmi a si peng. Kei zong nih CCC kaltak lai hi ka siang ve ruam loh. Kan umnak kip in CCC he cun kan i then lai lo. 7. Hmailei CCC ca na saduhthah na kan chim kho hnga maw?  Keimah nakin CCC caah saduh thah thatha a ngei mi an um ko lai. Mah cu zulh ka duh deuh. Ahmun ah hin Hakha a phan pauh nih CCC na hmu cang maw? ti ah an siaherhmi siseh ti ka duh. Siang hngakchia pawl nih CCC kai cu ca a tam tuk i a har tuk an ti hi thanchonak a si ka ti. 8. Pathian rian na tuan hlan ah Chin league in a tang ngai an in ti. Hmailei ah tah Politics hi na zuam ti hnga maw?  A hman ko. A tu ka tuanmi zong hi Palitics Field a si lo nain Politics he tthenawk a ttha loh tiah ka ruah. “Kawl cu Buddhist a si lai” ti hi Politics a si maw a siloah Biaknak sawhsawh dah a si ti hi ka ruat tawn. CCC: Caan na kan peh caah kan i lawm.  Ka lawm ve.

CAMIPUAI LE KHARTE September 17-30,2008 chung kharte camipuai a si. A tu hi kan tuah cinglingpi a si. Chunzaan hlan in mei a kan tawlrel piaktu upa cungah lunglawmhnak chimcawk lo kan ngei. Cun Oct. 1-21, 2008 chung kharte Sianginn khar a si lai.

Miss Roung Shan he tonnak CCC: Hello! Ahodah na si cu? RS: Roung Shan ka si. CCC: Zeidah na cawn lio? RS: B.Th. Final CCC: Na duhbikmi Subject? RS: Pastor rian he aa tlaimi subject. CCC: Na chungkhar le Khrihfabu kong theih kan duh ko. RS: Dec. 17,1987 kum ah ka chuak. Unau pali kan si. Ka pa cu U Yan Shein, Ka nu Daw Zan Seh an si. Kachin ram, Tanaing khua, Taya (1) block, Bethel Baptist Church in ka ra. Naga miphun ka si. CCC: Zeitindah Kachin ram in CCC na phak? RS: Saya Sein Maung (CCC chuak) nih CCC kong a ka chimh tikah ka lung a tho ngai. Hakha phak zong ka rak duh fawn. Cun ka nu le ka pa kaltak in hmasabik khual ka tlawn a si i ka lung a tor, (Seih-holh- shia de). CCC: CCC ah naa nuam maw? Khoi ka dah na um? RS: Hostel ah ka um i kaa nuam ko.

CCC: Hostel rawl na ei kho maw? RS: Pehang a si i a za pah ko. Mitampi ei ti a si i ka a thaw. CCC: RS: CCC: RS:

Sianginn na dih in zeidah na tuah lai? Pastor ka tuan lai. Hakha khuacaan zeitin na hmuh? A kik ngai ko. Nain um a nuam. Khuasik tlakka hrawng ahcun phundaangpi in ka um. Ka lung a leng bantuk, pakhatkhat a khaan-sa bantuk in ka um.

CCC: CCC he pehtlai in siaherh bia kan chim law kan duh ko. RS: Hmuh ballo, theih ballo mi khua le miphun sinah kum li khengte ka umnak a si i lungthiang mi Chin lungput zong ka hngalh khawh. Saya/ma te zong nih mah fa le taktak bantuk in ca zong an kan chimh. Ka thathnem pimi a tam ngaingai. CCC cu a thangcho chin lai ti zong ka zumh. CCC: Caan na kan pek caah kan i lawm. ATEM E/S The Association for Theological Education in Myanmar (ATEM) i Executive Secretary cu kum 60 a tlincang caah a thar thlen ding a si. Pathian nih a tha bikmi a kan pek nakhnga thlacam kan herh. ATEM annual meeting cu Oct. 24, 08 Ygn ah tuah a si lai.

Thawngpang tete David Van Bik Lecture Day (August 22, 2008) ah ZTC, Falam ah Vice-Principal a simi Rev. Joel Za Hlei Kap kan sawm. “Reconstructing The Missing Link: An Ecological Perspective” a kan chimh. A tha ngaingai. August 28-30, 2008 ah Early Childhood Care and Development (ECCD) program in Sayama No Tin Cuai, CE Secretary, ZBC nih nithum chung final year dihlak cawnpiaknak a ngeih hna. Sept. 22, 2008 ah Rev. Bil Hmung thlahnak zaanriah kan dum pi. CACC G/S Rev. Dr. Hla Aung cu Sept. 16, 2008 ah a khualtlawnnak in Yangon a phan. ZTC hruainak in Post-Eden Drive, First Council meeting cu Oct. 29-30, 2008, Falam ah tuah a si lai. ZBC EC meeting cu Nov. 7-8. 2008, Cengtum khua, Gangaw peng ah tuah a si lai. Mah dih cun CACC EC meeting peh colh a si lai. 6th Inter-Seminary Student Fellowship cu Nov. 10-13, 2008 Naung Nang Theological College, Myitkyina ah tuah a si lai. CCC in Rev. Za Mang le Siangngakchia 10 an kal lai.

KAN TUAHLIO 1. Thanglawi Vol.4, No. 1 ah kan thanh cang bantuk in Chin Christian Fellowship of Denmark (CCFDK) bomhnak in Staff Quarters innsaknak caah thing kan ah i zel cu a phan dih cang. 2. CCC Nu Hawikomhnak zuamnak in Lailungrawn Canteen (thinginn) sak ding thingtlang zalh lio a si.