Ccc Thanglawi (december 2008)

Thawnglawi 08 December Principal Cabuai Inn Christmas lunglawmhnak nan cung tlung ko seh! Bawipa vancungmi cu hruaitu, mifim le profet hna sin ah a lang tawn. Nain tutan cu a niambik rian a tuan mi tukhal hna sinah a lang. Cupin ah Bawipa sunparnak cu an velchum in a ceu (Lk. 2:9). Ni chuahlei mifim kan si khawh lo hmanh ah, Mary bang ngaknu thiang kan si lo zongah, Joseph bang, David hrinsor kan si lo zong ah, kan sinah, kan chungkhar ah, kan Khrihfabu ah Bawipa vancungmi a rung langh khawhnak lam a um. Cu cu mah le sining, mah le rian ah fel tein, teimak nun he a tuanmi sin paoh ah vancungmi a lang ti hi a si. Pathian nih a kan pekmi rian hi upat pek kan hau ve. Mah le rian upat a pe lomi cu mizeihmanh asi ah a tuannak zung (office) caah thilrit a si. Pumpak cio nih kan rian upat a herh. Cu bangin Khrihfabu nih siseh, biaknak zung nih siseh, cozah zung zong nih siseh, company nih siseh, rian upat a thiam a herh. Tukhal hna cu zan zong ah an rian fel tein an tuan. Kutka pawng in zaan khuadei tuu kha an hngah hna. Cu caah Messiah a chuahnak a hngal hmasabik tu an si. December kan phan cang. Christmas kan naih deuhdeuh cang. Messiah kan sin a rat khawhnak lam cu mah le rian te ah fel hi a si ko. Rian upat thiam cu Messiah tlun inn onh a si. Messiah tlun in onh cio u sih. Lecturer Bawi Cin CCC ah kum hra renglo siangcachim a tuanmi Pi Bawi Cin cu Oct. 1, 2008 ni thawk in a rian in aa din. Australia i a chungkhar sin kal awk ah Hakha in November 25, 2008 ah aa thawh. CCC nih kan sianglo ngai nain zei ti awk a tha lo. Australia ram ah CCC zungthar kan tuah ti tluk in kan ruah. Chin le Kachin Myanmar Baptist Convention Ministers Consultation cu Hakha Baptist Church, HBA ah November 20-23, 2008 ah tuah a si. CCC Principal zong November 23, 2008 zaan pumh ah Thawng Tha chimnak caan a ngei. Kachin Pastors 53 cu Chin mi he unau kan si bangin kan u le kan in tlawng hna tiah November 24, 2008 ni ah Chin mi he hawikomhnak tuah a si. Chin cu upa deuh, Kachin cu a nau a si tiah an ti. Cu ni ah CCC zong an rak leng. Chapel ah hawikomhnak kan ngei. Ka Chin Baptist Convention (KBC) chung um Ministers’ Council i Lutlai Rev. Tang Gun nih biachimnak a ngeih hnu ah KBC General Secretary Rev. Paul Naw Tawng nih CCC caah thla a kan cam piak. Ngaihchiatnak 1. CCC Siangcachim Rev. Hrang Awi i hringtu a pa nih November 20, 2008 ah pumsa in a kan liamtak. Chungkhar an ngaihchiatnak ah kan i hrawm ve. 2. CCC ah sianginn a kai lio mi Pa Thang Chum Lian (B.Th. II) hringtu a nu (Pi Biak Zi) nih November 4, 2008 le Pa Dawt Lian Sang (B.Th.III) a nau (Pa Thawng Kip Thang) nih October 21, 2008 nih ah pumsa in an kan liamtak. Chungkhar an ngaihchiatnak ah kan i hrawm ve.

3. November 24, 2008 chunhnu 12:30pm ah Hakha Khuahlun Baptist Church (HKBC) biakinn pi cu mei nih a kangh dih. Kan ngaih a chia tuk hringhran ve. Pathian nih a tha deuh mi kan pe te ko seh. November 30, 2008 Zarhpi Ni zing pumh ah H. Siang Kung nih Thawng Tha a chim. Deu thlam te khi an chon i cu ahcun kan i pum. Thlai Thar zarh a si i tisik an hnah tam ngaite a chuak. CCC Sport Day Kumkhat voikhat tuah a si i tu kum zong ni thum chung kan tuah. November 29, 2008 ah kan tim. Cachimtu Sayate le Students Council EC chungtel pawl pumpululh an chuih, pumpululh an beng. A pahnih tein sayate nih an tei hna. CCC Fun Fete Kum tin tuah tawnmi Fun Fete cu December 13, 2008 (Zarhte ni) ah HBC ah tuah a si lai. Kum dang nakin tha deuh in timh tuahnak kan ngei. Hi Fun Fete cu Kawlram Baibal sianginn tampi nih Fund kawlnak nganbik ah an hman i budget ah an suai chih ciomi a si. Tahchunhnak ah Myanmar Institute of Christian Theology (MICT) ahcun Fun Fete in hmuhding tangka Ks. 8,000,000/- (sing sawm riat) budget ah an suai. Sianginn i a thahri, a kengruh a simi Khrihfabu nih sianginn an dawtnak an langhter caan a si. Mah ni ah cun nan fa le zong zalsanh caah phaisa uak deuh in rak pe sawh hna u. Thawngpang dangdang ATEM meeting: October 24, 2008, MCC, Yangon ah tuah a si i Rev. Dr. H. Siang Kung a kai. Hmailei ATEM Executive Secretary caah Rev. Dr. Lal Tin Hre (Presbyterian) an thim. Nichuah Thlanglei Asia ram um Baibal sianginn hawikomhnak (ATESEA) cu phaisa lei in harnak an ton caah August 2008 thawk in full time in Executive Secretary chiah a si ti lo. Part time in Rev. Anna May nih a tuan. CACC Meeting: November 10, 2008, Cengtum khua, Gangaw pengah CACC EC meeting an tuah. An tlun lei ah CCC Principal Sweden in a rami CDP upa he Kalemyo ah tonnak an ngei. CCC Christmas December 1, 2008 cawn nikhat ah CCC Christmas puai kan tuah. Lecturer Ceu Cin nih Thawng Tha a chim. Nuam ngai in le thlarau ngai in caan kan hmang. Khuachung in hlasak thiam zong sawm an si i an kan nuamhter ngai. An cungah kan i lawm. Immanuel Bapstist Church (IBC) Nubu nih eidin caah phaisa K. 200,000 (Sing hnih) an kan hlut fawn. Kum tin Christmas a kan don piaktu an si. An cungah lawmhnak tampi kan ngei. CCC Website Cu hlan ahcun CCC nihWebsite a ngei lo. Pu Ceu Hlun nih a tuahmi CACC Website chungah CCC kong a telh chihmi te lawng a si. A tu cu America (USA) ah ca a cawng liomi Saya Thomas Cung Bik nih CCC Website tuah dingah ruahnak a chuahpi lawng silo in “kan i zuam lai,” tiah a ti caah kan i lawm hringhran. Saya Thomas Cung Bik cungah kan i lawmh

khunnak cu a rak kainak Princeton i an sianginn in CCC Library caah bawmhnak a kan hmuh piak. Cu pinah MIT, Insein ah cauk thar a phanmi copy tuah nak fund zong a kawl fawn. MIT in Lecturer Dr. Richard Chan Chum Hei nih a kan bawmh ve. Mino an si na in an lungput le an tuannak cu CCC ah pa can taktak an si. Pathian nih thluachuahnak pe ko hna seh. Kan Sa Lio CCC Nubu le CCC tan tinak in Lailungrawn Lakphak dawr thing inn dawhte kan sa lio. CCC FDK bawmhnak in Staff Quarters (two units-brick nogging) kan sa lio. Gospel Christmas Sianginn khar chung ah Gangaw Baptist Association le Chin Baptist Association ram chung um Khrihfabu sinah Main Building ca fund kawl pah in CCC Sayate le Siangngakchia an tlawng lai. CACC BM biachahnak bangin hmailei ah CACC ramchung tlawn dih a si lai. Library Telephone Library caah Telephone kan sok i nawlngeitu nih bunhnak nawl an kan pek cang. A rauh hlan ah kan bunh kho lai tiah ruahchannak kan ngei. Inter-Seminary Students Fellowship ATEM chungtel sianginn pawl tonnak civui pi cu Nawng Nang, Myitkyina ah November 10-13 ah tuah a si i CCC in Rev. Za Mang le siangngakchia 10 an kal kho. “Nawng Nang Baibal sianginn cu rian an tuan tikah an i biatak tuk, mah pumpak chungkhar rian tuan bantuk in an tuan” tiah an ti. CCC Structure Zohtu Meeting Hmailei ah CCC cu University bantuk in kal kho te seh ti hi saduhthah a si bantuk in CCC Structure zohtu Committee meeting cu Oct. 26, 2008, LBC Center, Yangon ah an tuah. Administration le Academic a dang te in chiah ding ah timhtuahnak ngeih siseh tiah bia an fun. Christmas Thlarau 1. Lai Kum Thar, Chin Miphun Ni, tbk tuah tik ah a voi zeizahnak, kum seizahnak ti hi tial a si tawn. A tha ngai. Sihmanhselaw a tanglei ah Nunphung le Zatlang bu tbk tial chih cu zapi caah sullam a ngei lo. Kan tuah hnawhchanmi ni sunglawi kha a hmete le biapilo ah a can ter. Zei thil tuah tik paoh ah tuahtu bu (Committee) cu um phung a si ko. CCC Fun Fete kan tuah tik ah Fun Fete Committee tial a hau lo. Zeicatiah a ngeitu le a tuahtu cu Committee lawng an si lo, CCC le a bawmtu dihlak an i tel dih. Cu caah a tlangtlatu Committee min telh chih a hau lo. Cucu Christmas lungput a si.

2. Thlacam lio i Luh le Chuah hi aa dawh lo ngaimi a si fawn. Baibal chung zong ah thlacam lio chuahluhnak kan hmu lo. Pumh lio ah a herhmi a um caah chuahluh a si ahcun thlacam lio ah siloin caan dang ah siseh law a tha. Pumh kan tlai tik zongah thlacam lio ah luh lo tein thlacam dih in luh ahcun a tha deuh. Pathian he i biakchonh lio ah chuahluh cu Pathian zei ah a rel lo mi khi a kan si ter khun. 3. Christmas Laksawng Christmas sullam cu “Pek” a si. Pathian nih vawlei a dawt caah a fapa a “pek”. Cu bangin minung pakhat le pakhat laksawng i pek caan a si. Dawr zuar mi hna nih thil man fawi deuh in zuar caan a si. Khat le khat dawtnak laksawng i pek caan a si.