Ccc Thanglawi (july 2008)

† CCC Thanglawi † "A Nungin Pekchanhmi Thawinak" Rom. 12:1 --------------------------------------------------------Vol. 4 No. 1 July 2008 ---------------------------------------------------------"Bawipa lianhngannak cu chim ti u si law a min cu thangthat ti u sih" (Salm 34:3). Editha hmurka 2007 le 2008 kum cu Laimi caah philh khawhlo mi kum an si. September 2007 ah kan ram ah duhlonak langhternak thawngin buaibainak a chuak. December 20, 2007 ah Laimi 45 ti in an pam. 2008 thal kan hung phan i Malaysia ah Laimi pakhat nih a hawi le pathum a thah hna ti thawng a hung thang. May 2-3, 2008 ah Nargis thlichia nih kan ram a hun den hoi. Zanmang ko khi a lo. Hibantuk thil sining chungah kan Pathian cu khoika dah a um kun hnga, sianginn zong thitha in kan kai kho hnga maw? tiah ruah phu ngai a si. Sihmanhselaw Pathian nih a kan um pi zungzal ko. March 9, 2008 ah awnnak certificate pek a si tikah Pathian umpinak a thar in a lang. BRE 2, BTh 17, DipTh 12, le BAE 5 nih awnnak tlamtling an hmuh. Cun June 2, 2008 ah sianginn hun a si tikah siangakchia 255 an si than. Bawipa min kan thangthat. Siangcachim 14 chung ah nu 4, pa 10 an si. Zung staff 10 chung ah nu 3, pa 7 an si. CCC compound chungah siangngakchia le riantuantu chungkhar he cun minung 300 reng lo khua kan sa. Ti le mei kong ah siseh, a dangdang ah siseh, bawmtu upa cung ah kan i lawm. Lunglawmhnak Laimi dihlak caah sianghleiruun University ah cangte seh tiah kan saduhthah mi, CCC caah lungthin, thazaang, ngeihchiah chawhva le thlacamnak in a bawmtu nan dihlak cung ah kan i lawm. Bawipa nih thluachuahnak in pe ko hna seh. Hostel ah nu 25, pa 65, an dihlak 90 an um. 'Sifak santlailo zong Lairamte ah fimnak cawng kho u sih' ti hi saduhthah a si bangin eidin caah kumkhat ah Ks.

100,000 lawng thawh a si. A lenglei in bawmchantu kan herh ko. Ks. 50,000 nih meh vui khat a cawk piak khawh hna. Tihang le meh a phunphun a rak hlu tu nan cung ah kan i lawm. Khualtlawnnak CACC BM hnatlakpinak in CCC Principal Henry Siang Kung cu August 15, 2007 in Dec. 14, 2007 tiang Zurop ram panga (UK, Sweden, Norway, Denmark le Germany) a tlawng. Academic institutions 15, organizations 25, Khrihfabu 10 sinah le Laimi umnak khua tampi ah CCC le CACC kong chimrelnak a ngei. CCC caah petu le bawmtu dihlak cung ah lunglawmhnak tampi kan ngei. Siangcachim Bawi Cin cu Chiangmai ah nu he aa pehtlai mi ceihmainak ah a kal lio a si. CACC General Secretary Rev. Dr. Hla Aung cu Germany ram a tlawn lio a si. Kawlram in July 18, 2008 ni ah aa thawh. Catluan chuahpi ding ah sawmmi a si. Damte in a phak thannak hnga thlacamnak in bawm cio u sih. Lunglawmte in Kan Don Hna Siangcachim Siang Zi cu MIT, Insein ah MTh (Missiology) a lim i CCC ah June 2008 in a tuan than. BAE chimtu kan herhngai lio ah Mandalay University in MA (English) a awng mi Ms. Vel Hlei Sung cu June 2008 in CCC ah siangcachim rian a tuan. Siangngakchia thazaang June 23, 2008 ah Board of Trustees meeting nih a fehter mi siangakchia milu cazin cu BTh 122, BRE 17, Dip Th 14, le BAE 102, an dihlak 255 an si. Cu chungah pa 154, nu 101 an si. Tukum akai mi hna cu Baptists, Mara Evangelical Church, UPC, Methodist, Gospel Baptist Church, Sabbath, AG, COTR, Beth Israel le CJC ti in bu kip in a ra mi an si. Thal chungah 2008 sianginn khar chungah sianginn zohkhenhtu Durwan umnak thing inn, Japan vok zuatning in zuat khawhnak vok inn kan sak i nu hostel le pa hostel caah septic tanks pa hnih kan tuah. Tuah lio mi Denmark Ram um Laimi CCFDK bawmhnak in siangcachim umnak inn pakhat brick nogging sak colh ding a si. Camphiu le tlakrawh cu kan i damh cang.

Main building CCC innpi main building 50 ft x 80 ft dot li, RCC sak ding ah timhtuahnak ngeih a si. Ramchung ramleng hawinau le Khrihfabu sin ah fund kawl ding a si. Gospel Team CACC nih hna a tlakpi bang in innpi saknak caah fund kawl pah in CACC ram chung ah tlawn ding a si. December 2008 sianginn khar chung ah Gangaw, Kalemyo, Tamu, Mandalay le Yangon, cun 2009 thal chung ah Laitlang ram chung ah tlawng kho ding in timhtuahnak kan ngei. Lunglen le lunglawmh aa cawh CCC ah kum tam nawnte rian a rak tuan cangmi Rev. Bil Hmung cu CCC ah first semester tiang lawng a kan um pi cang lai. October, 2008 in cun Yangon Lai Baptist Church (Dagon) ah senior pastor rian a tuan lai. CCC nih kan siang lo ngai nain a ngeitu a Khrihafbu hnatlaknak in a si tikah YLBC zong cu CACC Khrihafbu pei a si ko cu ti lei in thazaang kan i pe. YLBC ah CCC zung thar kan tuah ti tluk in kan ruah. A tu hin kan lung a leng cia cang. 2010 ah M Div CCC ah M Div parawkrem cu 2010 in thawk ding a si. M Div thawknak caah Committee ser a si cang. CCC in BAE a awng mi zong kai khawh a si lai. Cin-thlak le zuat-khalh CCC siangakchia cu lawmh an um ko. Siangngakchia cawlcanghnak in ngazuatnak ngakhor nganngan pa hnih an co. Pakhat cu an lim i nga fa zong an thlah cang. Cupin ah siangngakchia thazaang bakin vok pahra an zua. Japan vok zuatning in a inn zong sak a si. Thingkung le tisik anhnah an cin fawn. Kan ngaihchiat pi Minung nunnak cu pangpar bantuk a si, zing ah dawh ngai in a par i chun ahcun a uai kho mi a si. CCC chungkhar zong ah a tang lei i dawtmi hna nih pumsa in an kan liam tak tikah kaltak mi chungkhar an ngaih chiatnak ah kan i hrawm ve. Bawipa nih in khawhnak thazaang pe ko hna seh tiah thla kan cam. BTh kum hnihnak a kai lio mi pa Ivanhoe i hringtu a pa Pu Phun Ling, Tahtlang khua (kum 85) nih July 7, 2008 ah a kan liamtak.

CCC rawlchuangtu pu Thang Lian i hringtu anu Pi Bawi Hnem, Hriphi (B) nih July 6, 2008 ah akan liam tak. Rev. Dr. Shu Maung a ra lai Kum fatin tuah tawn mi awnnak roca peknak le biakpumhnak (commencement exercises) cu March 8, 2009 ah Hakha Baptist Church ah tuah a si lai. Thawng Tha chimtu cu Rev. Dr. Shu Maung a si lai. Dam le lawmte in caan tha kan hmuhnak hnga thlacam kan herh. Phaisa umtuning 2008-2009 cawnkum CCC phaisa khankhah mi cu Ks. 44,384,937.95 a si. Cu chungah miphun dang sin in hmuhhnga ding in suai mi cu Ks. 4,000,000 a si i budget dihlak i 9% a si. CCC a ngeitu Laimi sin in hmuhding cu budget a dihlak i 90% a si. Cunih cun CCC cu miphun dang bawmhnak lawng bochan in tuah mi a si lo, Laimi kan thazaang te bak in a nung mi a sinak a langh ter. Laimi cung ah Pathian a tha hringhran ko. 2008-2009 thawhvo chung in a pe cang mi a tang lei Association hna cung ah lunglawmhnak ngan taktak kan ngei. LABC..... 250,000 HBA ..... 1,900,000 TABC .... 500,000 CBA ..... 500,000 CCC Bus CCC caah kut le ke tluk in a herh mi bus cu Kalemyo ah remhter a si. Thlali leng a rau. Motor pum (body) a thar in thlen a si pinah muici dang in si thuh than a si. Bus remhnak ah re a thei biktu Rev. Bil Hmung, Saya Thawng Cung Nung, bus driver Tluang Hlei Cin, Kalemyo in Sayaci Tluang Hnin le innteek San San nu le pa cung ah lunglawmhnak tampi kan ngei. CCC website: cacc.info Phone 07021339 Email: [email protected] __,_._,___