Bma Aw: 2nd August 2009

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol. XV Issue No. 18



Bangalore Mizo Association Pathianni Tin Chhuak Chanchinbu

KEIMAHNI: Nimin, 1st Aug’09, inrinni khân BMA Freshers’ Day chu hlawhtling takin Goodwill Girls’ School-ah hman a ni, member leh lo kal tharte kan kal tha hle a, a lawmawm. Silver Jubilee lawmna pakhat atana thingphun pawh Pi Lalrinpuii, President BMA, kaihhruainain BMA Patron, SJCC Chairman ni bawk, Pu R. Lal Rinawman thingphun hmasa berna hun neiin hlawhtling taka hman a ni.



August ni 14 leh 15 hian BMA Football Tournament 2009 chu khelh \an tura ruahman a ni. He tournament-ah hian BMA memberte chauh tel theih a ni dâwn a ni. Entry fee Rs.800/a ni a, player te chuan team list thehluh rualin passport size photo thehluh tel zêl tur a ni bawk. Vawiin hi team inziahluh hun hnuhnung ber chu ani



BMA membership form 2009 - 2010 la fill up lo te’n a rang lamin i ngaihven ang u. Form man Rs.5. Fresher tan Fee Rs. 100, Renewal tan Rs.50 zêl; naupang kum 12 chin tan Fee pêk a ngai hran lo. August ni 31 thlenga thehlut te hming chu tûn session directory-ah a lang dawn ani. Tin, BMCF leh MSA form te pawh a fill up theih reng e.



Zirlai te tân scholarship form, Biakin kawtah, lei theihin a la awm e, Rs. 20/ - zel ani. A thehluh lampang erawh chu mahnia inbuaipui tur ani.

Date: Aug 02, 2009

‘Talofa Lava’ from Samoa - Lalliansangi Tuasivi College, Savai’I, Samoa

Samoa hi thliarkar te tak tê, International date line chhak , equator chhim lam, Hawai’i leh New Zealand inkâr, Pacific ocean a awm a ni. A zau zâwng hi 2934 sq.km a ni a, Samoa-ah hian thliarkâr, mihring chênna bîk, pali a awm a, a lian zual pahnih Upolu (an Capital Apia awmna) leh Savai’i-ah hian a mipui tam zawk chu an chêng a, a ram pumah mihring 214,265 vêl chêng anga ngaih ani. A mihring chêngte hi a tlângpuiin an lianin an vun rawng hi mizo te aiin a uk deuh zawk a, mi tuarchhel leh hlim thei tak hnam anni. Mizo ang tak tak te pawh an awm ve. Keini pawh Pacific thliarkarah kan awm rei ta deuh bawka, anmahnia min ngâitu kan tawng ve ta reng mai. Tunah hian mizo nula panga leh chhungkaw pakhat, Mizoram Synod leh ‘Council For World Mission(CWM)’ tang kawp tirhin kan thawk mek ani. An khua hi a mawi êm êm a, ram hrang hrang atanga thlawhtu pawh a ngah thin hle; hei hi an ram sum hmuhna lian ber pakhat ani. Hnam chîn dan leh tih dan mawi, FA’A SAMOA (pronounced ‘Fa-ah Samoa’) tia an sawi, chu an vawng nung reng a, an chhuâng êm êm bawk, “Fa’a Samoa-ah chuan ti chuan kan ti a” tih hi a lar hle. He chîn dan hi kawng tam takah thain lang mahse phurrit inphurhtirtu atana hmang an tam zawk ta mah emaw tih theih ani. An Fa’a Samoa-ah chuan ‘Thuawihna’ hi a pawimawh ber pakhat ani. Thu an awihna leh aia upa an zahna hi a mawi khawp mai. Khawtlâng thilah an inhmang nasa êm êm a, lâm leh zâi hi an nuna bet ve tlat a nih angin an hun tam zawk pawh chutiang zir nan chuan an hmang nasa hle. Hruaitu te’n tih tur an tih chu, ‘ka zak’ tih hi an nei ve ngai lo reng reng, phûr ber awm ang hian an ti vek mai a ni. Hla zir nikhuaa kal duh lo chhungkua chu khawtlang hruaitu te’n an zilh a, vêng atanga hnawhchhuah hial pawh an tawk thei ani. Aia upa te an chhang lêt ngai lo tawp emawni ka ti thin. Naupang zâwk chuan an dikna rengah pawh an thiamthu an sawi ngai lo. Naupang an tîr nasa em em a, in leh a vê tih fai, in sûk, rawngbawl, vawk chaw pêk zawng zawng hi naupangin an ti vek thin. A châng chuan in lama hna an thawk nasa lutuk hi lehkhazirna hun pawh an nei tha hman thin lo. Thil nuihzatthlâ ve mai mai chu, sikula zirtirtu te hian naupang te hi an han tî nasa thei khawp a, an bul lawka tui in tur awm te hi suah sak turin pâwna naupang an ko a, a chânga an naupang koh te’n an lo hriat mai loh chuan rei fê an au ta thin a ni. Anmahni kha thoin va in mai se, a rei lo zâwk ni mai tur. Tin, aia upa emaw mi an biak hrim hrim emaw chuan ding chungin an be ngai lo, naupangin zirtirtu te min rawn biak paw’n, chhuatah an rawn thu tawp a, ding chunga biak a ngaih pawh in an kun hniam thin. Office-ah te hian mi kan biak dawn chuan thut sawk sawk a ngai a, keini mizoah chuan mi in ‘thu rawh’ an tih hma a lo thut te chu mawilo a ni bawk sia, awm tirh chuan a buaithlak duh ve thin khawp mai. Mi hmâa kal tlang a tul te hian kûn chungin ‘tulou’ an ti thin a, ‘min lo hrethiam lawk teh u,’ tihna ang deuh ani. Mi hmâa thil awm han lak dâwn te, bul a mi lo deuh hlek hnêna thil han hlan chhâwn dâwn te hian bul a mi te hnênah ‘tulou’ an ti ngei ngei thin. Lawmthu in hrilh te, ‘khawngaihtakin’, tih tawngkam hman te hi an uar êm êm bawk a, engkimah hian lawmthu an in (Phek lehlamah chhunzawm a ni)

Vol. XV Issue No. 18

Bangalore Mizo Association Pathianni Tin Chhuak Chanchinbu

Editor: Samuel Lalrozâma Hmar - (Mb) 9886447684 Jt.Editors: Josiah L. Râlte - (Mb) 9845020992 Thaarie Hnamte - (Mb) 9886145877 Cir.Managers: C Lalnipuii, Laldinmâwia Hnamte & Lalhruaitluanga Contributors: Paul Chhanhima & Rev. James Chuaukailiana. Email:[email protected] / www.bangaloremizo.info

EDITOR KAM CHHUAK Khuânu thurêl dan hi hriatthiam har thin mahse kan thatna tur zâwk zêl a lo ni fo thin. Asian Indoor Games selection khêl tûra inpuahchah lai leh Editor nih lai takin, food poisoning vânga hospital bang zûtin, kâr khat lai chu lâikhumah chhâm ang ka zâl ta si a, hrehawm duh khawp. Mahse joint editors tha tak tak te zârah kan mualpho ta êm lo ani. Sawi leh sawi hnu, Mizo te hian chîn thalo kan ngah a, ram dangah mi zînga khawsak kan thiamlo tih leh thil dang dang sawi tur a tam, mahse a tha lam pawh sawi tûr a awm teuh. Kan society tluka inkungkaihna tha nei hi khawvel ram zâuah hian a tam vak lo ang. Zêm khat zenpui neihlohna hmunah pawh chhûngte an lo awm tho a ni tih ka hre thar leh ani, natna khuma ka han mut ve takah hian. Aw! Mizo nih hi chu a lo va nuam tak êm! Bangalore khawpuiah hian zonunmawi hi vul zel rawh se…. (Phek hmaa mi chunzawmna) hrilh a ni mai hian a hriat thin. Inah lo leng sê, an haw dâwnah, in tur kan pêk (tui pawh ni se) avang te, kan lo kawm avang te’n lawmthu an sawi thin. Committee naa zawhna an chhâan hma te hian ‘ Zawhna min zawh avang leh sawina hun ka neih avangin lawmthu ka sawi e,’ an ti deuh phawt thin. Mi thil pêk an uar em em a, ei tur in pêk hi an uar zual a, uluk takin a petu te hnenah lawmthu an sawi leh thlap thin. Naupang hnena lâwmthu kan lo sawi dân te hi uluk takin an nu leh pa te hnênah an sawi leh ngei ngei thin. Mizo te’n bus-a aia upa zâwk thutna kan ken thin ang hi an lo ti nasa ve êm êm mai a, tin, a hma lama chuang te chu midang chuang leh turte luh hmain a hnung lama thutna âwlah an insawn thin. Thil mak ve tak pakhat chu bus-ah hian an ding ve meuh loa, mî malchungah an thu mai a, mal chung a khah thap hnuah an ding ve chauh thin, he thil hi chu ngâia neih har ka la tih pawl tak chu ani.

Date: Aug 2, 2009:

Nikhat chu Class ka lâknaah Kristian nilo an awm leh awm loh ka zâwt a, naupang panga lâi hian bân an phar a, eng sakhua nge an nih, tih ka zâwt a, ‘Roman catholic, Assembly of God, Methodist, Seventh day Adventist,’ an ti ta nawk mai a, rilru a kal thui duh khawp mai. He thil thleng atang hian hna a tam zia chu min hriatthiampui mai ka ring. Zirtirtu kan nih tlat avângin zirlai zawh ngei ngei tur a awm bawk si, chumi kârah rem châng lâk a, Pathianthu han zeh hi kan tih theih chu a ni mai a, thahnemngaih a na thin khawp mai. Samaon hi indo hnam an ni a, Kristianna an rama a luh kum, 1830, khân indo a tih reh ringin an in pe ve tawp mai ni awm a ni, ‘Piantharna’ kan tih ang hian an nunah hmun a chang thûk lo khawp mai. Kristianna an rama a lo luh atang khân “harhna” kan tih ang pawh hi vawikhat mah a la thleng lo a ni. Zu leh sa, hmeichhiat mipat kawngah an in hnamhnawih nasa êm êm mai a, Pathianthu zir chhuak pawh nise, an nun, mi dang aia danglamna a awm hran lo. Hetiang a zu leh sa nêna inchiahpiah lutuk nun an neih avâng hian in thah mai mai te, pawngsuâl te, nupui leh fâte sawisak te a hluâr hle. Tleirâwl khawngaihthlâk tak tak an tam mai. In khatah thahnem tawk tak an chêng ho dul mai a, an nu te’n zânah Bingo khelin an len bosan a, chumi hlân te chuan an chênpui (an pate a te emaw, an pahrawn te emaw, an pa te ngei pawh) te’n an lo kawih a, an sawi ngam thin si lo; an tuar theih tawhloh tâwpah intihhlumah te an tuan ta mai thin a, rilru a na duh thin hle. A ram mipui tam dan a chhût in khawvêla mahni intihlum sânna pâwl ani. Chhûngkuaah chuan a tê ber atanga a lian ber thlengin chhungkaw inrêlbawlnaah tih neih ve kan duhin kan tum thina, chhungkaw mualphona tur thil tih kan duhlo bawk a. Nu leh pâ te rilru tihnat kan hlau ngawih ngawih a, ‘an rilru tihnat ai chuan kei hian tuar zawk ila,’ tiin kan ngaihtuah thin. Chutianga kan chhungkaw tâna thahnem ngai theuh ni mah ila, chhungkaw din chan nâna kan hmalâk dan te, kan hnathawhnate, kan thawh dân te a inang vek ngai lo. Pathian ringtute chu Lalpa Isua Krista-ah chuan chhûngkua kan ni a, chhungkaw din ngheh nân leh hmâ kan sâwn theih nân theihtawp kan chhuah a pawimawh a, chu chu Kan Pâ ber duh dan pawh a ni. Khawi hmunah pawh awm ila, eng hna pawh thawk ila, Pathian fa, Pathian chhungkua a mi kan nih hi theihnghilhlo-in, kan chhungkua kan lo din ngheh zel theih nân theihpatâwp chhuah ta theuh ila, kan lei nû leh pâ te tihmualpho kan hlauh ang chiah hian kan Pâ vâna mi hi tihmualpho leh tihrilrunat te hi hlau ta ila, chhungkaw dinhmun chuan hma a sâwn phah sawt dâwn lo’m ni? He thliarkâr te tak tê, Samoa-a mipui te hian i tawngtaipui an mamawh a, tin, keini, helâia awm mêk te pawh hi min tawngtaipui ziah theilo a nih pawhin, in mi hriatchhuah châng tal a min lo tawngtaipui thin turin ka han ngen che u a ni. Lalpaah chuan chhungkhat vek kan ni si a. {Article tha tak (kâwlvalênchhama lêngte chanchin) min rawn ziah saktu Lalliansangi chungah hian kan lawm hle a, kan tawngtaipui ngei dawn nia.}

Vol. XV Issue No. 18

Bangalore Mizo Association Pathianni Tin Chhuak Chanchinbu

‘BMA FRESHERS WELCOME’ REVIEW - Lalrinpuii, President

BMA chuan an lo tih thin angin nimin, 1st Aug 2009, khân Goodwill Girls high School-ah Bangalore-a mizo lo awm thar te lawmna hun hlimawm tak an hmang a, chutah chuân kumina Bangalore-a lehkha zira lo awm thar tur engemawzât an lo kal khâwm a ni. He hun hi chhûn dar 12.00-ah tan tura ruâhman a ni a; a hun taka thleng thei engemawzât an awm khân kan function a ti hlawhtling hlêin a lang a ni. Freshers te lo welcome nân Bangalore-a Biryani siamthiam tak Pu Barkhatulah hnenah kan senior adviser Dr.H.T.Sangliana chuan Beef leh Chicken Byriani a lo order a, kal khâwm te’n tui kan tiin kan tlai hle mai, kan lâwm hle ani. BMA Silver Jubilee kum a nih avângin Jubilee lawmnân thingphun programe kan buatsaih bawk a. He hunah hian Silver Jubilee Chairman, Pu R.L. Rinawma, chuan BMA hmingin Goodwill Girls HSah thing phunna hun a nei a, tin, Wesley English Church-te chuan an old-age Home-ah thing pathum phun min phalsak bawk a; hei hi Lasangzuali Sailo Section lamin an lo buaipui zui dâwn a ni. Nimin kan function naah khân chanvo nei tura ruat zawng zawngin an rawn tihlawhtlingthei vek a; host, Nl.Azaii leh Tv.C-a, te zei lutuk khân boruak an tinuam hle mai a ni. C-a phei chu a scoring viau a niang, a phone no. min dil tu an tam hle a ni. Sound system min enkawl sak tu Tv.Samuel Buatsaiha leh Tv.Joel Zoramthanga te hun vawndikzia te, buaina awm miahloa sound kan hmang char char te thei kha a ropui hle mai. Banner mâwi tak mai Vivek-Nagar nula leh tlangval te’n min rawn siâm sak chuan stage a mawi tha hle ani. Dr.Mâchhûngi’n zângkhai vahin kan programe Pathian hnênah min hlansak a; Nl Blondie leh Tv.Samuel Varte te hlasak hit zia kha thalai te’n an sawi bâng theilo ani. BMA naupang te’n choreography mawi tak mai min entîr chuan mipui kalkhawm te mit an titlai hlê a, Rokunga section te mawlh mai kha; Pu Paula hian ziak leh sawi lam ai chuan lâm (dance) hi a eizawnna a ni tih a hai chiang hlêin a lang. Bangalore a pâwl hruaitu hrang hrangin an pâwl kalphung leh member nih dân te min hrilh kha a bengvâr thlâk hle mai, Freshers te aiawha, Rev.LH.Rawsea’n, lawmthu sawina leh BMA duhsakna a hlan te kha a ropui. BMMP te’n tlâwmngaihna hla mawi êm êm an rawn sak chuan min ti mûr sung sung thei hial a nih kha. Lunch puar taka kan ei hnuin, tlâi lamah ril a lo tam leh ta ruih

Date: Aug 02, 2009

mai a, Nl.Muanpuii of Ticket Window chuan thingpui/ coffee leh a hmeh tui tak tak, BMA te min han khilai a nih kha; ‘Muanpuii dam reng rawh se,’ tia au dual dual mai te kha a châkawm. Mipui zai mawlh mai kha! Hla hruai tû te, Rev.H.Lalnunmawia, Rev.Lalthanmawia, Dr.Rini, Nl.BC.Lalremmawii leh midang koh chawp zawng zawng te hruaina hnuaiah ‘AW KHAWVEL PUAN ANG A CHUL TUR HI ,’ kan han ti dual dual te kha a va nuâm em! Sawi tel loh theih loh, kan senior member, Pu B.Kapthuâma’n min uap tlat te, Goodwill principal in an Hall englâi pawha BMA te tan min hman tîr thin te hi kan lâwm takzet a ni. Tin, vote of thanks sawitu, Tv.Samuel Lalrozâma, lo dang nâl zia leh tawngkam a lo thiamzia khân mi mak tih a hlawh hial a ni. Kan function hlim taka kan hman zawh hnuin Pu Josiah L.Râlte-in lawmthu sawi tawngtaina a nei a, khamlo takin tlai dâr li leh a chanve-ah kan tin ta a nih kha. Khatiang ang programe hlawhtling tura nasa taka min thawhsaktu, Ushering lamah UVCE, refreshment min semsaktu Koramangala nula hmeltha tak tak leh tlangval fel tak tak te, thing kan phun ngei theih nân nasa taka phun tur lo zawng tu Nl.Thaarie Hnamte leh Pu Paula te, coupon buaipuitu ni bawk (Nl.Blessy nen); still (Nl.Sawmteii leh Tv.Zualtea) leh video (Pu Châmtea) camera min lâksktu; tingtang (Tv.Hminga), laptop (Tv.Joel) leh Handy cam (Pu Josiah) min hawhtîrtu zawng zawng te, in thawhrimna avangin lo kal thar te pualin hun hlimawm tak kan hmangthei hi kan lawm takzet ani. SAWISÊL VE THUNG ANG AW !!

1.

2. 3. 4.

5.

Freshers lam kha duh aiin an in thlahrung a, introduction neih dawn vêla an chhâkbo teuh kha an zah vâng tih chu kan hriatpui tho na a, paltlang ngam ve hrim hrim hi puitlinna a ni tih kan hriat fo a pawimawh hle a ni. Kan chîn fo thin function neih lai, a bikin thusawi laia phun deuh mur mur awm thin hi chinloh a tha khawp mai. Function neih laia pawna lo tei mai mai kan awm leh thin hi sim vat atân thil tha ani. Programe siam tute’n an theih tawpa tha a an siam, rokhawlhna avâng ni lem loa a zawh hma a chhuah kan chîng fo hi tih loh theih hrâm a tha khawp mai. Bangalore-a mizo pâwl hrang hrangin programe kan siam hi ngai pawimawh vaklo pawl kan awm thin hi mizote inpumkhatna min tichhe hret hret tu niin a lang a ni.

Vol. XV Issue No. 18

Bangalore Mizo Association Pathianni Tin Chhuak Chanchinbu

ZOFÂTE KHAWVÊL  Mizoram Sports Minister, Pu Zodintluanga, chuan tun kâr khân tun hnaia Shanghai, China-a Asian Cup khelh zawh tâka India Team-a tel Mizo hmeichhe hockey player pahnih Lalrothuami, Mamit leh Ramngaihzuali, Lunglei - te chu a pisaah a lawmpui a. Mizoram Olympic Association atangin Rs.20,000/- leh Sports Council atangin Rs.10,000/- ve ve a hlan.  Mizorama environmental award sâng ber, Phawngpui Award, dawngtu Laldingliana (kum 48), Kâwlkulh khua, chuan thla hmasa khân court-a magistrate pakhat hnenah affidavit dangdai tak a thehlût. Fam a chan hnuah, a ruang chu, ramhnuaiah ramsa te ei zawh tura dah a ngên ani. Hei hi a mihringpui te hnena environmental awareness thehdarh a duh vâng ani. A rûang chuan ramsa riltâm te hnêm thei dâwnlo mahse khawvêlin nungchate leh ramngaw tel loa kan awmtheihloh thu hi hria se a duh vâng ani.  Zirtawpni khân police-in Myanmar mi, Lalnempuii in luah, Aizawl dâia mi, atangin ralthuam engemawzat an man. Chung râlthuam te chu Dimasa hel ho tâna tih ani. U.S. siam M16 silai te pawh a tel teuh niin an sawi bawk.  UNICEF-in a report dânin Mizoram sikul te hi India rama naupang te hrem nasat (corporal punishment) lamah pahnihna ani. (source – samaylive.com)

Ran hrâm dân thenkhat te: Vawkte a ngêk a vawkpui a ngûk thin. Arte a chiap a, arlâ a kawk kawdâk a, arpui a tui(trui) a, arpa a khuâng \hin. Hriat zâuna.: 1893 -‘A, AW, B’ siam kum. 15.06.1935 -YMA din kum (a tirah chuan YLA tih ani.) 1896 - Biak in sak hmasak ber kum (Aizawl).

Date: Aug 02, 2009

Thang thenkhat te: Chakai manna – Aiâwt. Zâwng awhna – Khârkhep. Sangha manna – Ngâwi leh bawng. Sava (leia tla lo chi) awhna – Thangthlêng. Pî pû te chîn dân tha, entawn zui atâna tha te: Ei la tling lo, ran notê, an man te chu an chhuah leh mai \hin. Chhan leh vâng awm loin ransa leh rannung te an tihlum mai mai ngai lo.

Enge an sawi:  BMA football tournament atân UTC nasa takin kan inbuatsaih. A hun a lo thlen chuan pastor leh rawngbawl tura inchher te hian tumah kan bum hreh dawn lo, kan tum tur apiang chu kahpa thîr ngalkâwr nen lo inpuahchah rawh se - Rev.Hmingmawia.  UTC chu Champion in duh chuan min lo ruai ve mai rawh u…. khawngaih takin. – Vêngnuam Sheriff (a hriatloh laiin kan chhuah). Pic. of the week

Cultural items – Editor/Cultural Secy. “Editor nih lai hian, remchânga lâin tun kum chu, Cultural Secy. nih angin hnam thil khawih chi, ho tê tê, permanent column siam teh ang,” tiin ka rilru ka siam a; \awng upa leh mizo zia te, mizo G.K. te leh a dang dang te kan rawn târlang dâwn a ni, hriat ang ang. Peihlo chung chungin lo chhiar ve \hin ang che, i lo fin vâr zawk nân. A hmasain Cultural department hmingin, kârlehah chuan, nungchâte humhalh denchhenin sairawkherh leh thang kawl zawng zawng te, rawn submit vek tûrin kan in ngên e. 

BMA Patron leh SJCC Chairman (r) leh BMA Vice President (t) te’n jubilee thing an phun lai.(01.08.09)

Tûn thla chângvawn: I Thessolonika 5:16 “Lâwm fo ula.” BMCF INKHAWM PROGRAMME DATE: 09.08.2009 Praise & Worship