Bma Aw: 25th November 2007

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol XII Issue No. 47

Bangalore Mizo Association Pathianni Tin Chhuak Chanchinbu

Date: 25th November 2007

Phek Khatna

KAN MIZO TAWNG HMAN BAWK HI (Obeda hnung rawn zuiin...) -Samuel Lalrozama H. (Sammy) Zo hnahthlak te’n kan hman tam ber - Lusei/Duhlian tawng, ‘Mizo tawng’tia kan hriat tawh mai hi mithiam zawk te’n kan hmandan te an sawiselin an sawifiah fo a, ka han bih chiang ve teh reng ang e... Issue thum kal taah te khan Obeda pui roh te pek hian a rawn thai rang nual tawh a, a hnung rawn zuia tunlai hun changkang themthiamna te hmang tangkaiin, ziakfung hmer lo a engkimtithei khawl (computer) hmaah thuin, kutzungtang sawm neihte hmang tangkaia hun han khawh ral ve lawk turin ka inbuatsaih a, ka rawn thlasaik mau puah ve pawp mai a nih ber hi a. A ni teh tak e, kan Lusei tawng hman pawh hi a dal tawh lutuk a, hetianga dik lo taka kan hman chhoh zel mai chuan thangthar te’n an rawn chhawm chho anga kan hnam rohlu tak mai hi a bo telh telh mai ang tih te a hlauhawm hle a ni. Critics tha tak Obeda te ang hi rawn piang zel se ka ti hle, kan ngaihtuah ngai lem loh, kan thlir liam puat mai thin te chu ngihtuahna thara thlira, in kaihkunna hun tha tak min rawn siam sak thin a nih hi. A thuziah te pawh kha BMA AW mai nilo a Zawlkhawpui lam chanchinphekah te chhuah hial a thain ka hria. Chutih rual rual chuan amah atang ngeia tawngkam indona chu tan ka duh a. Zofate hi kan thil ziahah hian kan fimkhur tawk lo thin a, mi thinlung a lut tur a ni tih hi kan hai fo thin, spelling leh thumal tin te, punctuation mark te hi uluk a tul takzetin ka hria, thupui thlan te hi a pawimawh hle. Issue hmasa (Vol XIII Issue No.43.)-ah khan kan Obeda khan ‘Kan Pathain hla leh Mizo Tawng’ tih thupuia hmangin a thinlung lairila thu inthup te chu a rawn puangzar a, ‘tunlaia thalaite hlabu a chuang chauh kan thlir dawn ani’, a rawn tizui bawk a, ka han chhiar thla zel a, point 4-naah khan Mimi hla sak pakhat a tlar khat ‘Ka thlang tawh che Ainawn kumtluangin’, tih kha, kumtluangin ti lo a, ‘kum tluang atan’, tih zawk tur a ni, a rawn tih ka hmu a, a bengvar thlak hle mai, amaherawhchu kha hla kha Kristian thalai te hlabuah ka la hmu miah lo mai a, buaithlak hle mai a, Mimi Renthlei hre lo tan phei chuan (A AW B CH... thiam chuan kan hriat loh chu ka ring lo a) Pathian hla ni ve ngei turah an ngai ngei anga, “ka thlang tawh che kumtluangin” han tih chu Isua lam kawhna ni awm takin a ngaihbel theih a, mahse ‘Ainawn’han tih tak khan ngaihtuahna sukthlek a tibuai ve thei tlat mai maw; thangthar te, a bikin Obeda fans te, phei chuan Ainawn tih hi Pathian hla phuah hunah an lo hmang ve mai anga, kha hla kha Pathian hlabuah an lo zawng nghek mai ang tih te pawh a hlauhawm alawm le. A, engpawhchunise, ziakmi te tan kan thupui hman leh tlangkawmna te ziah fimkhur tulzia ka han tarlang ve duh mai ania; khalaiah khan, “lengzem hla pakhat han zep tel zeuh ila...”, rawn ti sela chuan a ziaawm tur ania, mi ril te pawh hian thil hi an theihhngilh ve thin a ni ange, a ngaihtuah thuk lutuk vang ani ber ang ka ring. Tin, point pahnihnaah khan B.Lalthlengtliana hla, ‘Damchhung ni’ a hla tlar khat, mangan.. tam... rethaihna ten...hmun a chang tawh lo..’tihah khan a tih chu , an tih tur a ni, a ti a, a dik khawp mai, plural siamtu chu ‘an’a ni ngei mai Duhlian tawng chuan, amaherawhchu heng noun te hi Proper noun an ni lo a, uncountable leh common noun an ni hlawm a, tin, ‘an’tih hian thil nung lam hi a kawk bik bawk a ni, Duhlian tawngah chuan, chuvngchuan a dik thei a ni ‘a’ tih hman hian,

entirnan, lalte, sipaite an awm; Hming – Liana... Mawia...Ruali te.. an lo kal; rannung- kel.., ar.. leh bawng.. an tla..., chutiang zelin... Han kal zel ila, ‘hla siamtu’ tih hi kan hmang ta fo maia thusawinaah te leh thuziakah te pawh, ‘hla hi phuah lo in a siamin an siam thin emawni tehreng’, tih zawhna Obedan a rawn zawh hlek kha han chhansak lawk ka duh bawk a; a dik khawp mai hla chu phuah thin a ni, mahse kan hriat ve mai mai tur chu hla thu hi an phuah a, a thluk hi an siam thin a ni. Chuvangchuan a literary term a kan sawi dawn chuan phuah tih ai chuan siam tih hian lung a kuai zawk a, hla phuahtu te chuan a thluk an siam nghal tlangpui bawk a, kaikawpin hla siamtu tih hi hman uar a lo ni ta a ni, amaherawchu mi tihdan hi dika ngaiin zawm ve mai zel lo a, chhut ve fo hi a tha, a danglamna te hi hria ila, kan thusawi leh ziah te hi a awmzia tak hriat chian i tum thin ang u. Tin, issue hmasa bawk (Vol XII Issue No.37)-ah thumal hnih inzawm a rawn sawifiah kha kan hmu a, a literary meaning a lak dawn chuan kan tawng tam zawk hi chu a dik thei lo ani, a rawn ti bawk a, a ni khawp mai, hmeichhia tih kha ka han pawt chhuak teh ang, mi thenkhatin thlak an duh a, ‘a diklo a ni’, tia an rawn sual duh chuan danna tur dan kan nei hauh lo, (Phek hnungah) BMCF INKHAWM PROGRAMME Vawiin (25.Nov.2007) Hruaitu: Dr.AIT (Fellowship & Sharing) Karleh (2nd Dec. 2007) Hruaitu: Pi Lalnunmawii, Tantu: Johnson D. Thianga. Thilpek Hlanna: Tawngtai Rual Special No. : Nl. Phoebe Zairemmawii Thuchah: Nl. K.Zorinpuii

Vol XII Issue No. 47

Bangalore Mizo Association Pathianni Tin Chhuak Chanchinbu

Editor C.Lalhmachhuana, UTC, Ph- 9845330822, Joint Editor Thaarie Hnamte Vasanth Nagar, Ph. 9886145877 Circulation Staffs: David Laldanfela, Joshua Lalramdinmawia C. Lalramthanpuia E-mail: [email protected] Website: www.bangaloremizo.info A Man Thla Khatah : Rs. 15/-

Editorial… Tawng Hi Pathianin lei leh van leh mihring te a siam hma daih tawha awm, amah Pathian ngei pawhin a hman tangkai leh, thil siamna atana a hmanraw hman tangkai tak mai, keini mihring te pawhin kan hman tangkai zui em em mai leh min ti mihringtu chu tawng hi a ni awm e. Tawng thil tihtheihna hi sawi phak leh han suangtuah mai phak piah lamah hian a awm a. Tawngkam khat avangin vawiin ni a inthian tha tak kha naktukah chuan hmelma lian takah a inchhuah theih a. Khawvel ram hlauhawm ber ber leh ralthuam nei tha ber ber te pawhin indona hmanraw tangkai takah an hmang a, thlarau mi leh sakhaw mi ten inzirtir nan an hmang a, tlangval ten nula veh thlem nana hmangin, nula ten tlangval lem thluk nan an hmang thung a, hmeichhia ten mi rel nan an hmang vek kher lo, mi fak nan pawh an hmang ve (mipa mi rel ching deuh pawh an awm vet ho an ti). Hetiang taka tawng hian thil a tithei a nih si chuan kan hman dan ah hian I fimkhur deuh deuh ang u hmiang.

Date: 25th November 2007

Phek Hnihna

… phek hma zawm… dik tak chuan Zohnahthlak tawng tam zawka thumal rawn chhuah dan te chu awmze neia thumal awmsa atanga zawmkhawm (construct) a ni tlangpui, chutiang bawkin hmeichhia tih tawng pawh hi hmanlaia hmei leh chhia an ngaih dan fawm kawpa lo chhuak kha a ni tlat, tun hnaiah dinhmun a sang tawh a, ‘minu tih ngei tur’, tita sela, thlak theihna dan an nei miahlo, amaherawhchu dan theihna dan pawh kan nei chuang bik lo a, tawng thar rawn inlumlet te pawh ni se, tawng rawn ti hausa zualtu te pawh a rawn ni chho ve thei tlat.Dik tak chuan kan tawng hi a hausa lo ve lutuk a, sawi tawh ang khan tawng remkhawma siam hi a tam a, ransa hming te pawh Thlanrawkpa Khuangchawi lai khan an chetzia atangin an phuah vel mai mai a nilo em ni kha!! Sakei pawh kha an hmu a, “e!! sa a keih a nih saw..”, an ti a, Sakei an ti a; zawhte pawh khan thil te tek te a rawn zawh a , “E!! a zawhte asin, khai khai khai!!”, an ti a, zawhte tih an phuah a; Sakhi ve thung erawh hi chu an han hmu thut a, kham chhak lam ni ngei tur a ni, “e! sa khi, sa khi!!”, an ti a, in lama mi te in, “Eng sa nge in hmuh?” an tih pawhin, “Sa khi” an ti tlat a, “Engmaw??”, an han ti a, “Sa khiiiii” ; sakhi a lo piang leh, a pu hlen ta ni awmtak a ni, aa.. a tam lutuk, sawi tawh lo mai ang, thawnthu mah nise kan culture a tarlang chiang hle a ni.. Issue kalta vekah, kan ‘Lal tawngtaina’, a rawn sawisel kha a tizia ka ti hle mai (a Issue No. chiah ka hre chhuak zo tawh lo a), tawng leh (translation) fimkhur tulzia a rawn tarlang a ni. Kan sawi liam puat a, a awmzia pawh hi kan ngaihtuah chiang lo tumah hian; kan tet laia zan mut dawna tawngtaina kan sak ang deuh khan, ‘Zania.. min veng la, Lalpa kan thil hlo ata..’, enge “kan thil ‘Hlo’” chu tih kha rilru khan a chhut ngai lo re re, thlamuang tak khan kan mu ve ziah tho thin anih kha mawle... Chutiang bawk chuan kan Obeda vek khan kan Lal tawngtainaah khan ‘misual lakah chuan min chhandam zawk ang che’, tih lai kha a rawn sawisel anih kha, ‘min chhandam’ni lo in, ‘min chhanhim’, tih zawk tur a ni, a rawn ti a, a dik khawp mai, ka han belh ve hlek duh a, ‘zawk’tih rawn awm tak hian ka lung a rawn kuai ve riau a, ‘misualte chu chhandam ve lo la, keini chauh min chhandam ang che’tih a kawk thei tlat, “Misual lakah min chhanhim ang che”, tih hi a tawk felfai khawp mai, chuvangchuan tawng leh te pawh hi fimkhur a ngai takzet a ni. Han sawi zau leh zel ila, kan Lal tawngtaina hi rilru leh tihtakzetin tlar tin mai hi sawi chhuak ila, thlamuanna min petu ni theiin thatna lam kawnga min hruai theitu a ni tak zet a ni tih hi i han hre nawn leh teh ang u. Tawngtai dan tur kan hriat vak loh tum chang te hian rilru leh tih takzetin han sawi tawp mai ila, a tawk em em mai tlat. ‘I hming zahawm rawh se… I duhzawng Vana an tih angin leia miin ti rawh se.. . Kan chunga thil tisual tute kan ngaihdam angin… ’, tih te hi kan zawm thlap chuan mi fel tak kan ni ringawt mai dawn a ni. Tin, khawvel thil awhna te lo zual chang leh hna dil emaw exam result nghah chang emaw te, laichin leh thenrual thate natna khuma mut chang emaw te hian kan Lal tawngtaina tawp lam ‘ram te, thiltihtheihna te, ropuina te… chatuana I ta a ni si a… ’, hian min thlamuan thei em em a ni, khawvel leh a chhunga awm zawng zawng, ropuina te nen hian Pathian ta vek a ni a, a tul leh tha a tih angin min pe thei a, min pe dawn bawk a ni tih hi kan thinlunga rawn tinung nawntu a ni. Obeda chu han duhtawk ila, ka ngaihmawh ve em em pakhat chu kan lam ang anga thuziaka kan dah thin hi ani, inverted comma hman a tul hun hi hriat a tha khawp mai, kan tawng ti zahawmtu a ni tih hi i hre hreng ang u, entirnan, lo ang- long (lo’ng), te inten (te’n) etc.. Tin, kan thusawia kan lam rik anga thuziaka ‘v’lo awm fo hi Bible-ah pawh hian a tam ta hle mai, lo ang tih hi han thlir leh ila , lovang tia lam chu lovang tiin kan ziak ta mai a, mihring hming ngeiah te pawh kan hmang ta fo mai, Zaua tih aiah Zauva, RoaRova tih hi a dik lo tlat ani; chutiang zelin hetiangah te hian: fova -fo a, lovin- lo in,lo va-lo a etc. Chuvangchuan kan tawng ziah te hi i fimkhur tak zet ang u, future lyrcists leh writers te entawn tur kan ni tih hi hre reng ila, kan hriat loh laia mi thinlunga rah tuh tu kan ni reng a ni. Tuna ka thuziakah ngei pawh hian sawisel tur a tam ang, ngaihtuahna titamtuah ka rawn tarlang ve mai a ni. (Sei in ti ve tho em??)

Vol XII Issue No. 47

Bangalore Mizo Association Pathianni Tin Chhuak Chanchinbu

Cha nc hin Tha rlâm KEIMAHNI… ¦ Nimin khan UTC-ah Kumin Chhinlung Magazine Thupui Thlurbing “Tunlai Khawvela Mizote Rilru Sukthlek” tih zir/bih chianna zawhna (questionnaire) chhanna thliarfelna neih ani a. Chhinlung Editorial Board-in mi engezat tlawmngai turin phungbawm sawmin he hna hi zawh fel ani. Tlawmngaia he hna thawktu te chungah Chhinlung Editorial Board-in lawmthu a sawi e. ¦ Kan member pui Tv. L. Amie (Bangalore University) nau Tv. Byhna (25) chu tun chawlhni liam ta, 18 Nov. khan an khua zawngling-ah khawsikpui natna in a boral. Khawhar chhungte kan tuarpui takzet. ¦ Tunlai hian kan member thenkhat zirlai (secular) engemawzat exam bei mek an awm a, karleh lam hian theology zirlai ten exam an tan ve leh dawn bawk. Exam beitu zawng zawng te duhsakna leh hlawhtlinna BMA in kan hlan e. MIZORAM LAM… Ruotmoi Pasal Neih Ni Chiang Ta … Tuemaw in he thu hi min rawruk anih kha. A lo dik ngei e. Lalruotmawii (27) chuan December 12, 2007 khian Saron Veng Presbyterian Biak Inah Kawrtethawveng tlangval, Saiha pastor Rev. Rammawipuia (32) chu pasal atan tiam tlat e a tihpui dawn ta. Hmar nula Ruotmawi man hi Rs 1,200 a ni a, an palai Lalsangzuala Sailo (Holy Cross Bakery) leh Marina s/o Upa Lalchawimawia te chuan Rengkai-ah an han hlan dawn a ni. Chumi hnu chuan December 4 khian thlahna khilamah an nei zui nghal ang. Ruotmawi'n pasal a neih dawn vang hian amah ngaisanga lawmtu thenkhatte an hnual hle nia thudawn a ni a, lo tuar tawk te pawh an awm niin kan thudawnna thenkhat chuan an sawi bawk. Kan ngaihsan rawn he zaithiam hi kan pa rual tam tak te hian a rukin an lo ngaizawng fur ani awm a sin! TawrhBawm (23 Nov) Laldenga Institute of Peace … Tuna America lama official tour neia thang mek Minister Dr.R.Lalthangliana chuan United State Institute of Peace hotu te hmu in Mizoramah Laldenga Institute of Peace din turin a thlen a. Hei bak ah hian kan minister zin hian World Bank Executive Director Dhamindra Kumar te, Development Gateway Foundation Chairman McFleed leh International Finance Corporation Vice Chairman Farida Khambata leh he pawl hruaitu dang te Mizoram hmasawnna kawng sawipuiin a hmu bawk. Engemaw a rawn hawn ve leh mahna le. sinlung.com ATC Kum za Tling Ta… 1907-a zosap tena an din, Mizorama college kan neih upa ber chuan kum za a tling ta. Tunkar chhung zawng khan he kumza tlin lawmna hi chi hrang hrangin hman a ni a. He hun hi Master, Senate of Serampore College Dr K Rajaratnam in a hmanpui. Vawiin hi a lawmna vawrtawp a ni. sinlung.com

Date: 25th November 2007

Phek Thumna

Mizoram Kickboxing Professional Ranking & title fight 2007 Aizawl Sipai Lammuala neih ni thum awh infiamna hi mipui pawhin an phur puiin entu an thahnem thei hle a. Lawmman ringawt pawh Rs nuai 3 chuang zet a nih avangin a game pawh a sang a. Infiamna rothap tak a nih avangin a telte pawh an pawhraw hlawm hle a ni. He infiamna hi mipuiin an hlutin a hmuhnawm hlawm hle a. Zaithiam a nih mai bakah infiamna dang dang lar em em Gnat Lalrinchhana leh a u M Hunter Hnamte te chuan entute mit an lain tan pawh an hlawh hle a, an khel a mawiin an khingpuite an tukdawl hma thei hle a ni. Nimin khan he infiamna hian a vawrtawp a thleng a. Mi te nghahhlelh Saidingliana Sailo, Mizoram Police leh Vanlalhruaia 3rd Bn MAP, Mualpuite inbei a hmuhnawm hle a Vanlalhruaia hi chakzawkin price money Rs.70000 a hlawh. Zotalk China Thalai Ten Mizoram Nuam an ti.. An polite avang mge nuam an ti tak tak erawh a hriat loh. A chhan chu an rawn kal/thlen dawn hian thlenna tur atan pawh star kai chin Hotel beisei kha an ni a. Keini lahin chutiang Hotel chu khawi lamah. Mi 91 lai an nil eh nghal a, Raj Bhavan, Beraw Tlang, Chaltlang Tourist Lodge leh State Guest House ah te sem darh an ni a. Mahse Mizoram an thleng chu nuam an tih thu leh mahni in thleng ang maia an inngaih thu an sawi ve mauh mai. Hetihlai hian heng China thalai te hruai kual tura hman motor pakhat khalhtu in nula pakhat leh tlangval pahnih te a pawi lo chi in alo phur kual hlek a, an hruaitu te leh a buaipui tu te an mangang hman hle, police-in an man zui. sinlung.com Helen Keivom… IFS anihna ai maha thuziak thiam tak anih avanga mite hriathlawh L.Keivom fanu Helen Keivom chu New Zealand-ah tun October 17 khan City Council (District) Deputy Chair ah thlan a ni. He nihna hi Mizo mai bakah Asia hmeichhe zingah chelhtu hmasa ber a ni. He hna hi hna pawimawh tak ram pum huapa mi langsar nihna a ni a. New Zealand ah hian District pali a awm a, a hna ang hi pali chiah a awm tihna nih chu. lawrkhawm.com Rev. Chanchinmawia thih dan 3 party hruaitute'n an sawiho Tun ningani a neih eptu party pathum - MPCC, MPC leh ZNP hruaitute, Three Party Joint Committee chuan Rev. Chanchinmawia thih thu ngun takin an sawiho a. Resolution siamin, Rev. Chanchinmawia thihna chhuichiang turin CBI koh luh an duh thu an tarlang. vanglaini Mizo Tlangval US Marine-a tang hmasa ber… Lalthanmawia hi a thlalak ringawt kan hmu thei a, a chanchin internet lamah kan kheuh hawng mai thei lo. Kan zawng mek e. Hria in awm phei chuan rawn thawh teh u.

Vol XII Issue No. 47

Bangalore Mizo Association Pathianni Tin Chhuak Chanchinbu

LAWRKHAWM England chu Euro 2008-ah an hmel kan hmu dawn ta lo… England chuan anmahni khelmual Wembley Stadium-ah 3-2 a Croatia an hneh loh avangin Euro 2008-ah an hmel kan hmu dawn ta lo. England hian Euro 2008 khel thei turin draw chiah an mamawh tawh a, mahse Wembley-ah ngei mai Croatia an draw zo lova, coach Steve McClaren dinhmun a derthawng ta hle a ni. Croatia hian goal an khung hma hle a, minute 8-na lekah yard 25 a hla atanga Niko Kranjcar shot chu England keeper kum 22 mi Scott Carson chuan ho ang reng takin a chhuah a, England boss McClaren hian Austria an khelh tum pawh khan keeper-ah Paul Robinson aiah Carson hi a hmang tawh bawk a ni. Croatia hi chetha zui zelin minute 14 hnuah Ivica Olic chuan Croatia goal hnihna a khung belh leh a, halftime a thlen meuh chuan England boss McClaren chu fans ten an au el nasa tawh hle a, 2nd half atangin David Beckham leh Jermaine Defoe te a luh tir a, minute 56-ah Defoe chuan Croatia defender Simunic lakah penalty a hlawh hlauh a, hei hi midfielder Frank Lampard chuan a khung a. Minute 65-ah Beckham-a siam tha zet chu Peter Crouch chuan a khung a, ram tana goal 14 a khungna a ni a. A goal khung siam saktu Beckham hian ram tan vawi 99 a khelhna a ni. England hian draw chauh an mamawh tawh laiin Croatia chakna goal hi minute 77-ah Mladen Petric chuan a khung a ni. England an chak loh hnu hian an coach McClaren chuan, "Ka bang dawn lo, ka hna a ni a, qualify pui tumin ka theihna ka seng a, ka tling zo ta lova, tunah mai chuan ka hma lam hun tur hi ka ngaihtuah dawn rih lo. Result tha zawk ka la beisei zel dawn" ti mahse an ban ta tho a. A rual hian a assistant coach Terry Venables pawh FA chuan an ban nghal bawk a. FA emergency meeting neih a nih hnuah McClaren hi ban a ni a, thla 18 chhung England hi a kaihruai hman a ni. FA chairman Geoff Thompson chuan, "England fan te pawhin engkim an hre vek a. Euro 2008 khel turin kan tling zo ta lova, Steve-a rilru put hmang pawh ka hriat pui vek a ni. Tupawhin major tournament khelh chu kan duh vek a, kan tling zo ta lo a ni. Steve hi a kal lehzelna turah duhsakna ka hlan a ni" tiin a sawi. Kum 46 mi McClaren hian England kaihruai tur hian kum 4 atan contract a ziak a, heti ban a nih tak avang hian compensation-ah pound maktaduai 2 chuang an pek rin a ni a. A hmunruak hnawhkhat tur hi an la nghal lova, Chelsea boss hlui Jose Mourinho leh Martin O'Neill te hming erawh an lang. Tihian Euro 2008 khel turte chu a hriat ta a, a thlengtu Austria leh Switzerland bakah Greece, Holland, Croatia, Italy, Czech Republic, Sweden, Germany, Romania, Portugal, Spain, Poland, France, Turkey leh Russia te an ni. Fifa ranking thar bera England dinhmun 12th a ni e.

Car Rintlak Ber… Tunhnaia survey “Which Car?” survey-ah Toyota siam Corolla chu khawvela car rintlak/hmantlak bera ngaih a ni a, Honda CR-V in a dawt. Car i lei dawnin hre mai mai the. Sampras in Federer Hneh… Asian Exhibition Match an khelh mekah Soul leh Kuala Lumpur ah a hneh tawh lova Macau ah erawh chuan 7-6, 6-4 in a hneh thung. Sampras hi Federer aiin kum 10 in a upa.

Date: 25tht November 2007

Phek Li-na

A MAMAWH LEH DUH TAN Mizoram lamah haw chhoh angai thut si a thil tih ral tur kan nei nual a. Fridge LG double door with stabilizer Rs. 4500/- LPG (commercial) with stove Rs. 2700/- Bunk bed Rs. 1000/- Diwan Rs. 700/Utensils, sofa, mattresses etc te an ni a. Chicco Renthlei, Kammanahalli, Bangalore. Contact: 9986497241 or email @[email protected]. … chhiar liam mai mai chi… ¦ Tualthahna case khirh tak chhui chhuak ta: A thih atanga chawlhkar khatna ah Bawngsai Inquiry Commission, BS Senior Officer Pu Châna kaihhruaina hnuaiah din nghal a ni a. Ani bakah hian tunhma pawha tualthahna case khirh tak tak lo chingfel tawh tu te; kan mi chhuanvawr – Detective Pu Khiangawia leh Officer dang Pu Ziona te he inquiry commission ah hian dah an ni a. Hun engemawchen chawmpangkar atanga kham bakbahai leh chhengchhe tak tak thlenga an chhui hnuah nimin khan an thil chhui hi an hlawhtling ta a ni. Mahse he commission report hi BS Court chuan engtik hunah emaw, khawilai hmunah emaw, tu te hnen ah emawa puanzar atan, an thir thingrem chhungril berah a kalhhnan rih. ¦ “Shantinagar mizo tlangval ah chuan ka dûp ber tih chu ka hai lo, mahse BMA ah lehzel chuan ka ni loving a” -Ramchhuana, a.k.a. Wisdom Home Teddy Bear

¦ “Nl Mami Kawlhring hian thil pakhat chiah tih loh chu engkim a nei ani awm e”. He… he… ni hrim hrim ang. - Unknown

¦ Pa Thilphal (hausa ani zawk mah): Hmanni deuh khan UTC pa pakhat chuan Auto Ricksaw a hmang a, auto pu khan a tilawm deuh ni ngei tur ani, Rs. 500 a pe a, auto pu-in kir a tum pawhin a duh miah lo, tawng pawh tawng lovin a kutin a vai kiang/per vel. Mahse hemi hnu lawka thil thleng hi … .an mahni zawt tawh mai teh u.Tunge hre thei rawh.

BEAUTY PLANET OFFERS… 1. Parmanent Hair Straightening (Sam pawh ngil, sam tam/sei pawh) - @ Rs.2500/- (limited period). 2. Package Offer @ Rs. 599/- & Rs. 999/Mapuii Cooke Town, Near ITC Infotech Park. Ph- 9886738975, 9341080948.

BMA Office Bearers: President : Pu K Lalrokima Vice President General Secretary : Tv. Madawnga Hauhnar Assistant Secretary Treasurer : Nl. Blessy Sailo Assistant Treasurer Sports Secretary : Tv. Joar Panzela Cultural Secretary Secretary i/c Academic & Human Resources : Tv. Lalrothara Tlau

: Rev PC Lalduhawma : Tv. James Lalrintluanga : Nl. Thaarie Hnamte :Tv.Obeda Lalhuliana