Bma Aw: 11th November 2007

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol XII Issue No. 45

Bangalore Mizo Association Pathianni Tin Chhuak Chanchinbu

Date: 11th November 2007

Phek Khatna

THATHA BORAL Tun thawhtan tlailam dar 2:30 khan Pu ThaTha (26), Mysore St. Philomenus College-a BA Final Year zirlai chu Malaria (Cerebral) natna-in a boral. Hemi ni/zan vek hian Bangalore ah a ruang hi lak phei a ni a, zan dar 11 ah a puala hunserh St. John Hospital ah neih a ni a. Atuk zingah Mizoram lam pana chhohpui a ni. ThaTha hi tunhma pawha Malaria lo nei thin a ni a. A damloh dawn vel hian exam an nei a, subject khat a exam hman nghe nghe a, hetih lai hian khawsik te nei chhovin damdawi in ah te pawh a inentir a. Amah hi mi zakzum leh mi tawng tlem tak a ni a, a natna chungchang pawh hi a sawi tam lo te pawh a niang. Ni sawmpanga dawn a damloh hnu ah, alo zual zel a, tun thawhtan zing dar 9:30 khan damdawi in ah dah ani a, mahse daktawr ten an chhan hman ta lo ani. A damlohna chungchangah hian daktawr amah lo entu chuan ni 15 chhungin rawn in admit ngei ngei ang che ka ti a, a rawn in admit lova, hetiang hi a thleng ta a nih hi a ti. Thatha hi mi zakzum tak anih avangin thian te phena awm deuh chi ni in zirlai hriathlawh tak a ni lem lova. An boral khan, a attendance record te an han en a, alo tha hle mai lehnghal a. Mysore atanga a ruang rawn phurhna Ambulance hman man te pawh an Principalin a tum vek a ni. 1999 khan helai ah lehkha lo zir tawhin, mahse a zir zawh fel hma hian nupui te a neiin an khua Lawngban lamah an awm leh rih a. Chumi hnuah hetiang hian a nupui leh a fanu kalsanin zirna bawk rawn chhunzawm lehin, mahse hetiang hian Vanduaithlaktakin alo boral ta a ni. Thatha boralna atang hian zirtur pawimawh tak mai kan nei a, chu chu kan taksa hriselna hi kan ngaipawimawhin natna te tham deuha lang pawh kan ngaihpawimawh a, kan inenkawl zung zung a pawimawh hle a ni. A nupui, fanu leh a chhungte kan tuarpui takzet a ni. Synod Executive Committee-ah Rev. Chanchinmawia Thih Dan Sawi Rev Chanchinmawia thih dan ah a chhuitu Police lamin Mahni Inthat nia an ngaih laiin Synod Executive Committee chuan he ngaihdan hi an pawm thei lo bur a, thuchhuah an siam tih Upa C Lalmuankima Synod Executive Secretary (Junior) hnen atanga thudawn ani.A thihdan chhuitu Police te hian a thihdan diktak chhui chhuak ngei turin SEC chuan an duh bawk.Synod Executive Committee hi Nov 5 thawhtanni atang khan an thukhawm a, Rev Chanchinmawia thih hnua an thutkhawm hmasak ber niin, Rev Chanchinmawia thih dan chungchang hi thu khel hnuhnung berah a bik takin an nei a, zirtawp zan dar 9:30 khan an zo chuah ani.hetiang hian thuchhuah an siam. “Rev Chanchinmawia thih chungchanga Synod Executive Committee Resolution Dt 9.11.2007 Kan rawngbawlpui duhtak Rev Chanchinmawia Khatla Pastor Bial vawngtu hliam na tak tuara ama chenna In khatla Pastor Quater a a thih dan hian mi a barakhaihin pawi kan ti tak zet a.Mahni kuta thi nia kan pawm theih loh avangin Mizoram Synod chuan urhsun takin ama chenna In ah leh Biak in ah Oct 2 2007 Thawhlehni khan a vuiliam ta ani.Amah hi kan Pastor chhuanawm tak leh mithiam ani a. Tirhkoh Paula Zirtirna tih a ziak phei chu Puitling Sunday Sikul ah kum 2008 ah hian kan zir dawn nghe nghe ani. Tunah hian a thih dan hi sawrkar mi ruat ten an chhui mek tih kan hria a.A thih dan dik tak chhuichhuak ngei turin kan beisei tlat ani”tiin. (mizoserver)

NGENNA LEH HRIATTIRNA # Chhinglung magazine atana Questionaire kan sem kha Pathianni leh ah chuan rawn keng theuh turin mipuite kan ngen e. Tin, vawiinah pawh sem a ni a... hei hi Pathianni lehah lo keng ngei turin kan in chah bawk e. A tam thei ang ber min laksaka, uluk taka min chhansak turin mipuite kan inchah nawn leh a ni. # Hmun hrang hrang a Questionaire sem tura kan tihte khan lak khawm a hun tawh bawk a, min lo tlawmngaihsaka, min lo lakkhawmsak leh vat turin kan ngen tak meuh meuh che u a ni e. # Chhinlung ami tur Article, Painting, Poems, te a thehluh theih reng a. November 30 hma in soft copy in emaw, email ([email protected]) ah emaw thehluh tur a ni e. Pu Lalhmingchhuanga Zongte, Obeda, Madawnga leh Thara te hnenah thehluh tur a ni ang.

Vawiin (11 Nov. 2007) BMCF Inkhawm Hruaitu: Nl. Mary Lalhriatzuali, Tantu: Tv.Paul Lalchhanhima Thilpek Hlantu: Pi Claudia Ralte, Spcl No: Nl. Chuauzikpuii Thusawitu: Pi Lalrinpuii Karleh (18th Nov. 2007) Hruaitu: Pu P.C. Lalduhawma, Tantu: Nl. Lalrempuii (Azemi) Thawhlawm Hlan: Tawngtai Rual, Thuchah:

Editor C.Lalhmachhuana, UTC, Ph- 9845330822, Joint Editor Thaarie Hnamte Vasanth Nagar, Ph. 9886145877 Circulation Staffs: David Laldanfela, Joshua Lalramdinmawia C.Lalramthanpuia E-mail: [email protected] Website: www.bangaloremizo.info A Man Thla Khatah : Rs. 15/-

Editorial… Khawvel mihring ah hian mi chi hrang hrang ngaihdan thuhmun lo leh inpersan tak tak te, hausa leh rethei te, mi hlim thei tak te leh lawmna reng nei ngai ve lo ni awm tak, thil reng reng a harsa zawng leh a thim zawng hlira thil thlir thin te kan awmin kan cheng za a. Mi vannei leh mi nihlawh kan tih te hi eng ang mi nge an nih tih han inzawt ta ila. Kan chhanna tlanglawn tak ni tura ngaihtheih chu mi hausa te leh mi neinung te tih hi a ni awm e. Mahse han chhut chian tak tak hian mi hausa ber ber te leh nei nung ber ber te hi mi hlim ber ber an ni lo tih chu inhrilh kher ngai lova kan hriat theuh ani a. Chuti chu lo ni tase nun hlimna leh mi vannei nihna chu khawiah hian nge a awm ang le. Kristian te ngaih dan leh thlir dan chuan Pathian neitu leh amah ringtu te hi mi vannei leh mi nihlawh ber te an ni kan ti a, a dik viau pawhin a lang. Mahse hei hi ngun lehzualin han chhut ta ila vawiin ni a ringtu kan hriat te leh kan hmuh theih mai leh kan kawmphak mai, keimahni ngei te pawh tel hian mi vannei kan ni kan ti tak tak thei em?

CHHAKCHHUAKVUNGA CHANCHIN TAWI Football-a talent nei tha em em CC-a hi a naupan lai atangin a thiam em em tawh a, 1985-ah Chaltlang football team-ah a khel tan a, kum 17 mi lek a ni. Kum 19 mi a nihin PWD chuan football khel turin an la tawh a, hemi kum hian Laldenga Gold Gup-ah goal 15 thunin top scorer a ni a, Mizoramin a thiamzia a hre tan ta. He tournament-a a khelh that em avang hian SAI hnuaiah football zir turin thlan a ni a, a thiante H. Ramthlengliana, Zohmingliana, Zonunthara leh Lalrinsanga-te nen New Delhi-ah an kal a; he hmuna an coach chuan India rama footballer talent nei tha ber pawl a nih thu a sawi nghe nghe a ni. Tunlai anga India ram pum huapa footballer ropui nih tum phak ta chiah lo chu, Delhi-ah hian a awm tluan tling ta lo a, Mizoramah lo kir lehin a lâr chhunzawm zel. PWD, PHE, Mizoram Police leh AFC-ah te a khel vek a, CYMA-ah Chaltlang a champion-pui bawk a, Junior level atanga Santosh Trophy thlengin Mizoram team-ah a khel vek a, a vanglaia Mizo footballer-in a thlen phak chin ang chu a thleng kim a tih theih ang. 1980's leh 1990's-a Mizoram football fans zingah Chhakchhuakvunga hre lo an awm thiang lo a, an lo awm a nih chuan football fan dik takah chhiar chi a ni lo ang. He attacking midfielder fing lutuk mai hian AR Lammmuala mipui khat tlatte kut ben dur durna tur khawpin ball a khawih thiam a, a ball chawk vel hmuhnawmzia hre ve phak lo chuan a hmu phakte zawt mai rawh u! Ball thiam chungchuang a ni a, pa chak leh tlan chak ni lo mah se a fing em em a, footballer langsar a nih chhan ber pawh a 'fin' vang niin an sawi thin. Goal thuntu langsar a ni a, goal siamsaktu a ni bawk a, midfield leh forward-ah a khel kawp thei a, a vanglai na nâ na chuan Chhakchhuakvunga hi a ropui a ni. Mihring a ni a, chak lohna a nei a, zu avanga a buai ve thin avangin a 'talent' a tipung tawk lo a, football ngaina mi tan chuan mi uiawm tâwp a tling - a football nun kawng zawh ropui tak tawpna zuih ta hi thangtharte'n inzir nan hmang hlauh se la, CC-a thihna hi footballer naupang zawk tan malsawmnaah a chang thei ang. FOOTBALLER TE FAKNA CC-a 'boss' leh a teammate, vawi tam tak Mizoram football team captain lo ni tawh F. Laltanpuia (TPA) chuan, "CC-a hian football khelmual pawnah chanchin sawi zui tlak vak a nei lo a, khelmual chhungah hi chuan chanchin a nei ropui khawp mai a, 'opponent tana player hlauhawm tak a ni' ka tih hi sawi fiah thiam dan ber chu a ni mai.... naupang tê a nih lai atangin ka hre tawh a, a pianpui thiamna hi a sang a, a khel 'fair' em em bawk a, a awm ta lo hi ka ui hle a ni," a ti. PWD captain hlun TPA chuan, "Tun hnua ka ngaihtuah hian CC-a movement vel kha a lo European ruih mai ni hian ka hre ber," a ti a, a sawi dik chiah. Sports journalist lâr Mamuana chuan, "Ani tluka footballer talent nei tha hi an awm ka hre lo... 'born footballer' kan tih ang tak tak hi a ni a, football kha a pianpui a ni ber a, mi zirtir chawp pawh a ni lo. A lâr chhuah tak tak hmain junior level-a a khel ka hmu fuh a, a thiam ka ti em em a, Laldenga Gold Cup-a top scorer a rawn nih pawh khan mak ka ti lo a, mi danglam bik a ni... a thiamzia hre chiang duh chuan a hunlaia a opponent-te zawt mai rawh se," a ti. Mamuana chuan, "Tun thleng hian CC-a aia skill nei tha hi ka la hmu lo," a ti hial a ni. (khampat.com)

Vol XII Issue No. 44

Bangalore Mizo Association Pathianni Tin Chhuak Chanchinbu

Cha nc hin Tha rlâm KEIMAHNI

¦ Nimin khan MSA Day hlimawm takin UTC ah chawhnu dar 2:30 atangin tlai dar 7:00 thleng hman a ni a. Member kal pawh an tha hnem hle. ¦ Nimin khan BMCF Executive Committee neih a ni a, thu pawimawh tak tak rel zingah, Asst. Secretary Pu Rotea aiawh turin Rev. R. Lalnunzira ruat, 9th December ah Adv. Krismas hman tur, tih te kan hriat atan kan han tarlang e. Tin, Adv Xmas ah hian gift exchange neih tur a ni a, a man Rs 30-60 hu tih a ni bawk. ¦ Vawiin hian Mandya/Mysore Mizo inkhawm hman pui turin Rev. Lalhmingchhuanga Zongte a kal a. Ani hi kan zaimi neih te zinga mi RJ Lalnunpuia, Andrew leh Sarah ten an tawiawm. ¦ Nimin khan UTC ah Inter Sunday School Meet neih a ni a. Hetah hian BMCF Sunday School naupang te pawh an tel ve a, intihsiakna hrang hrang ah lawm man an la nual. ¦ Academy of Integrated Christian Studies (AICS), BD zirlai 26 leh an Lecturer Rev. HC Vankairinga te chu CMC Vellore ah Practical Work thlakhat dawn hun an hman hnu in tun zirtawp khan Bangalore an rawn thleng a, nimin khan whitefield ah seminar an hmang a, zanin dar 11 hian Mizoram lam panin an haw le hang. Heng zirlai te hi in Editor-in a BD zirlaia alo kaihhruai thin fel tak tak te an ni e. MIZORAM LAM Ruang Chhar Nimin khan Zemabawk Berawtlang AR ram piah Tuirial lam hnaih ramhnuai pilril takah mi pakhat inawkhlum niawm tak ruang chhar ani a.Tukkin thleng hian mipa nge hmeichhia tih pawh hriat ala ni lo.Vawiin hian Aizawl Civil Hospital ah Doctor ten an post mortem dawn a,hetah hian mipa nge hmeichhia tih a hriat theih chuah an beisei. Ruang hi Zemabawk mi pahnih khan an hlawm nghal ani.Police ho sawi dan chuan nylon hrui hmanga inkhai ani a,a ruang bulah hian Camera chhe deuh pakhat leh YMA No pakhat leh Damdawi bur niawm tak pakhat a awm a,a ipte vel atangin pawisa nawi an hmu nual bawk.A ruang atanga alan dan chuan kar khat aia rei a inkhai tawh an ring. (mizoserver) Mizo Footballer Ropui Chhakchhuakvunga Boral Mizoram football khawvela hming dai tawh lo tur, a hun laia Zoram dung leh vang dengchhuak hat khawpa football-a lar, Chhakchhuakvunga (40), CC-a tia an koh thin chuan November ni 6, 2007 (Thawhlehni) zan dar 10:40 khan Mitliam natna avangin chatuan ram min pan san ta. Thawhlehzan khan a ruang hi tlaivar pui a niin, nimin chhun dar 12:00 khan Chaltlang thlanmualah vuiliam a ni. (Article column-ah a chanchin tawi kan tarlang). (khampat.com)

Date: 11th November 2007

Phek thum-na

Lirnghing Tun nilai kal ta (7th Nov) chhun dar 12:19 khan Ritcher Scale 5.3 a na-in Mizoramah lir a nghing a, he lirnghing hi Mizoram hmun hrang hrang atangin a hriat theih a ni. Geology & Mining Jt. Director, Dr. Lallianmawia chuan Regional Research Laboratory, Jorhat atanga thudawn sawi chhawngin, he lirnghing lo intanna UPI Centre chu Chittagong Hill Tract a ni tih a sawi a, hei hi Latitute 31°94’niin, Longitute-ah chuan 83°94’ a ni. He lirnghing vang hian chhiatna a thlen hriat a ni lo. (khampat.com) Mara Gospel Centenery Mara rama Centenary lawmna pui ber chu nimin atanga tanin hapta 1 chhung programme hman a ni dawn a. Gospel Centenary hriat rengna building an sak bak ah Mizoram Sorkar chuan Kawlchaw East-ah Centenary Gate a din sak bawk a ni. Centenary lawmna atan hian Saiha mualah Pandal a dung 250 ft leh a vang 200 ft sak a ni a. Centenary lawmna atana Sorkar, mimal leh tlawmngai pawl sum thawhkhawm Rs Nuai 120 a ni. (khampat.com) Sazu mei 87,022 halral tawh Mizoram hmun hrang hranga Agriculture Deppartment ten mautam do nana an programme kalpui pakhat sazu mei pakhat cheng hnih zela an lei an hal ral chuan 87,022 a tling ta. Hei hi Rs. 174,044/- man a ni tawh a ni. (mizoserver) Jail Tang Tlanchhuak Thawhlehni chhun dar 12:00 vel khan Naupang kumtlinglo pawngsual vanga damchhung lungin tang tura tih, tuna Central Jail-a tang mek, Lalthuthlungthara (31) S/o Challiana, Thingsai Venglai chu inentir tura damdawiina an hruaina atangin a tlan chhuak a, tunah hian zawn mek a ni. Lalthuthlungthara hian naupang kumtling lo vawi 2 a pawngsual avanga damchhung lungin tang turin 9 May, 2006 khan a chungthu rel a ni a, a tirah chuan Lunglei Jail-ah a tang a, nikum August thla khan Central Jail-ah hian an sawt a ni. (khampat.com) UNIVERSITY HUNGNA TICHHIA Tun nilai kal ta khan Tanhril JAC te chuan Mizoram University hungna bang an chhu chhia a. Hemi chungchangah hian Tanhril JAC hruaitute chuan Univ Campus hrul-ah hian Quarry 22 vel a awm a, heng Quarry-a lung lakna kawngte hi Campus chhungah awmin Univ thuneitute chuan tun thla November ni 2-a an ramri an hung tak avangin heng quarry-ah te hian a kal theih ta lova, Univ ramri hungna bang an vuak chhiat chhan pawh an mi leh sate eizawnna kawng a ping dawn vang niin an sawi a ni. He thil-ah hian Tanhril Quarry Assn hruaitute chuan Quarry-a lung la thei turin Univ Registrar vawi tam tak an dawr thu an sawi a, Univ thuneitute chuan an hnen-a an sawi ang ti hlawhtling lovin Quarry-a lung lakna tur kawng an dan pin sak ta a, la nghak hret tura dil a nih pawh Univ thuneitute chuan an nghak hman ta lo niin an sawi. Ningani khan Aizawl DC Pu C. Thanchhum hovin Univ hotu te leh Tanhril JAC te hian inbiakna an nei a, helai hmuna Lung Quarry neite chu kumin December ni 31 thleng lunglak zui nan hun pek an ni a, hemi hnu chuan University chuan an ram chin a hung tawh dawn a ni. Hemi chungchang sawihona-ah hian tun hnuah mahni thuin tumah chet tawh loh nise, thil tih turte chu District Magistrate hriat pui leh remtihna anga tih ni se ti-a thu dah a ni bawk a ni. (mizoserver)

Vol XII Issue No. 44

Bangalore Mizo Association Pathianni Tin Chhuak Chanchinbu

LÂWRKHÂWM Naupang Khawngaihthlak Lakhsmi Tha Zel… Naupang ke pali leh ban pali neia piang Lakhsmi kum 2 mi doctor 36 zet tena darkar 27 chhung Sparsh Hospital, Bangalore-a an zai chu nimin thleng kha chuan he surgery team hotupa Dr. Sharan Patil chuan thatlam ala pan zel tih a sawi. Zirtawp ni khan ventilator atangin ICU-ah sawn a ni. Lakhsmi hi Bihar Aria district thingtlang khua atangin a nu leh pa Shambu leh Poonam ten October ni 3 khan he Hospital hi an rawn panpui a ni. (PTI) The Longest Day Indona lam hawi Film tha berah… 1962 daih tawha chhuak Burton, John Wayne, Sean Connery leh Richard Todd te channa The Longest Day chu tunhnaia Sky Movies leh Forces Reunited tena mipui ngaihdan (poll) an lak atangin indona lamhawi film tha ber niin tunhnai film chhuak lar tak Saving Private Ryan te, A Bridge Too Far , The Dam Busters leh The Cruel Sea te a khum a ni. He film hi Indopui pahnihna-a British sipai ten Normandy an beih dan leh an run dan tarlanna a ni a. Heta chang Richard Todd hi he indona-a a tak taka tel (sipai) zinga mi kha a ni. (IANS) Kate Moss-in Conservative Party Leader David Cameron Phone No Dil… British Opposition Leader David Cameron chuan tunhnaia TV Show pakhata interview an neih na ah, charity show-a Kate Moss nena an titi dun thu leh a phone number te a dil avanga a lawm zia a sawi a, mahse a phone number a dil chhan kha Kate Moss chenna leh chhehvela tuichhe luanna mumal lo siamthatna kawnga puih theih a inrin vang lek chu lo ni si a. He interview ah hian fiamthu ti tihin a sawi lang vel a ni. Hmeichhia/mipa kan number min dil nazawng hi kan rin dan leh kan beisei ang zawnga min dil an ni lo fo reng a ni. Risk sual palh hlauhawm thei fu nia. (AFP) English Premiere League Points dinhmun hetiang hi a ni e. Pos. Name Played Point 1. Arsenal 11 27 2. Man Utd 12 27 3. Man City 12 25 4. Chelsea 12 24 5. Portsmouth 12 22 6. Blackburn 11 22 7. Liverpool 11 21 8. Everton 12 19 9. Aston Villa 11 18 10. New Castle 11 17 Zanin Inkhel turte: Sun 11th November 2007 Birmingham v AstonVilla

13:00

BMA Office Bearers: President : Pu K Lalrokima General Secretary : Tv. Madawnga Hauhnar Treasurer : Nl. Blessy Sailo Sports Secretary : Tv. Joar Panzela

Date: 4th November 2007

Phek Li-na

Chelsea v Everton 14:00 Tottenham v Wigan Athletic 15:00 Man Utd v Blackburn 15:00 Bolton v Middlesbrough 1500 Portsmouth v Manchester City 16:00

Windows XP vs Vista Kum 2004 laihawl vel khan Windows Longhorn la siam pumhlum loh hmel ka hmu ve a, a puma hman theih hun kha a nghahhlelhawm hle mai a. Mahse, kum 2005 July thla khan Microsoft chuan Longhorn chu Vista tiin a rawn thlak leh ta a ni. Tunah phei chuan Laptop ah hman a ni ta fur mai. Vista lo chhuak chuan a thutiam a hlen zo chiahlo emaw ni chu aw a tih theih a! Vista hmangtu an lo pun rualin, a U, XP chu a tluklo ti an tam ta zel mai bawk. Dutch Consumer Association chuan heti hian thuchhuah a siam, “Netherlands a computer dawr reng reng chuan Vista a lungthlulo te tan XP a pe tel zel tur a ni.”tiin. Kumin April pawh khan US-a Dell Company chuan, a computer siam hmangtuten an nawr nasat em avangin, XP leh Vista duhthlan theih turin computer siam a tithlu bawk. A chhan chu Laptop leh Desktop ah Vista chauh an dah vang a ni. Microsoft chuan XP tih nun zel nan June 2008 thleng hun a pawtsei a. Chutih laiin, Vista in duhthu a sam lo hle a, software tam tak hman theihloh a nih bakah, graphics card chak tak hman a ngai bawk a, tin, a memory duh a hautak hle bawk a ni. Vista hi June 2006 a tihchhuah tum kha kumin 2007 January khan tihchhuah theih chauh a ni nghe nghe. Sawitur a tam hle mai. Awle, Microsoft chuan nakum 2008 tir lam hian Windows XP Service Pack 3 tihchhuah leh a tum a. Hei hian Vista hmelhmang tam tak a nei dawn a ni. Engpawhnise, Vista hi han zir ve zel phawt ila, thatlohna tam tak awm mahse a thatna leh hman a nawmna tam tak a awm a ni. ¦ “Kum 10 chuang zet Blore ka awm hnu ah, a vawi 1nan perfume ka han lei ve mial chu le.” - James of Shantinagar ( “lo kap ve hram teh u, a tuah tawh lutuk” tih kan dawng tel) ¦ “Vawiin ka hi birthday a ni tak2 a nia, inkhawm ka tum, ka zai dawn lehnghal, present min pe duh tan BMA Madawnga kaltlangin ka dawng thei” - Zikspuis ¦ Pu Rpa-a: “Blessy hian a nula fel term hi hei a chelh tlang zo dawn meuh emaw chu le?” Pu Zira: “Ani khawp mai, a lang hman lo vel chiahin a chelh tluantling, felfai, deuh nial nual dawn ni in a lang e, lawmpui awm khawp mai.” ¦ Sunday Bazar la hre lo in la awm em? Thil tha tak tak te pawh lei tur a awm a niang thenkhat chu Sunday tin kal an awm a ni awm e. Hrechiang duh chuan Nl Mapuii leh Zorini of UTC te zawh mai tur a ni e.

Vice President Asst Secretary Assistant Treasurer Cultural Secretary

: Pu PC Lalduhawma : Tv. James : Nl. Thaarie Hnamte : Tv. Obeda Lalhuliana