Bma Aw: 4th November 2007

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol XII Issue No. 44

Bangalore Mizo Association Pathianni Tin Chhuak Chanchinbu

Date: 4th November 2007

Phek Khatna

Call Centre-a Thawh Hi A Him Tâwk Em? Tun zirtawp khan Gopal Hosur, Joint Commissioner Crime, Bangalore chuan Call Centre hrang hranga hnathawk te a bikin zanlai leh zan reha an mahni in atanga an hnathawhna hmuna pana kal te leh an hnathawhna hmun atanga an chenna pana haw te, a ruaitu ten an thlenna tur hmun an thleng ngei ani tih an chian tur ani a ti. Kum khat leh a chanve kalta a pawikhawihna case ziah luh zinga 100 zet chu call centre-a thawk hruaitu (driver) te inhnamhnawihna a ni a ti bawk. Hemi rual hian call centre-a zan rei tak taka thawka kal vel thin te chu pawikhawih tu ten an target a nih thu sawiin fimkhur turin leh hriat chianloh lirtheia chuang mai mai lo turin a chah. Nimin khan Pune atanga km50-a hla leilet ah nula kum 21 mi call centre-a thawklai ruang chhar ani a, a landan ah thah anih hma hian pawngsual ni ngeia hriat a ni. He tualthahna avang hian a hma lawka a chuanna (idica) driver leh a thurualpui pakhat man nghal an ni. Bangalore ah hian mizo nula leh tlangval engemawzat chu call centre-a thawk lai kan awm a, i fimkhur teh ang u khai. BMA Executive Committee Rorel Thuchhuak Nimin tlai dar 3:00 khan BMA Executive Meeting Pu K. Laltlankima-te in, SCM House , Mission Road ah neih a ni a. Thurel tlangpui, mipui hriata tarlan nghal awm chi hengte hi a ni:1. Office Bearers Hmun Ruak Siamrem General Secretary Pu K. Laltlankima chuan Kohhran hnuaia Pathian rawngbawl hna thawk turin Churachandpur ah min kalsan dawn tak avangin, a hmun ruak awh tur hian Committee chuan Tv. Madawnga Hauhnar, tuna Asst. Gen. Secretary ni mek chu a ruat a, Asst. Gen Secretary thar atan hian Tv. James ruat nghal a ni bawk. BMA Inkaihhruaina Dan Thar-in OB Post thar a siam, Secretary i/c Academic & Human Resources atan Tv. Lalrothara Tlau a ruat tel nghal bawk. 2. BMA Thlalak Kum tina kan tih thin angin kumin Chhinlung Magazine-ami tur BMA thlalak runpui Dt.11 Nov. 2007 (Pathianni) hian neih leh tura rel a ni bawk. Thlalak min buaipui tur hian Chhinlung Sub Committee-te beisei an ni a, tlawmngaia thla min laksak turin Tv. John Sailo, Tv. Lalthlengliana leh Tv. Paul Lalchhanhimate beisei an ni bawk. 3. Nula Fel leh Tlangval Fel Thlan BMA Nula Fel leh Tlangval Fel pawh Dt.11 Nov. 2007 ni vek hian thlan ni se tih a ni. He Inthlan min buaipui tur hian tlawmngai turin Committee chuan hengte hi a ruat nghal: 1) Rev. Sairengpuia Sailo, Convener 2) Pu Joshua Lalrempuia 3) Pu Lewis Lalsiamliana 4) Pi Lalnunmawii 5) Pi Singthangpuii 6) Pi F.Lalrotluangi

4. BMA Aw Circulation Manager Siksawi BMA Aw Circulation Manager atana ruat mi 3 zinga 2 te an remchan dawn tak loh avangin an aiawh tur hian Tv. Joshua Lalramdinmawia leh Tv. C. Lalramthanpuia-te ruat an ni bawk. 5. BMA Silver Jubilee Lawm Chungchang Kum 1984-a din BMA chu kum 2009 hian kum 25 a lo tlin ve dawn tak avangin he Silver Jubilee hi ropui taka lawm tura tun atanga inbuatsaih hi Committee chuan tulin a hria a. BMA Day, January 1, 2009 atanga ‘a bik tak’programme siama lawm tan ni se tiin, BMA Silver Jubilee Celebration Committee pawh heti lam hawia a tul ang zela hma la tan nghal turin din nghal a ni a. Committee ruangam pawh thui taka zam nghal a ni, hetiangin: Chairman: Pu R.Lalrinawma Secretary: Pi Lalrinpuii Treasurer: Pu Lewis Lalsiamliana BMA Office Bearer zawng zawngte chu Ex-Officio member an ni nghal ang a, anni bakah hian Committee Member mi engemawzat ruat nghal an ni bawk (a remchan angina Pathian ni-leh chhuakah memberte hming hi kimchangin kan rawn tarlang dawn nia). BMCF INKHAWM PROGRAMME Vawiin (4th Nov. 2007) Hruaitu: Pu K. Laltlankima, Tantu: Tv. Benjamin Lalfakzuala Thilpek Hlan: Tawngtai Rual, Spl No: Nl. Margaret Lalrinfeli Thusawitu: Pu R.L. Rinawma Karleh (11 Nov. 2007) Hruaitu: Nl. Mary Lalhriatzuali, Tantu: Tv.Paul Lalchhanhima Thilpek Hlantu: Pi Claudia Ralte, Spcl No: Nl. Chuauzikpuii Thusawitu: Pi Lalrinpuii

Editor C.Lalhmachhuana, UTC, Ph- 9845330822, Joint Editor Thaarie Hnamte Vasanth Nagar, Ph. 9886145877 Circulation Staffs: David Laldanfela, Joshua Lalramdinmawia C.Lalramthanpuia E-mail: [email protected] Website: www.bangaloremizo.info

RAP MUSIC HI SUAL ANI EM? BMCF Revival Camping kan neih zawh takah khan music chungchang ngaihnawm tak leh bengvarthlak tak kan ngaithla a. Khati lam hawi bawk khan ngaihtuahna I seng ho dawn teh ang. Music hi mizo te nunah abik takin thalai te ah hian a bet thuk fu mai a. Ram changkang leh hnam changkang zawkte rimawi leh hla te pawh a theih chin chinah chuan kan la chhawngin an tih dan zulzuiin kan ti ve thei nghal zel a. Rimawi (music) in mihring suangtuahna leh ngaihtuahna a lakpen thui theih dan te, a sual zawng leh a tha zawnga mihring min kaihhruai theih dan te kan hre theuh awm e. Kan ramah, kan thalai te zingah, kan phal emaw phal lo emaw, kan duh emaw duh lo emaw rimawi khawvel hian bu a khuar nghet deuh deuh zel a. Music tha leh tha lo-a kan ngaih te pawh dan chi/zawh rual lovin alo lut zel a, alo lut zel dawn bawk. Hemi kawngah hian ngun zawk leh thuk zawka ngaihtuahna kan sen hi a tul fu mai.

A Man Thla Khatah : Rs. 15/-

Editorial… Mizote hi kan hriat angin hnam naupang te kan la ni a, kawng hrang hrang ah mi te tihdan leh nun dan te kan zir nasa in hma pawh kan sawn nasa hle mai. Hetih rual hian mi te tih ang zawng zawng a chhia leh tha pawh zir chiang lova kan ti ve nghal zung zung ta lutuk hi chu a manganthlak deuh chu a ni. Mi te tihdan dungthula kan uar tak em em mai Youth Icon hi I ngaihtuah ho lawk teh ang u. A hming lah hi kan han ngah tawh khawp a; Youth Icon (LPS), Mizo Idol (Zonet), Youth Idol (Lunglei), Champhai Lelte? (ka chiang chiah lo), Zo Star (Lunglei). An la phuah belh zel hmel lehnghal. Heng show avang te hian kan ramah mi lâr (‘celebrity’ an ti ve mai a ni awm e) population a pung chak fu a ni awm e. Thil inti hre deuh ho phei chuan tun atanga reilo te ah Mizoramah milar lo aiin mi lar an tam zawk ang an ti. Heng ang thil te hi ngun zawk luh uluk zawka thlirin kan ram leh hnam hmasawnna thlen thei tu a ni nge, kan thuanawpna tih te hi kan zir ngun a ngai ani.

Rap Music leh kan thalai te chungchang hi ilo thlir bing lawk teh ang. Kan rama RapMusic alo luhna leh kan thalai ten he music an hmanna hi kum tam ala ni lo. Chuti chung chuan he music hian nasa takin kan ram thalai te ah bu a khuar nghet tawh a, inchei dan thlengin rappers ho te an entawn nasa em em a ni. Hetiang a nih avang hian nu leh pa leh kohhran leh vantlang mimir te chuan he music hi, music tha ah pawm harsa kan ti fu ni pawhin a lang. Kan hmuh phak ho leh kan hmuh zin ho te hi a tha lam aiin a tha lo lam a tam tlat vang te pawh a ni ang. Hetiang a nih avang hian thalai ringtu/piangthar te chuan rap music hi ngaithla leh hmang ve ngai lo tura ngaihna leh chutiang tura inzirtirna te pawh chu a awmin, he music hian mizo kristian te zingah nasa taka do a hlawh a ni. Mahse I ti teh ang. Heng zawhna chi hrang hrang te hi I ngaihtuah ho teh ang u. Kan thalai te leh rap music hi a lak hran theih ang em? An buaipui leh tam takin an atchilh tawh hi a thlakna kan pe thei a nih ngawt loh chuan a har fu ang. A thu hrim ah rap music hrim hrim hi sual a ni em? Thil reng reng hi a mah ngawt hian sual ani lem lo, rap music te pawh hi alo chhuahna bul chhui phei chuan, rahbeh leh nekchep, tihduhdaha awm te infuihtawnna leh inhnemna atanga lo chhuak asin. A chhe zawnga hmangtu te leh rawn tlangaupui tu te ringawt hi kan hria a, a tha zawnga he music hmang tu te hi an awm ve tho lo maw? Rap music hi chi hrang hrang a awm a, kan huat em em mai leh tha lo tak mai zahmawh leh tharum thawhna lam hawi a awm a, chu chu gangsta rap a ni a (e.g. Snoop Doggy Dog, Ice T), chutih rual chuan a tha lam hawi hardcore rap (e.g. Public Enemy) leh female rap (e.g. Salt ‘N’Pepa, Monie Love) an tih te pawh a awm ve leh bawk a. Heng music ah te hian mihang (black community) te hmasawnna leh zalenna lam te leh hmeichhia te dinhmun chawikanna thu te a awm a ni. A thatlohna leh a chhe zawng ringawt kan hria a, rap music thuchah tha tak tak keng a ve tho mai. Thil reng reng hi kan hman dan leh kan inzirtir dan a zir hian thil sual ah leh thil tha ah kan chhuah mai zel chu a nih hi. Chuvangin rap music te pawh hian kan thalai te a ti buaiin, atchilhtu tam tak an awm tawh si a, a thatna lai leh a tha zawnga hman dan kan inzirtir tam hi thil pawimawh tak ani lo maw? Rap music hrim hrim ka sawi mawi ah min lo ngai lo ula. A chhiatna leh a that lohna lai ringawt kan sawi tam lutuk hian min siam tha vek seng si lova, a lehlam zawnga thil kan inzirtir a, hman tangkai dan leh her rem dan kawng kan dap hi a ngai a ni mai lo maw??

Vol XII Issue No. 44

Bangalore Mizo Association Pathianni Tin Chhuak Chanchinbu

Cha nc hin Tha rlâm KEIMAHNI

¦ Pu K.Laltlankima te nupa chuan tunkar lo awm tur zirtawp ni hian Bangalore an lo chhuahsan dawn tar eng mai. An chhuah hun tur hi tlai lam dar 3:00 ani a, chawhma lam dar 11:30 ah an chenna in SCM House, Mission Road ah an mahni thlahna tawngtaina hun hman tur ani a, kal theuh kan tum dawn nia. ¦ Pi F.Lalrotluangi (Pi Mapuii) u fapa Jimmy F. Lalnunzira BMA member ni a hun engemawchen Bangalore-a lo awm reng tawh chu hun engemawchen a damloh hnu in, nimin khan Durtlang Synod Hospital ah a boral. Khawhar chhungte BMA in kan tuarpui tak zet a ni. ¦ Nimin khan BMA Football Tournament 20007-a champion Sherwood FC ten an Champion lawmna Jonathan K.Lalthlenglien te In Richmond Town ah an nei. BMA Adviser Dr.Lalrinawmi leh Executive Commt member thenkhat ten he hun hi an hman pui. ¦ R.Vanlalmalsawma, Mandya BMA representative pawh BMA Committee meeting hmangin alo kal. ¦ BMA Joint Editor Nl. Thaarie Hnamte pawh karleh lamah engemaw thil pawimawh tak (??!!) ti turin Kolkata lamah a kal dawn. MIZORAM LAM LADC VC Inthlan Zo Fel Lai Autonomous District Council hnuaia VC thlanna chu zawh fel a ni ta a, hetah hian inthlanna neihna khaw 80-ah rorel lai, MNF chuan seat 195 la-in V/C khaw 58-ah an siam thei a, a dawttu, Independent chuan seat 76 la-in khaw 18-ah V/C an siam thei a, eptu party, Congress chuan seat 22 la-in khaw 3-ah V/C an siam thei a ni. Lawngtlai Dist MNF President, Pu Lalthlamuana hnen atanga thu dawn danin, he inthlanna-ah hian khaw 86-ah inthlanna buatsaih nimahsela, khaw 80-ah hlawhtling taka inthlan neih theih a ni a, khaw 6 dang-ah te chuan inthlanna a buai avangin Tribunal din tak chin fel turin ruahmanna siam zui a ni. Hetihlai hian Aizawl Dist Congress Committee (ADCC) chuan LADC hnuai-a V/C inthlanna neih tak chu inthlanna dik lo leh fel fai lo a ni tih sawiin thawh tam taka inthlanna neih a, an chakna ber tur khua-a a bul tan a, result puang nghal zel a, mipui-te thluak suk a ni tih tarlangin hetiang inthlan dan hi tha lo leh fel fai lo a ni an ti. Hetih lai hian MNF Gen Hqrs ve thung chuan he inthlan hi chhinchhiah tlak a MNF Party chakzia tarlangtu a ni an ti thung a ni. (mizoserver) Vice President Mizoram Tlawh Ningani (2nd Nov) khan India ram Vice President Mohammed Ansari Karzai chuan Mizoram a tlawh a, nimin khan Delhi panin a let leh nghal. (mizoserver)

Date: 4th November 2007

Phek Thumna

Lunglei DC Thar Lunglei District Bawrhsap thar tura Sorkar-in a ruat Pi M.Zohmingthangi MCS chuan November ni 1 khan Lunglei thlengin, Lunglei Bawrhsap charge lo la lailawktu Pu Lalhmingthanga Addl. DC hnen atangin charge a la fel ta. Pi Zohmingthangi hian kum 1982-85 chhung khan Lunglei-ah BDO hna a lo thawk tawh a ni. Hun reilote-ah IAS nihna pawh pek ni dawn awma thudawn a ni. Pi Zohmingthangi hian Pu C. Thanchhuma (Nl. Rebec-i pa) Aizawl DC ni tura Lunglei chhuahsan ta ava thlak a ni. (ralvengtu) Rimawi Khawvel 2007 Award Rimawi Khawvel Award 2007 December ni 6 khian Tumpui Field Kolasib lamah sem chhuah tum ani a.He Zaithiam chawimawina hi October ni 24 tanga 2007 atanga November ni 7 thleng thlan theihna hun hawn ani a.Category 10 ah thenin, Category hrang hranga Phone Number tarlanah te hian Phone number pakhatah SmS vawi khat hmang zelin a nominate thei dawn a, phone call erawh pawm ani lovang. Category Best Choir Best Beat Group Best Album Best Song Writer Best Folk Song Singer Best Rapper Best Music Video Best Female New Artist Best Male New Artist Best Female Gospel Singer Best Male Gospel Singer Best female Love Song Singer Best Female Love Song Singer

Phone

No 9436142606 9436154533 9436352857 9862383725 9436154533 9862383725 9862400528 9862015791 9436142633 9436392203 9436366041 9862386985 9436375437

(mizoserver)

Art & Culture Joint Director Pu RS Rosangluaia Ruang Chhar a ni Art and Culture Department-a Joint Director, Pu R.S. Rosangluaia chu Guwahati ah tun zirtawp (2nd Nov) khan thi a chhar a ni. A ruang hi Mizoram House Building hlui leh thar inkarah hemi tuk dar 6 vel khan House-a hnathawkten an hmu a, a lu, tukkhum lamah hliam na tak a tuar a, In chhawng atanga tla nge mi kut tuara thi tih chu hriat fiah mai theih a ni lova, Police leh Forensic Expert-te koh a, enfiah a nih hnu, ah Gauhati Medical College-ah Post mortem a ni a, ruang hi hemi ni tlai vek khan Aizawl lam rawn panpui a ni. Pu Rosangluaia hi Sorkar hna pawimawh thawka Delhia a zin lo haw lam a ni a, nimin tlai dar 6 leh a chanve vel khan Guwahati Mizoram House-ah a lut a, VIP room pakhat, Clivia-ah a thleng a, zan dar 9 vel-a House hnathawk, amah hmutute chuan chaw House-ah a ei dawn em tih an zawhin, "dawn lo" tiin a chhang a, hemi bak chu a chinchang hre zui an awm tawh lova, a room thenawm chiaha thleng, Pu Hrangthanga Colney nupui-te pawhin zan lamah a roomah thawm dang hriat an nei lo a, tukin khan a ruang hi Mizoram House 2 inkarah pheikhawk bun lo, Jean kekawr leh kawr var ha-a thia hmuh a ni ta mai a, Police te chuan mi kut tuar a thi a nih ringin thil thlen dan an enfiah zui mek a ni. (zonet)

Vol XII Issue No. 44

Bangalore Mizo Association Pathianni Tin Chhuak Chanchinbu

Date: 4th November 2007

Phek Li-na

LÂWRKHÂWM Hiroshima Atom Bomb thlaktu pilot boral… Sang tam tak nunna suattu leh khawvel indopui 2-na tawpna thlentirtu pakhat Atom Bomb 1945 August 6-a Hiroshima khawpuia thlaktu B-12 Bomber khalhtu/pilot Paul Warfield Tibbets chu tun ninga ni khan a chenna in Columbus, Ohio ah kum 92 mi niin a boral. A thih hma hian Tibbets hian amah vuina hun (funeral service) hmang lo tur leh thlan lung (headstone) reng reng siam lo turin a chhungte a chah a ni. Amah an phumna hmun hriattheiha a awm chuan nakin zelah mitten an lungawilohna (protest) an lantirna hmun berah an la rawn nei ang tih a hlau a ni. A thihni thleng khan Tibbets hian a thil tih avanga inchhirna emaw thupha chawina emaw eng mah a sawi chhuak lo. A thil tih avanga nunna chan engemawzat an awm tih a pawm rualin khami avanga nunna tam zawk chhanhim an nih thu a sawi ve tlat bawk. (AP) Nupui Birthday ah Luxury Jet… Tun thawhtan maia Bill Gates khûma khawvela mi hausa ber ni ta, Reliance neitu Mukesh Ambani chuan a nupui piancham vawi 44-na lawmpui nan thlawhtheihna $60 million man a leisak tih Mumbai Mirror in a tarlang. Ambani hian chenna in, khawvela man to berte zinga mi tur $1 billion man Mumbai ah a sa mek bawk. Hetih lai hian India ram hi khawvela mi rethei tamna be rte zinga mi a ni bawk. In persan fu mai. (REUTERS) Maimawm She Vangin Pawngsual… Australia mi Philip Spiers, 1997 a mi pawngsual tu chu tun ningani khan court ah hruai niin, he a thil tih hi a duh reng vang pawha ti nilova maimawmin a seh avanga ti ni a insawiin ngaihdam a dil a. Mahse a chungthu ngaihtuahtu New South Wales District Court chuan, a insawifihlimna hi nemnghettu (medical evidence) a awm loh avangin kum 8 chhung lungin tang turin a ti ta a ni. I lo inseh tir ve palh hlauh ang e. Pawl hnih ah inthenin, a hran ve ve in an thawk a… (en liam mai suh)

MARTINA HINGIS Nimin maia Tennis chawlhsan ta, Martina Hingis thlah nan a Carreer Summary Date of Birth: 30/09/1980 Birth Place: Kosice (Slovakia) Nationality: Swiss Height: 1.70m Weight: 59 kg Present Ranking: 19th Best Ranking: 1st Tournament Victories: 43 in singles, 37 in doubles Grand Slam Tournaments: Australian Open: Champion (1997, 1998, 1999) Runners-up (2000, 2001, 2002) US Open: Champion (1997) Runners-up (1998, 1999) Wimbledon: Champion (1997) French Open: Runners-up (1997, 1999) Career earnings: $ 20,130,657 … chhiar liam mai mai chi… ¦ “Kan inpuang teh ang kei pawh hi mi ril ringawt ka nih hi” - Ramhluna of Wisdom Home (‘Pronoun’ti a hriat lar) ¦ “Camping ka ngaihna ber kha chu nupui te nena room hrana kan han mu a, nula/tlangval tha leh ang hrima Security te hriat hlau taka han inrim mawlh mai kha ani.” Pu RP-a of UTC ¦ Zanin hian appointment lawm nan chawhlui buatsah ka tum a, a duh apiang rawn tel mai teh u. Kan hrut hniam dawn teh ania. James (BMA Asst Secretary thar) ¦ Blessy pasal neih hunah ‘receipt’hlirin a inneih kawr kan thui ang Obeda ¦ Nimin BMA Commt zet kha chu a ‘happenings’bawn tawp. Rinzuala of Dr.AIT (thil reng reng hi nuam a ti fal thei ve hrim2) ¦ “Nangni chu in la naupang a, hun in la ngah a lawm, upa berin a bar hma chuan tih leh aia up ate zahthiamin tih kha I hre reng ang u.” - In Û te, Mami Khawlhring, Panteii, Mary, Blessy, Thaarie, Tleipuii, Vl-i, etc… ¦ Pu K. Tlana thusawi hnuhnung kan hriat theih te, “Nupui hmu chuan thil tha a hmu a ni” “Nupui te thu thu hian han awm hmasa ila, a hnu ah nupui te chu kan thu thu in kan dah mai alawm, mahse hrehawm han tawrh hmasak chu tuarchhuah loh mai te pawh a awl lek lek a, in san mara, inham ping vel erawh chu a ngai khawp mai.” “Madawnga thu leh hla hi lo ngaichang ula, lo zuam lutuk bik suh ang che u.”

BMA Office Bearers: President : Pu K Lalrokima General Secretary : Pu K Laltlankima Treasurer : Nl. Blessy Sailo Sports Secretary : Tv. Joar Panzela

Vice President Assistant Secretary Assistant Treasurer Cultural Secretary

: Pu PC Lalduhawma : Tv. Madawnga Hauhnar : Nl. Thaarie Hnamte : Tv. Obeda Lalhuliana