Bma Aw: 18th November 2007

BMA AW An Official Organ of The Bangalore Mizo Association Registered Under Societies Act of Karnataka No.BLU-S188-2007-08 Date 7 May 2007 Vol XII Issue No. 46 Bangalore Mizo Association Pathianni Tin Chhuak Chanchinbu Date: 18th November 2007

THLARAU NUN LEH POLITIK TUI NÛ Rev. Chanchinmawia (L) Dated: 24-08-2007 ‘Thlarau Thianghlim chu tilungngai suh u’(Eph. 4:13) Politik hian kan nunah hmun a chang thûk lo thei lo. Chang thuk tur pawh a ni. Mahse ringtu chu Thlarau Thianghlimin a kaihruai tura ni a, politik tui nua a inbual ve a thiang lo. Sawrkar rorelna hian mi tin a huap vek avangin politik chu boruak ang maia min tuamtu a ni. Politik tha leh tha lo erawh chu an inthlau em em a. Inang lo tak an ni. Hei hi kan thliar thiam ngei a pawimawh a, politik tui hi a nut chuan Thlarau Thianghlim dodaltu a ni a, ringtu nunah a luang lût ve tur a ni lo. Politik tha chuan innghah nan’Rinawmna’leh’Dikna’a hman thin avangin Thlarau nun a tihliam ngai lo. ‘A ram leh a felna’dah hmasak a nih avangin dawt leh eirukna te hian hmun an chang thei lo. Diabola ngam lohte hlirin ro an rel avangin nun dik leh hmasawnna sang chu khawvel êng an lo ni thin. Chutiang politik tha chu Kristian ramah hian a awm thei lo a nih chuan ringtute kan mualpho tihna a ni. Entawna insiam tur kan ni a. Chu chu Bible-in kan chan tur Thlarau rah a sawi kha a ni. Chutiang rorelna chu retheite tan a nuam a, hausate tan hlei hlei a hlu bawk. Mi sual erawh chu an chep thung ang. Politik tui nu avanga kan kalpui dan dik lo leh sawrkar awm dan hian hei hi an hlat lutuk a, kan khawlo zo ta a ni ber. Pathian hming lah kan lam zur zut mai a, mahse Setana rorelna hnuaiah kan kun tlat bawk si niin a lang. Setana hnuaiah tumah an hlim tluantling ngai lo. Kan ram politik tluka Thlarau Thiang-hlim tilungngaitu, Setana tanhmun tha hi hmun dangah a awm ang em tiin a ngaihtuah theih rum rum a ni. Sawrkar leh party politik-ah hian mi tha leh rinawmte chu lût ve phak lo tura ngaih an ni fo thin. Setana hi a huangtau lutuk a ni lo’m ni? Tuna kan party politik hian kan sawi tak politik tha khi a thlir phak lo hrim hrim niin a lang. Dawt sawi te, mi mal insawi chhiat vak vak te, hleih neihna leh eirukna te, mi vote lei leh vote hralh te, tihpuitlin loh tur thil intiam vak vak te hi kan Lal Isuan a phal rêng rêng lo. Setana chawh nut party politik hi tihthianghlim a hun ta. Thlarau Thianghlim hnathawh dawngtu chu he tui nuah hian a inchiah ve thei lo va, an zingah hlawkna ûmin a tel ve thei bawk hek lo. Hetiang tui nu atanga diabola malsawmna dawn ai chuan Krista hminga retheih a tha zawk a ni. Harh a hun ta. Lem chang lovin an zing ata chhuak ila, Thlarau Thanghlim duh dan hmangin tihfim i han tum teh ang u. Biak Ina vantirhkoh ang mai, politik leh sawrkara Setana tirhkoh nih kawp hi Pathian pawi sawina a ni. Inthlan dawn hian party tinin political training an nei thin, he training hi party politics boruak chawh nut dan inzirtirna a ni ang tih rinhlelh theih turin a rawn inpuang chhuak thin. He tui nuin a bual chu Upate thleng pawhin hai theih an ni lo. Chutiang rawngbawltute chu tu thlarau nun mah han chawm ziazang an ni lo. Politik tha pangngaiah hian chu tui nu chu leih luh an tum fo lehnghal. Thil tha ti thei lo tura mite hruai an tum a ang mah mah zawk a ni. Hetiang mite tan hian siam tha tura pawl ding tawh phawt chu a hnawksak dawn. Thlarau Thianghlim hnathawh hmangin an tui hnar hi tihfimsak tum zawk ang u. Thlarau Thianghlim hnathawh kan chan theih lohna pawh hi he politik tui nu hian keimahniah a kawng a dal tlat vang a ni. Harhna mei timit leh thintu pawh hi hei hi a ni thui hle. Politik ruih chilh lova insawi reng chunga hmel, nungchang leh thusawia ruihzia lang reng si lah kan tam. Zu leh ruihtheih thil leh mipat hmeichhiatna lama fihlimte an inrin lohna lama phih awh nan Setana hian politik hi a hmang nasa a ni. He politik tui nu hi a sosang tial tial a, intual vuakna a thleng ang tih pawh a hlauhawm lek lek thin. Sawrkar sum hai chhuah tumtute leh sawrkar hnaa inhnim luh beiseite ruling party officeah

1

kan zaikhawm ta luih luih mai a nih hi. Hei hi kalhmang tha a ni zel ang em? Setana thuhnuaia kun siin Pathian hla kan sa ve mai mai a ni thei em? Philipi khuaah khan ramhuaiin a nihna a lo puan khan Paula a lungawi miah lo asin. Kan chawhpawlh lû deuh em? Minister-te an Bangla-ah biak kan intihhmuh bawk a, kan tlar peu po mai. Kan bawhbuai lutuk. A zia lo khawp mai. Sawrkar tanpuina rilru nei hlawm ni ila hetiangin kan awm lo vang. Mahni phak tawka sawrkar ei kan tum vang a ni ber. Diabolan malsawmna min dawntir a tum dan hi a hrisel lo thei hle. Politik tui nu chuan ram tana an thawh tur hliah vek khawpin inpuhmawhna a tisosang thin. Thlarau a cheng lo em mai! Mi retheite vote lei khawm tumna a rawn so chhuahpui ta. A ngam huai huai hnenah kan vote kan hralh mai dawn em ni? Inthlanpui hnuhnung (2003)-ah khan Synod Social Front chuan nuai za sengte pawh awmin a hria. Kan Chief Minister ngei pawh hian a hautakzia leh an senso zat an sawi duh tawh loh thu a sawi chhuak thin tih kan hria. Kristian State inti ngam awm chhun tih dan hi a mak hle ta mai. Bible zirtirna leh Thlarau Thianghlim kan dodal dan a thuk lutuk ta. Khaw tinah mi tlem tê vulh lena chu mite hmanga retheite vote lei khawm hi kan tum zel dawn em? He zawhna hi dik takin vantlang hriatah party leader-ten an chhan a ngai ta. Retheihna avangin cheng za nufa lekin kan zahawmna kan hralh duh zui zel ang em? Hei hi mi retheiten I chhang bawk ang u. Kum 2003-a kan inthlan khan ralthuam chelekna a lo awm ta nia sawi a ni a, hei hi zalenna tihbo theihna a nih avangin MPF chuan ‘tuman hei hi kan phal tur a ni lo’tiin a din tirh atang khan a lo tlangaupui tawh a ni. Pathian kan zah loh dan em em hi mak tak a ni. Nu tak kan ni. Ralthuam cheleka hel pawlte nen kan bei vaih chuan Kohhran leh Tlawmngai pawlte aw pawhin awmzia a nei thei tawh lo vang a, Satanic rule-ah kan lût pumhlum a lo ni tawh ang. Dikna tuman kan sawi ri ngam tawh lo vang a, silai kaw hmawra rorelna a awm zawk tawh ang. Lalthutthleng inchuhna avanga politician-ten chutiang dinhmunah min hnuk lut lui a nih chuan ringtu dik tak chuan kut kan silsan a tul tawh bawk ang. Chu bakah Thlarau Thianghlim hian min tinsan ngeiin a rinawm bawk. Politik tui nu kara Setanan min hreuh chhiatna lai ber chu sawrkar sum bawm hi a ni. Inrelbawl dan leh thuneihnate hi sawrkar sum bawm nen a inzawm vek a. Tuna sawrkar kalhmangah hi chuan Setana tan hmun hi a remchang em bawk a ni. He sum bawm hi Minister-te, Commissioner-te leh Department head-ten an enkawl a, Aizawl atang veka enkawl a ni a, hei hi tuna kalhmang chu a ni. An rinawm loh chuan tumah dang venpuitu tur an awm lo. Judiciary lamin an veng pha lo va, CBI ventir ve kan remti rih bawk si lo. Synod tih dan angin thla tina endiktu tur an awm bawk lo. Budget lah area wise or District wise a department tin tana siam a ni lo va. Minister bialte hian nihlawh deuh turah kan inngai chawp ve ringawt mai a ni. Hna lak thuah pawh District atanga lak theih a awm lo va, Aizawl atanga lak vek an ni. Hmasawnna a chak loh bakah a khai rual thei lo va, mihring pawh kan inringhlel tawn zo ta vek a nih hi. Setana a hlawhtlin hmel thin hle. Zu ngawlveite ang maiin hnam ro siamna tur leh hmasawnna tur sumte chu kan eiru zo ta zel mai niin a lang. Mau tam sazu aiin kan chimawm fe zawk âwm asin. Sum min petu sawrkar laipui lahin kan mawhah a dah mai niin a lang a, kan mawhchhiat tur a ni lo vang. Keini Kristiante mawh liau liau hi a ni. Hetiang hi kan dinhmun dik tak a nih avangin Pathian Thlarauva harhna pawh hian a daih rei loh phah fo va, Setana kan do hlei thei lo ni berin a lang. Krista nungchang leh Chanchin Tha nena inmawi sawkar kan neih theih nan i tawngtai tlat ang u tih leh politik tuifim atangin kan ram awm dan hi i thlir ngam ang u tih hi ka inchah duh chu a ni. Zalenna awm lohna, Pathian Thlarau chhuahsan ram kan ni palh ang e.

Editorial… Mahni inhriat a har hi kan ti fova, a tak tak ah chuan keimah ka inhriattluka min hre chiang tu tumah an awm lo, Pathian a nih ngawt loh chuan. He theory hmang hian I nitin hnathawhna emaw zirna emaw ah khan mi te tan tangkaina pakhat tal I nei ve tawh em? Nge mi te tana hnawksak leh mite harsatna siamtu I ni zawk? Tih hi han ngaihtuah teh le.

2

Gross National Happiness Joshua Lalrempuia Kar hmasa mai khan TV news channel ah Bhutan chu khawvel a hnam hlim ber a puan anih thu ka hmu a. Ngaihtuah a ti thuiin chik lehzual a bihchian ka tum ta a. Engtinge khawvel hnam hlim bera puan an nih theih dan zawn chhuah tumin hmun hrang hrang atangin hetiang lama thuziak ka chhiar phah a. Bhutan lal, Jigme Singye Wangchuck hian kum 1972 khan Gross National Happiness (GNH) hi alo sawi chhuak tan a. GNH in a tum ber chu mihring nun hmasawnna tehfung atan sum leh pai dehchhuah bakah thlarau lama hmasawnna hman hi a ni. Khawvel ram zawng zawng deuh thaw in ram hmasawnna tehfung atan Gross National Product (GNP) leh Gross Domestic Product (GDP) kan hmang a. GNP leh GDP chuan ei-leh-bar, bungrua leh sum deh chhuah lama hmasawnna hi ram hmasawnna tehfung atan a hmang a ni. Gross National Happiness hian innghahna lungphum pali a nei a. Chungte chu - (1) Inkhuangrual taka vantlang leh ei-leh-bar a hmasawn, (2) hnam thilhlu vawnthat leh chawisan, (3) ram leilung humhalh, leh (4) inrelbawlna tha te an ni. Hmanni lawk khan World Bank managing director pawhin "Bhutan GNH policy atang hian World Bank in thil tha tam tak kan zir chhuak a ni" tiin, khawvel ram dang pawhin entawn ve turin a rawn hial a ni. Liberal economists ten mihring hlim zawng tehnan kan eiral/hmanral leh kan hlep zat te an hmang thin. GNH in a tum ber erawh chu mihring hmasawnna tak tak thlen turin ei-leh-bar a hmasawnna leh thlarau lama hmasawnna kal kawp leh inchawm tawn tir hi a ni. Khawvel ram dang zawng zawngin GNP leh GDP chu ram hmasawnna tehfung atan an hman laiin Bhutan lal chuan "kan ram chuan Gross National Happiness (GNH) kan hmang zawk dawn" a ti tlat mai hi chhinchhiah tlak tak a ni. Mihring pumhlum chu tisa leh thlarau a siam a ni miau a. Tisa lam hmasawnna ringawt buaipui a thlarau lam hmasawnna kan hlamchhiah leh si chuan kan hmasawn dan a khingbai hle dawn a. Thlarau a hmasawnna tel lo chuan nun kawrawng tak kan nei anga kan lungawi tak tak chuang lovang. GNH hi Bhuddist pachal hmuhchhuah ni mahse, keini Kristiante tan pawhin zirtur ropui tak kan nei. Kan thlarau nunin Krista nena inlaichinna alo neih tawh hian hma a sawn zawh poh leh kan lungawina a zual zel dawn a nih chu.

CHANCHIN THARLÂM KEIMAHNI… Nimin khan BMCF Area II ten camping follow-up kal zel, fellowship leh Bible Study Rev. Hrangkhuma leh Area leader te kaihhruaina in an nei a, an hlim hle. Tunkar nilai khan Grace Home lamah pawh camping follow-up tho Rev. Lalhmingchhuanga leh Rev.Sairengpuia ten an hmanpui bawk. Kan member pui Lalfakawma pa Pu Saichhuana Adl C.S. (Manipur) internal bleeding avanga boral ta chu Manipur-ah State Funeral kimchang pek a nih hnuah, an chenna Aizawl Zotlang ah vuiliam ani ta. Khawhar chhungte kan tuarpui takzet a ni. Kan member, BMA leh MSA thil tihna hrang hranga zaia min awi thin Nl.Mimi pawh Rimawi Khawvel Award 2006-2007 ah, category pahnih Best Album of the Year leh Best Female Love Song Singer-ah te nominate ani a, a tlin ngei kan duhsak e. Keimahni tih column ami tur hi kan member pui te leh keimahni kaih hnawih thil dang lawmna ani emaw thil dang ani emaw, kan inhriatpui theih chanchin kan neih te I thawhkhawm thin teh ang u. Chanchin zawng zawng hi veng pakhat leh kil khat atang ringawt hi chuan inhriat zung zung te a harsa a, han ti hram hram the u khai. –ED

3

MIZORAM LAM… Bible chhiar khap … Tunlai hian Central Kristian Thalai Pawl (CKTP) thuchhuak angin Mizoram hmun hrang hranga KTP Branch hrang hrangten Bible chhiarchhuah beihpui an thlak a, hetihlai mek hian Mizoram State Pollution Control Board (MPCB) chuan, zan reia mike hmanga ring tak taka Bible chhiar chu dan-in a phal angina a khap. MPCB chuan thuchhuah siamin, The Noise Polution (Regulation & Control) Rules 2002 chuan phalna nei lova mike hman leh, zan dar 10 hnuah phei chuan tihchhuah reng reng a phal loh avangin, pawn lama mike nena ring taka Bible chhiar mekte chu an tih dan thlak turin an ngen a, mimal harsatna awm thei a ni tih hriaa thawm dim turin an ngen a. MPCB chuan zan reia Bible chhiar vanga harsatna tawkte hnen atangin Complaint an dawn thu a puang bawk. - khampat.com Naupang ngaihsaktu neilo … Friends of Children, Chaltlang chuan Mipa naupang pahnih (Phir) an enkawl mek chu an chhungte an zawng mek a, naupang chhungte hi North Marpara, Chhimtuipui District-a awm niin an hria a, mahse tuh thlengin naupang te hi ngaih ven an la ni lo a ni. Hemite unau hi May ni 2 khan Aizawl Civil Hospital-ah an piang a, an nuin a thihsan avangin an pi chuan Chawnpui-a Isua Hnung Zuitute Camping Centre hotute kutah a hnutchhiah a, mahse, Child Welfare Committee-in naupangte chu he hmun hi an awmna chi lohah an ngaih avangin Friends of Children chu anmahni la chhuak a enkawl lailawk turin a ti a, tichuan Friends of Children chuan la chhuakin an enkawl zui ta a ni. Friends of Children chuan naupang chhungte hi North Marpara, Chhimtuipui District-an an awm niin an hria a, mahse tun thlengin naupangte hian ngaihventu an la nei lova, thla hnih chhunga ngaihventu an la awm lo cheu a nih chuan naupangte hi a neitu nei lo (abandoned)-ah puan an ni dawn tih an sawi a, heng naupang chhungte emaw hria chuan Ph. No. 2344931/2340870-ah hriattir turin Friends of Children chuan ngenna an siam. - khampat.com China Thalai Rual Aizawl ah… India sorkar leh China sorkar-in thuthlung an siam tawh - thalaite intlawh tawn chu kalpui mek a ni a, a thawh hnihna atan ni 10 cham turin China thalai mi 100-in India ram hmun hrang hrang an fang dawn. He programme-ah hian Aizawl pawh telin, zan hnih riak turin November ni 21-ah an rawn thleng ang. Lengpui Airport-ah hian hnamlam te entirin lo hmuah an ni ang a, anmahni lo dawngsawng leh lo kaihruaitu tur pawh nimin khan Vanhela Pachuau, principal secretary hova relfel a ni. An cham chhung hian chief minister-in Tourist Lodge-ah zanriah a buatsaih sak ang a, sikul \henkhat tlawhpui an ni ang. China president Hu Jintao, November 2006-a India a tlawh tum khan India Prime Minister nen thuthlung siamin, kum ruk chhungin thalai mi 500 tan ram pahnihin intlawhtawnna programme huaihawt tura duan a ni. China Thalai rual hi Hu Chun Hua, 1st Secretary of Central Communist Minister, Youth Leaque of China and Honorary President of all China Youth Federation-in a kaihruai a ni. - The Aizawl Post Women Pollytechnic – in Exam Boycott Dawn… Women polytechnic Students' Union chuan general meeting neiin sorkara an thil phut hrang hrangte kar nan November 19- 20 hian exam boycott ni se tiin an rel. An la hlawhtling lo a nih chuan a tul anga hmalak an tum niin an thuchhuah chuan a sawi. Thuchhuah chuang hengte hi October thla chhung ngeia tih hlawhtlin sak turin chief minister an ngen niin a sawi – industrial visit -cum- study tour neih chhunzawm leh kumtina nawr a ngaih loh nana higher & technical education department budget-a telh; technical puala directorate hran siam; Mizoram Polytechnic, Lunglei leh Women Polytechnic, Aizawl tana bus thar pakhat ve ve pek; polytechnic pahnih atanga diploma zirchhuak te'n BE awlsam zawka an zir theihna tur optional question siam sak an nih theih nana CM hmalak sak leh polytechnic pahnih atanga diploma zirchhuakte apprenticeship training hlawh semi-skilled hlawh ang pek ve te a ni. - The Aizawl Post DGP hlui thuziakin police officer-te mak tih a hlawh… Mizoram leh Meghalaya DGP hlui Lalngheta Sailo in Rev. Chanchinmawia thihdan chungchanga a ngaihdan ‘article’a ziahah mahni inthat nia a rin loh thu te, mi thah a nih theih dan leh a chhuitu police te chhui hmaih theih nia a ngaihdan hrang hrang a zaik chu Mizoram police senior officer

4

thenkhat te mak tih a hlawhin hetianga mipui hriata a ngaihdan a vawrhdarh vak chu a hun rih lo nia an hriat thu Aizawl nitin chanchinbu pakhat chuan a tarlang (he article hi buannel.com ah chhiar theihin a awm e). - buannel.com

Bangalore Mizo Nula/Tlangval Fel 2007-2008 Chawlhni liamta, (11th Nov)-a Bangalore Mizo Association ten kum tin kan lo tih thin dana, Bangalore-a Mizo nula/tlangval awm te zinga fel kan tih lungrual taka mipui kalkhawm tena kan thlan te.

LAWRKHAWM Bangladesh Cyclone-in Nuai… Cyclone danna (vaccine)-a injection nachang hr eve hek lo le, kumtin deuh thaw an tuar a nih hi. Mi sang dawn an thi tawh a, engemawzat an bova, chhanchhuahna leh bo zawnna hna thawh mek ani. He cyclone siper hi Mizoram lamah pawh an lo tuar a, Khawlian khua-ah in engemawzat a tichhia ani. - PTI Bipasha: Asian Hmeichhe Sexy Ber… London atanga chhuak Asian Newspaper pakhat Eastern Eye chuan a vawithumna atan Asia khawmualpuia hmeichhe sexy 50 a thlang chhuak leh ta a. A vawihnihna atan Bipasha chu Asia khawmualpui hmeichhe nalh leh itawm bera thlan a ni. He nihna hi Bipasha hian 2005 khan alo

5

nei tawh a ni. Bips hi Madhuri Dixit-in a dawt a, ani hnuai ah hian Pryianka Chopra a awm thung. – PTI English Premier League-a pathumna ni mêk Manchester City chuan Thai player 3, Suree Sukha(fullback), Kiatpravut Saiwaew (centreback) leh Thirasilp Dangda (striker)-te chu kum thum chhung atan contract an sign tir ta. Thaksin Shinawatra, Thailand Prime Minister hluiin July thla khan Man City club hi $162.6 million-in a lei a. Asia football tihhmasawn leh Man City hlawhtlinna chu a duhthusam ber a ni. Man City Coach, Sven- Goran Erikkson pawh tunkar khan Asia ah han kal in, academy leh club thenkhatte nen thawhhona an ruahman nghal a. Chinese club pakhat Shanghai Shenhua atangin mi pathum, Striker Gao Lin, goalkeeper Wang Da Lei leh midfielder Mao Jianqing te chu trial nei turin an thlang bawk. Thaksin Shinawatra hi eirukna chung changah thubuai neiin, a pianna Thailand-ah haw ngam lovin UK ah a la khawsa mek a ni. UEFA EURO 2008 Qualifying round khelh mekah England dinhmun a derthawng hle, an awmna Group E-ah point 23 hmu a pahnihna ni mekin, game khat chauh khelh tur an la nei a, Wednesday (21st Nov) hian an group leader Croatia (26pt) nen an khel ang. Croatia hian an home ah 2-0 in England hi an lo hneh tawh a ni. Pathumna ni mek, Russia (21pt) in away game pahnih (Andorra leh Israel) khelh tur a la nei thung. Euro ‘08 Qualifying khelh mek a top scorer-te:12-David Healy, Northern Ireland 10-Eduardo da Silva, Croatia 8-Cristiano Ronaldo, Portugal 7-Jon Dahl Tomasson, Denmark EPL Club hrang hrang Dinhmun (as on 16th Nov 2007) Arsenal 30pts, Man Utd 30, Man City 26, Chelsea 25, Liverpool 24, Portsmouth 23, Blackburn 22, Aston Villa 21, Everton 20, West Ham 18.

… chhiar liam mai mai chi… “Mi rill eh ngaihtuah chik/peih te pawh hi lung lengin kan kur hnep hnup mai zawng a nih hi maw!!”… .- Obeda “Mizoram khera Xmas hman hi a tulna ka hre lo, Blore ah tiho dial dial ila a fuh zawk daih” -Mapuii of UTC (hmanpui tur nei tha fû niang) “1… 2… 3… cheese a ka tel lo kha chu a pawi khawp mai, chhinlung magazine hralh a tlak loh phah dawn nih kha”- Pu Rinawma (confi bon theng) “Tunlai khaw awm dan hian NUPUI neih a demand riau mai, tih hukz a ngaih hmel tlat… mahse tunge niang”… - James, Joshua, Marema (an vai hian Shantinagar Mizo veng V/C member an ni) UTC paho an hming (kohna) thenkhat kan han tarlang e, an hming pangngai nen lo phuahrem mai teh u: Pu Zion-a, Evan. Rohmingliana, Pu Chân-a, Pu Bawngsai-a(BS-a), Pu Thou art-a

6