Bma Aw: 25th May 2008

BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007 Vol XIII Issue No. 18 Bangalore Mizo Association Pathianni Tin Chhuak Chanchinbu Date: 25th May 2008 Phek Khatna

BMA Sumtuakna Ball Pen, Rs 10/- man chauh leh Lucky Ticket Rs. 20/- man chauhte zawrh chhuah mek zel a ni a, member-ten tlawmngai takin i lei zel ang u khai. Lucky ticket phei hi chu nakum BMA Silver Jubilee kan lawmna atana sum tuakna a ni a, thahnem i ngai ang u khai. % BMCF member leh YWAM Bangalore member ni thin Gilbert Lalinpuia 33 yrs s/o Lalkhama, Zemabawk fatlum ber chu YWAM Mumbai outreach a an nei nuamsam lo haw kha a room ah zanlaia borala hmuh a ni. % BMA General Secretary 2004-05 & 2005-06 leh BMA Sports Secretary 200304, Tv. Lalmuanpuia chu tunlai hian natna khirh takin a tlakbuak mek niin report a awm a. BMA member ten kan hruaitu hlui hi tawngtainaah hre tlang ang u. % Kan member Anita Ruatkimi Ralte chu Welcomgroup Graduate School of Hotel Administration, Manipal a lut turin All India Entrance test-ah Rank 20a ni phak a. Kan lawmpui hle. % Kan Asst. Treasurer, Nl. Blessy Sailo chawlh hmanga Aizawl lampanga hun engemaw ti chen cham pawh a lo thleng thla leh ta e. % Bangalore-ah zirlai leh hnathawk turte in rawn chhuk zel tih kan hria a, Bangalore Mizo Association chuan kan lo lawm tak meuh che u a. Mizo thil tihnaah te thahnemngai taka intawiawm tlang zel turin kan ngen a che u. BMCF Inkhawm Programme 1 June, 2008

Bangalore Times (Times Of India) Thu Chhuah R.Lal Rinawma Bangalore Times May ni 24 chhuak ( Downtown Plus) phek 9 ah chuan “ A LITTLE CORNER OF MIZORAM” tih a awm a. A hnuaiah Wesley English Church thlalak chiang taka tarlan a ni. Hei hi Piali Dasgupta rawn file a ni. He thil hi kan nuin a lo chhiar a, ka tennis khel haw chu min lo entir vat a, “report dik fumfe lo a tel....” tiin. Ka chhiar ve thuai a. Thil pahnih ka mit la zual a awm a. Pakhatnaah chuan: Bangalore Mizo Association chungchang sawinaah kum 1975 daiha din ni tawh chu registration nikum atanga neih ang chauh a ziak kha a dik lo deuhvin ka hria a. BMA hi a din hlim atanga Karnataka Societies Registration Act dana registration nei char char thin a ni a. Hun engemaw ti lai deuh khan hruaitute ngaihthah vang emaw ni kum 2 khat chu registration a chat lak a ni mai awm e. A hrilhtu lam tihsual nge a lo chhuahtu tihsual zawk aw? Newspaper-a tarlan meuh atan chuan a fel hlel viau. Pahnihnaah chuan: Wesley Biak in chu Bangalore Mizo Association ten an memberte tan ‘hire’ angin a sawi a. Hetah hian thil dik lo tak a awm a. Pakhatah chuan he Biak in hi BMCF hminga hman a ni a, BMA hi a lang thei lo. Tin pawi tak pakhat chu: Biak In hire anga tarlan hi a fello hle. Wesley Kohhran lam miten lo chhiar se a rik dan hi an duh lo mai awm mang e. Sawifiah ila. Kum 1988-89 atanga he Biak in hi hmang tan kan ni. Assembly of God Church, Cockburn Road atangin kan insawn a. Hetiah laia Presbyter, Pastor Henry leh Kohhran hruaitute thatna azara hmantir kan ni. Hun a lokal zel a, Wesley Kohhranten an thatna lantir zelin phal leh inhawng takin min hmantir zel a. Hei hi BMCF hruaitu lam pawhin kan lawmzia kan lantirin ‘inkungkaihna tha tak’ neih reng tumin tan kan la ve thin a. ‘Wesley Family in ni e” tia tawngkam tha min hlan thin chu keini pawhin kan thiam ang anga lo chhawn chho ve thin kan ni. Hun engemawti deuh atang khan tlema boruak mam zan lo deuh a lo awm hnuah BMCF chuan sum a vawm lut ve ta thin chauh a ni. Hetiang a nih hnuah pawh hian ‘business term’ deuhva hire ang chuan an ni lam pawhin an lantir duh lova, BMCF lam pawhin electric bill leh senso kan tum pui ve ang chauha in ngai tur kan ni. Hire tih ralah chuan tuna Rs. 4,000/- kan thawh ve thin hi a beitham hle bawk a ni. Wesley Kohhran lam thlirnaah chuan an Kristian unaute phal taka min hmantirna kha ti tha an inti ve em em a, an ti tha em em lah tak a. Chu chu keini lam pawhin kan tihrik dan tur a ni.

(Inkhawm hun 3:00pm)

Hruaitu: Pi Toni Lalhmangaihzuali Tantu : Tv. Dr. John Laldingliana Tawngtai Rual Special No. : Nl. Gospel-i Thusawitu: Rev. C. Lalmuankima

He news reporter hnenah hian, “ Mizo inkhawm chu Wesley Church ten an family angah min ngai a, kum rei tak BMCF a hmantir tawh a ni”, tih ni mai se chuan anni lam tan pawh chhiar a nuam zawk ngei ang.

Vol XIII Issue No. 18

Bangalore Mizo Association

Editor Lalengzuala Ph- 9972 235 314 Joint Editor C. Lalrinfela Ph- 9844 783 282 Circulation Staffs: Ruby Lalremruati R. Laltleipuii

E-mail: [email protected] Website: www.bangaloremizo.info A man (thla thum) : Rs. 60/Editorial Neitua Inngaihna Mizote chauh pawh ni lo, Indian-ina kan tlakchham lian tak mai chu ‘Neitu nihna thinglungput lohna’ hi a ni awm e. He thil ropui tak, hetia han ngaihtuah maia ho hmel ang reng tak si hi a pawimawhzia kan zirchhuah a tul a ni. Pawl thil leh pawl thiltihnaah te re re hian a neitu thinlungpu kan awm loh chuan thil a hlawhtling lo fova, chutih rualin kan hmanrua te leh kan thil neihte pawhin neitu thinglungpu an awm loh chuan a tuar fo thin. Hei hi Mizoten kan tlachham hle a ni. Pawla neitu thinglung pute hi mahni hmakhaw ngaiah te kan puh leh mai thin. Pawl hmasawn nana thil pawimawh tak a nih rualin, pawl chauh pawh ni lo, hman hmasawn nana thil pawimawh tak pawh a ni tel a ni. Hnam changkang apiang mai hian an lo ngai pawimawh a, an lo vawng nung thiam a. Neitu nihna thinlungpu tak chung chuan thil tha lo tihte hi thil har tak a ni. Kan sawrkar hna kan thawh danah te, kan ram inrelbawlna kan khawih chet danah te, kan pawl kal danah te hian he thil hian kawngro nasa tak a su a. Mi pakhat chauhin a neih pawhin mi dangte tan pawha tangkaipui tham a ni a. Kan zavaia neih atan phei hi chuan thil itawm berte zinga mi a nih a rinawm. Neitu nihna thinglung hi put tum theuh ila, kan pawlin hma a sawn ang a, kan ramin hma a sawn ang a, kan hnam pawhin hma a sawn ngei ang.

Pathianni Tin Chhuak Chanchinbu

Date: 25th May 2008

Phek Hnihna

Mak Ka Tih Ber Te Zing A Mi A Ni Lalhriatrenga (UVCE) Ka thiamna leh finna zawng zawng sawmkhawma ka ngaihtuah pawhin ka hlawhchham leh thin, ka ngaihtuah ngun poh leh min tia hian ka hre leh nghal! Khawvel mithiamte hian an chhutchhuak tawh ang em le? Chutia ka ngaihtuah lai mek chuan chu mak ka tih em em ‘Tawnmang’ ramah chuan ka leng leh chu a ni der mai si. Chutia engmah hrelo ang mai a ka awm lai chuan ka thianpa hian min rawn tiharh hlauh mai a, ka harh chian chuan chu mak ka tih em em chuan min kiansan leh mai bawk si!!! Engtia lo awm nge chu ‘Mumang’ chu? tih chuan ka rilru chu a la peng hneh kher mai. Mithiam thenkhat chuan “Kan mut chiah hian kan ngaihtuahna hi chawl ve mai lovin kan mutthilh lai pawhin thil kan ngaihtuah reng a, chu kan ngaihtuahna vakvel chu mumang kan tih hi a ni e” ti an awm a. Thenkhat chuan “Kan mutthilh chiah hian kan thlarau hi keimahni atang hian chhuakin a leng vel a, chu kan thlarauin a thil tawn leh hmuh ang ang chu kan mumang a ni e” ti an awm bawk a. Eng ber nge dik erawh ka hre thei chuang lo. Mak min tih tir zualtu ber pakhat chu Mumang chhawr leh chhawrlo kan awm leh zel hi a ni! Thenkhatin kan mumanga kan thil tawn leh hmuh ang te hi a taka hmu leh tawng kan awm lain thenkhat tan awmzia a nei lem lova. Eng pawh nise, engvangin nge Siamtu Pathian hian chu Mumang chu a siam a, engtin nge a siam chu le? Chu mumang chu kan ngaihtuahna leng vel nge, thlarau nge thil dang zawk? Eng vangin nge Mumang chhawr leh chhawrlo a siam kher? tiin ka in zawt mai mai a!!!! …

Hringnun Warren Buffett Tuna khawvel a hausa ber, pa ropui tak mai nunphung hi tlem i han thai lang lawk teh ang, hei hian mi ropui tak a nihzia a tarlang nasa hle a ni. Kum 11 mi chauh a nihin share a lei a, tun hnu hian a lei tlai lutuk chu a inchhiar a ni! Kum 14 mi a nihin a chanchinbu semna pawisa dahthatin farm a lei a. Kum 50 kal taa a in lei, bedroom pathum nei chu tun thleng hian a la luah a, engkim a duhkhawp a awm niin a sawi fo thin. A car amah ngeiin khalhin bodyguard pawh a nei ngai lo a ni. Khawvela private jet company lian ber a nei chungin, private jet-in a zin ngai lova. A hunawl hman dan tlangpui chu puakzo kan (pop corn) leh TV en a ni a. Bill Gates nen kum 5 kal ta chauh khan an inhmu ve a, chumi tum chuan Bill Gates chuan inanna leh duhzawng inang an nih loh vangin darkar chanve lek inkawm turin hun an ruat a. Amaherawhchu, darkar 10 teuh meuh Bill Gates hian a va kawm a, amah ngaisangtu a ni chhunzawm ta a ni. Warren Buffet hian cell phone a keng ngai lova, computer a inchhawp ngai hek lo. Thalaite hnena a thu chah pawimawh tak tak – Mi dang thil sawi ti mai suh, ngaithla la; ‘marawhchu, nangma’n tha i tih chauh zawm ang che. Pawisa i neih hmang mai mai lo la, i mamawh tak tak chauh lei nan hmang ang che tihte hi kan tana pawimawh tak a nih a rinawm. Pa ropui, nun tlawm tak zawng a ni ngei e!

Vol XIII Issue No. 21

Bangalore Mizo Association

Bangalore Chanchin % Vawiin ah boruak alum lai berin 32oC a ni anga, a vawh lai berin 21oC ani dawn ani. Ruah tlem a sur bawk dawn. Kar leh lamah pawh ruah hi a surh deuh zeuh zeuh reng dawn ani. % Nimin May 24 atang khan BIAL airport, Devanahalli pawh hman tan ani ta a. Airport hmasa lakah chuan a felfai that zia leh a ropui zawk zia thu a hmuna kalte an report ani. Thawktu(staff) lam duh angin an la indaih lova, security leh ticket checking counter vel pawh a felfai tha hle nia report ani bawk. % Karnataka State inthlanpui pawh zawh fel ani ta a. Vawiin hian inthlan result chhiar tan ani dawn. Inthlan chhungin boruak duh awmlo leh buaina lian tham em em a awm hriat ani lo. Mizoram Chanchin %Mizoramah mautam tam vangin thalai 29 an thi tawh niin Times of India, Kolkata edition chuan May 20 chhuakah an tarlang a, hetih lai hian Mizoram chief secretary Haukhum Hauzel chuan district thuneitute atangin mautam tam avanga thi an awm report an la dawng lo tih a sawi thung. The Aizawl Post zawhna chhangin chief secretary chuan a ziaktu Times of India te chu he thu an dawn dan an zawt fiah a, chhanna an la dawng lo niin a sawi.ZAWLBUK.NET %Kolasib MZP te chuan nilaithawhtan khan Kolasib-a higher secondary school dah belh ngiatin total bandh an huaihawt a, "Dan leh thupek kengkawhtu te'n uluk taka hna an thawh avangin chawhma dar 11 vel atang khan boruak pangngai neih zui leh nghal a ni," tiin sorkar thuchhuah chuan total bandh chungchang hi a tarlang. He bandh avanga Kolasib MZP hruaitu thenkhat Police in an mante pawh a ni hian chhuah leh nghal an ni a, nilaithawhtan zan vek dar 8 atangin bandh hi tihtawp ani. ZAWLBUK.NET %Thawhtanni tlai dar 6:20 vel khan Zemabawk Falkland Veng huam chhungah BSF sipai motor a chesual a, a chhunga chuang mi 15

Pathianni Tin Chhuak Chanchinbu

zingah pathum an thi a, mi 12-in hliam an tuar a, hliam tuar zingah hian naupang kum 5 mi pakhat a tel. BSF motor hi sikul naupang phur thin mini bus hring, Swaraj Mazda No. JK 01H 8846 a ni a. Tlai lama BSF sipai hnathawk phur hawng lam, Sector Hqrs thlen hma, Mount Ararat Higher Secondary School thlang lawk kawng zal laiah chesualin kawngthlang meter 100 vela thui a lum a. Accident-na hmunah sipai pahnih an thi nghal a, pakhat chu Presbyterian hospital Durtlang thlenpui a nih hnuah a thi leh niin Traffic Police te chuan an sawi.ZAWLBUK.NET % Chanmari West Park siam thar chu nimin khan Urban Development & Poverty Alleviation director B. Darkhuma'n a hawng. He Park hi Sq. mt. 15,000 vela zau niin kum 1992 khan Chanmari West Branch YMA in thing te phunin a lo cheibawl tan a. Thingkung puitling 60 awmin Chawlhbuk 4, thut hahchawlhna block 9 a awm a, pipu siam a ni bawk. ZAWLBUK.NET % Thawhtanni khan Kolkata-ah United States Consulate General Henry Jardine chuan Kolkata LO kutah Mizorama mautam avanga tam tuar, Saiha District-a awmte tana US sorkarin a pek cheng nuai 20 chu a hlan. Henry Jardine chuan, "US-in tun ang huna Mizoramin harsatna a tawh mek chu hriain US hian an tuarpuizia lantir nan he tanpuina pawisa fai pek hi ruahman a ni," a ti. ZAWLBUK.NET % Directorate of Higher & Technical Education, Mizoram Hmeithai Association leh IndoRussian Friendship Society te bultumin Russia rama university thenkhatah Mizo tan MBBS, BDS, BVS, BBA, BCA leh technical course dang thenkhat a zir theih dawn niin H&TE Director Dr. HL Malsawma chuan a tarlang. H&TE Director tarlan danin, Mizo zirlai tana Russia university-a technical course chi hrang hrang zir theih dan chungchang hi kar leh Thawhtanni khian Vanapa Hall-ah sawifiah a ni dawn a, a duh apiang a tel theih. Chawhma lamah zir dan kalhmang sawi a ni ang a, chawhnu lamah

Date: 25th May 2008

Phek Thumna

admission a tih theih nghal dawn a; mahse admission fee leh thil dang tul atan Rs. 75,000/- pek phawt a ngai dawn a ni. On the spot admission ti tur hian Kolkata-a Russia Consulate atangin mi pawimawh an lo tel dawn niin an tarlang bawk.VANGLAINI.ORG % Nizan khan Tuidam-a Horticulture Quarter Assam Type pakhat a kangral vek a, kang thelhtu mi tlawmngai zinga 22-te chu Gas Cylinder puak vangin an hliam. Hliam zinga na zual 5-te chu nimin khan Aizawl Civil Hospital rawn thlenpui an ni. In kangah hian Gas Cylinder 3 a puak a, kangmei chhuahchhan hi hriat a nilo a, kangmei chhuah zan hian a in luahtute hi dawlohna avangin damdawiin lamah an awm ani.VANGLAINI.ORG % Champhai-a Fire Service Motorin zirtawpni tlai khan DC Office hlui bulah nu 1 a chil hlum. Kangthelh Motor-in a chilhlum hi Lalzarmawii, kum 44 mi, Champhai Bethel Venga khawsa a ni a, tunge a nih tih hriat lawk a nih loh avangin Champhai Police Station-ah lak a ni a, hemi hnu hian Lalzarmawii, Bethel Veng mi a ni tih finfiah a ni a, Postmortem a nih hnuah nimin khan vuiliam a ni. He Fire Tender Motor hi Driver Lalhmachhuana chuan a Driver ni lo, Lalawmpuia Hnamte, Fire Service-a mi tho hnenah a chahbi nen a hlan a, Lalawmpuia chuan he Motor hi chak taka khalhin kawngsira awm, Lalzarmawii chu suthlu-in a lu-ah a chil zui avangin ka pawh chhawn lovin a thi nghal a, pawikhawihtu Lalawmpuia hi a tlanbo avangin Police-te chuan an zawng a, nizan khan man a ni ta a ni. Driver hi man a ni tih hriat a nih veleh Champhai Bethel Veng tlangval rual leh mipui thinrim chu Thana-ah an tlan khawm a, Driver ni lo, mi chilhlumtu chu hmuh an duh thu an sawi a, Lock-up-a a awm chu hmuh an tum a, hei hi Police-te chuan lo dangin an innawr buai a, hetah hian Police ASI pakhat lu-ah lungin na taka vawm a ni a, hemi hnu hian buaina chhuak zui lovin khawtlang hruaitute chuan mipui thinrim chu an haw tir thei ta a ni.ZONET.IN

Vol XIII Issue No. 21

Bangalore Mizo Association Pathianni Tin Chhuak Chanchinbu

Khawvel: % Colombia rama an hel pawl liantak pakhat FARC an tih ami hruatu Pedro Antonio Marin chu nimin khan lungphuchawl in a boral. Tin, nimin chawhnu lam khan Colombia ah hian 5.6 Ritcher scale a na in lir a nghing a, mi 6 an thi a 10 velin hliam an tuar nia report ani. % Punjab-a Panchayat inthlanna-a tharum thawhna thleng avangin he state chhunga Congress MLA 41-te chuan Inrinni khan banna an thehluh thu Punjab Congress President, Kaur Bhattal chuan a sawi. Hei bakah hian Congress party chuan he state chhunga President's Rule puang turin an phut thu an sawi nghal bawk. Bhattal chuan MLA-te hian an banna lehkha hi ama hnenah an thehluh thu sawiin, heng lehkha hi Congress President Sonia Gandhi hnenah thlen leh a ni ang a, ani hian thutawp a lo siam dawn a ni. Congress thupuangtu, Bir Davinder chuan banna an thehluh chhan hi state chhunga tharum thawhna thleng an duh loh zia lantirna a nih thu a sawi.VANGLAINI.ORG % Cheryl Bart leh a fanu Nikki(Kum-23) te chu nufa a khawvel tlang sang ber Mt. Everest lawnchhuak hmasa ber an ni. Cheryl te nufa hian April 1 khan an lawn hi tan in a tlang chhip ah hian oxygen tam loh avangin reilote chiah an awm ani. Hemi te nufa hian khawvel tlangsang hrang hrang an lo lawn chhuak tawh ani. Inleh siak: English-Mizo: Self-pity is our worst enemy and if we yield to it, we can never do anything good in the world. Helen Keller Mizo-English: 1. Thaparmawi, ka tan i mawi chiangkuang. 2. U Tawn, i tha ngei e. I hnar in chakai ek a iang. On this day:
1935 : Jesse Owens, Ohio State University world record panga a khum a, a parukna atan 'The Big Ten Conference Track and Field Championships' ah lawmman a la leh.
1953 - America-in Nuclear Nevada Test Site-ah khawvela a vawikhat nan Nuclear a test.
1963: Mike Myers, actor leh comedian lar pianni.
1975 - Lauryn Hill, zaithiam pianni.
2001: Erik Weihenmayer(32yrs), mitdel Mt. Everest tlang lawn hmasa berin atlang chhip a thlen ni.
2005 - Sunil Dutt, Indian film chan thiam leh politician boral ni.

Date: 25th May 2008 Phek

Infiamna: % Manchester United chuan a vawi 2-na atan Champions League Champion no mawi chu an chawi leh ta. Final zan hian Penalty shoot out ah 6-5 in Manchester United hi an chak a, tun champions league hian vawikhat mah chakloh neilo team awmchhun an ni. % Nizan khan Italian Cup final chu Roma leh Inter Milan ten an khel a, Roma hian 2-1 in Inter Milan hi an hneh ani. Roma tan Perrotta leh Philippe Mexes ten goal an khung a, Inter tan substitute tanga lo lut Pele chuan a rawn thun ani. He Italian Cup ah hian kum 4 ngawt a zawnin hemi te club pahnih hi an in tum tawh ani. % Vawiin a Formula one tlan tur hi Italian driver Giancarlo Fisichella tan vawi 200 tlanna ani dawn a, formula one a tlan tan tirh atangin Fisichella hian fans te lawm a hlawh hle a, amaherawhchu vawiin intlansiak naah hian qualifying round a atlan muan avangin a hnu hnung berah a awmdawn ani. % Chelsea FC chuan an coach Avram Grant chu an ban ta a, coach thar tur hian tumah ruat an la ni lova, Barcelona Coach hlui Frank Rijkaard, Inter Milan coach hlui Roberto Mancini leh Guus Hiddink te chu he hna chelh tura Chelsea in an biak mek an ni a. England leh Manchester City manager hlui Sven Goran Eriksson pawh he hna atan a biak anih thu sawi ani. % Kum 2007-08 chhunga neih, NIS Deploma in Sports Coaching Course ( National Qualified Coach) Training, Bangalore-a zawh takah Mizo tlangval Joseph Lalsiama, Electric Veng, Aizawl chu pakhatna a ni. Main subjectah topper niin certificate leh trophy mawi tak a dawng. Joseph Lalsiama hian mark 66.4% a hmu a, 65% hmutu R Vanlalnghaka, Chanmari, Aizawl chu pahnihna niin, V Lalnienga, Robert Zohmangaiha, Lalhmangaihsangi te pawh a titha pawl an ni. MATA chuan heng mite sponsor-tu Sports&Youth Services Deptt. chungah lawmthu a sawi.ZAWLBUK.NET

PG ACCOMODATION AVAILABLE PG Accomodation available in Lingarajapuram, Bangalore-84 with good facility and food. Contact: PC-a Phone: +91 99804 74918 Rocky: +91 98861 23354 Verse of the Day: Tin, I vanglai hian I siamtu hre reng rawh. Ni thalote a lo thlen hma leh “Lawmna reng reng ka nei lo ve” I tihna tur kumte alo hnaih hma hian. Thuhriltu 12:1

BMA Office Bearers 2008-2009: President : Rev PC Lalduhawma Vice President : Pu Josiah L Ralte General Secretary : Mâdawnga Hauhnâr Asst.Gen. Secretary : Lalengzuala Treasurer : Rebecca Lalmalsawmi Assistant Treasurer : Blessy Sailo Secretary i/c Sports : R. Lalremruata Secretary i/c Cultural: Terence Lalthlamuana Secretary i/c Academic & Human Resources : Lalrothara Tlau