Bma Aw: 11th February 2007

Vol . XII Issue

No.6

An Official Organ Of The Bangalore Mizo Association Dt.11.02.07

ENG KAN TI TA NGE.......KHAWIAH NGE KAN ZO NUN MAWI KHA ??? Tûn hnai tê-a kan Patron Dr. HT. Sângliana chunga amah tihmualpho tumna ni âwm tak thil thleng, Bangalore leh a chhehvêla Kristian harsatna tâwkte ngaihsak lo leh an thlavâng pawh hauh lo anga puhna leh, amah pawhina a hriat hauh loh thil ni si-a a tihtûr ti lo nia puhmawhna thu Mizoram lam Chanchinbu, The ZOZAM Times February 5, 2007 (Thawhtanni)-a chhuaka târlan a han ni thut mai hi amah Pu Sânga tân na tak a nih mai bâkah hnam leh khawtlâng ang pawha mualphona a ni, a pawi thîn ngawt mai (He Chanchinbu thuziak leh a kaihhnawih dangte hi kan website www.bangaloremizo.info –ah en theih an ni). Bangalore khawpui leh a chhehvêla Mizo khawsa mêkte hi sâng khat emaw êrhâwrh chauh kan ni a, inlungrual thêm âwm tak pawh kan ni e. Amaherawhchu he thu belhchiandâwl lo, Pu Sânga tâna hmingchhiatna nasa tak thlen thei hi ama tân chauh a pawi a ni lo va, Mizo zawng zawngte tân thil pawi leh zahthlâk, mualphona lian tak niin a lang- he thu irhchhuahna hnâr hi kan Mizopui ngei nia a lan miau avângin (BMA member a ni em tih erawh chu hriat a ni rih lo). He thil hi Bangalore Mizo Association chuan a ngai thutakin pawi a ti tak zet a; February 11, 2007 (Pathianni)-a Executive Emergency Meeting pawhin hêng thu hi thlîr hovin hetiang thulawi lo hmanga inbeihna leh intihmualpho tumna hi na takin a dem a; tûn hnu-ah kan khawtlângah hetiang thil hi thleng leh tawh ngai lo se a ti êm êm a ni. BMA chuan khawtlâng boruak hrisêl leh nuam tak kan neih thin hi vawn nuna, hnam dang kâra kan khawsak mêk lai hian kan hnamzia- Zonunmawi vawn him tlat ni se a duh takmeuh meuh va, chumi atân chuan kan thiante emaw, mi tupawh, an chanchin mawi lo lam leh duhawm lo lamte mi te hriata puanzâr kher te hi tha a ti lo êm êm a. Dâwt thu leh thu tling lo ngat phei chuan pawi a khawih thui nasa lehzual a; chuvângin hetiang kawnga mi tinte fimkhur tûr leh inpumkhatna boruak tha siam kawnga theihtâwp chhuah theuh zâwk tûrin member tinte a sâwm tak meuh meuh a ni. Pu HT. Sângliana, Bangalore Mizote mai ni lo, hmun hrang hranga Mizote min tihmingthatu leh mi dangte tâna inpe, mi chak, huaisen leh taima chunga thilthleng demawm tak hi kan khawtlâng tân dârthlalang ni se; hmalam hun zêlah mi tinte fîmkhur ila, khawtlâng boruak nuam i siam chho zêl ang u. (K.LALTLANKIMA)

(K.LALROKIMA)

General Secretary

President

Bangalore

Mizo

Association

??? Lalpa Pathian hnenah chuan ka chapona min lakkiansak turin ka ngen a, mahse Ani chuan, “ Ni lo ve, I chapona chu ka lakkiansak che ngai lovin nangmah khan bansan mai ta che”, tiin min chhang a. “Anih leh Lalpa ka tawrhna zozaite hi min lak kiansak ta che”, tiin ka ngen leh a, mahse Ani chuan, “ Ni lo ve, I tawrhna te hian ka lam hnaih zual zel turin a pui che asin”, tiin min chhang leh a...

Tawngtaipui Tura Sawmna Feb. 15 khian Yangon (Myanmar) ah kan nupain kan kal dawn a. Myanmar Evangelical Graduate School of Theology chuan an FEb. 17-a an Graduation ceremonya thusawi tura min sawm avangin kan kal dawn a ni.Chubakah, Feb. 18, Sunday khian Yangon English Service (9 AM) leh Mizo Fellowship (Chawhnu lamah) thuawi turin min ruat bawk. Feb. 20 khian kan lo haw leh ang. BMCF member zawng zawng min lo tawngtaipui turin kan sawm e. - Rev Dr F Hrangkhuma te nupa (Note : Kar hmasa lama chhuah atana a rawn thawn, a tlai deuh avanga kan telh hman tak loh a ni a, member-ten an mi sawmna hi ngaipawimawhin, i tawngtaipui theuh ang u)

BANGALORE MIZO ASSOCIATION

Editor: Madawnga Hauhnar Newsletter Date Jt Editor: K.Laltlankima Cir. Managers: Lalhriatpuii & Margaret L Fanai Guest Editor; James CVL Thafamkima

KEIMAHNI ** Kan ti bual buala, kar hmasa Valentines Special kan chhu kha kan phur the hurh lutuk a, BMCF Inkhawm Programme dik lo kan chhuah pek. Min lo ngaithiam hram hlawm a niang chu. ** Kan Senior Adviser Pu F Lalbiakmawia, a u damlo tlawha Aizawl lama haw pawh a rawn thlengthla leh ta a. Pu Mawia U hian that lam a pan thei meuh lova, member ten thahnemngai takin i tawngtaipui ang u. ** Nimin khan BMA Executive Committee Meeting neih a ni a, Committee hian BMA Parting Social neih chungchang leh BMA Constitution ennawnna report te a thlir a. BMA AW chhuak lehah hemi chungchang hi rawn tarlan kan tum dawn nia. ** Chhinlung Magazine kha lei tur a la awm reng a. A la lei lo te khan lei theuh i tum ang u. BMCF INKHAWM PROGRAMME 25th February 2007 Hruaitu: Pi Lalnunmawii Tantu:Tv James CVL Thafamkima Thilpek Hlantu:Tv Lalrothara Special Item:Tv Andy Vanlalremtluanga Thuhriltu:Pu Bobby DK Vaiphei Thla thupui : Isua Krista chu niminah nen, vawiinah nen kumkhua pawhin a pangngaiin a awm fovang. - Hebrai 13:8

Vol No. XII Issue No 6 Bangalore Mizo Association Chanchinbu

From Our Guest Editor:

ZORAM LAM CHANCHIN

Tun tum chu kan duhthawh deuh avangin kan lawm ber thin “inkahna” kan tichhuak leh ta lo mai. BMA Parting Social leh Inthlanpui lo awm turin rilru a luah tan a. Khaw awmdan inthlakthleng chho leh thlasik ral lam avangte leh eng eng emaw ‘neuh neuh’ avangtein zan mut lah a har hrep zel mai. Dawn Tisei kan ti hian space hi a heh sawt ta riau; engtia tih chi nge maw ni le ? BMA AW hi theihtawp chhuaha kan buaipui ve thin laiin, inkhawm ban hnua Biak In tual vela a copy thler hniang hnuang leh bal zet zet mai chhar tur awm fo thin hian a buatsaihtutute rilru a tina lek lek thin mai. In lam panga chhiar a tan i hawn hram hram teh ang u. Kan chhiar peih ngang lo anih pawhin Biak In tualah kher hi chuan paih tawh lo ta bawk ila… .

**Khawvel hmun hrang hranga AID/HIV veite, nawhchizuarte leh riangvai leh chanhai te tana hnathawk thintu Francois Xavier Bagnoud (FXB) dintu nu Countess Albina du Boisrouvray chuan Aizawl a rawn tlawh a. Nilaini khan thuthar thehdarhtute kawmin Mizoram-ah FXB chuan nasa zawkin hma a la zel dawn tih a sawi a. Countess hian ruihhlo emaw HIV/AIDS emawa harsatna tawkte chu pawm thiam an pawimawh thu a sawi. ** Thawhleh zan dar 8 vel khan Laltlanpuia (24) s/o Zakuala Bawngkawn Chhimveng chu a nula rimna Inah C.L.Thianghlima (52) s/o Thanga (L), Chanmari W, Aizawl chuan pistol .32 hmangin a lu-ah a kap a, Laltlanpuia hi ka pawh chhawn lovin a thi nghal. Tlanpuia hi a thiante pahnih nen Bawngkawn Chhim Venga Bethesda Hospital bul Zothanzuali

Dt. 18.02.07

BMA AW

(25) d/o Zadingliana te Inah an leng a. Hetih lai hian Zothanzuali bialpa ni a sawi C.L.Thianghlima hi pawnah awmin silai nen a inhrosa a, kawngkhar hawn leh khar chungchang ah pawna awm C.L.Thianghlima hi thinrimin In chhunga Laltlanpuia thu lai chu a mit vei lam pangah a rawn kap ta mai ni a hriat a ni. Laltlanpuia ruang hi Nilaini khan post mortem niin vuiliam nghal a ni. C.L.Thianghlima hi Police ten Thawhleh zan vek dar 10 khan an man nghal. ** Mizoram Excise chuan January 2007 chhung khan Zu zuar - 194, Zu rui - 14,Rak zu - 1977.2550 lts, Zu bilhlai 1289 tins, Dawidim - 31 kgs, IMFL - 341 bottles, Zu sakna bel 59, Motor - 11 an man. ** Mizorama sipai zirna hmun Counter Insurgency & Jungle Warfare School, Vairengte-a training nei mek Nigerian Army officer leh sipai 30 rualte chuan Zirtawpni khan Aizawl an tlawh. Nigerian sipai Officer te hian Aizawl hmunpui hrang hrang leh Aizawl Musuem an tlawh a, Inrinni khan Reiek Tourist Complex an tlawh leh bawk a ni. Nigerian sipai te hi CIJWS-ah January 21, 2007 atang khan training an nei tan a, February ni 25 khian an haw ang. Tun kum chhung hian CIJWS, Vairengte-ah hian Indonesia, USA leh Australia Army te pawh training nei turin an rawn kal dawn thu CIJWS hotuten an sawi bawk. (sources www.thezozamtimes.com& www.zotalk.com) NGENNA

Editorial-a kan sawi angin Inkhawm banah thingpui leh tui inna note paihdarh mai mai lovin a paihna tur dik takah i paih thin teh ang u. Biak In tual a hnawk nuaih zel mai a. A mawi lo em mai.

Dawn Tisei ( Artui ruak chu ) Miss Dorris Miller-i tan chuan a sikul naupang zinga Jeremy-a, pianphunga rualban lo leh rilru chaklo zet mai awm ve chuan a hna chu a ti khirh zual sauh a. Jeremy-a chuan Class lak lai hian thawm riva eng engemaw a chhuah thin a. Kum 12 mi lai ni tawh mah se, pawl hnih chauh a la ni a, a classmate te ai chuan kum 5 laiin a upa nghe nghe a. Chutia, a class-a rualbanlo kawl ve reng mai chu thil dik lo ni-a hriain Miss Doris-i chuan Jeremy-a nu leh pa hnenah chuan an fapa chu rualban lo sikul-a kaltir mai zawk turin a rawn a. Mahse, Jeremy-a nu leh pa chuan, " Kan awmna hnaiah rualban lo sikul kaltirna mai tur pawh a awm si lova, khawngaihin i theihtawp min chhuahsak hram hram teh", tiin an ngen a. Miss Doris-i chuan an chhanna chu ngun takin a ngaihtuah a, chu chhungkaw harsatna chu a harsatna nen chuan a han khaikhin chhin a, Jeremy-a nu leh pa te chu a khawngaih ta hle mai a. Chumi ni atang chuan Jeremy-an bengchheng a lo siam pawh chuan a haider lui ta hram hram thin a. Nipui a lo thaw a, hun inher chuan kan Lalpa thawhlehna ni pawh a rawn herchhuahpui leh tep tawh tihah chuan Miss Doris-i chuan a naupangte hnenah chuan Isua thih leh thawhlehna chanchin te chu a hrilh a, nidang ang lo takin Jeremy-a pawh chuan a ngaithla uluk kher mai. Miss Doris-i chuan a naupang te hnenah chuan Plastic-a siam artui lem hi a pe hlawm a. "He artui hi hawn ula, a chhungah nunna entirna thil engemaw in rawn dah theuh anga, naktukah in rawn keng leh dawn nia a ti a. A tuk a lo thlen chuan naupangte chuan an artui ken chu Miss Doris-i hnenah an hlan hlawm a. A then chuan artui chhungah chuan hnim hring te, phengphehlep lem te, rannung chi hrang hrang lemte an rawn dah hlawm a. Miss Doris-i chuan a hawn pah chuan a hrilhfiah nghal zel a, chung phengphehlep te, hnim hrinte chuan nunna an entir a ni tiin. Nakinah chuan Jeremya artui chu an han hawng ve ta a, a chhungah chuan engmah a lo awm lova, Miss Doris-i chuan Jeremy-a chuan a thusawi kha a hrethiam lo ni ngeia ngaiin artui ruak ringawt mai chu ngawi reng hian a dah kiang a. Chutihlai tak chuan, Jeremy-a chuan, " Miss, ka artui ken chungchang kha engmah i sawi ve dawn lo a mi" a rawn ti a. Miss Doris-i chuan, " Jeremy, a chhungah engmah a awm hleinem" tiin a lo chhang a. Chutah, Jeremya chuan, " Isua thlan pawh kha a ruak i ti sia" a han ti a. Class room-ah chuan thawm ri reng hriattur a awm lo, a reh thap a. Miss Doris chu a hnuk a ulh teuh a, a rawn tawngchhuah leh theih hnu chuan, " Mahse, Jeremy Isua thlan a ruak nachhan kha i hria em ni?" a han ti a. Jeremy-a chuan, " Isua chu an that a, thlanah an dah a, mahse, a pain a tinung leh a ni" tiin a chhang a. Chawlh dar a lo ri a, naupangte hmanhmawh taka an tlanchhuah dawr dawr lai chuan Miss Doris-i chua thutnaah a la thu ta reng a, artui ruak ringawt mai chu enin a biangah mittui a luang zawih zawih a. Chumi atanga thlathum hnuah chuan Jeremy-a chu a thi ta a, a kuang chungah chuan artui ruak ringawt sawm leh pakua, a classmate 18 te leh Miss Doris-i rawn ken chu an dah a.