Bma Aw: 9th December 2007

A-PDF MERGER DEMO

BMA AW

An Official Organ of The Bangalore Mizo Association Registered Under Societies Act of Karnataka No.BLU-S188-2007-08 Date 7 May 2007 Vol XII Issue No. 49 Bangalore Mizo Associ ation Pathianni Tin Chhuak Chanchinbu Date: 9th December 2007 Phek Khatna

KEIMAHNI && Kan member Tv C. Lalrinfela, damlohna avanga St. Martha Hospital a awm pawh Ningani zing khan a chhuak fel ta. && Ningani tlai dar 8 khan Chhinlung Magazine a mi tur panel discussion chu, ropui takin, UTC Studio ah neih a ni. Video nena cover a ni a, en theih tura buatsaih a ni. A ngaihnawm dawn hle ani. && Mandya lama kan member te pawhin practical exam an nei tan mek a, theory chu December 26 atangin an tan dawn. Chutih laiin, Nl. R. Zoramsangi, Iyr BE zirlai chu dem ylination natna avangin Apollo Hospital ah kar khat zet a awm a, doctor ten thla khat chhung tal chu lehkha chhiar loa a awm hahdam a ngaih thu an hrilh a. Ni 14 hian, a pa nen an haw chho dawn a ni. && Mysore lama kan member, Joseph-a, St. Philomena’s College a Iyr B.Com zirlai chu Mysore University aiawh football team ah telin, Chennai lamah khel turin a kal dawn a ni. Tin, C. Lalremmawia leh Muana ten YWAM atangin DTS an zo bawk. HRIATTIRNA

15th Dec. (Inrinni), tlai 3pm hian BMA Executive Committee koh a ni a. A Hmun – Pu K.Lalrokima In, UTC. Committee member te kalvek kan tum dawn nia. BMCF INKHAWM PROGRAMME Pathianni (16th December 2007) Hruaitu : Pu Athang Leivon Tantu : Nl F. Lalhriatpuii Thawhlawm: Tawngtai Rual Special Number: UTC Thusawitu: Dr. HT Sangliana

SING ME A CHRISTMAS SONG -

Obeda Lalhuliana

Dampui duhawm tak, Thil pakhat chauh min tihsak thei ang em? Lehkha mawia tuam thilpek manto ka dil lo che a, In ina vawksa chhim tura sawmna anka ka ngiat hek lo. Tun thlasik khawvawt kian hma ngei hian vawikhat tal, vawikhat chauh tal Christmas hla min sak sak thei ang em? Nipui thereng hram bengchhen laia ngaihthlak ka duh lo va, Fur ruahtuiin kan kaiten a phuh thawt thawt laia ngaihthlak ka chak hek lo. He thlasik khawvawh lai, boruak vawtina ka taksa a hm er vawng vawng lai ngei hian Christmas hla mi sak sak la ka duh a ni. Rimawi dang ruai lovin Siamtu’n a pek che i aw chauh hmang khan Bethlehem daiah mi hruai thei lawm ni? I hlasak turah duh ka thlang lo, ka ngaihthlak duh chu i hriat kha. I hmuh khat em em ka mittui tla i hmuh duh chuan, “Bethlehem mual tlaitla engah, Khuavel sakhming an chhiarin. Tahchuan remna lal a piang ta, Lei miah an chhiar ang maw.” han ti phawng mai la, ka mualpho hmel i hmu ngei ang. Enge ka nih i hre duh em? Enge ka tih thin i hre duh em? I hre duh a nih chuan, “Thimin lei a tuam laiin, Van engin piallei a chhun. Van ho zai mawi a lo ri, ‘Remleng se’tiin an zai.” Min tih khum mai rawh. Chutah zet zawng ka lo inbunfai vek tawh ang a, kawrawng takin mi hmu ang. He khawvelah hian nangmah hmangaihtu leh nangmah ngainatu an awm lovin i hria a maw? I hmel leh i pianzia a ni lo, mi rilru chawh tho dan ka hrilh ang che. Ka bulah lo thu la, i duh leh tingtang pawm tel rawh. Bengcheng lovin Bethlehem bawngin tlawm nghaktu ang maia tlawmin thaw han la l a, “A mi an riang maw van mi a lo piang Bethlehem bawngin tlawm a nghak e” han ti la, “Ropui rawh se, aw ropui ber rawh se”, i tih thlen meuh chuan i zai ngathlatu hi ka lo tui zawih zawih tawh ang. Mi an lungnona i hriata, chumia i tawh fuh tawh chuan i tan engmah an ui tawh ngai lo vang. Zanah lo kal la, mi zawng zawng an mut reh hnuah pawn boruak hipin i thuchhuak teh ang. Bethlehem dai phullenga Berampute awi mu thintu Van dum pawl ruih mai khi min thlir pui la, arsi chanchin i sawi dun ang. Khua a vawh em avangin tawng a harsa ngei ang. Kan thawkchhuah boruak lum chu romei ang maiin kan velah a zam chi chiai ang. Chutih lai chuan he hla hi ngaihthlak ka duh a ni. Lunglenthlak takin, (...phek hnihah chhunzawm a ni)

Vol XII Issue No. 49

Bangalore Mizo Association Pathianni Tin Chhuak Chanchinbu

Editor C.Lalhmachhuana, UTC, Ph- 9845330822 Joint Editor Thaarie Hnamte Vasanth Nagar, Ph. 9886145877 Circulation Staffs: David Laldanfela Joshua Lalramdinmawia C. Lalramthanpuia Guest Editor – Mâdawnga E-mail: [email protected] Website: www.bangaloremizo.info A Man Thla Khatah : Rs. 15/-

Editorial High living, simple thinking Kan Editor awmlo chu, BMA AW pawh a phuai deuh ang em aw ka ti a… A awm dawnlo chuan ka kutah a dah a, hei kan han chhunzawm ve ta zel chu a ni a. Article te leh thu chhuah tur dangte pawh han thawh zel turin kan in ngen e. Bangalore ah Mizo tam tak kan awm ta a. Hnampui zawkte ang a mahni a han tal vel a, duh ang ang han ti thei turin puitlin tawk lohna Mizote hian kan la nei khawp mai. Kan awmdan te kan fimkhur hi a ngai hle ani. Hnam tlemte e tilo hian kan inti champ ve em em ang tih te hi a hlauhawm a. Hnamdang ten eng angin nge min hmuh ang aw tih te hi kan ngaihtuah thin a va tha em. Kan ngaihtuahna kan hman nasat a ngai. Thil kan awt hma lutuk te, mi tih ang tihve kan chak viau ringawt zel mai te, finna awm leh miah silo, engemaw huna quality awm leh miah silo nih si te hi, thil zahthlak tak a ni. Thil awhtur tha tak tak awt lo a, a thalo lam awhna suala kan awm chhung chu kan puitling thei lo ang. ‘Simple living, high thinking’tih a nih kha.

Date: 9th December 2007

Phek Hnihna

“Zantlai khawthiang karah, Muangten zan mu an chhing, Beramputen thawm an hriat chu, Bethlehem tlang chungah.” han ti la, Berampute’n thawm an hriat tluk zeta mawi leh ropuiin ka lo ngaithla dawn a ni. I aw sawisel lo la, i zaithiam leh i zaithiam loh mi zawt suh. I zaithiam thu ka hrilh ngai lo vang che. Mahse i zai ri chu ka bengah a zam lut zel zel anga, ka thinlung a tuam zawp dawn a ni. Chhimbal kara inzep ve ang maia fiah lovin meng riai riai la, “Kumpui sul a lo vei chang hian lunglen a tho leh thin Ngai lo leh lawm lo reng awm hlei lo.” han ti la, a mawi tizualan ka samah Bethlehem par han thiat la, kan ngaih Christmas ni eng lo zam thar leh tur chu i thlir dun ang hmiang. Dated: Somewhere midnight in 15th January, 2004

COMPUTER VIRUS Mihring ang tho in computer pawh hi hrisel that a ngai ve hle mai. Computer natna kai theihte pawh hi mihringa thatlohna thlentu nen hian inang tak an ni. Mihring leh Computer hi inang ve tak an ni. Han sawi takah chuan Bible dikzia tih lan te pawh kan la tum dawn nia. Awle, computer virus te hi computer tangkai taka thawhtir theitu program ang tho an ni a. Ama’rawhchu, chu’ng program tangkai tak te tibuai tura siam chu an ni hlauh thung a. Virus chuan a siamdan a zirin hna rapthlak tak emaw, lian tham tak emaw a ti thei a. Computer te chu muang em em te’n a siam thei a, a ti thi tawp thei a, monitor ah te chuan eng eng emaw thuthawn awmze neilo te a rawn tilang thin a, monitor te pawh a ti thim thut thin a, a neitu thu ni miah lo in data te alo la chhawngin, alo tibo thei bawk a, tin, email thenkhatah te pawh mail alo thawn ringawt thei bawk. Chutiang chu a nih avang chuan, computer tan chuan chimawm tak an ni ve a ni. Virus ang chiah a hlauhawm ‘Worm’ ve thung hi le. Hei hi amah a program insiam thei a ni a. Document in lakchhawn vel naah computer pakhat atangin a dangah a inkai chhawng awl em em mai. Tun hma chuan floppy disk kha virus inkai chhawnna bulpui ber a ni a, tunah chuan internet hi a nihna chin a awm ta. Computer a program thenkhat, virus in a alo chiahpiah tawh kan han tihnun khan, virus code te kha an lo nung ve nghal a, chu computer ami emaw, a dang network hmang a a zawmpui a mi emaw program dang te kha tihbuai ve an tum nghal a ni. Kan hriat reng tur chu… heng computer virus te hian, computer khawl lampang tibuai lo in, a software lampang zawk hi an khawih chu an ni a. Computer a program emaw, data kan dah emaw te kha an ti chhe ta thin a ni. Virus tam zawk chu te tham tak an ni a, program thenkhat te chauhin an hmantir thei a ni. Natna hrang hrang lakah mihring te pawh kan inven a ngai ang hian, computer pawh an natna lakah kan ven ve an ngai a ni. Chuvangin, kan computer hmanah te anti-virus software thar ber zel kan dah ang a. Internet atanga kan file download te leh computer dang atanga file thenkhat kan lakchhawn te khan virus an lo neih thin avangin, tin, email thenkhatah mail ruala thil thawn kan dawn te kha virus an ni thei bawk a. Kan computer ah invenna kan lo laklawk kha a tangkai hle dawn a ni. (Chhuak lehah virus thenkhatte leh an thawhdan rawn tarlan kan tum dawn nia – Guest Editor)

Vol XII Issue No. 49 Bangalore Mizo Association Pathianni Tin Chhuak Chanchinbu Date: 9th December 2007 Phek Thumna

MIZORAM CHANCHINTHAR December ni 15 hian Aizawl ah ‘Zorock Nite – A Tribute To Rosangliana’ hman a ni dawn. He Nite ah hian zaithiam hrang hrang ten Pu Rosangliana (Zorock) a hla an sa dawn a. fans te pawh an phur nasa hle. Pu Rosangliana pawh Shillong atangin December ni 10 hian a fanu pahnih te nen Aizawl lam an pan dawn a ni. Tin, a fapa pawhin Aizawl lam atangin a lo tawiawm dawn bawk. Vulmawi Award: Lunglei nitin chanchinbu Vulmawi bultuma buatsaih, Vulmawi Award semna inkhawm chu Saikuti Hall-ah ropui taka neih zawh a ni ta a. Lunglei, Lawngtlai leh Saiha District pual bika sem, Vulmawi Award semna inkhâwmah hian khuallian Vanlalsailova bakah Mizo Idol Star thenkhat leh zaithiam lar hrang hrangte an zai. Khuallian Vanlalsailova chuan ‘Simple Living’ chungchang uar takin a sawi a ni. Kumin Vulmawi Award sem chhuah tâkah hian category hrang hrang 20 siam a ni a; R Lalramchhana chu mipa fakna hla sa thiam bera thlan niin Pensy B Lalthangliani hnenah Best Female Artiste (Gospel) award hlan a ni. Mipa lengzem hla sa thiam berah TBC Zaithanpuia thlan niin, hmeichhe lamah K. Lalnipuii thlan a ni. Leitlang Picture hnenah ‘Best Music Video Maker’ chawimawina hlan a ni a. Best Song Composer-ah B Sangmawia thlan a ni bawk a, Dist. PYD Choir chuan zaipawl thiam ber nihna an dawng a. Musician of the year-ah C Lalzarmawia thlan a ni a. Best Beat Group award chu GIORAS, Serkâwn ten an dawng bawk a ni. Rev Dr HS Luaia hnenah Life Time Achievement Award hlan a ni a; Welborn Manner Lalremruata, Saiha hnenah Special Award hlan niin Jeffrey Khara, Editor, Moonlight, Saiha chuan Integration Award a dawng bawk a ni. (source : Vanglaini) Mizoram Governor, Pu MM Lakhera chuan Ningani khan Prime Minister Dr. Manmohan Singh hmu-in, mautam vanga Mizoram mipuiten harsatna nasa tak an tawh mek sutkian dan tur a sawipui. Sawrkar thuchhuahin a tarlan dan chuan, Mautam sazu puang leh fur ruahtui tam vanga kuthnathawktuten buh leh bal an thar mumal loh thu te Governor chuan Prime Minister hnenah hian a thlen a, buhfai lamah harsatna an tawh thu leh a leina tur sum pawh Mizoram sawrkarin a mamawh thu a sawi a, hei hi Prime Minister chuan ngai pawimawhin, (column lehlamah..)

Mizoram buhfai quota tipung tur leh a leina tur sum pawh ngaihtuahpui a tum thu Governor chu a hrilh a ni. (source : Khampat) Rev. Chanchinmawia thihdan chhuina Final Report chu Court-ah an thehluh. Mizoram Police chuan Rev. Chanchinmawia thih dan chhui turin Special Investigation Team a din a, an thil chhuichhuah chu Zirtawpni tlai khan ADM (J) Pu Chawngtinthanga kutah an hlan. Khatla bialtu Pastor, Rev. Chanchinmawia thih dan chungchangah Congress Party leh MCP Party chuan December 10 khian a thlavang hauhna kawngzawh neih an tum a. Tin, Rev. Chanchinmawia thih dan chhuitu Police, Special Investigation Team chuan nimin khan an thil chhui final report chu Court-ah an thehlut bawk. ZNP chuan Congress Party leh MPC ina sorkar nawr nan leh an chhungte thlavang hauh nana kawngzawh an huaihawt turah tel an tum loh thu an sawi a. Synod leh MPF-te zah ngaih rih chu tha an tih thu an tarlang. Hetih lai hian a thihna thu-ah kohhran-in FIR a thehluh chu bawhzuia, thil chiang tak a rang thei ang bera chhui chhuak a, thudik leh a mawhphurtu puang thuai turin Mizoram sorkar an phut takzet a ni tih an sawi. Mizoram Police chuan Rev. Chanchinmawia thih dan chhui turin Special Investigation Team a din a, Addl. SP Pu Rodingliana Chawngthu chu team leader a ni a. Midangte chu, Aizawl South SDPO Pu Lalringdika, Aizawl Police Station O/C Pu PC Lianhmingthanga, S.I. Pu H. Lalnunmawia (Case Investigating Officer), S.I. Pu OU Majumdar te an ni a. He final report hi phek 20-a chhah, computer-a chhut a ni a; Court-ah hian chemte pahnih, a thawmhnaw, postmortem report, CMC Vellore medical report, damdawi, witness engemawzat statement tlangpui leh tul dangte a tel a ni. He report-ah hian Rev. Chanchinmawia thih danah midang inrawlhna an hmuh loh thu Police hotute chuan an sawi a. Thuhretu mi 30 chuang an zawhfiah thu pawh a tel thu te, he case-ah hian midang inrawlh theia finfiahna dang a awm chuan Magistrate thu nghak kher lo pawhin an chhui that leh theih thute an sawi a ni. (source : internet) Thil tha i duh a nih ngai chuan nangmah atangin zawng rawh. – Thomas Fuller

Vol XII Issue No. 49

Date: 9th December 2007

Bangalore Mizo Association Pathianni Tin Chhuak Chanchinbu

INFIAMNA ## Tunlaia Aizawl a MLA bial hrang hrang, Wai Wai Cup khelh mekah nimin Inrinni chawhnu dar 2 khan AR Lammualah Aizawl North I leh Hnahthial an inkhel. Zirtawpni a semi-final khelhah Aizawl North I-in extra time-ah 4-1 in Aizawl East I an hneh a, Hnahthial-in 2-0 in Aizawl North II an hneh bawk. Aizawl North I leh nikuma final khel Aizawl East I te hi hun pangngaiah 1-1 in an inhnehtawk a. East I tan Lalrinkima’n goal a thun a, North I tan MS Dawngliana’n a pet lut bawk. Hun pek belhah, North I game in hma a sawn hle a, East I team khel erawh chuan hma a sawn vak lo. North I chuan 4-1 in chak zawk nihna an l. North I tana pet goal tute chu David Lalrinmuana (1) leh Robert Lalrammawia (2) a ni. Inkhelh dangah, Hnahthial-in Aizawl North II an hneh a. Hnahthial hian goal hnih an pet lut a ni. Hnahthial hian minute 60-naah goal khatin hma an hruai a, hun tawp tep tawh, minute 87-ah goal dang an thun leh ta hlauh a ni.

## Lal Bahadur Shastri Women’s hockey, New Delhi a Shivaji Stadium a khelh mekah, Nilaini khan India chuan Azerbaijan chu 1-0 in an hneh. India team a tel Mizo nula, Rosalind L. Ralte chu a che tha in, a thiam hle a ni. Team te chakna leh tournament tana hlu tak niin an hotu ten an sawi.

## Nimin 8th December atang khan India leh Pakistan te chuan Test match final, Chinaswamy Stadium Bangalore an khel. English Premiere League % Aston Villa manager, Martin O’Neille chu Barclays Manager of the month atan thlan a ni a, tin, Gabriel Agbonlahor chu Player of the Month atan thlan a ni bawk. % Chelsea striker turu tak Didier Drogba chuan a khup a tih hliam avangin thla khat lai mai football a khel thei dawn lo. Drogba hian thla hlui lama ram tana a khelhnaah a khup vei lam a ti hliam a, chu chu zai a ni a. Tunah hian enkawl mek a ni. Drogba hian a khelhna club Chelsea tan hian, tun season Champions League ah khelh li ah goal 4 a thun tawh a ni. January ni 10 a tan tur African Cup of Nations, Ghana a neih tur atana in lak fit a ngaih vanglai tak a ni.

Phek Li na

Zanina inkhel turte: 7:00pm Middlesbrough vs Arsenal 8:30pm Bolton vs Wigan Athletic Tottenham vs Man. City 9:30pm Blackburn vs Westham United 15th December (Inrinni) a inkhel turte: 8:30pm Portsmouth vs Tottenham Manchenter City vs Bolton Westham United vs Everton Wigan Athletic vs Blackburn EPL point dinhmun 1 2 3 4 5 6 7 8 9 10

Arsenal Man. United Chelsea Liverpool Portsmouth Man. City Everton Blackburn New Castle West Ham

Pts 37 36 34 30 30 30 27 26 22 19

Infiamna Dang… ## Keichu, U Pc, ECC campus atanga ka kros put hawn khan min delh chau der tawh. Krismas a liam meuh chuan kalvari ICU vela admit ka ngaih tawh hmel. - Blessy ## Jharkhand atanga ka lo kir leh hunah chuan vawksa lei tura hindi a buai viau kha chu a awm tawh lo viau ang.

- Rev. Murmu, Nandidurg Road ## Haw hi ka chak ve tawh bon. Inah pawh haw loin, ban veleh kawr pawh thlak loin uniform nen ka thlawk chho nghal dawn. - Sammy COMPUTER MONITOR 15 inches a hlai leh UPS la tha tak mai Rs. 1500 in hralh duh a ni e. Contact: +91 99640 08487

Intihbingna hi hnam tlûkchhiatna hmaah a kal châwk.

BMA Office Bearers: President : Pu K Lalrokima Vice President General Secretary : Tv. Madawnga Hauhnâr Asst.Gen. Secretary Treasurer : Nl. Blessy Sailo Assistant Treasurer Secretary i/c Sports : Tv. Joar Panzela Secretary i/c Cultural Secretary i/c Academic & Human Resources : Tv. Lalrothara Tlau

: Rev PC Lalduhawma : Tv. James Lalrintluanga : Nl. Thaarie Hnamte :Tv. Obeda Lalhuliana