Bma Aw: 26th July 2009

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol. XV Issue No. 17

Bangalore Mizo Association Pathianni Tin Chhuak Chanchinbu

Joseph, Min Ngaidam Rawh! (Joseph-a July 27, 2008 a boral ta hriat reng nan) July 17, 2005 khan kan thianzahoin Bangalore kan thleng a. Pathian khawngaihna leh malsawmna zarah kum 4 chuang kan lo awm ve ta der mai. Kan zirlai te kan zo fel tawh thawkhat a, result chiahin min nghak ta. Bangalore Thlen Thlak Tirh: Bangalore kan thlen atanga chawlhni hmasa ber a Tv. K. Laltlankima (a la tlangval lai) thusawi kha ka la hre reng a. Incheina chungchang hi a sawi a. Khatih hunlai nena ngaihtuah kha chuan sawi awm tak thil a ni a. Tunah zawng mi pahnih khat bak mit tikham khawpa inchei an awm ngai ta lova. Khami hnu khan ka hriat ve chinah tumahin khatiang hawi zawng khan thu an sawi pawh ka hre ta meuh lo. Bangalore Mizote hi a than zawng kan thang khawp mai. Bangalore kan thlen thlak tirh atang hian ka rilruah nasa takin Pathian thu a lang ve thin a. Midangte tana malsawmna theih ang anga nih ka tum ve thin. Pathian thu dah 'number one' turin ka pa in min chah a, ka zirlai ai pawhin ngaipawimawh ka tum thin. Ka inchhir lo ngei mai. Chak lo chung pawha ka zirlai aia Pathian thu ka ngaipawimawh hian kum 4 chhung harsatna nei miah lovin Pathian malsawmna ka dawn phah ta a ni. Thupuanah 'Kei Alpha leh Omega, a bul leh a tawp ka ni' a ti kha. Mizo Students Association Rawngbawlna: Kum 2 kan awm pumhlum a, kum 3-na a intan chuan engtin tin nge maw ni MSA OB-ah ruat ka ni a. Mak ka ti ngei mai! Tichuan MSA-ah chuan ka theih ang angin ka inhmang chho a, nuam ka tiin, Bangalore ka awm chhunga zirlai dangte tana zirlai pawl din member ni a, zirlai harsa zawkte chawm tura engmah nei lova hma la ngam pawl a ka tel hi ka inchhuang hle thin a ni. BMA Rawngbawlna: Tichuan kum 3 kan zawh a, kum 4-na tantirh chuan BMA hruaitua thlan ka ni leh a. Hei zet chu a mak tih piah lam thil a ni ta! MSA lamah a hma aia chanvo rit zawk ka phur chho ta bawk nen. Mi tam takin hmai chhanah pawh pha then rawh an ti thin. Khawtlang rawngbawlna hi Pathian rawngbawlna ropui tak niin ka hria a, ka pha ngam lo. Krista min kohna hi ka hnial ngam lo ni berin ka hria. Pathianin mal min sawm a, kan zirlaiah harsatna reng MSA leh BMA a ka inhman avang khan ka nei ta hauh lo. Sangluran min boral san: Bangalore kan thlenthlak hlim atanga tun thlenga kan awmnaah hian a tir atangin Sanglura kha a awm a, a awm rei berte zinga mi a ni nghe nghe. Mihring mihrinnaah hian midang pawi a sawi reng reng ka hre ngai lo. Vanduai thlak takin June 26, 2008 khan a room- atangin rim kan hria a. Ni hnih lai kan intlawhpawh loh chhung khan kan thianpa chuan min lo boral san! Khami ni a kan thla bar zia kha vawiin thleng hian ka la ngaihtuah thin. Enge tihtur tihte, engtia tih chi nge tihte kha kan ngaihtuah a. Pathian min awmpuina a

Date: 26th July 2009

takin ka experience leh a. Harsatna em em nei lovin Bangalore Mizo khawtlang leh Pathian zarah engkim kan paltlang fel chho ta a. Joseph-a a boral ve leh: Joseph-a leh Sanglura kha inkhawm chawt an ni a, midang hi chu min kawm tam vak lo zawk. Sanglura boral in Joseph-a beiseina a ti bo a. Tichuan Joseph-a khan 'a nun a beiseina a neih tawh lo thu' thleng a sawi chhuak ta. A tawi zawngin, kan theih ang angin kan tawngtaipui ve a. July 27, 2008 zing lam dar 11:30 vel chuan Pathian thu darkar tam tak kan inhrilh hnu a, kan kalsawn lawk hlanin ama nunna ngei amahin a la ta! Khami ni atang khan ka maimitchhin apiangin ka rilruah Joseph-a hi a la lang a. Lan loh ni a la nei lo. Joseph-a ah khan ka nun hi ka zuk hmu a. Isua Krista ka nuna a lan lohzia hi mi hrilh ngai lovin ka hmu ta! Kan sawi tawh angin theih ang angin kum 2 chhung MSA leh BMA rawngbawltu ka ni a, pawl tan theih tawpin rawng ka bawl ve thin. Isua Krista aiin ka nunah hian kha pawl khan hmun a awh thuk zawk tih ka hriat meuh chuan ka thiante pahnih ka chan ta der mai. Sengkhawm pui lotu hian ka tidarh a ni: Keimah avang miten Pathian hmel an hmuh sawi tur ka neih loh laiin, vawiin thleng hian midangte tana harsatna thlentu ka ni fo a. Midangte Isua Krista bulah ka hruai thleng zo lo. Joseph-a Pathian thu a thih hma darkar a kan hrilh a, a rilru a Pathian a lan theih lohna chhan kha eng dang a ni lo. A chenpui hian a tan engmah ka tihsak lo va, engtin nge Isua Krista hmel hi a hmuh tehlul ang. “Kei atan erawh zawng Pathian hnaih hi a tha a ni.” ( Thuziak awmze nei leh ril tak rawn thawh tu Tv. Zualtea kan lawm e, I kal leh zelna turah duhsakna kan hlan bawk a che. )

Longest SOLAR ECLIPSE - 22nd July 2009 – 21st Century chhung in…

Vol. XV Issue No. 17

Bangalore Mizo Association Pathianni Tin Chhuak Chanchinbu

Date: 26th July 2009

Editorial Naupan laia kan sak fo thin “ Enge ka hlim chhan min zawh chuan, Krista ka aia thi chu…” tih hla hi kan hre theuh awm e.. Mihring ten harsatna tam tak kan tawk thin, hlim hi mi tam tak tan a harsa ani thei e. Mahse hlim chhan tur kan nei tlat. Harsatna leh buaina pawh tawk mah ila, Lal Isua hi kan hlim nan a tawk a, tlinglo leh fel lo te a khawngaihna leh hmangahna a min thlah lo tu Lal Isua hi kan hlimna chhan tur chu ani. Hei hi Bangalore Mizo te hian i hre thar leh ang u ! TUALCHHUNG NEWS  BMA Academic Secy leh MSA a Information Secy. ni bawk Tv. Alan Lalhriatpuia chu Infosys-ah software engg. hna zawm turin August 9 khian Mysore-ah a insawn phei dawn a. Bangalore ang bawkin Mysore-ah hian a va chetnat leh hle a rinawm .  Silver Jubilee denchhenin October 2 zan ah Jubilee Night Variety Programme hlimawm tak tur “ ARKAIDEN ZAN” neih ani dawn a. Nizan khan Jubilee Night Organising Committee Convener Pu Josiah Ralte te inah member ten kim takin a vawikhatna atan meeting an nei a. Chawhlui tui tak – vawklu bawl , bekang, sawhchiar etc. nen tlai takin Pu Josiah te chhung hian member te an lo hrai puar hle a, Committee chuan lawmawm a ti tak meuh ani. Programme tur pawh duan fel nghal vek niin, kimchang zawkin kan la rawn chhuah zel ang. Programme hi a ‘sial’ em em vek mai hlawm a. A nghahhlelhawm tawh hle ani. He hun ah hian stall neih duh tan BMA President Pi Lalrinpuii hnen ah hriattir tur ani e.  BMA league a tan a inpuahchahna kal zelah UVCE zirlai te chuan tan an la nasa toh hle a. Jersey mawi tak mai an order mek a. Kumin chu strategy thar an hmuchhuak ni in an sawi a, an tawrhhlelh om hle turah ngaih a ni. Physical fitness aia mental fitness an ngaihpawimawh zawk avangin tunlai chu rilru sawizawina hun an hmang hrih a ni. Sponsor tute atanga pawisa lengvak a tam avangin Player tha tak tak an chahchhuak tawh bawk ni in an sawi.  Bangalore leh a chhehvel school/ College a zirturte chu admission buaipui turin an rawn thleng thla mek zel e. Engineering lam zir tur pawh thahnem tawk tak an rawn thleng thla tawh ani. Tunlai zaithiam leh Pathianin-a a hman em em Pu Lalremruata , “Amen, Silfai ka ni” phuahtu leh satu pawh a fanu zaithiam, Brenda ( Tetei ) Koshys a Nursing zir tur lo hruaiin a lo kal bawk.  TV Amos Lalremtluanga chhungkhat laina tlawha Zoram haw pawh, lam ang alo let leh ta. Saturday kha a flight a missed luia , Monday khan a rawn haw ta zawk.Thu kanlo dawn danin Zoram lamah vawksa an ei ngam vak lova vawksa rep pawh a rawn hawn lo.

 TV. Terence Lalthlamuana Ex cultural secy pawh a exam zo Hyderabad va zin pawh tluang takin Thursday khan a lo let leh.  Tunlaiin Chicken Pox Bangalore ah a leng nasa in, UTC lam ah phei chuan mi 15 ngawtin an vei mek tih thu kan dawng a, hei vang hian college poh ni 10 an chawl a, zirlai engemaw zat mahni khawlam panin an haw. Mipuite fimkhur theuh turin kan han inchah nghal bawk e. Hmani lawk pawh khan UTC zirlai pakhat chu chicken pox kawchhunga lut vangin a boral.  A hnuaia mite hi UVCE atanga Engg. zirchhuak turte an ni a. Exam hi zo fel toh in tunah hian result an nghak mek a ni. Computer Science and Engineering: a) Alan Lalhriatpuia b) K. Vanlalruata c) Lalengzuala d) C. Lalrinfela e) C. Lalremsangi Mechanical Engineering: a) Dennis Lalhlimpuia b) Johnson D. Thianga Civil Engineering: a) Lalbiaknungi b) R. Laltleipuii c) Ameline Lallawmpuii  BMA Cultural Secy Tv. Sammy damlo pawh fit zawk leh hrisel zawkin damdawiin a chhuahsan tawh a, Pi Pianmawii te hnenah inenkawl chhunzawm turin a awm mek.I tawngtaipui zel ang u.  Vice President Rev. PC Lalduhawma chuan a ma hna lamah a buai tak deuh avangin a hna a chelh chhunzawm thei dawn ta lova, Vice President thar atan Pu Josiah Lalchhanhima Ralte chu Executive committee chuan a ruat. HRIATTUR PAWIMAWH TE BMA Freshers’ Day - A hun – 1st August 2009 (Inrinni) 12:00pm ah lunch tui tak eitur a awm ang a. Lunch ei zawh veleh Silver Jubilee lawman Thingphun programme hman ani anga, chumi zawhah Freshers’ day ropui takin hman nghal a ni ang. Mi zawng zawng tel theuh turin kan in sawm e..A hmun – Goodwill Girls High School, Coles Park. BMA Football Tournament 2009 chu August 14 hian neih tan tur a ni a. Team tel duhte chu 1st August thleng inziah luh theih a ni e. Player tin te chuan team list ah passport size photo thehluh tel theuh tur a ni e. Entry fee – Rs.800.He tournament hawnna ropui takah hian Bangalore Mizo nuho leh paho an inkhel dawn a. An inpuahchah nasa hle a ni. Hawnna neihna hmun tur chu Austin

Vol. XV Issue No. 4

Bangalore Mizo Association Pathianni Tin Chhuak Chanchinbu

Town football ground, nuam leh changkang tak a ni e. Thutna pawh nuam tak a awm.

Thingphun programme

A hun : 1st August Evening Hruaitu – Pi Lalrinpuii, Secretary, SJCC Thingphun hmasa ber tur – Pu R. Lal Rinawma, Chairman, SJCC. Hun pawimawh leh chhinchhiah tlak tak ani dawn a, member te kim taka kal turin i inpuahchah theuh ang u. He huna thingphun tur hi Hmar Association lama kan unau , Bangalore a hun rei tak atanga lo awm tawh Pu Lalkhawmawi an Jubilee lawmpui nan a lo thawh dawn a, a chungah kan lawm hle ani. LAWRKHAWM  Mumbai Hmar Inkhawmpui Vawikhatna chu Lonavala ah 15th August 2009 hian neih ani dawn a. He hunpui atan hian Mizo hnahthlak zawng zawng te te tawngtaipui turin min sawm.  Indian Idol a tel tur thlanna ah, Mizoram atanga tel turin ZONUNMAWII Leite chu intihsiakna “ THE HUNT “ kal tlangin pakhatna ani. Joseph Lalhmangaihzuala, Thuampui Veng chu pahnihna niin, Tini Thapa , Kolasib chu pathumna ani. The Hunt a top 5 chin te hi INDIAN IDOL ah an tel dawn ani. A va nghahhlehawm tawh em !  Mizoram Synod chuan tun hnaia Homosexuality chungchanga thutlukna Delhi High Court in a siam chungchang ah Synod chuan a duhlohzia en tir nan, ennawn leh tura ngenna High Court ah a thehlut.  July 23 2009 khan Kolasib ah leimin in hnathawk mi 2 a chilh hlum - Zamawii leh Sumzakhum te an ni.He leimin hi NREDF lei laih lai ani.  Ningani kal ta khan Ramhlun vengah ruang an phawrh leh. Hmanni deuh a Tv. Samuel Lalrindika thih chungchangah Police ten thil chiang zawk a chhui anih theih nan a ruang an phawrh leh. Samuela hi VDP in an sawisak hlum nia rin ani a, rualban lo deuh niin, Mi mobile phone a ruk avanga VDP sawisak ani.  Art and Culture Minister Pu PC Zoramsangliana chuan Vanapa Hall sak that dan tur July 22 khan a hmun ah official danbg ten en an en ho.Tum dan chuan Petrol pump lam ah zauh phei an tum ani.  Swine Fever ( Vawk pul hri ) chuan Mizoram dung leh vang a fang mek a, kar hnih kal ta chhung khan vawk 500 chuang an thi. Heng vawk tam tak te hi mautam tam tuar te hnena NGO ten an pek ani tlangpui niin thu kan dawng. Vawk pul hri hi Burma lam atanga rawn tai darh niin zir chiang tute chuan an sawi bawk. Abikin Lunglei leh Saiha ah he vawk pul hri hi a leng nasa hle a. Hei vang hian vawksa ei tur Mizoram ah a vang hle bawk ani. Hei hi Swine Flu nen inkaihhnawihna erawh a awm lem lo ani tiin mithiam te chuan an sawi. ------------------------------------------------------------------------------NI AWK LEM (SOLAR ECLIPSE) KHA! -Josiah Ralte Kar kalta July 22, 2009 (Nilaini) a ‘Awk in Ni a Lem’ kha i lo thlir ve em? I lo thlir ve a nih chuan khawvel hmun hrang hrang a

Date: 26th July 200917

thlirtu maktaduai tam takte zing a mi i lo ni ve reng a nih chu! A ni tak a, kha ‘Ni Awk Lem’ kha a dangdai ve tlat! Khawvel piantirh ata ‘Ni Awk Lem’ thlirtu ngah ber a nih mai bakah tun kum zabi chhunga rei ber rikawt (Minute 6 leh second 39) a ni. Hei ai a rei nghak leh tur chuan June 13, 2132 dam thlen ngei chu a ngai dawn a ni! Asia khawmualpui a intanin, Pacific thliarkar lam kawng zawhin, mual min liam san ta mai zawng a nih kha! ‘Hamara Desh’ ah ngei pawh thlirtu an tam na niang mai! Bangalore ah chuan he ‘Ni Awk Lem’ hi vai pathian thawh hnu hret 5:38am vela intanin 6:21am vel khan a hliah tam lai ber (66%) a ni; 7:17am khan, tho hma lutuk ngai lo, ‘Lore khawpui Zofate chu mual min liam san ta a ni. Keini anga vannei ve ta lo khawthlang lam mite pawhin internet atangte’n live in an lo en ve hram hram a nih kha! Ni awk lem kan tih mai hi Kawlsen leh kan Khuavel inkara Chhawrthlapui rawn kaltlang hi a ni mai a, he Khuavel a i awmna a zirin thla khan ni a hliah vek emaw hliah vek lo emaw pawh a ni thei. Ni hi Thla aiin a let 400 velin kan hlat a, tin, Ni hi Thla aiin a let 400 vel bawkin a lo lian leh a, hengte vang hi a ni chek ang chu, thla hian ni hi a hliah bo hmak theih tehreng ni!Hmakhawsang atang tawh khan ‘Ni Awk Lem’ leh ‘Lawilo Zel dina (ka phhuah chawp)’ (superstition) hi a in kaihhnawih tlat a. Tun tum pawh hi a dang chuang lo, hmun a awm loh avangin kan sawi vek seng lo a nga, ‘Awk lem’ ni a, hmun hrang hrang a thil thleng leh mite hman dan a then a zar chu i han tarlang ang hmiang:  Khawthlang lamah chuan ‘Ni Awk Lem’ laiin raipuar chu pawn chhuah loh tur. An fate hmui a piansual loh nan safety pin an kawr (an dul chung deuhah) kilh tur an ti. 

Aztec leh Mayan ho tihdan kalzel an lak ni ngei tur a ni, Mexico ramah chuan raipuar chu kekawrte sen safety pin kilh an ha thin. Hei hi Ni leh Thla power in an naupai a tihbuai loh a, a piansual loh nan ani.



Hmakhawsang Chinese ho chuan Dragon hian Ni chu ei dawnin an ngai tlat. Tunlaiah pawh halpuah leh darkhuang te hmangin um bo an tum thin. ‘Ni Awk Lem’ hi ‘Resh’ an tia chu chu ‘Ni ei’ tihna a ni.



India ah pawh, Hindu ho chuan ‘Ni Awk Lem’ lai vela chaw thing ilo reng reng chu ‘thianglo’ an chan zel.



Nepal ah chuan sorkar in awm ni a kham riap mai! Tui vawt te’n an inbual vel!



India hmun thenkhatah chuan an rualbanlo naupangte chu an dam beiseiin, chirh dumah an nghawng chen chenin an lo phum thul. Mangan thlak teh asin!



India khua Bhavnagar, Surat, Ujjain, Indore, Bhopal, Sagar, Jabalpur, Varanasi, Allahabad, Gaya, Patna, Bhagalpur, Jalpaigudi, Guwahati leh Dibrugarh ah te chuan ‘Ni Awk Lem’ pumhlum an hmu bik a ni.



Bihar a Taregna khua, Aryabhatta’n (476-550AD) arsi zirna’n a lo hman tawh na hmun chu, a thlirna hmun tha

Vol. XV Issue No. 17

Bangalore Mizo Association Pathianni Tin Chhuak Chanchinbu

ber tura ngaih a ni.Awk lem lai hian Hindu ho chu temple tlawhlo a, kawt tuala inbual a, chumi zawh a, an tawngtai chhampual vel turin an in fuih. 

Hindu ho lui thianghlim Ganges ah pawh thatpui ring a inbual an thahnem hle mai a, Varanasi ah phei chuan nu pakhat an chilhlum ringawt! Thahnem fe an inhliam bawk.

INTERVIEW BMA Editorial Board chuan hun engemaw chen Bangalore –a lo awm tawh, Bangalore Mizo te min ti Bangalore em em thin tu, Rev. Sairengpuia - tuna Kathikund , Jharkhand lama an chhungkuaa Pathian rawngbawla min pem san ta kawmna hun lawmawm tak mai , a hun chep tak karah kan nei thei hlauh mai a, vannei kan inti hle ( Engineering zir turte lo hruaiin Bangalore a lo zin a) . Han chhiar rawh le… BMA AW : Pu Rengpui, hei inkawmna hun tha tak kan nei thei dawna, kan lawm hle mai. A hmasa berin i thawhna hmun chanchin tawi tein min hrilh thei em? SRP : Ka thawhna hmun hming chu Kathikhund ani a, hei hi Jharkhand State a thingtlang khaw pakhat ani. Tunah hian Kathikund Bialtu Pastor in ka awm a. Kathikund ah hian school a awm loh avangin he hmun atanga school awmna hnai ber Dumka khua ah ka fate zirna kan ngaihpawimawh a tul avangin kan awm a, nitin Kathikund pan hian ka kal thin. BMA AW

: Bangalore hi inlo ngai ve thin viau lo maw…?

SRP : Keichu khawpui hi ka hua a, mipui tam lutuk leh motor tam lutuk te hi ka ning tlat mai thin a, Bangalore pawh hi khawpui zinga chhiar tel ani. Mahse Bangalore Mizo community hi kan ngaina in, nuam kan ti a, kan rawn ngai thin hle ani. BMA AW

:Harsatna lian tham deuh tawh te in nei em?

SRP : Harsatna lian tham em em tawh kan nei hranlo a, mahse khawlum lutuk khi kan harsatna tawh chu ani deuh ber mai. Naupang pawh, puitling pawh khawlum lutuk vang hian kan bawl ter tuar mai ani. Current awm that loh avangin Mombati kan chhi nasa thin a, khawlum lutuk vang hian kan mombati chhit reng reng hi a kawi ngul zel mai ani. A dang leh ah chuan kan thawhna hmuna chengte hi an la mawlmang ve hle a, rawng bawl sak an harin , a sawt lo hle thin , envangelical wrok, construction work leh thil dang dang ah pawh tih dan hrilh kimchang lutuk leh an mahni an lo inring tawk lovin an lo ti ngam lo a, kimchang vakloa hrilh lahin an lo ti ngam lo bawk a, hei hi harsatna kan tawh pakhat chu ani a, Bangalore Mizo mipuite min tawngtaipui turin ka han ngen nghal duh bawk che u a ni. BMA AW : Bangalore Mizo te vanneihna Jharkhand lam atanga i hmuh dan min hrilh thei em?

Date: 26th July 2009

SRP :Ti hian hmun hla taka Pathian rawngbawl in Mizote kan kal tang tang a, Missionary te pawh kan in tir chhuak a, Bangalore ah ngei pawh Synod tirhin Nl.Debbie te pawh an awm mek a, Bangalore Mizote in vanneihna chu Pathian rawngbawlna chance tha tak he hmun ah, in awmna, thawhna leh zirna theuha ah hian BMA member tin te hian in nei nghal a, hmun danga feh chhuak hran kher lovin, in vannei ka ti hle ani. Tunah phei chuan Synod in Tent-making missionary mi engemaw zat a nei tan a, Bangalore ah hian hetiang hi Mizo te zingah hian an la awm lo ani awm a, a awmzia tak ah chuan Tirhkoh Paul-a khan puanin (tent) siam chungin Lal Isua rawng a bawl thin ani. Chutiang ang chuan Mizoram pawna awm te pawh hian kan hna thawhna theuh ah , missionary hna kan thawk pah thei a, Report te a tul angin submit ve tur ani a, tin Synod in heng Tent-making missionary te hi Medical lama in enkawlna thlengin a buaipui sak a. Khawpui thenkhat ah te chuan an awm nual tawh a, BMA member zingah pawh hian Tent-making missionary duh hi engemaw zat an awm ka ring tlat ani.Mahni thil tih lai kalsan / chawlsan si lova, missionary hna thawh theihna ani. Hrechiang duh tan Synod office, Aizawl ah zawhchian theih reng ani. BMA AW

: Bangalore Mizo te thu chah duh te min nei em?

SRP : Hmanlai atangin ka chah duh chu ala ngai reng. Bangalore Mizo te a hmingtha zawnga , Pathian ropui nana an nun te hmang theuh turin ka chah duh ani. BMA AW : A tawp ber atan, Bangalore-a i lo uar ve em em thin, Sa kawchhung, a chek tih vel te Jharkhand lamah chuan ei chhunzawm tur te a awm em? SRP : Bawngsa lam hi an talh vak lo a, kan ei ngai meuh lo, Bangalore sa chek pawh kan rawn ngai thin khawp asin! BMA AW : A lawmawm hle mai Pu Rengpui, Pathian tana in tawrhna te a thlawn lo vang, beiseina nung tak nei chung in, in rawngbawl zelna turah Pathianin in chhungkuain vengin awmpui che u rawh se. SRP : Keipawh ka lawm e. BMA Silver Jubilee hlim taka in hman ka duhsak che u in ka lawmpui tak meuh che u ani. BMA Dam reng rawh se ! Left : Pu Lalremruata – a hla“Amen Silfai ka ni” tih hmanga Pathian mi hman. Right : Rev Sairengpuia, Jharkhand. Place : Bangalore Editor: Samuel Lalrozama Hmar Jt.Editors – Josiah Ralte & Thaarie Hnamte Cir.Managers – Dinmawia, Nini Contributors : Pu Paul & Pu James UTC, Sawmtei Email:[email protected] / www.bangaloremizo.info