Bma Aw: 14th October 2007

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol XII Issue No. 41

Bangalore Mizo Association Pathianni Tin Chhuak Chanchinbu

Date: 14th October 2007

Phek Khatna

BMA FOOTBALL TOURNAMENT ’07 PÊTLIAM ANI TA BMA Football Tournament ’07 chu nimin 13th October khan ropui taka zawh a ni ta. Final ah hian champion lai Shalom FC leh champion ngei tum Sherwood FC te an inkhel a. He inkhel hi a hmuhnawm kher mai, hun tawp alo thlen chuan Sherwood FC te hian an tum chu 1-0 in an ti hlawhtling ta ani. Kumin BMA Football Tourney hi August 15 khan khelh tan ani a. Champion Trophy hi Dr.Lalrinawmi Ralte in an pa Pu HVLT Mawia hriatreng nana a pek a ni a. Runner’s Up Trophy hi leh lawmman dang te hi kan nula chhuanvawr Nl. Blessy Sailo te unauin an pa Pu Lalhluna Sailo hriatreng nana an pek a ni thung a ni. Dr.Lalrinawmi Ralte hian kum 2005 BMA Tournament khelh tan atang khan Tourney tan ni leh khar ni apiangin refreshment atan Rs.500/- a pe ziah a, Nl.Blessy Sailo te unau pawhin ‘Tourney Special Bulletin’min buatsaih sak ziah bawk a, an chungah kan lawm tak zet a ni. Kumin 2007 inkhel hi a tanni atangin mipui lamin kan tawiawm tha in entu kan tam thei hle a. Infiammi te lah an inkhel a hmuhnawm thei hle bawk a, kan kham lo tlang hle a ni. A khelhna tur hmun zawn leh ngaihtuah chungchang ah hian harsatna eng eng emaw kan nei thin a. Hemi chungchangah hian min buaipuia hma min laksak thin tu kan Patron Pu Lalrokhuma Pachuau, IPS chungah kan lawm tak zet bawk. Kumin Tourney ah hian a zavaiin team 10 an lut a. A khelh thawh khatna (first round) hi a ruh no no chhuak (knock out)-a khelh a ni a. A thawh khatna-a chak team 5 te chuan a thawh hnihna (second round) lutin an inkhel kual (league) ta a. Chung an inkhelh kualna-a point hmu sang sang 2 ten final lutin (chakber) champion zawn ani ta ani. Kan tarlan tawh ang khan final hi Shalom FC leh Sherwood FC an khel kan tih kha. Shalom FC te hian Final lut turin team 4 hmachhawnin, team 3 paltlangin team 1 an paltlang zo lova. Sherwood FC pawh hian team li tho hmachhawnin team 2 paltlangin team 1 an paltlang zo lova, team 1 dang nen an inthathen bawk. Nimin final hi a hmuhnawm hle mai a. Tan atanga rei vak lo minute 10 velah Sherwood FC te hian penalty an hmu hlauh mai a, an goal thun khawl Kamzamang rawn pen chhuakin, ani hian mawi taka ti goal in hei hi a tawp thlengin sut let ani lova, a khawi lam lamah mah goal lut tawh lovin an chakpui ta ani. Vawiin nia khelh zawh tak BMA Tourney 2007 ah hian lawmman hrang hrang sem a ni a. Chung lawman dawngtu te chu; Best Playerah HT Lalrokhuma (Shalom FC), a lian lo na in thiam tak mai ani, a inkhel hi ka la hmu ve chiah lova, mahse a thiam ani tawp mai. Top Scorer Kamzamang (Sherwood FC), ani hian he tournament chhung hian goal match li-ah goal 8 a thun a, inkhelh apiangin goal 2 thun ziah ang anih chu, a phu khawp mai. Best Goalkeeper (si veng)-ah Valpuia (Shalom FC) thlan ani a, ani hian he tourney chhung hian goal han chhuah palh te chu a nei ngei mai a, mahse a si veng kha a world class riau nia. Fair Play Award hi Shanti Nagar FC ten an dawng thung, an phu ve hle tho mai hei pawh hi. Final ni a kan match official te, Referee- R.Lalremruata (R-a), Linesmen- Joel Murray leh Lalruatfela (Fela) Dr. AIT ami te an ni a. An chungah kan lawm tak meuh meuh ani. Kan organizing Secretary Joshua LR Dinmawi’an kan match official

ten final ni a, an kal/tlan thui zawng alo chhinchhiah thlap lehnghal. Ani nge nge a hna hi a tlin teh asin. He tourney alo hlawhtlin theihna tura hah taka thawktu, organizing committee te chungah kan lawm e. Tourney chhung zawnga taima taka match official-a min tansaktu te, mawi tak leh thiam taka inkhel kan infiam mite, mipui min tawiawmtu te leh he tourney zahawm taka min uap saktu kan patron te leh BMMP lam te, in chungah kan lawm tak zet zet e. Nakum lamah phei chuan… â duhtawk mai teh ang. CHHINLUNG EDITORIAL BOARD ATANGA NGENNA LEH SAWMNA ¦ Article leh thil dang, hla emaw thu chham chi emaw te, a thupui mil leh mil kher lo te pawhin mizo tawng leh sap tawngin thawh theih a ni e. ¦ A kawm (cover) tur, a duh apiangin a design theih a, hei erawh hi chu thupui (Tunlai khawvela mizote rilru sukthlek bihchianna) mil tur a ni e. Committee-in tha atih ber a thlang ang. Article leh cover design hi November thla ral hma-a thehluh tur a ni e. ¦ Tunah hian ‘thupui zirbing’zirchianna questionnaire sem chhuah mek ani a, hei hi BMA member te hnenah pawh kan la rawn sem dawn a, tlawmngaia thahnemngai taka min lo chhansak turin kan han ngen lâwk che u a ni e. Vawiin BMCF Inkhawm Programme Hruaitu: Pi Saibuangi, Tantu: Tv. Joel Murray Thawhlawm Hlantu: Pi Malsawmdawngliani, Thuchah: Rev. Sairengpuia Sailo, Special Item: UVCE Karleh Pathianni (21.10.’07) Hruaitu: Dr. F. Hrangkhuma, Tantu: Tv. B.Zodinpuia, Thuchah: Upa C. Ngurthantluanga

Vol XII Issue No. 41

Bangalore Mizo Association Pathianni Tin Chhuak Chanchinbu

Editor C.Lalhmachhuana, UTC, Ph- 9845330822, Joint Editor ThaarieHnamte Vasanth Nagar, Ph. 9886145877 Circulation Staffs: David Laldanfela, Lalhmachhuani Vanlalhluni E-mail: [email protected] Website: www.bangaloremizo.info A Man Thla Khatah : Rs. 15/-

Editorial…

Khawvela ram leh hnam hrang hrang te hi an mahni ngawtin an awmin emaw, an khawsa thei lo. Keini mizo te ngei pawh hi kan ramah ringawt kan awm vek thei lo tih chu kan hre theuh awm e. Ram dangah, hnam dang zingah engemawzat kan khawsa a, chutiang chiah chuan kan ramah hnam dang engemawzat an khawsa ve tawh bawk a. Hnam dang zinga khawsak hi a thiam pawh kan thiam sawt viau. A then te phei hi chu kan thiam leh lutuk mah maha, a tha lo lek lek zawk te pawhin a lang. Tumah inzirtir tur bik kan awm chuang lo, khawsak dan turah pawh a mawi, tha leh dik chu kan hre theuh awm e. Mi dang (hnam dang) te nena khawsak ho kan zirna ah hian an tih dan leh nundanphung engemawchen kan zir te pawh a ngai ang. Mahse kan nihna leh hmelhmang, landan hlauh/bo thak khawpa kan kal erawh a tha ber lo ang. A hnuaia thutawi awmze nei (quotation) atang hian I zir dawn teh ang. I do not want my house to be walled on all sides and my windows to be stuffed. I want the culture of all lands to be blown about my house as freely as possible, but I refuse to be blown off my feet by any one of them. - Mahatma Ganghi

Lengzem Vs Pathian Hla

Date: 14h October 2007

Phek Hnihna

Hriatpuii Pa

Tunlai kan mizo zaithiam lar tak tak lengzem hla sa thin ten Pathian hla an han sa ta tliar tliar a, chutah lengzem hla an sak theih tawh loh thu sawiin an han tuihnih zel bawk a. Pianthar avanga lengzem hla ka sa thei tohlo antih avanga dem ngawt chi anni lova, chutiang bawkin piangthar tawh pawhin lengzem hla lo sa ta pawh nise dem chi anni chuang lo. Tin, hun reiah lengzem hla bawk anlo sa leh anih pawhin keichu ka hrethiam reng mai. Pathian leh anmahni mimal inkar thu ani miau a. Mitinin Pathian kan rinna level a inang miau lova chutiang bawkin kan mizia, ngaihdan leh thlir dan a inang thei miau lo alawm. Mizo culture-in a ken tel chu a huhova thil tih hi ani. Chumai bakah mite tih anga ti ve tur a intihluihna tel thin hian min ti luhlul zual mai mai niin ka hre ve thin. Mahse rinna hi ‘personal relationship’ania, midang an tel ve lo. Pathian leh mimal inkar ani. Ka tan 'sual’a ka ngaih miau chuan lengzem hla sak loh theih chu a tha lutuk tlat. Rinna a thanlenna zel ani. Amaherawhchu, mimal tan sual anih avang ngawt in midang tan sual ani ve kher lo thei tih hi pawm thiam tha ve mai maiin ka hria. Kei pawh ka pianthar tirh chuan lengzem hla ka ngaihthlakin ka inthiamlo tlat zel mai a, ka rinna thanlen na a min daltu ani tih ka hriat avangin ka ngaithla lo mai ani. Heng hi mi min hriatpui theih chi anilo, keiman ka thinlung chhungrilah ka hre kiau a, ‘decision’pawh keima siam ngei tur ani a siam pawh ka siam reng ani. Kum tam tak alo liam ve ta a, tunah chuan lengzem hla ka ngaithlak pawh hian inthiamlohna leh sual riau a hriatna ka nei hran tawh lo. Avang chu lengzem hla ka ngaihthlak hian ka rinna a khawih buai phak tawh lo ani ti ila a sual lovang. A chang phei chuan a hla thu khan Pathian lam hawi riau a hria a, atan liau liau-a ngaihthlak chang ka nei bawk. Amaherawhchu, keiin a sual lova ka ngaih avangin midang zawng zawng pawhin a sual lova ngai ve ngawt turah chuan ka dah lo. Thenkhat tan sual ani anga, thenkhat dang tan sual anilo mai. Kan rinna thanlenna kawnga kan mamawh ang zelin mimal tin hnenah a sual/suallo turin Pathianin min hriattir ah ka ngai.Thian pakhatin a sawi kala hriat ve reng chu, carom (board) pen hi sual ah ka ngai a ti ve tlat. Avang chu han pen khan penluh mai tum lovin midang sa tihchhiat tel pah kha kan tum ani si a, midangte tan a rilru thalo put na ani ati ve tlat. Khatih lai khan ka tan carom pen hi sual a ka ngaih ve kher loh avangin ka inkhel thova, pen lo turin min phutin min tilui lem lova, a inkhel lo ve mai ani. Khami hunlai kha a kalsan ve tawh nge sual ah ala ngai chhunzawm zel phei chu ka hre zui tawh lo. Heng te bakah hian thil dang dang ani thei ang. Kan rinna min ti thuanawp thei tu hrechiang ber tu chu keimahni bawk kan ni. Mahse thil dang awm thei leh chu, kan thinlunga chhia leh tha hriatna haider luih hi a ani (hei hi kan zawm zawk tlangpui). Pathianin tuna kan thiante nen kan in be bawrh bawrh ang hian a hring a hrân in ka tana tha leh thalo chiang deuhin minlo hriattir lo. Mahse eng thil pawh nise chhia leh tha hriatna hmanga mimalin inthiamlohna riau kan neih pawh a kan haider a kan tih luih tlat thin hian ani kan nunin nghawng a neih thin ni.Vawihnih..vawi thum kan haider a kan tihluih hnu ah phei chuan a awlsam zual chho zel a. Vawi engemawzat haider luih hnuah phei chuan inthiamlohna leh sual a ngaihna a bo thak thei. Chuvangin, piangthar in lengzem hla sak hi a pawilo ani ti an awm pawhin pawmlo tawk an awm anga, a pawi ani ti an awm pawhin pawmlo tawk chu kan awm tho tho dawn. Tichuan midangin an tih ve leh ve lohah buai tam lo ila, Pathianin mimal tintena kan zawm tur min hriattir theuhte zawm phawt mai hi a pawimawh ber chu ani. Pathianin ‘duhthlan theihna’ min pek pawimawh tak hi hmang thiamin dik taka hman tlan tum ila ava tha dawn em. Engnge I ngaih ve dan le?

Vol XII Issue No. 41

Bangalore Mizo Association Pathianni Tin Chhuak Chanchinbu

Date: 14h October 2007

Phek Thumna

Cha nc hin Tha rlâm KEIMAHNI… ¦ Vawiin chawhma lam khan UTC-ah BMCF Camping SubCommittee hrang hrang te leh BMCF Executive ten Camping thlir lawkna leh ruhmanna te neiin an inhmukhawm. Camp-a lut tur pawh an thahnem dawn niin a lang. Tawngtaina ah I hre zel teh ang u. ¦ Tunlai hian Bangalore leh a chhehvela Theological College leh Seminary hrang hrang ten in elna Inter-Seminary Sports an nei mek a. Nimin khan UTC leh Piaristic (Catholic Seminary) ten Football an khel a, 3-0 in UTC te hian an hneh a. Hei hi UTC history a thil la thleng ngai lo ani. Kan President Pu Rk-an goal hnih lai a khung lehnghal. An inkhel zo an rawn haw hian, zirlai tawiawmtu leh team member dang ten Pu Rk-a hi UTC gate atanga an quarter thlengin haw haw dur durin an zawn lut. ¦ Kan Vice President Pu PC Lalduhawma chu vawiin tlai dar 3 hian New Life College ah, Unigversity of Jerusalem, Chennai in a ordain a, kan lawmpui e. MIZORAM LAM… Kolasib District ah Buaipui tham Sazu Nimin piah khan District Agriculture Officer Pu R.L Thanzuala chuan Kolasib khawpui chhunga thuthar theh darhtute ama office ah kawmin kawng hrang hrang a an hmalakna te an hrilhfiah. Kum dang zawng aiin kum 2007 hian Kolasib District ah ruahtui a tla tam a. hei vang hian Tuilian leh leimin a tam hle a. Leilet zawla buh leh thlaidang tel antam chhawhchhi hmarcha vaimim,bawkbawn,aieng,kuhva etc an chhe hneh hle a.Tuna report dawn theih chinah chhungkaw 532 ta ram hectare 516.6 azau heng bul leh thlai chinte hian an chhiatphah vek bawk ani.Sazu seh chhiat buh leh thlai report belh zel anih reng avangin hei ai hian ala pun chhoh rin ani. (Mizoserver) Mizo Idol Lallawmpuia Fanai Tun nilaithawhtan zana zawh fel tak Mizo Idol thlanna ah khan C.Lalthlengliana Durtlang chu pahnihna niin Lalhmingliana Chhangte Saiha chu Pathumna ani a. Idol Lallawmpuia Fanai hian lawmman tangka fai Rs 20,000/- leh Bajaj Platinum Bike bakah thilpek tam tak a dawng a. Zonet chuan kum khat chhung (nakkum september thleng) thla tin Rs 3000/- an pe dawn bawk. Pahnihna C Lalthlengliana Durtlang hian Rs 10,000/ a dawng a, Pathumna Lalhmingliana Chhangte Saiha chuan Rs 8,000 a dawng bawk. Mizo Idol Lallawmpuia pa hi Champhai-ah IV Grade hna thawk lai ani a, music lama tuina ril tak nei niin Synod Music hnuaiah a zir tawh a, mahse sum harsatna vangin a zir chhuak thei lova, tuna hetianga hlawhtlinna a nei hi a lawmpuiawm takzet a ni. Tunah hian an kohhran ah zaipawl conductor niin khawhar In ah pawh khuangpu bera an hman ani bawk. (Mizoserver)

Presbytery Hmang Mek October ni 11 atanga vawiin ni 14 (Pathianni) thleng hian Mizoram Presbyterian hnuaia Presbytery 36 ten inkhawmpui (presbytery) an hmang mek. Tukin zingah hian Presbytery hnuaia Upa thlan thar te engemawzat nemngheh an ni ang. Zan lamah Presbytery Moderator kalchhuak tur thlahna leh a thar lawmluhna inkhawm (valedictory service) neih ani bawk ang. Rimawi Kût BMCF Camping kan neih lai (18-19 October) hian North East India Christian Council (NEICC) Youth Assembly huaihawtin Chanmari Presbyterian kohhran Biak In-ah Peace & Christian Music Festival neih ani dawn. Rev Chanchinmawia Thihdan Chhui Zel… Aizawl leh Mizoram hmun hrang hranga mi te ngaihven ber Rev Chanchinmawia thih dan, doctor ten ‘thah ani ngei e’ ti a an finfiah chu, a chhuitu ten thu mûm an la nei thei meuh lo. Pawl thenkhat chuan hemi chungchang chhui tur hian CBI ko lut turin sorkar an kar mek bawk. He thihna avang hian Mizoram a bikin Aizawl ah titi a ti tamin, chnchin mak tak tak a darh phah a. Thudik leh dik lo hriat hran har khawpin sawi dan chi hrang hrang leh ngaihruat dan te, thudik lek lek leh dik lo deuh te pawh a niang, a vir kual nasa a. Mizoram pawna mizo te awmna thleng hmun hrang hrang pawh he thil thleng hian a nghawng ve lo thei lo ani.

BMA WEBSITE

(www.bangaloremizo.info) Hun engemawchen atanga kan lo sual tawh website chu, kumin 2007 atang khan kan nei ve tar eng mai. He kan website hi a changtlungin a tlawh pawh a manhla fu a ni. A web design te pawh professional kutchhuak tih takah zahpuiawm lo tak ani. Tunah hian he kan website hi Pu Joshua Lalrempuia (administrator) leh Pu RL Rinawma IRS (moderator) ten min vil sak mek a. A content developer te pawh tha tawk tak kan nei a ani. An ni min enkawlsakna zarah hian he kan website hi a changtlun phah nasa hle a ni. BMA Website ah hian Bangalore Mizo te tana hriat tur te, chanchinthar te, articles te, forum te, visitor’s feedback te, BMA Newsletter te, thlalak hmuhnawm tak tak te, directory leh thil dang dang te a awm a. Lo tlawh chin ve mah the. Tin, kan website ah hian chanchinthar, article, thlalak leh, thil dang midangte tana thil tangkai tur thil te advertisement thlengin a duh apiangin a pek luh theihe. Mahni ngei pawhin a dahluh theih bawk. Kan hmantangkai thiam leh kan nihlawh ani mai.

Vol XII Issue No. 41

Bangalore Mizo Association Pathianni Tin Chhuak Chanchinbu

LAWRKHAWM Nobel Prize 2007 Khawvel chawimawina sang leh hlu Nobel Prize semna chu tun thawhtan atang khan Stockholm hmunah neih ani leh ta. He chawimawina semna hun hian October ni 15 thleng a awh ang. Hriat theih china he chawimawina dawng tu te chu, British ziakmi Doris Lessing kum 88 mi in Literature-ah; Mario Capecchi (Italian-American), Martin Evans (Briton) leh Oliver Smithies (Briton-American) ten Medicine or Physiology-ah; France mi Albert Fert leh German mi Peter Gruenberg ten Physics-ah, US vice president hlui Al Gore leh Intergovernmental Panel on Climate Change (IPCC)-in Nobel Peace Prize te an dawng. Literature tih loh hi chu a mi mala dawng an awm rih lo. IPCC hi UNO peng pakhat a ni a, heta chairman hi India mi scientist, Rajendra Pachauri a ni. Nobel Prize hian gold medal, diploma leh pawisa fai, 10 million Swedish kronor (1.53 million dollars) te a keng tel. (AFP) Myanmar Prime Minister thi… Myanmar Prime Minister Gen. Soe Win (59) chu hun engemaw chen thisen cancer (leukemia)-a a damloh hnu in Yongon-a sipai damdawi in ah tun zirtawpni kalta khan a boral. Kum 2003a Aung San Suu Kyi beihna nasa taka sulsutu ber kha a ni. Hetihlai vek hian Myanmar ram buaina hian ziaawm lam ala pan hlei thei lo. Nimin mai pawh khan sawrkar dinglai duh lotu leh democracy sawrkar ngiata lungawilohna lantirtu te zinga mi an hruaitu te mi pali lai an man. (AP) Kan Pa Chauh Lo Chu… Nupui leh mo fel tak ni mek a lang Aishwarya Bachchan chuan hmangaihna leh inngaihzawnna lam rawngkai reng reng chi film chu a pasal, a changtupa a nih dawn loh chuan a chang duh loh bur mai. Ash-i te reuh hi tunah Boston-ah Pink Panther 2 changin hun a hmang mek a. A thutlukna (phek hnung en rawh) te hre chiang hle mah se producer lar Rohan Sippy chuan a film siam tur atan a awt thlu ngang a niang, Boston lamah hian umzui a rilruk mek. Nupui fel leh zahawm tak nih a tum avang hian Kiran Johar-a film a chang tura sawmna paw halo hnar fithla thak tawh anih kha. Sawm hlawhtling tak maw. (IANS) World Cup Qualifier-ah India che chhia Tun thawhtan kal ta khan 2010 World Cup, Asian football qualifiers thawh khatna (first leg)-ah, mahni muala pawr ve tak, Indian Football Team te chu Saida International Stadium, Sidon-ah a thlengtu Lebanon-in 4-1 in an sawp. India tana goal awmchhun hi Sunil Chhetri tih luh a ni. October ni 28-ah, Chennai-ah hemi te pahnih tho hian thawh hnihna (second leg) an khel leh ang. Result dang kan hriat theih te chu UAE Vs Vietnam (1-0), Palestine Vs Singapore (0-4), Thailand Vs Macau (6-1), Omen Vs Nepal (2-0), Yemen Vs Maldives (3-0), Syria Vs Afghanistan (3-0) leh Bangladesh Vs Tajikistan (1-1). BMA Office Bearers: President General Secretary Treasurer Sports Secretary

: Pu K Lalrokima : Pu K Laltlankima : Nl. Blessy Sailo : Tv. Joar Panzela

Date: 14h October 2007

Phek Li-na

Hetia an chak loh hnu lawk tun nilaithawhtan khan Kolkata-ah Bengali magazine 'Dakshini Barta' huaihawtin India Captain Baichung Bhutia duhsakna hlanna inkhawm buatsaih ani a. Hetah hian AIFF president leh union minister Priya Ranjan Dasmunshi ten Bhaichung Bhutia hi Golden Boot an hlan. (IAN) Tunge I hria em? Football chanchin zirmi te leh ngainatu tam tak tena Europeon Footballer of the Year 2007 ni tura an beisei leh rin, Ricardo Izecson dos Santos Leite tih hming tawi lo tak mai pu a, 1982-a Sao Paulo hmuna chhungkhaw khawsa thei tak atanga piang, kum 20 mi chauh ala nih lai 2002 kuma Brazil in a vawi ngana atana World Cup an chawi tuma Brazilian team member-a a tel atanga khawvelin a hmelhriat tan, a kum leh 2003 atanga Italy rama club ropui ber pakhat AC Milan-a an lakluh, 2003/2004 kum te a AC Milan, Italian Leage Winning Team-a hlangkaitu, chumai ala nilo kumin (2007) Champions League AC Milan chawitirtu, football player ropui tak tak Pele, Diego Maradona, Michel Platini leh Zinedine Zidane te ang thova number 10 ha ve thin, Champions League match 13-a goal 10 khung thei, hman lawka Real Madrid President Ramon Calderon-an euro million 90-a lei tuma Spanish Sports Daily Marca-in a tarlan leh kar kalta maia Milan President Silvio Berlusconi-in “engvang mahin ani hi Milan atanga hralh chhuah ani dawn leu” ti a, a lo sawi, kum khata a ball petna (inkhelhna) atang ringawta euro million 6 laluta Italy rama footballer hlawh tam ber ni mek, kum 2011 thlenga Milan nena contract nei naupang nula leh tleirawl deuh te * rawn kha tunge?!! I hriatloh chuan Nl. Panteii i zawt mai dawn nia. … chhiar liam mai mai chi… ¦ “Nimin BMA Tourney final ni zet kha chu inkhel en leh thil dang aimah chuan refreshment mawlh mai kha nih kha HIT ber mai” - James of Shanti Nagar (Cake 6 leh coke bur 8 a rualin)

¦ “Nizan chu kan hepz deuh aniang, kan lam nasa lutuka kawng kan herh fur mai” -Shanti Nagar FC (ruremsangi hla ah ngat khan asin an lam kur hnep hnep ni)

¦ “Vai leh hnamdang ho hmuha min dimlo baksaka (inkhelhna mah nise) min han sawp lutuk kha chu… kan pasalte hmuh lai ngeiin a vuakfung tel lo kut lawnga in nuai mai ani ka duh” - Pi Madingi (UTC Sports ah Pi Mahlu-in Badminton-ah a knock-oughh… alawm le)

QUOTE OF THE DAY Kan rama nawrhna tam ta lutuk hi mipuiin Sorkar kan ringtawk zia tilangtu a ni; kan innghah ngamna leh kan rintawk te hnen lovah kan nuar ngam ngai lo. - Dr. R. Lalthangliana

Vice President Assistant Secretary Assistant Treasurer Cultural Secretary

: Pu PC Lalduhawma : Tv. Madawnga Hauhnar : Nl. Thaarie Hnamte : Tv. Obeda Lalhuliana