Bma Aw: 28th October 2007

BMA AW An Official Organ of The Bangalore Mizo Association

Registered Under Societies Act of Karnataka No.BLU-S188-2007-08 Date 7 May 2007

Vol XII Issue No. 43

Bangalore Mizo Association Pathianni Tin Chhuak Chanchinbu

Date: 28th October 2007

Phek Khatna

“KOHHRAN LEH MIPUIIN REV. CHANCHINMAWIA MAHNI INTHATAH NGAI THEI LO… ” Ni 26, October (Zirtawp) tlai dar 5:30 khan Synod Moderator Rev Vanlalchhuanga chuan a chenna inah thuthar lakhawmtute kawmin tun hnaia Rev.Chanchinmawia thih dan chu Kohhran leh mipuiin mahni inthatah an ngai thei lo tih a sawi a. Synod Moderator chuan nakum puitling Sande Sikul zirlaibu tur Rev Chanchinmawia ziak pawh zir anih tur thu a sawi. Police lamin mahni inthat niin an thil chhui mekah chhui chhuak mahse he zirlaibu hi an zir tho tur thu a sawi ani. Synod Moderator chuan Rev Chanchinmawia thih dan leh thil awmdan engkim Pathianin a hria tih a sawi bawk. Rev.Chanchinmawia, an chenna in choka-a thi a chhar a nih atanga ni engemawzat a liam hnuah pawh, he thihna chhuitu, kan Mizoram police ten thil chiang fek fawk mipui te hriata puanzar tur engmah an la nei thei lo. Hetih lai hian mipui nawlpui erawh chuan rindan thuhmun leh inang an nei tan ta tih Mizoram chanchinbu engemawzatin a tarlang. KAN PATHIAN HLA LEH MIZO TAWNG -Obeda A thupui hian a huam zau hle nachungin tunlaia kan thalaite hla bik (thalaite hlabu-a chuang) chauh kan thlir dawn a ni. Thenkhat hi chu a phuahtute ka hriat loh an ni hlawm a, kei meuh pawhina ka hriat chu hla lar tak an ni phawt ang. (Hla phuahtu tih aiah Hla siamtu tih hi kan hmang thlazen a, Hla hi Phuah lovin a siamin an lo siam thin em maw ni tehreng!) 1) Evan Lalropuia Hla 'Lalpa a ropui hle' tih atang hian i han tan teh ang. Hetiang tawngkam, Degree nei sang lo lutuk hi Bible-ah pawh kan hmu zeuh zeuh va, chu chu he hla phuahtu hian nghahchhanah a hmang a ni mahna. Mahse Pathian meuh sawi nan chuan 'A ropui hle' tih tlawng chu a sitawm deuh a ni. Positive Degree pawh ni lo, Comperative Degree pawh ni lo, Superlative Degree ngei kan hmang tur a ni. Degree sawi takah chuan 'Ka tlantu khawiah nge i awm' tih hlaa 'Aw, ka Chhandamtu mak ber' tih lai tlar hian rilru a ti buai map mai. Rev. R.Lowry-a hla letlingtu hian "Chhandamtu engzah chiah nge a neih ang aw?" a tih theih a ni. He hla chang 3-naa "Aw, I lo kal lai ang khanin, tunah ka hmu thei lo che." tih thu pawh hi a nuihzatthlak a ni. Lal Isua lo kal lai kha lo hmu ve ang ziazangin. Lo hmu vein Tirhkoh Paulate zingah khan lo chetla ve thin pawh ni ta tehreng se a tawngkam hi a dik thei chuang lo. 2) Lallawmthanga Hla lehlin 'Phu loh Hmangaihna' chang khatnaah chuan "Hmangaih lungduh kaltate chuan, kan zinna ram lei ninawm hi, hnuchhawnin tudang ngai lovin an leng" tih kan hmu a. He thu hi chhiar chhiar ila a Syntax kalhmang a dik thei lo. "...kal tate chuan...an leng" ni lovin "...kal tate chu...an leng" tih zawk tur a ni. He hla vek chang

tawpa, "an lenna rammawi ka thlirin, lungchhir mittui ban zai an rel" tih pawh hi a dik lo. 'Ka thlirin' tih thu hian a dawt chiah tlar hi a kungkaih a ni si a, a thlir avang ngawt chuan lungchhir mittui ban zai an rel phah hauh lo vang. (a reng reng thuah mittui hi a ban theih loh!). A chunga ka sawi hmasak ang deuh chi khi B.Lalthlengliana hla 'Damchhung ni' ah kan hmu leh a. "Natna leh mangan, tam...retheihnaten, min chim vel mah se, hmun a chang ta lo" tih a ni. Han chhiar nawn leh la "natna...retheihnaten...a chang ta lo" tih a nih hi. ('A' aiah 'AN' tur a ni si a). R.Lalnunpuii hlaah pawh "Thlarau zawng zawng mahni hmunah, kal tawh turin Lehkhabuah, an hming an zawng tawh dawn si." tih a awm a, a Adverbial Clause zawng hi han paih ila, " thlarau zawng zawng... an hming an zawng tawh dawn si." tih a nih hi. He hla vek chang tawpa "chu hmun nuama cheng ve turin" tih pawh hi "chu hmun nuama cheng ve tur chuan" tih tur a ni. (a hnungah chiah hian a zawm… ) BMA EXECUTIVE COMMITTEE, MEETING HRIATTIRNA A Hun: 3rd November, 2007 (Inrinni) Tlai Dar 3:00 A Hmun: Pu K. Laltlankima te In, SCM Programme Centre, Mission Road

Vawiin BMCF Inkhawm Programme (Fellowship & Sharing) Hruaitu: : Rev. Dr. K. Sapthanga Karleh Pathianni (04.11.’07) Hruaitu: Pu K.Laltlankima, Tantu: Tv. Benjamin Lalfakzuala, Thawhlawm Hlan:Tawngtai Rual, SpecialNo: Nl. Margaret Lalrinfeli, Thuchah: Pu R.L.Rinawma

Vol XII Issue No. 43

Bangalore Mizo Association Pathianni Tin Chhuak Chanchinbu

Editor C.Lalhmachhuana, UTC, Ph- 9845330822, Joint Editor Thaarie Hnamte Vasanth Nagar, Ph. 9886145877 Circulation Staffs: David Laldanfela, Lalhmachhuani Vanlalhluni E-mail: [email protected] Website: www.bangaloremizo.info A Man Thla Khatah : Rs. 15/-

Editorial… Tunlai hian sorkar laipui sum tam tak senga Mizoram sawrkarin hma alo lak tawhna, sum a awm tawh loh avanga chhunzawm nita lo, Falkawn Refferal Hospital chu Mizoram sawrkarin Roman Catholic Kohhran hnenah hlan tumin kohhran hruaitu te nen an indawr mek a ni awm a. Hemi chungchangah hian ngaihtuah tur tam tak a awm thei awm e. Engvanga central sorkar hian sum hi pe thei tawh lo nge anih? Nge a pe duh tawh lo? Refferal sakna atana sum rawn kal hi a hmanna tur lo deuh ah te hman niin central lam hian alo hre ru ta mai em ni? Tin, he projectah hian Mizoram sorkar hian tih/thawh ve tur a nei a, mahse chumi pawh chu a ti ve thei/duh tlat lo nia mawle. Hemi avang hian central lam hian sum a rawn pe chhunzawm duh ta lo mai ani lo maw? Ngaihtuahna a tithui hle mai. Hetiang anih chuan Mizoram sorkar hian central sorkar rin hi a kai lo thuai mai lo’ng maw? Hemi atang ringawt pawh hian kan ram khi han thlir vang vang teh i lung a awi em??

Date: 28th October 2007

Phek Hnihna

3)Zoramliana hla 'Thihna luiral'ah khan "ka thla a kal Lalpa hnenah, vansang mu angin a leng vel" tih kan hmu a. Heta a Simile hman hi Simile inchukha lo tak niin ka hria. Vansangah mu a han len vel tak tak hi chuan kal tumna mumal pawh a nei lo. Lalpa hnena kan thla a kal thu sawinan chuan a inhmeh lo deuh. Simile-a mu vek hmang J.Zahmingthanga pawhin "chung muvanlai iang min chawiin" a lo ti bawk a, heta zawhna lo lang hmasa ber chu "Tuin nge mu chawi ngai?" tih hi a ni. 4) Pu T.Romama hlaa "thinlunga Lal atan ka lo thlang ta, a duhzawng anga awm atan min duh" tih hi i lo thlir leh lawk teh ang. Heta zawhna lo lang leh bawka chu "Thinlunga Lalah engtik hun atan nge a thlan? A duhzawng anga awmah engtik hun atan nge a duh?" awmzia a awm ta lo reng reng. Hetah hian hman lohna turah 'atan' a hmang a, Hmanna tura 'atan' hman lohna hla chu Mimi Renthlei sak "ka thlang tawh che Ainawn kumtluangin" tihah hian a ni. Kumtluangin a thlang lova (theih pawh a theih lo va), Kumtluang atan a thlang zawk a ni si a. Hla phuahtu pakhat leh pawin "I hmangaihna ka tanah a hlu" a lo tih bawk pek chu. 5) Mizo tawngah hian Invauna tawngkam te, Ngena tawngkam te hi a awm hrang ve biai a, "chu chu chutiang chu a ni a, tha tak a ni, i ti ve duh angem?" kan tih chuan sawmna emaw ngenna emaw tawngkam a ni a. "chu chu i tih chuan chutiang chuan i awm a nga, a rapthlak hle dawn a ni. i ti ngam dawn em ni?" kan tih chuan Invauna emaw, Intihthaihna tawngkam emaw a lo ni daih ang. Sanglianthanga hla lar tak pakhatah chuan " Krista vanga tuar ngam...mualphona zawng zawng...i phur ngam dawn em ni?" tih kan hmu a, he hlathu hi Invauna tawngkam a ang hle mai. "Krista vanga mualphona zawng zawng hi i phur ve ngam dawn ringawt em ni?" tihna lam a kawk daih si a. 6) Tuna ka sawi tur ang chi hi 'Tawngdik Pawl lo' ka ti mai thin a. Biakdika hlaa "Lalpa ringtute chuan hnehna chu an nei" tih ang chi hi a ni. Mizo tawngah chuan Hnehna chu a neia nei lovin a chanin kan chang zawk thin si a. Vanlalzuata hlaah pawh "tichuan an hnenah chengin a awmpui ta a." tih kan hmu a. Zankhat lek awmpui sawinana 'cheng' hman chu a em em deuh niin ka hria. Dr. Ramdinthara Sailo hlaah chuan "ka rul seng chuang lo ve i thatna hi" tih kan hmu a, hei pawh hian tawng dik a pawl lo. Rulh lo tum tawh thina, rulh sen ngang loh sawina ni lovin, a rulh zawh sen dawn loh thu a sawina a ni zawk a, "chuang lo ve" tih hi "chuang lo vang" tiin thlak ila chu a dik zan ang. Hla dang pakhata " ka rul seng law'ng hrin chan chhungin" tih hi chu a dik. He pa hla bawk 'Vankhua'a "an leng dial e, Angel dungthulin" tih pawh hi a dik lo. Heta a Adverb hman "dial" hi Double adverb "dial dial"a thlak tur a ni. Chuti a nih loh chuan "an leng ta dial mai" tihna a ni daih ang. He pa hla(a dang) vekah hian "thinlung hian a thukzia a chhui phak lo" tih a awm a. Tawnghmang dikah chuan 'thinlung' leh 'chhui' hi a kal kawp thei lo vang, thinlungin thil kan chhui ngai hauh si lo va. A hla dang pakhat lehah pawh "aw, vanthli lo leng ang che" tiin thli chu a len tir ngawt mai a, a changa thaw vuk vuk thin, a changa tleh seng seng thin 'thli' chu a lenin a len tir ngawt mai a nih chu. 'leng' sawi takah chuan T.Romama hla "aw Van Thlarau Thianghlim lo leng ang che, min awmpuia venghim thin tu kha" tih hian tawnghmang dik a pawl lo bawk. Thlarau Thianghlim biaa "aw Vanthlarau thianghlim lo leng ang che" ti na na na "...min awmpuia venghim thin tu kha" a ti leh daih mai. "Ka nu min tawngtai sak rawh, min hmangaih thin tu kha" tih thluk chiah a ni. He hla tlukpui chiah hi hla dangah kan hmu leh a, "aw ka Lalpa thatzia hi tem r'u ka rualduhten" tih a ni. "tem r'u" tih a ni a, "ka rualduh ten" tih a ni leh daih mai. FC.Thanzawna pawhin "I tan rinawm lovin phatsan thin mah ila" a ti a. "Phatsan thin che mah ila" tih a tum a ni reng si a. Naemi hla sak pakhatah chuan "Chawmtu nei lo Beram vak bo te" tih kan ngaithla a. Beram hi chawm lova a vulha kan vulh zawk thin avangin tawnghmang dik lo a ni a, tin, Beram hi an vak ngai lo va, 'tla bo' kan hman loh chuan 'bo' ti ta ringawt mah ila a dik zawk tho tho ang. Hla nalh tak pakhat "Tap chungin Kros kawng" tih chang tawpa "ka mittui min hrukfai sak tawh ang a" tih pawh hi 'tawngdik pawl lo' ka tihte zinga mi a ni. (phek li-na en leh mai teh… )

Vol XII Issue No. 43

Bangalore Mizo Association Pathianni Tin Chhuak Chanchinbu

Cha nc hin Tha rlâm KEIMAHNI… ¦ Pi Muanteii, Pu Rote-a thiannu pawh tun zirtawp khan Mizoram lamah an pa fin turin a chho ve leh ta. An ni chhungkua Mizoram lama min han awmsan ta daih mai hi Bangalore Mizo ten kan ui tak zet zet a ni. ¦ Nimin (Inrinni) khan BMMP member te chuan Camping Follow-up nip ah fawmin inpawlhona hun hlimawm tak Pi Siampuii te In ah an nei. A tel te an hlawk hle tih thu kan dawng. ¦ Nimin Vek khan BMCF Area 2 Camping Follow-Up Programme, Pu Josiah te In ah neih a ni bawk. Mi 28 lai an kalkhawm a, zaihona leh sharing hlimawm tak an hman bakah sawhchiar tui tak Pu Josiah hian alo siamsak bawk ani awm e. MIZORAM LAM… Ruang Chhar leh pek Nimin zing dar 5:20 vel khan Lalsangi (61) D/o Zahmuaka Sihphir Arpu veng chu ama dawrah thi-a hmuh ani a, a taksaa hliam awm dan atangin mi thah ni ngeiin a lang. (mizoserver) Sazu, Pangang leh Bâk Mizoram hmun hrang hrangah Sazu puang chuan zual lam a pan chho mek a. Kolasib Dist. chhunga khaw 28-ah chhungkaw 2608 te buh leh thlai chu a sehchhiat sak deuh vek tawh. Khaw thenkhatah chuan an tui tlan-ah te Sazu thi rim a nam avangin harsatna an tawk mek bawk. Champhai Phaizawl a Pu Sangliana leilet buh chu thla hmasa khan Bak rualin an khawih ni a thudawn a ni a. Heng Bak te hian buh vui la pum lo an seh chhe nasa hle a, tunah chuan an che tawh rih lo tih thudawn a ni. Lawngtlai Dist. a khaw 65 a chhungkaw 4463 thingtlang a buh chu seng tur awm lovin Sazu hian an eizawh sak vek a. Tunah hian leilet buh te chu Sazu in an suasam leh mek a ni. Diltlang khua a leilet Buh te pawh Sazu hian a khawih zo tawh niin thudawn chuan a tarlang. Thingfal a chhungkaw 20 te Serthlum chu a hmin hmasa a piang Sazu in a ei sak a. Heng Serthlum te hi Sazu hian a chhung khawrh fai vekin, a kawr chiah an dah bang thin tih thudawn chuan a tarlang. Heng sazu te hi an nghal hle a, chhun en lai pawhin Serthlun hi an ei ngam tho a. Tlailam khawthim dawnah phei chuan Serthlum eitur Sazu inhawrkhawm chu an thawm a lian hle tih huan/lo nei tu te chuan an sawi. Zamuang khua (Mamit District) ve thung chuan Pangang danglam tak mai apuang chiam a, hei vang hian In 2 chu luah ngam lohvin an rauhsan hial a ni. Hetiang Pangang puang hi Oct 18 atang khan a puang tawh a. Patling kutzungpui tiat vel, a rawng dum leh buang lam, a hmul sei deuh tak a ni a. Amah pawh hi a me hle tih an sawi. In khatah 100 vel zet an awm khawm a ni tih thudawn chuan a tarlang. (mizoserver/ralvengtu)

Date: 28th October 2007

Phek Thumna

Dakpu (Postman) Chhuanawm India ram Post Office-a hnathawk tha te chawimawina sang ber chu Aizawl Dak Inpui-a Dakpu Pu T.Lalnunpuia hnenah Union Communication Minister A.Raja chuan a hlan. He lawmman hian pawisa fai Rs. 11,000/- bakah Certificate leh Medal a keng tel a. Hetiang Award hi India rama Dak In-a hnathawk tha mi 7 hnenah hlan an ni. Kum 42 mi, Pu Lalnunpuia hian kum 15 chhung Dakpu-a a tan chhung hian thahnem a ngai hle a. A tih tur a ti khawtlai ve mai mai ngai lo tih Post Master chuan a sawi. (ralvengtu) National Youth Carnival 2007 Vawiin thleng awh tur Baptist Youth Fellowship of India buatsaih, National Youth Carnival chu ni 25 atang khan Dimapur Nagaland ah hman mek ani a. He hun hmang tur hian gospel singer Nl. Pensy B. Lalthangliani leh Mizoram hmun hrang hrang atangin zaipawl leh cultural show nei tur palai 70 chuang an kal. Cultural Show-ah hian Dr. R.Lalthangliana, Minister chu khuallian a ni ang. (ralvengtu) Central YMA General Conference Thunawi Kar hmasa lama YMA Inkhawmpui lian neih zawh takah palai riak lut zawng zawng 5,760 an ni a, langa kal 2,680 te nen mikhual 8,440 an awm. Mikhual thleng tam ber BDO chuan mi 173 an thleng. Kum 2007 chhunga ruihhlo tihchhiat a vaiin Rs. Nuai 139.9 a ni a, ruihhlo ngai sim 2,148 an awm, tih report a ni. Ramngaw leh Nungcha humhalh tha (YMA Branch-ah) 1stBungzung, 2nd- Champhai Zote, 3rd- Zemabawk Azl.; Groupah 1st- Champhai, 2nd- Saitual, 3rd- Tuipuiral te an ni. (ralvengtu) Mizo Zaimi Zinga Album Siam Tam Ber Ni 26 zan thla eng hnuai ah khan New Capital Complex, Aizawl ah H. Lalchawimawii audio album 29-na chu B. Lalthlenglianan (Thangkura) a tlangzarh. Tihian mizo zaimi zinga audio album siam hnem ber record Pi Lalsangzuali Sailo (28 albums) chu a khum ta ani. (Tv. Joshua te ho awm se nuam an ti ngawt ang) (Vanglaini) Zin Mi te Him Zawk Nan Zin veivakte Vairengte bul vela suam an nih loh nan Sorkar chuan ruahmanna thar a siam. SDO Civil, Police officer-te leh Private Travel Agent hrang hrang 14 aiawh kal khawmte chuan Vairengte-ah an siama, chumi ang chuan zan dar 8 hnu lama hmun ralmuanglo pal tlang turte chu Police Escort hnuaiah kal tir thin an ni ang. (mizoserver) A MAMAWH TE TÂN BMA han pe ngawt dawn sela, han hmanna em em tur kan nei si lova. Hralh hming pu ve chang changin an hralh mai dawn a ni awm e, a man lam chu inbiak rem/thiam dan a ni mai. Pu K.Laltlankima, GS, BMA hnenah a mamawh chuan a hnuaia kan han tarlan te hi ngaihven ran chi ani e. 1. Refrigerator 180 litres 2. CRT Monitor 17 inches.

Vol XII Issue No. 43

Bangalore Mizo Association Pathianni Tin Chhuak Chanchinbu

LÂWRKHÂWM Jackie Chan, Beijing Olympic Hla Record… Martial Art chauh emaw a larpui kan lo tia. Audio album engemawzat alo siam reng tawh a lawm le. Tunhnai mai khan Beijing ah, Peter Kam phuah nakum Beijing Olympic Countdown hla tur (Chinese version) a rawn record ve zân a nih chu. Hei hi Olympic organizer te huaihawt niin, ani bakah hian Chinese pop singer dang mi 100 chuang zet ten he hla tho hi an lo record tawh a ni. Eng atan zozai ni maw?! (TNN) 2007 Movie of the Year… Gerard Bartler pa taka a channa 300 kha la en lo kan awm em? Tun thawhleh-a neih zawh tak 11th Hollywood Film Festival’s Hollywood Award-ah khan “2007 Movie of the Year” ah thlan ani. (TNN) Kan Chenna Khawvel Dâwl Zawh Bâkin… Tun ningani maia United Nations Environment Programme in a tihchhuah, Global Environment Outlook-4 in a tarlan danin kan nitin khawsak phung leh nunphung hian kan chenna khawvelin vawikhata min pek theih aibaka 40% a tam zel natural resource hi kan hmang a ni a ti. Hei hian sik leh sa mumal lo leh khawrêl chhiatna (natural calamity) hrang hrang a thlen thei a ni a ti. Kan chenna khawvela natural resource hrang hrang Siamtun amah leh amah in awi nung (recycle) tura a duan hi duhamna leh changkan duhna avangin, a zawh tawk bak kan hmang ral nasa lutuk ta ani. (TNN) Beng Êk Ei… Thla leh November ni 24-a maia Australia inthlanpui lo awm tura chak mai thei dinhmuna ding, tuna eptu pawl, Labour Party Leader Kevin Rudd chu tunhnai maiah a thlalak (video) maksak tak mai chu You Tube.com website ah tihchhuah ani a. He video hi tun hma kum thum emaw vela Parliament inkhawmlai a ni a. A lan danah chuan member tu emaw in thu a sawi laiin Kevin Rudd hian vawi engemaw zat a kut vei lam zungchala a beng chhung kawmin chumi hnuah a ka chhungah a kut zungtang zen zauhin a thial zui nghal. He thlalak hian politics-a a dinhmun pawh engemawchen tihniam tura rin a ni. (TNN) … phek hnihna zawm… Bianga chawmal kai chu kan hrufai thin a, mittui erawh chu kan hruhul thung a ni. J.Zaihmingthangan "Van taksa sin hun tur" a tih pawh hi ngaihtuah tham fe a ni. (Taksa a sin theih em?) "sual tlenfaina luipui chu, sual fai nan ka daikai ang" tih pawh hian tawng dik a pawl lem lo, luipui hi daikai mai mai theih a ni lo. Tun hnai deuhva hla lar thar pakhatah pawh "thlan puana tuam chungin a lo chhuak ta" tih thu a awm a, "thlan chu puanin an lo tuam emaw ni tehreng aw?" a tih theih hial a ni. Rophunliana pawhin "tuna ka nung hi kei ka ni tawh lo va" a lo tih pek chu. BMA Office Bearers: President : Pu K Lalrokima General Secretary : Pu K Laltlankima Treasurer : Nl. Blessy Sailo Sports Secretary : Tv. Joar Panzela

Date: 28th October 2007

Phek Li-na

7) A Syllable tih kim nan maia Hlathu kaihtawi hi kan ching hle mai. Tun hmaa Mizo tawnga awm ngai miah lo "chutin" te hi a lar ta em em mai a ni. Lalmawia paw'n "Engtikemaw ka la hmu ang" tiin "Engtikah emaw" tih chu dik lo takin a kai tawi a. T.Romama pawhin "Engtikemaw kan la chhuahsan ngei ang" a ti bawk a ni. "Pa hnena hawng turin" tih turte hi "Pa hnen hawng turin" an ti awlsam et a, "an chung a pik si lo" tihna turah "an chungpik si lo" an ti leh ringawt bawk a, a lam tih kim nan 'A' hmanna tur ngawih ngawihah an hmang lo va, Dr. Ramdinthara ve thung chuan a lam tih kim nan vek 'A' hman lohna tur ngawih ngawihah a hmang ve thung a ni. "a hniakhnunga kan zui ve nan" tihah hian. 8) 'Fo' kan hman dik loh fo thin hi ka lo sawi ve fo tawh thin a, tunah hian sawi ka tum tawh lo. Hla Pakhat erawh chu i han tarchhuak talh teh ang. F.Thanchhuma hla a ni a, " Ka thutiam a danglam ngai lo, a nghet fo thin." tih a ni. He hla nuihzatthlakna lai tak chu "Zu ka in ngai lo, ka ngei zeuh zeuh" tih tlukpui chiah hi zu nia maw le. (Sei in ti ve emmm?!!?) FIFA WORLD RANKING Tun nilai (24th October) khan FIFA in ranking thar a tichhuak a, a sang sang 10 kan han tarlang e. Kualkhung chhung ami hi a hma aia ranking-a an tlakhniam dan emaw, hma an sawn dan emaw a ni e. 1. Argentina 2. Brazil 3. Italy 4. France 5. Germany 6. Spain 7. Netherlands 8. Portugal 9. Czech Republic 10. Croatia

1533 points 1459 1387 1271 1245 1226 1207 1203 1174 1155

(+ 1) (+ 1) (- 2) (+ 2) (- 1) (+ 1) (- 2) (=) (+ 2) (=)

… chhiar liam mai mai chi… ¦ Chhas neihloh hlawkna 10-te 1. Sum a hek lo, 2. Lung a leng lo, 3. Nula/Tlangval tupawh a biakthat ngam. 4. Rilru nat a awm lo, 5. Mi thik buai a awm lo, 6. Mut a tui, 7. Hmelah buai a ngai lo, 8. Ze thup a ngai lo, 9. Inchei reng a ngai lo, 10. Hunawl a tam. BONUS: DÂWT SAWI A KHÂT. From: Madawnga Hauhnar To: Blessy ¦ “Tuntum Bangalore ka rawn chhuk chu damlohna em em pawh nei si lovin ka awm a nuam thei thlawt lo. Khawiah mah pawh ka chhuak peih meuh lo a ni e.” - Teteii, Marappa G. ( phone bill a chawi hnem thei fu tih thu kan dawng) ¦ Tunkar liamta UTC paho titi: “Lalroutmoi pasal nei tur leh ramhuai/tulûm” tih vel a ni awm e. Chawlhni lehah UTC paho hming leh kohna (hming diktak?) rawn tihchhuah kan tum ang.

Vice President Assistant Secretary Assistant Treasurer Cultural Secretary

: Pu PC Lalduhawma : Tv. Madawnga Hauhnar : Nl. Thaarie Hnamte : Tv. Obeda Lalhuliana