Bma Aw: 14th June 2009

BMA AW An Official Organ of The Bangalore Mizo Association Registered Under Societies Act of Karnataka No.BLU-S188-2007-08 Date 7 May 2007

Vol. XV Issue No. 11

Bangalore Mizo Association Pathianni Tin Chhuak Chanchinbu

Hnehna Hla Lettu- Vanneihtluanga Mi tamtak damna atan Fapa a thih a ngai ang bawkin, hla tha sawr chhuak tur chuan fapa nunna hmanga thleng a ngai a ni. He thu ziaktu Mark Schultz (b. 16.9.1970) hi kristian tunlai hla (contemporary christian music) phuahtu leh satu lar tak a ni a. Album 4 a chhuah tawh a, vawi tamtak nominate a nih hnuah 2006ah khan Dove Award hlan a ni. September ni 17 2005-ah nupui Kate a nei. Mexico-a fahrahte puala concert a neih tumin a rilru a khawih hle mai a. An puala thawhlawm khawnna atan May 6, 2007ah khan California atanga Maine (mel 3,500) chu thirsakawra thlen tumin a fang tan a. A karah chawlin concert a nei zel a, July ni 8, 2007-ah Bangor (Maine) a thleng ta a ni. Kan chhiar tur hla awmna He’s My Son album-ah hian hla 10 a awm a, kum 2000-a tlangzarh a ni. Zaithiam niha mipui nena mahni hla lâr han sakho dual dual tluka nuam hi awm theiin ka ring lo. Nikum March thla khan ka CD hmasa ber ka chhuah ve a. Chutah chuan hla pakhat, Ka Fa A Ni (He’s My Son) tih hla a awm a. Pa pakhat, a fapa thi tur ngaihtuahna atanga ka phuah a ni a. Mak deuh maiin he hla hi ram puma radio station hrang hrangah hla lar ber a ni chho ta mai a. Mi tamtakin he hla phenah hian eng nge awm tiin min zawt thin a, chu chu hei hi a ni... Rimawia eizawn tum Mihring sang 5 vel lek awmna khaw tereuhte Colby (Kansas)-a seilian ka ni a. Rimawi hi ka ngaina em em a, college ka zawh hnu chuan, record siama eizawn ve ka duh a, a khurpuia luhchilh turin rimawi khawpui Nashville ka pan ta a. Nashville khawpuiah chuan rimawi chu an ngaithla a ni satliah lova, an chaw ber a ni mai. An hna ber leh an zan mumang a ni a, rimawi lo chu lungphu dang an nei lo emaw tih mai tur a ni a, kawtthler tluan hian rimawia eizawnna chi hrang hrang chu an tlar del dul mai a. Thlen hlim hlawt chuan chu khawpui chuan min mamawh ngawih ngawih hian ka ring nghal a, recording studio hrang hrangah chuan inhlawhna ka han zawng ta a, rin ang a ni hauh lo. Mamawh aia tam Kei aia thiam, kei aia hmelhriat nei tha, kei aia zei leh talent lantir thiam zawk tamtak chu an lo chuang rei rui mai tih ka hmuchhuak tan ta a ni. Tuk khat chu rimawi chhuah phalna (music publishing rights) an chinfelna office-ah chuan ka va kal ve mai mai a. Hmeichhe pakhat hian, “Kar lehah ka bang dawn a, hetah hian inzir paha a kahpaha hna thawh tur (internship) ka hmuhsak mai thei che a ni,” a ti zauh a. Ka lawm kher mai. Mite hna anga hun puma thawh tham chu a ni hauh lo ang a, a kahpaha thawh tur pawh ni se ka lawm tawk em em a, ka vanneihna chu ka ringhlel rum rum zawk a ni. Sawmna Hnartu Hmeichhia chuan chu khuaah chuan hmelhriat ka neih leh neih loh min zawt a. Tumah hmelhriat ka neih loh thu ka hrilh a. Chu veleh, lehkha themah hian mi pakhat hming leh address a ziak mawlh mawlh a, “Hei hi keng la... Ka thianpa hming leh address a ni a. Amah chu First Presbyterian Church thalai pawl rawngbawltu a ni a, phone in i lo be dawn nia,” tiin min hrilh a. Thalai pawl rawngbawlna tih lampang chu ka rilruah a awm hauh lo. Talent ka neiin ka inhria a, larpui leh hlawkpui tumin he khua hi ka pan a ni mai a, rawngbawl ka tum lem lo. Tichuan, rimawi khawvelah, hna kahpah chu ka thawk a, hlawh a chhiat em avangin, ka hun awlah hotelah waiter

Date: 14th June 2009

hna ka thawk tel bawk a. Chuti chuan ka eikhawp ka hmu ngawr ngawr a, mahse rimawi nena inzawmna nei thil pakhat ka thawh tel avangin ka lungawi em em thova. Finfiahna Hmasa Chutianga thla ruk zet ka thawh hnu chuan, ka hla chu chhuah tlâk a nih leh nih loh min ngaihthlâksak ve turin rimawi chhuahtu dawr pakhat chu ka hmin thei ve ta hram a. Mithiam rualin ka hla an han ngaithla ve tur chu ka phûr satliah pawh a ni lo, ka helhhawlh chhe vek a ni ber mai. Ka mitthlaah chuan, an han ngaihthlak rualin an han phu zawk mai ang a, khawvela zaithiam lar ka ni nghal ang a, min han chibai sup sup ang a.... teuh lo! Pa pakhat hian ka hla chu a han ngaithla thuak thuak a, a vai pawhin a ngaithla peih lo, “Vala, piano i thiam vak lova, i aw a chak vak lova, i hla pawh a tha vak lo a nih hi!” tih chiah chu keimah leh ka hla chungchanga ‘sawi’ ka hlawh ve chhun a ni ta mai a. Beidawn theih tiah tiah tak a ni. Thawnthubu-ah te hian beiseina nei sang tak tihtawpsak an nih dante ka lo hre ve tawh a. Mahse, mahni chunga a han tlâk chiah chuan na ka ti takzet a. Ka tliak hnâwp ni ber hian ka hria. Ka aw tal tha sela chuan hla leh rimawi lam thiam lo mah ila tihdan a awm, ka rimawi, ka aw, leh ka hlathu chenin a chhe vek a nih ber chu. Naupan lai atanga ka lo suangtuah zawng zawng chu a chim hian a chim hum hum ni berin ka hria. Duh lohna lamah min kai Beidawng takin chu in atang chuan ka chhuak a, rimawi lam hna kahpah ka neih chu bansanin, Nashville khaw ropui taka hotel tereuhteah hun pumin waiter hna ka thawk chhunzawm ta a ni. Mahse, hetih chhung zawng hian vanneihthlak takin tawngtai ka thlah lo. “Aw Lalpa, eng nge ka tih tak ang? Min hrilh rawh,” tiin ka dil tlut tlut mai thin a ni.Ni khat chu ka thawhna hotel restaurant-ah chuan nupa niawm tak hi an lo kal a, an eitur duhzawng zawt turin an dawhkan bulah ka val kal hnai a, chu pa lianpui mai chuan, “Ka hming chu Mark De Vries a ni a, First Presbyterian Kohhranah thalaite zinga rawngbawltu ka ni a,” tih hi min lo hrilh teh ngawt a. “A ni maw...” “Enteh. Thalai zinga rawngbawl atan i that ka ring tlat a ni. Lo tel ve ta che!” A va han mak tehreng em! Waiter ka ni. Rimawi lam timi ka ni pawh ka ti ngam tawh lo. ‘First Presbyterian..’ tih a sawi atang khan hmeichhe pakhatin address min pek chiah kha a ni tih ka hre ta nghal a. Ka tuina zawng a nih loh avang khan a address min ziahsak chawpin ka lo paih bo daih tawh lehnghal a. “A! Ka thei lovang. Zaia ei zawn tum ka ni a, ka tih chi a ni lovang,” tiin ka tang tlat a. Lo kal ve mai mai la, min rawn enchhin ve reng reng la mawle,” a ti talh a. Thalai zinga rawngbawlna Tichuan, ka tum lawk reng reng lohin, First Presbyterian kohhrana tleirawl rual Bible zirna hmunah ka tei ve ta lauh lauh mai a. Tleirawl rualte lah chu an han phûr nasa khawp a, chutiang phûrna hlimawm tak chu ka chan ve lohna chin pawh ka hre tawh lo. An zinga ka awm chuan boruak thar thawventhlak tak mai ka chhar ta a. Zawhna an ngah zawh poh leh nuam ka ti ta tlat mai a ni.An zawhna tamzawk chu an rinna chungchang te, an hmabak leh an kal zel dan tur te a ni ber a. Chutiang zawhna chhang tur chuan ka rilru ruak chu ka hnawhkhah a tul a, nuam ka ti ta riau mai a. Marka’n hun puma chu hna chu thawk tura min ngen meuh chuan thawk turin ka lo inpeih ru hle tawh a ni. Mahse, chu chu rimawi a ni tlat lo. A chang chuan rimawi tum chu ka châk ngawih ngawih thin tih Mark-a chuan a hria a, ni khat chu biak-in chabi min pe a, biak-in chhunga piano chu min kawhhmuh a, “Rimawi hi hnapui berah neih la, naupangho hi chu a dawttuah neih tawh ang che.” a ti a. Thu

Vol. XV Issue No. 11

Bangalore Mizo Association Pathianni Tin Chhuak Chanchinbu

Editorial Famkimlohna khawvela kan awm ang hian duh angin BMA AW pawh a famkim lovin, hmaihpalh, tihsual etc. kan nei leh hlauh thin. Kan thuchhuah te pawh thenkhat ril a rem lem lo thin ngei ang, heng zawng zawnga kan tlinlohna ah te hian chhiartute hriatthiamna kan ngen tak meuh. Dawhthei tak leh hriatthiamna sang tak nena BMA AW chhiar thin tute hnenah lawmthu kan sawi e.Tun tum pawh hei article thui tak mai kan han chhuah a, mahse engti kawng emaw tala i tangkai pui kan ring tlat. BMA AW a thuchuah duh nei apiang te’n thahnemngai takin I thawh zel ang u! BMA AW hi mitin ta ani. ( Phek khatna chhunzawmna )

mawi tak a ni. Mahse, naupangho chuan min bawh buai reng a, kan inhmachhawn tawh chuan ‘hnapui ber’ an ni lo thei lo. Chuti chung chuan, ka tui bawk a, ka hla tamtak hi hetih laia thalai rualte nena kan khawsakho laia ka phuah a ni. Kan pawlah hian thalai 400 zet an awm a, an zinga ka ngainat ber mai chu Martin Baird a ni a, kum 14 a ni tawh chungin naupang mawl tak ang mai hian a la thianghlim a, a bula awm a nuam thei hle a ni. Thu thin thawng Martin-a pa John-a chu kan kohhranah chuan sunday school zirtirtu a ni a, eizawnnah chuan ukil a ni thung a. Ni khat chu, May 1998-ah khan, Martin-a pa chuan phone-in min rawn kova, Vanderbilt Naupang Damdawiin-ah lo kal lawk teh, hei Martin-a kan dah thut mai,” a rawn ti a, a hmanhmawh hmel hle bawk a. Mark-a nen hmanhmawh takin car-ah kan zuang lût a, damdawiinah chuan John-a chu rilru nâ leh phâwk tih hriat tak hian kan va hmu ta a. “Kar khat kalta lawkah khan, Martin-a kutzungtang hi a rawn vûng a, a zungtang chu a tikawm thei lova, a reh mai ka rin laiin, ni hnih ni thum hnuah pawh a reh ta lova, hetah hian kan hruai ta a. Tichuan, a thisen an la a, an han enfiah chuan.. hei thisen cancer... leukemia...” a sawi zawm thei lo. Kan thin a thawng takzet a ni. A chak chi a nih avangin chemotherapy leh radiation hmanga hemna te an ti nghal a. Martin-a chu ni hnih khat dam-dawiina awma haw leh mai tur angin an sawi a. Mamawh dan anga damdawiina awmtir leh tur a ni. A hmel a la danglam si lova, a hria apiangin rin ngam har kan ti a, a nu leh pa John-a leh Luoise -i te chuan an tuar thiam lo zual a ni. Sunday school zirtirtu kar tina thingpui dawra inhmu khawm thin rual khat hi kan awm a. John-a pawh chumi zingah chuan a tel ve a. A fapa Martin-a chu thi tur ang deuhah a ngaih avangin leukemia a vei tih an hrilh atanga Martin-a thil tawn zawng zawng chu ziakin a chhinchhiah zel a. Kan inhmuh khawm chang chuan a chhiar thin a. Intipachang tak hian a han chhiar tan a, a tawpah chhunzawm thei lovin a mittuiin a nun chu a thunun zawk deuh zel a ni. Lo ngaihthlak leh tawngtaisak bâk engmah tihsak theih kan neih bik loh avangin hrehawm kan ti thei hle mai. Ka fapa a ni.. La lul suh Chutianga kan inhmuhkhawm tum khat chu, John-a chuan a nupui Louise-i nena an fapa mutna pindana Martina khum thutchilha a kut vuan chunga a muthilh an nghah tuma a tawngtai dan min hrilh a. A tirah chuan a pindan kawngka zawnah ka ding reng a. Chumi hnuah, a khum chu ka pan a, a muthilh hma zawng chuan a kut vuanin ka chul hliau hliauva, a muthilh veleh a kut vuan chungin chhuatah chuan ka thingthi a, ka tawngtai ta a,” tih pahin ka kut chu a fapa kut a vawn dan ang chiahin a vuan a. “Aw Lalpa, ka fapa natna hi chhawk theih ka va duh em! Min phalsak hram teh. Martin-a natna hi a let sawmin ka chungah rawn thlentir la, mahse ka fapa hi chu la lul suh... Lalpa..” A sawi zawm thei lo. John-a tawrhna chu a thûk lutuk a, ka hnem phâk rual a ni lo. Ka kut a thlah lova, thlah lovin kei pawhin ka vuan ve reng ringawt mai a ni. Kan inthen a. Chuti khawpa fapa tana pa tawrhna rit tak mai chu hre chungin ka pindanah ka lût a. Khawiah pawh kal ila ka theihnghilh lo. Ka pindanah chuan ka leng hek lo. Hla lo thleng chu Mangang takin ka chhuak a, chapel reh thiap mai lam chu ka pan a, piano bulah chuan ka thu hnawk a, John-an a fapa tana a tuarna na

Date: 14th June 2009

tak mai chu hla hmanga phawrh ka tum a, piano ka han khap tan a, eng note leh chord mah chuan a phawrh zo lo, eng hlathu mah chuan a hrilhfiah zo hek lo.Hla phuah chu ka inpuan-chhuahna hmanrua a ni a. Mite leh he khawvel hnena thil hlu ka pek theih awmchhun nia ka lo ngaih ve chu hla leh rimawi chiah a ni. Chu ber chu ka thinlung chhung atanga ka phawrh theih si loh chuan hlutna reng reng nei ta lo ang ni ber hian ka inhria. Ka chhuak a, ka hawi vel a. Chutiang hunah chuan muthilh theih a ni lova, eng ei mah a tui hek lo. Beidawng thawpika zan tam ka tlaivar hnuah zan khat chu, ka chhungrilah eng emawni hian, vawi khat chauh bei nawn leh ta che min ti hian ka hria a. Engmah dawn lawk nei miah lo hian, zan thimah chapel chhungah ka lut a, Piano chu ka thutchilh a, hla thluk (melody) chu a lo kal nghal ta zawih zawih mai a. Vawilehkhatah ka hmui ka han phun a, ka lam rik apiang chu hlathu a ni nghal ta zawih zawih mai a, ka hriat loh hlanin hla thar sain ka zai ta tlat mai a ni: Zan thimah thingthi-in ka ngen che Ka dilna tlawm hi min chhang ang che Puih ngai hraichawi riang te hi en the Tih theih dang reng ka neih tak loh hi Hla ka phuah a ni tih ka inhriat hmain ka zo der mai! Ka ta ni pawhin ka hre lova, Pathian chuan, “Mark, hei hi ka pe dawn che a ni,” a ti mawlh mawlh zawk hian ka hria a; kei chu a kaltlangna hmanrua mai ka ni. A thupui atana Ka Fa A Ni (He’s My Son) tih phuah chu ka ‘phuah’ awmchhun a ni ta ber awm e. Chumi hnu lawk chuan Nashville khuaa Ryman Auditorium-ah concert ka nei a. Martin-a nu leh pate pawhin an rawn chhim ve a. Hemi tum hi vantlang hmaa he hla ka sakna hmasa ber a ni. Concert zawh chuan Martin-a nu leh pate chuan min rawn chibai a. “Schultz, ka lawm takzet” tih bak a sawi thei lo. Mahse, show hlawhtling leh mipui lawmna authawm zawng zawng ai pawhin ka tan chuan a ropui zawk. Mittui nena zai He hla record tura company nen kan inziah fel lai atangin, He’s My Son tih hi ka CD hmasa berah telh ngei ka tum sa a. Studio-ah chuan, zan rei tak thlengin hla kan record a, ka hah bakah ka aw pawh a dik tawh meuh lova. “Ka aw-in a tlin ta si lova, hla dang kan thun leh thei tawh hrih lovang,” ka ti hman nghe nghe a. Mahse, rimawi chu ka headphone-ah chuan an rawn tiri leh a. Maimitchhing chung hian ka ngaithla a, sa tak tak lem lovin phun deuh mai mai hian rimawi mil chuan ka zai a, Martin-a nena kan inkawp thin lai te, an chhungkuaa an hlim laite mitthlaah ka hmu a, ka sa zel a, a thunawn ka sak chuan ka mittui a tla ta mai. Ka sa hlei thei ta lo. “Khai le. A tawk ta e. Zanin atan chuan tawk rawh se,” tih pahin headphone dah ka tum a. “Che miah suh! Tikhan.. khati tak khan. Zai zel rawh. Kan record nghal dawn!” Producer aw a ni tlat. Engah nge tap chunga ka zai kher kher record a duh ka hre lo. Chutianga tap per pur chunga ka zai pawh ka la hre ngai lo. Mahse, Producer chuan eng nge a hriat ka hre lo. A ti miau si a, zir leh cheimawi awm miah lova chutia ka zai hmasa ber chu CD-ah a bel ta pawp mai a ni. Lungngaite Hnemtu Mak tak maiin, St. Louis khuaa radio station-a hla puangtu (dj) chuan a lo ngaithla fuh hlauh mai a, a rik chhuahtir rualin ngaithlatu tamtakin an rawn phone let a, chu hla chuan hna a thawk ta tlat mai a ni. Natna inkaidarh theih ang mai hian chu hla chu radio station dangin an lo hre ve a, a darh ta thut mai a. A chhuah hnu ni hnih khat lek chhungin khawvel pumpui atangin lehkha leh e-mail sang tel takzet ka dawng ta mai a ni. Mahse, “I hla hi mawi ka ti lutuk! Kan ngaisang che!” tih lam a ni ber lo. Mite chuan an fate an sunna lungchhiatthlak tak mai chanchin te min hrilh a, fa dam lo neiten min rawn phone a, an rilrua an vei, puan chhuah loha kum tamtak inup chu he hla hian a phawrhsak a ni ti ang deuhin an sawi tlangpui a ni. Hla phuahtuten Pathianin an hnena a pek a ni tia an sawi hian an hawihhawmna tawngkam mai maiah ka lo ngai thin a. Chutiang chu a lo ni hauh lo tih leh, zawlneite ang mai khan A thiltum kaltlangna hmanrua mai kan lo ni thei tih chu, a takin ka lo hrethiam ve ta a ni. (www.lengzem.info)

Vol. XV Issue No. 11

Bangalore Mizo Association Pathianni Tin Chhuak Chanchinbu

Tunkar Changvawn: “ Thlemnaa in luh loh nan

Ø

inring rengin tawngtai rawh u.” –Marka 14: 38

TUALCHHUNG NEWS §

Nimin tlai khan BMCF Exe. Committee chuan Monthly Meeting tluang takin an nei.

§

Vawiin tlai inkhawm ban hian MSA Exe. Committee chuan Rev. Lalhmingmawia , UTC te in ah meeting an nei dawn bawk.

§

Tunkar lo awm tur hian kan zaithiam leh guitarist Tv. David Lalramliana ( Lana ) pawh thla 3 chhung Manipur lamah hna tul han buaipui turin a haw dawn.Dam taka alo chhuk leh thuai kan beisei.

§

BMA League 2009 lo awm tur atan Registration hawn tan ani ta. Joel Murray – 9886633695 / 9900167923, Joseph Lalhmangaiha 9986933407 leh Amos Lalremtluanga – 9886392979 te hnenah in register tur te chuan hriattir tur ani e.

§

Vellore-ah damlo thisen mamawh an awm a, tlawmngaia pe thei chuan Tv. Madawnga Hauhnar – 9886527194 ah inhriattir tur ani e.

§

BMA Cultural Secy. Samuel Lalrozama pawh tunkar lo awm tur hian Aizawl lamah mo thianpa-a han tang zuai turin a haw lawk dawn. Innei tur te hi kan member lo ni tawh leh zaithiam Zorina Pautu leh zaithiam ve tho BS-i te anni. Tluang taka inneihna an hman theih nan duhsakna kan hlan e.

§

BMA membership form 2009 - 2010 atan a la fill up theih reng e. I ngaipawimawh theuh ang u.Form hi Sunday apiangin Biakin kawt ah BMA hruiatute hnen ah lei theih leh submit nghal theih ani e.

§

Zirlai te tan scholarship form Biakin kawtah lei theihin a la awm bawk. Zirlaite tan ngaihven vat chi ani.

MIZORAM NEWS Ø

Ø

Laldinsanga, Lalmuanpuia, Vanlalhruaia leh Abel Lalawmawia te chuan June 5 zanah khan an kuttum hmangin an tum ram an thleng. Zoram boxing khawvel thunin mipui nuai tel hmaa LPS Pro Fight champion kawnghren latu an ni.SAI Contact Sports Centre, Mission Vengthlangah nizan khan ‘Main Event’ buatsaih a ni a. Boxing lama mi hlui leh Mizorama chaw luta hma a sawn theihna tura nasa taka tha thawhtute chawimawi an ni a, mipui hmaah pholan an ni. Mi hlui zingah hian khuallian chief minister Lal Thanhawla bakah, Zorama boxing tichhuaktu kum 82 mi John Lalk aisanga pawh mipui hmaah a inlan thei a, a ropui danglam. Mizo Zirlai Pawl (MZP) headquarters Aizawl chuan NEIGHRIHMS Shillong-ah MBBS zir duh tan India hmarchhak tan seat 18 ruak a la awm tih an tarlang a, dilna hi July ni 19 thleng thehluh theih a nih thu an sawi.Hemi chungchang hi chiang zawka hre duh tan MZP pisa-ah emaw, an website www.neighrihms.nic.in-ah enfiah theih a nih thu MZP chuan an sawi.

Ø

Date: 14th June 2009

Congresss party hruaitu hlun leh Minister hlui J. Lalsangzuala chu June 10 2009 dar 11:10 khan Aizawl Civil Hospital-ah a boral. A tuk chhun dar 12:00 anmahni chenna In Mission Veng-ah vui a ni. VZ Biaka leh Sangluaii te fapa John Lalsangzuala hi September 24, 1924 khan Kulikawn-ah a piang a. A pa VZ Biaka hi Mizo dawrkai hmasa a ni a, ram pum huap pawha neinung hmasa an ni. Pu J Lalsangzuala hian a nupui Zokhumi leh a fate Zosangpuii (L), Lalrengpuii w/o Zodintluanga, Tuikual South; Lalzikpuii w/o Lalfakzuala Hmar, Zarkawt, John Zoliansanga (L) leh Dr. Margaret Malsawmkimi Varte te bakah, tu 11a nei a ni. Amah vuina hunah hian Mizoram chief minister leh MPCC president Lal Thanhawla, Lalriliana - President Mission Veng YMA ‘N’ Branch leh a nupui Zokhumi ten thlahna thu an sawi a. Rev. Father V.A. Paul chuan thlamuanna thuchah a sawi a. Mizorama politician lar, sawrkar official pawimawh, sipai leh mi pawimawh dang engemawzat an tel a ni. Builum khua a pil mek.Lalruatfela leh Saihnuna-te chhungkaw chenna, an in chhuat chu tuiin an chim tan tawh a, Builum chhuahsan hi an tum eih lo, hei vang hian hemite chhungkaw hnih bungraw thenkhat chu mi thenkhatin an thiarchhuah sak lui a, mahse an chenna chhuahsan erawh an la tum si lo.Ruah a sur loh lai pawhin Builum khuaa tui chim chin chu a sang zual zel a, nitin inches 4 ten a sang thei a, hei hian he khuaa la cheng luite chu a nek chhuak mek zel a ni.Kolasib DC tirh Kolasib ADCP L Rinliana chuan Builuma la chengte chu kar hnih chhung hun pek an nih thu a sawi a, hun tiam chhunga an chhuah loh chuan tharum hman pawh a tul theih tur thu a sawi bawk.June ni 10 khan ADCP hian thupek hi a tichhuak tawh a, chhungkaw 24-te chu rang taka an awmna hmun atanga chhuak tura tih an ni. Mahse Builuma awmte hian chhuah an tum lo, an chen lailawkna hmun tur erawh ADCP hian hmun him zawka sak tan a nih tawh thu a sawi a, heng hmunah hian tuiin a chim hmain insawn lut vek turin a ti a ni. L Rinliana hian Builum-a zangnadawmna la beiseite dinhmun a hmuh dan chu sawrkarah a thehlut tawh a ni. (Courtesy Evening Post)

LAWRKHAWM q

World Health Organisation chuan swine flu leng mek hi hripui lengah June 12 khan a puang ta. North America-ah swine flu vei an pun nasat tal viau hnuah WHO chuan he hri leng hi hripuiah a puang ta a ni.Hetih lai hian Hyderabad leh Mumbai-ahte chuan swine flu damdawi Tami flu mum 10 awmna tlep (strip) pakhat chu Rs 3000 tein damdawi zuartu thenkhat chuan an lo hralh a, hri leng laka mi veng thei angtein an lo sawi a ni. He thil thleng avang hian Tami flu zawrh hi khap (ban) a nih phah ta nghe nghe a ni.Hripui leng puan hnu hnung ber hi kum 41 liam ta kha a ni a, khami tum, 1968 khan H3N1 chi avangin mi maktaduai khat vel an thi nia chhut a ni. Tun tuma swine flu leng hi H1N1 chi a ni. WHO hian hri leng hi level hrang hrangah a thenah nimin khan level 5-na atangin level 6-na thleng tawhah a puang a ni.Tun dinhmunah hian ram 74-ah mi 27,737-in hri leng hi an kai tawh a, mi 141-in an thih phah tawh a ni. WHO chuan a tak takah chuan hri vei hi an tam zawk fe turah a ngai. Hri leng avang hian khawvel mihring awm zawng zawng hmun thuma then hmun khat chu kum khat chhunga thih vek theihah a ngai a ni. Khawvela damdawi lam chanchinbu lar tak Lancet chuan hripui leng avang hian mihring maktaduai 62 velin an thih phah thei ang a, chuta 96% chu chhungkaw harsa leh pangngai ve deuh chin an ni ang, a ti.

Vol. XV Issue No. 11 q

q

q

Date: 14th June 2009

Bangalore Mizo Association Pathianni Tin Chhuak Chanchinbu

Goolam Essaji chu India ram Attorney General thar atan ruat a ni a, Mosolman zingah he India sorkara law lama hna pawimawh ber chelh hmasa ber a ni.Additional solicitor general thin Gopal Subramaniam chu Solicitor Generqal atan a ruat a ni bawk. He hna hi india sorkara law lama hna pawimawh ber dawttu a ni.Vahanvati hi 2004 khan Solicitor General a lo ni tawh a, a hmain Maharashtra advocate general a lo ni tawh a ni. Solicitor General hna hi May thla thleng khan chelhin kum nga a chelh tluan a, 1960s hnu lama Solicitor General hna kum nga chelh hmasa ber a ni. Attorney General atana ruat a nih hian Milon Banerjee a thlak dawn a ni.Attorney General thin pakhat Soli J Sorabjee chuan Attorney General atana Vahanvati ruat a ni chu lawmawm a tih thu sawiin, "AG atana Vahanvati ruat a nih hian Attorney General office chu a zahawm phah sawt dawn a ni," a ti. India MP 100 chuangte chuan Aung San Suu Kyi chhuah tur leh a zau thei ang bera inthlan buatsaih tura Burma sipai roreltute ngen ve turin Prime Minister Manmohan Singh an ngen.MP-te chuan Manmohan Singh hnenah memorandum an thehlut a, Suu Kyi chu a din ve phal a nih loh chuan inthlan hi ramdang tana pawm tlak nia an ngai lo tih an tarlang.India MP-te hian Indian Parliamentarians’ Forum for Democracy in Burma an din a, hei hi Sharad Joshi bultan niin tunah hian co-convenor a ni a, India chu Burma laka a policy thlak tur leh sorkar chauh ni lova mipuite nena intlawhpawhna tha zawk a awm theih nana hma la turin an ngen thin a ni. Exercise laka tui taka mut theih inringte chuan an tisual tih zir-chianna atangin hmuhchhuah a ni.International team pakhat, Walter Reed Army Medical Centre, US bul tuma neih chuan chhuna exercise la nasate hi zanah mut chhuak loin an har kur fo tih a hmuchhuak niin The Daily Telegraph chanchinbu chuan a tarlang.Zirchiannaah mi 14-te hun hman dan zir a ni a, ni 23 chhung an an nitin hun hman dan zir a ni. Chhuna an chet nasat chuan zanah an mu tlem a, eng mah ti loa an awm hian a chawhrualin minute 42 velin an mu tam zawk tih hmuhchhuah a ni."Eng mah ti lova an awm hian an mu reiin an mut pawh a tui," tiin zirchianna a hotu ber Arn Eliasson chuan a sawi."Exercise hi muttui nan a tha tia sawi a ni nain kan zirchianna atanga thil hmuh-chhuah chuan a thlawp lo a ni," a ti.He zirchianna atanga thil hmuh-chhuah hi Asso-ciated Professional Sleep Societies’ meeting, Illinois-ah pawh pharh a ni tawh nghe nghe.

Hriat ve mai mai atan… Nokia model 1100 hi camera, ringtone chang-kang leh colour screen an siam hmaa mi a ni a. Nokia Design Center, California-a duan (design) a ni .Ram hnufual (developing country) te mamawh mil tur tawka siam a ni a.Khawvela cell phone handset model ngai hralh chhuah tam ber record a la ni.Kum zabi 21-na-a consumer electronic hmanraw siamchhuah zingah, kum 5 ral hnua a man pangngai hlutna la hloh lo hmanraw siamchhuah awmchhun chu Nokia 1100 hi a ni mai awm e.

Editor: Thaarie Hnamte – (Mb) 9886145877 Jt.Editor - Madawnga Hauhnar Cir.Managers –Amos Lalremtluanga, R.Lalremruata & Sawmtei Khawlhring Email:[email protected] / www.bangaloremizo.info I lo bengvar lehzual nan sms JOIN BloreMizo type la, 567678 ah thawn rawh le. I lo fin deuh deuh nan BMA AW chhiar thin bawk ang che. Thla 3 lak man Rs.50/-

( Hriselna Huang ) KAN INENTIR LOH CHHAN Hengte hi natna a ni em? Khawsik, pum nuam lo, thak, vung, pan, khaw hmuh fiah lohna, ri hriat that lohna, ka chawmawlh, hrawk thip, sil, hit, luhai, chaw ei tui lohna, vun rawng danglam, chauhna leh mut theih lohna angte hi natna-ah i ngai em? Heng hi thil awm ve satliah a nih chang a awm a, pawi deuh a ni thei bawk. Hnam mawl apiangin an taksaa thil thleng an ngainep a, palzam an tum a. An hriselna ai chuan an thi awrh an ngai pawimawh zawk maithei. Hnam fing erawh chuan tuar zawh loh khawp a nih hmaa inenkawl dam pawimawh mang lote kan ni nual awm e. Hriselna leh changkanna hi a inkawp tlat tih hriat tur a ni. Engvangin nge damdawi thiamte entir lova kan natna kan zep thin le? Thil thleng ve satliah anga ngaihna: Hmanlai nun atangin natna tlanglawn hi thil thleng ve satliah anga ngaih a ni. Chu ngaihdan chu vawiin thlengin kan hnam nunah hian a la awm. Kan la thutak lo a ni.A phena awm kan ngaihtuah lo: Khua a sikin khawsik awmtirtu hriat tum lovin kan mu mai. Vung, thak leh pan te pawh, engin nge awmtir tih lam aiin a natna ngawr ngawr kha tihdam kan tum thin. Pawn lama nep deuh phenah cancer leh zunthlum natna te a awm thei tih kan hriat loh avangin tamtakin inentir tul kan ti lova, hei hi kan ramah cancer-a thi kan tam chhan pakhat a ni thei ang. Chhungte rilru tinuamlotu nih hrehna: Hei vang hian kan na kan zep a. Tihngaihna a awm tawh loh hnu-ah a lo lang chhuak a, inchhirin ban a chen thin. Hei hi ngaihdan letling a ni. Result chhe deuh a lo nih palh hlauhna: Huai hmel deuh, dawihzep deuh kan awm! Damlo dang tan damna kan puansak a, mahni chunga a lo thlenin, a result hmachhawn kan ngam lo fo. He ngaihdan dik lo tak hi kan Kristianna hian tireh lovin a tizual ta em ni tih mai tur a ni. Pathian kan rin chuan result chhia hi kan hmachhawn ngam sauh tur zawk a ni. Kawchhungah pan a awmin kan ring a, enkawl theih a nih laiin a result kan hre ngam tlat lova, kan tluk tawp hnuah damdawiinah “In tlai lutuk a ni!” tih chu kan chan tawk a ni fo. Inrenna dik lo: Khum man to leh changkang deuhah mahni khawsik chhan hre miah lova kar tluana khum beta kan han mu mai thin te hi chu a zahthlak takzet. Kan khum chu nalh mah se a chunga mu chu kan mawl tih entirtu a ni. Kan rangkachak thi awrh ai khan kan khawsik tihreh kha changkanna a ni zawk. Incheina leh tlereuha pawisa ren hauh si lo hian, doctor rawnna tur leh taksa damna tura inenkawlna sensovah kan inren tlat mai thin hi.. a tawi zawngin, hnam mawl zia a ni. (www.lengzem.info atanga lakchhawn ani)

Pu.J.Lalsangzuala (RIP)

LPS Pro Fight Champion te

BMCF INKHAWM PROGRAMME DATE: 21.06.2009 Hruaitu : Rev. Athang Leivom Tantu : Nl.Lalfakawmi Khawlhring Thawhlawm hlan : Tawngtai Rual Thusawitu : Pu B.Kapthuama Special Number : Nl.Lalrokimi Pachuau