Bma Aw: 19th October 2008

BMA ÂW An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007 Vol. XIII Issue No. 41 Bangalore Mizo Association Pathianni chhuak chanchinbû Date: 19th Oct. 2008 *Ball Pen, chêng 10/- man leh Lucky Ticket chêng 20/- man zawrh mêk a la nî a, member-te’n tlâwmngaih chhuaha min lo leisak zêl tûrin kan ngên a che u. Lucky Ticket hi BMA Silver Jubilee sumtuakna a nî a, a vâwr nî sawn hlat a nih avângin lei tûr thahnem tâwk tak a la awm e. * Kan member Lalhruaitluanga (UVCE-a BE 2nd year, CSE zirlai) û Lalsângliana s/o Lalthuamluaia Sailo, Vênghlui chu nimin piah ni 17 tlai dâr 3:30 khân Internal bleeding avângin a boral. Nimin tlai dâr 3 khân Rev. C. Lalmuankima in, UTC-ah thlânthut a ni. *Kan member chhuanawm Tv. Samuel Lalrozâma chu 6th National Tang Soo Do Championship, Oct. ni 11 leh 12-a Delhi-a neihah Official-a tang pahin Black Belt Division Open Weight Category-ah a chhuak a, Gold Medal a la. Hemi hnû hian 5th National Taekwondo Championship, Haryana-ah a chhim leh a, hetah hian International Instructor’s license pêk a ni bawk. Tûnah hian Karnataka State-ah Assistant Manager-in a awm mêk. BMCF Inkhâwm Programme 26th October, 2008 Leader: Pi Lalrinpuii. Bible Reading and Prayer: Pu H.Rodinsânga.

Quartet: BMMP atangin. Duet: Tv. Lalnundika Hnamtê & Nl. BC Lalremmawii Zaipâwl: Area 3. Interview: Leader Solo: Tv. Andy Vânlalremtluanga Tâwpna Tawngtai: Pu B. Kâpthuama Worship Team: Tv. Lalnundika Hnamtê, Tv. Francis Lallâwmawma, Nl.BC.Lalremmawii, Nl. Lalthawhpuii, Nl.Vânlalchhuani Pi Mawiteii

(Article huang)

A Silent Story - Editor

Hmânnî chu chawngzawng chaw zawng hi ka room-ah a lo thlâwk lût a, mî nêna inbia ka nî a “nakinah ka rawn be leh ang che” tîin ka tâwpsan a, zanriah hmuh zawh loh hlauva chhûngpuinû tlaichhuak tâ chu tia chawpêk tumin ka man a, a zawn hah ngai miah lova hlawhtlin tîr ka tum a ni. Chû chawngzawng chu kâwla nichhuak chhiara chawzawng thîn a nih ngei ka ring a, mî kawmkâr leh sapui tlatna hmunah a nunna thâpin a puarkhawp a dap tâwk tâwk thîn ngei ang. Choka lama fairêl bêl atang chuan engtiklai maha a hmuh zawh ngai loh tûr buhfai tharlâm tak ka thâm chhuak a, a hmâah chuan ka theh thlâ a. Chû savâ chuan amah duhsaktû kut atanga buhfai liamthlâ chu a chhar i ring em? A chawzawnna platform-a a tum sual vaih chuan râlin a ke dinglam sâwp khawpin an chilh ngei dâwn tih a hriatrengna hmuna a chhar buhmal bâl tak mah hlim taka a lem theih sî chuan nga ti ngê ka ei ai ka pêk buhfai tuihnai tak chu a hnar theih le. Hê chawngzawng hian richhuak lo thawnthû (Silent story) mi hrilh ta mial mial mai a ni. A chaw duhzâwng chu a buhfai tui leh tui lohah a lo innghat hlek lo mai. Thlantui farkhat pawh a sên lohna buhmal ai chuan a nun a thâp ngamna rama a pianken thiamna zawng zawng nêna a sualchhuah ve ngat chu atân chuan a hlû a, a tui zâwk a, lem a nuam zâwk ngei ang. Hê chawngzawng thawnthu mi rawn hrilh hi Bangalore-a zirlaite hian hre vê ila ka tî a ni. Zirlai tam tak, mahni thawhchhuahsa tui ti lo, mi min pêk nghâka nung ka hre thîn. Class kal peih lo, lehkhâ zir peih lo, certificate chauh dawn tum kan tam lutuk. Thiamna entîrna certificate chu thiamna nei lovin zakzeh ta tlat mai sê, chû thluka thil inmil lo leh inrem lo chu a awm chuang dâwn em ni? Mizoram khi han thlîr teh u! Party Pîsâ-ah sawrkâr pawisa ningnawi huih then vê ngei tuma phusâ patling an phu siau siau a, Pathianin hnathawh nâna a pêk thahrui chu a thlâwnin an bânah leh an kêah an zâm tîr mai mai tâk khi. Zirlaite pawh an bâng lo. Thiam lêm lova hlawhtlin tum an tamzia chu bazar note hralh tlâkzia atang khian a hai theih loh. Enga ti ngê mizo hian Sâmdâla thawnthû hi kan neih bîk. Europe ram leh Japan ramte khian hê thawnthû ang hi an nei vê angem? Thawnthû hi a neitû culture mila lo piang a ni sî a, Sâmdâla culture hi mizo culture pêng lian tak a ni mai lo vang mâw? (Phêk dawtah a chhunzawm)

Vol. XIII Issue No. 41 Bangalore Mizo Association Pathianni chhuak chanchinbû Date: 19th Oct. 2008 Editor Obeda Lalhuliana Joint Editor Pu Levis K. Lalsiamliana Cir. Managers Blessy Sailo, Thaarie Hnamtê E-mail: [email protected] Website: www.bangaloremizo.info Thlakhat lâk man: Thlathum lâk man: Thlaruk lâk man: Kumkhat lâk man:

Rs. 20/Rs. 50/Rs. 90/Rs. 180/-

Editor Bathlâr October thlâah hian thlâ khi a lo êng bîk riau ni tûr a ni, ka nûin thla êng hnuaiah lehkhâ kan zir thîn a tih kha ka la hre reng mai. Science chuan thla êngin tui a tih fâwn nasat thin zia thû min hrilh a, tuidûl tak mihring pawh hi kan lo fâwn vê nasa thîn a ni ngei ang, October thla ên zâna ka fâwn tumkhat ka han sawi ang e. Kum tam a ni tâ. Ka thian pa nên October thla ên zânah ngei mai hian hlâ kan in phuah siak a, rang zet mai hian ka ziak puat puat a, kha tih laia ka rilrû tûr khâ ka ngaihtuah thiam tawh lo rêng rêng. Ka fâwn a ni ber ang chu. Ka dairy-a a la chuan dân chuan hetiang hi a ni: Zân zawng zînga tlâwm ber, Êng zawng zînga duhawm ber, A lo her chhuak lêng zawng lâwm’an, Kei ka tân tahna a ni, nunhlui kotû chhawrhthlapui khi. Ârkai dêngtû chhawrthla êng mawi, I zûnzâm a na lua. Nunhlui hrilin i êng no riai, Dî hlui ânkanêm chawitû i ni.

Amah ka thianpa khâ endiktû a ni tlat mai a, amah chu pakhatna a nî a, kei pahnihna ka ni.

(Phêk hmalamami chhunzawmna) Mizo hi thil man chak leh thiamthil ngah kan in tî a, kan inchhuang thîn. Chûng thil zawng zawng khawêng hmuh tîrtû ber thawhrimna leh tumruhna chû khawiah ngê? Thiamthil ngah leh thil man chak tak Sazupui a mutthlûk siai siai lai hian Thiamthil nei ve lêm lo leh thil man chak ve lêm lo Satel chuan a thawhrim avângin min lehpêl leh sî a ni lo mâw? Joseph Joubert-a chuan “Pianpui finna leh thiltihtheihnain hna ropui bul a tan a, a thawk zotû chu thawhrimna chauh a ni” a tî asin. A bul tanna chu kan nei tha teh meuh mai, a thawk zotû kan mamawh tâ a ni. Kan têt laia kan zirtîrtu pakhat chuan a college kal laia a B.Sc zirpui Canada mî chanchin a sawi thîn. Chû pâ chuan a zirlai a zawh hnûin Certificate a lam duh tlat lo mai a, “ka tân a pawimawh lo, hê ka thiamna hi ka huanah ka hmang dâwn alâwm” a tî e, a tî. Chû pâ Certificate chu a lâk ai lâk theih ta ngat sê mizote hian a chuhin kan inchuh ngei ang tih hi thudik zahpuiawm tak a ni. Attendance avâng chauhvin class-ah i kal thîn em? Exam-a lo chhuak tûr chauhva i rin i zir thîn em? Certificate zuar theitû phone number i kawl em? Zirlaibu lei nân pawisa i hmang ui thîn em? Thil zirmi leh mi rilru chak nih ai chuan thil zir peih leh mi rilru hria an lâk tlâk zâwk fê a sin. Tum i nei em? I tumna kawng chu i zawh em? Ngê kawng pêngthuamah i lû i la hiat? Hei hi hriat a thâ. Eng Certificate pawh beisei la, chû Certificate chû a suala sual chhuah ngei tum rawh. Zuin chung pawhin i sualchhuak thei, i in thiam phawt chuan. Pub kal chung pawhin i sualchhuak thei, kal chintâwk i hriat chuan. Ngaihzâwng nei chung pawhin i sualchhuak thei, i ngaihzâwngin a tihbuai loh che chuan. Zuin, pub kal leh ngaihzâwng neih ka sawimawi a ni lo. That chu a tha lo na meuh mai, nimahsela i ti rau rau a nih pawhin i goal pêt luhna tûr hmun an khâr phal ngai suh ang che. Pass tlâkin lehkhâ i zir em? Hlawh la tlâkin hnâ i thawk em? Pathian rawngbâwltû ni tlâkin Pathian i tih em? Chhûngkaw nû leh pâ ni tlâkin fanau i enkawl em? Fa duhawm ni tlâkin i nû leh i pâ i chawimawi em? Thian thâ ni tlâkin thian i kâwm em? Hlawhtling tlâkin i thawkrim em? Malsâwm tlâkin i nung em? Malsâwm tlâkin kan nung meuh em le? __________________________________________________________ A Story of Kiss :Infawh lo chhuahna bul nia an sawi hi a ngaihnawm hlê. Hmânlai Egypt ramah khân nûpâ hi an awm a, a nupui chuan zû a in thin avângin a pasal chuan a hau thîn a. Tlaikhat chu a nupui zu in leh in loh hriat tumin a zu hnîm tâ a, a hnîm hnai hlê ni tûr a ni, an hmui leh an hmui chu a insi tâ a, chutia hmui leh hmui insi ta rân mai chuan engemaw ni taka nuam tihna a thlen ni ngei tûr a ni, an tinawn ta chhên mai a, chuta tang chuan infawh hi a lo intan e an tî. Khâ mîte nûpâ kha an in ngaihzâwn lai pawhin leh, an inneih zânah takngial pawh an infâwp ngai lo va, a nachâng pawh an hre ngai lo tihna a nih chu. Infawh hi tawngkam tel hlek lova thu tam tak sawi nân an lo hmang nasa khawp mai. Mî an kut-a i fawh sak chuan i va fawh saka khâ i zah hlê tih i entîr a ni. An chal-a i fawh chuan i duat a nî tih entîrna a ni thung. An biang-a i fawh chuan i ngainâ a, i thian tha tak an ni tihna a ni. Hmui-a infawh chu kan hriatthiam vek kha… a ni mai.

Vol. XIII Issue No. 41 Bangalore Mizo Association Pathianni chhuak chanchinbû Date: 19th Oct. 2008 (Chanchin la tharlâm deuh huang) * The Man Booker Prize dawngtû: Chennai-a piang, Mangalore mi, Australia, Columbia University leh Oxfort-a lehkha lo zir tawh, Journalist(Time Magazine) hnâ thawk sil hrep tawh bawk kum 33 mî Aravind Adiga-a lehkhabû The White Tiger chuan Oct. ni 14 zân khân pawisa fai pound 50,000 keng tel The Man Booker Prize a dawng. Adiga hi Indian rim nam zînga Booker Prize dawngtu pangâna a ni a, amâ hmâa lo dawng tawh, an dawnna lehkhabû leh an dawn kum chu hetiang hi a ni: VS Nailpaul - In a Free State - 1971, Salman Rushdie – Midnight’s Children - 1981 (Hê lehkhabû hi chuan Special Booker of Bookers Prize - 1993 leh The Best of Booker 2008 a dawng tawh bawk), Arundhati Roy – The God Of Small Things – 1997, Kiran Desai – The Inheritance of Loss – 2006. * Mafia râl lian: Râwng taka Mafia chêt dân lantîrna lehkhabû hralh tla tak(ber) Comorra ziaktû Roberto Saviano(Italy) chu Police vênhimna hnuaiah kum hnih lai a lo awm tawh a, tûnhnai khân vênhim ngawrh lehzual a ni. Mafia ho chuan tûn kum Christmas hmâ ngeia thah an tum hlê. *Mizoram Kohhran Hruaitûte Committee (MKHC) chuan inthlan thuchah an tichhuak a, MLA inthlan lo awm tûr atân November ni 1 zân hian Mizorama kohhran zawng zawngte chu tawngtai tûrin an ngên (Source Buannel.com) *Chanmari YMA Branch-in an kum 50 tlin lawmna ni hnuhnung ber chu nimin piah khân an hmang a, ruai an theh nghâl a, YMA hall sak thar chu Dr. C. Silver-a, Union Minister hluiin a hawng nghâl bawk. Chanmari YMA Branch hi Oct. 16, 1958 khân din a ni a, tûnah hian member 2132 an awm mêk a ni. ( Source:Evening Post) * Rev. Chanchinmawia thih dân chhui tûr CBI Aizâwla châm mêkte chuan hnuchhui hnâ ngawrh takin an thawk mêk a, anmahni leh an hmalâkna ngaihventu chanchinbumîte nêna inkawm pawh an duh rih lo. Hriat theih chinah chuan CBI-te hian Police Investigation Team-te report kimchang an zir tawh a, hnuchhui kawnga an biak duh tualchhûng mi thenkhat an kâwm nual tawh bawk. An hmalâkna kal zêl hi mitin ngaihven ni mah sê CBI lam chuan hnâ an thawh zawh hmâ chuan engmah an tlângzarh dâwn lo a ni. * October 17 khân Mizoram School of Fine Arts, Canteen Square, chuan Vânapa Hall-ah painting exhibition an nei a, Lemziakthiam Laltanpuia Art school dina zirlai 13-te lemziah hrang hrang: oil on canvas, charcoal on paper leh pencil on paper-te pholan a ni. *Pu H. Lalrinfela (Mâfâ-a) lehkhabu palîna ‘Thlalêr

*Mizoram People Forum (MPF) leh Mizoram Journalist Association (MJA)te chu ni 17 khân Aizawl Press Club-ah inkâwmhoin, November 29-a Mizoram Assembly inthlanpui neih tûr chungchâng an sawi ho a. MLA inthlanah inthlanna dik, thianghlim leh felfai a awm theihna'n a theih ang anga thawh ho thâ an tî a. MPF Secretary Dr. Lalbiakmawia Ngênte chuan, tûn hnaia MPF-in NSCN (IM) an biak chhan sawiin, hê hel pâwl thunun theih hnuaiah hian Mizoram inthlana inrawlh mai thei hel engemaw zât an awm vâng a nih thû a sawi. (source: Vanglaini.com) *Mizoram sawrkâr hnathawkte chuan 6th Central pay revision 2008 angin hlawh an la thei dâwn tâ a, Sawrkâr chuan 6th Central pay revision 2008 leh Mizoram State sawrkâr hnathawk hlawh bihchianga lo zirchiang tûrin fitment Committee a din bawk. 6th Cenbtral pay revision 2008 leh Mizoram State sawrkâr hnathawk hlawh bihchianga lo zirchiang tûr fitment Committee sawrkârin a dinah hian Pu C. Lalsâwta IAS chu convener a ni a, Pu Lalbiaktluanga Khiangtê leh Pu JC Ramthanga IAS-te chu Member niin Pi Esther Lalruatkimi IRS chu secretary a ni a, Fitment Committee hian : 6th Pay Commission Central-in a hman mêk chungchâng leh State sawrkârin pay scale a hman mêk a that lohna lai endik te, 6th Pay Revision 2008 leh Mizoram sawrkâr hnuaia hnathawkte hnathawh dân khaikhin te, 6th pay Revision 2008 sum huam tel tûr leh a kaihhnawih tûr siama, chû chu Mizoram sawrkâr hnathawkte tâna hmeh bel te, Tûna Grade leh Pay Scale hman mêkte hi, eng ang grade leh pay scale-a dah tûr ngê tih leh, chûng sawifiahnate chu awmze nei tûra siam te, an hlawha bet tel tûr allowance chungchângte chu State Sawrkâr hnathawkte tân a pawmawm em tih te leh GP Fund, Insurance Fund, Medical Facility, Pension leh a dang hamthatna chi hrang hrang, Pay Scale Revision nêna inlaichîn thil zirchiante chu an hmalâkna tûra tih a ni. (Source Buannel.com) * November 29-a Mizoram Assembly inthlanna neih tûrah inthlanna dik, felfai leh muanawm a awm theihna’n Election Commission chuan election dân anga tih loh tûr leh insûmna tûr a siam. Thawhlehni-a inthlan puan a nih rualin, Model Code of Conduct hman nghâl tûra puan a ni a, hei vâng hian sorkar ding lai, Minister-te, party hrang hrang leh candidatete tih loh tûr târlan a ni. (Source Buannel.com)

*Seventh Day Adventist Kohhran chuan an ni serh, Election Commission of India-in a ruat anga inrinnî-a vote thlâk a ngai chu pawi an tih thû leh vote pawh thlâk loh hial an duh Aurâwl’ tih chu Pi Lalrinliani’n Oct. ni 16 khân a duh thû an sawi avângin, Central YMA hmalâknain party hrang hrangte leh tlâwmngai pâwlte chuan inrinnî-a vote thlâk apiang chhiar theih tûrin a tlângzarh. chungchâng hi an ngaihtuah thâ.

Vol. XIII Issue No. 41 Bangalore Mizo Association Pathianni chhuak chanchinbû Date: 19th Oct. 2008 Ph.D bei duh tân Bangalore University chuan Ph.D Entrance Exam a buatsaih leh dâwn a, Application hi naktûk Oct. ni 20-a pêk chhuah tan a ni ang a, Oct. ni 31 thleng thehluh theih a ni ang, chumi hnûah Nov. ni 5 thleng fine chêng 50 pêin a thehluh theih bawk ang. Hê Application form hi chêng 500 man a ni a, Sneha Bhavan, Ph.D Department, Administrative Block, Bangalore University atanga pêk chhuah a ni ang. Hê Course hian Arts, Science, Education, Law, Commerce, Management leh Engineering-te a huam a ni. Candidate chuan Master Degree Course-ah 55% mark tal a hmu tûr a ni a, ST/SC tân 50% chin ngaihhnathiamna a awm. Hêng number-ahte hian zawhfiah theih a ni e. : 080-22961079, 080-22961209. Mizoram lui Mizoramah hian lui a luang hnem hlê mai a, khawtin hian lui kalna hi zu nei fur hlawm a mawle! An hming ringawt pawh hian lung an ti lêng a, a luang rîte pawh a hriat theih dâwn dâwn ringawt nia. Vairama lui luang kan hmuh ngawtte ai hi chuan an thianghlim zâwk a, an chhuanawm zâwk fê ta vê ang. Khawngê an sei zâwng nên i han thlîr teh ang khai. Tlawng 185.15 Kms Tiau 159.39 Kms Chhimtuipui 138.46 Kms Khawthlangtuipui 128.08 Kms Tuichâng 120.75 Kms Tuirial 117.53 Kms Tuichawng 107.87 Kms Mat 90.16 Kms Khawchhak tuipui 86.94 Kms Tuivawl 72.45 Kms Teirei 70.84 Kms Tuirinî 59.57 Kms National Muai Thai-ah Mizoram 3-na October ni 12 atanga ni 17 thleng khân National Games Village, Koramangala-ah National Muai Thai Championship neih a ni a, hetah hian Mizo 8 an chhuak a, 4-in Gold Medal an lâ. A pumpuiah Mizoram hi 3-na kan nî a, a ropui hlê. Mizo lâwm teh u.

BMCF Christmas Sub- Committee thurêl Nimin tlai khân BMCF Christmas Sub-Committee chu Convener Pu Josiah L. Râltê inah an thukhâwm a, Christmas lawm dân tûr an rêl. Christmas-ah hian Ruai vawi hnih (lunch leh dinner) theh thei tûra rêl a nî a, Vawksâ ngata theh chu rêlthlûk a ni. Thawhlâwm khawntû tûrte hi Category lî-a then an nî a, a khawntû tûr ruat fel a la ni lo. Ropui leh hlimawm taka Christmas min hmanpui tum Sub-Committee-te hi an fakawm hlê a, keini pawhin tlâwmngai taka thawhlâwm thawh theuh i tum ang u.

Lâwmthu sawina Kan fanû Josephine Zomuanpui’n vânduaithlâk taka accident a tawh leh chumi hnûa min boralsan tâknaah Bangalore Mizote chungah lâwmthû sawisên loh kan bâ a. Hospital-a a awm laia mahni hna tûl leh zirna kalsana, engmah tihtheih loh chung pawha, tlâwmngaia zankhuaa min tlaivârpui leh chhûn lamah pawh nilênga min awmpuia, a boral hnû thlenga mahni sum sênga eng kim, thil tûl zawng zawngte min buaipuinaah lâwmthû kan sawi tak meuh meuh a, min buaipuitûte a mal malin kan thai lang sêng lo a. BMCF, BMA, BMMP leh MSA-te chungah kan lâwm takzet a ni. Hun lo kal zêl tûrah pawh in mi tawngtaipuina Pathian hmingin kan ngên tak meuh bawk a che u. Kan chhûngkaw chunga in thatna, hmangaihna leh lainatna in lantîr zawng zawngte keini chuan kan damchhûng hian kan rûl sêng dâwn lo a, mahsê Hmangaihtu Pathian chuan a lêt tam takin a rûl ang che u tih hi kan duhthusâm leh tawngtaina a ni e. In khawngaihna dawngtû Benedict Thanhlîra leh a chhûngte Champhai, Mizoram

Mandhya-ah thlânthut

PES Mandya-a E&C 2nd year zirlai Laltanpuia chu a pâ Pu VL Nanga, Chaltlâng dingdi vêng-in nimin zîng dâr 2 khân BP sâng avângin a boralsan a, nimin tlai dâr 2:50-ah khân Mandya-ah thlânthutna neih a ni.

BMA fawng vauntu lawk (Office Bearers 2008-2009)te:President : Rev. PC Lalduhawma General Secretary : Mâdawnga Hauhnâr Treasurer : Rebecca Lalmalsâwmi Secretary i/c Sports : R. Lalremruata Secretary i/c Academic & Human Resources

Vice President Asst. General Secretary Asst. Treasurer Secretary i/c Culturer : Lalrothara Tlau

: Pu Josiah L. Râltê : Lalêngzuala : Blessy Sailo : Terence Lalthlamuana