Bma Aw: 8th June 2008

BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007 Vol XIII Issue No. 23 Bangalore Mizo Association Pathianni Tin Chhuak Chanchinbu Date: 8th June 2008 Phek Khatna

BMA Sumtuakna Ball Pen, Rs 10/- man chauh leh Lucky Ticket Rs. 20/- man chauhte zawrh chhuah mek zel a ni a, member-ten tlawmngai takin i lei zel ang u khai. Lucky ticket phei hi chu nakum BMA Silver Jubilee kan lawmna atana sum tuakna a ni a, thahnem i ngai ang u khai.

% Nimin khan Bangalore Mizo Students Association te chuan vawksa rep hnathlang an nei a. Member tlawmngai taka vawksa leisaktute chungah an lawm hle a ni. Heta tanga sum hmuhchhuah hi MSA-in zirlai tanpui ngai a chawm mekte chawm chhunzawmna tur atan tih a ni. % Nimin khan UVCE lama Mizo zirlaite chuan an senior-te thlahna hun an hmang a. Jnana Bharathi-ah he hun hi hmangin hun hlimawm tak tlai lam dar 3 atangin an hmang tan a. Zirlai kalchhuak turte thilpek te pein, tlai lamah chaw hlui tui tak kilho nghal a ni. % Kan member Tv. Andy Lalremtluanga chu Bangalore pum pui zaia intihsiaknaah pakhatna a ni a. Kan va lawmpuiin kan va chhuang tak em. Hetah hian lawmman Rs. 10,000/- leh laptop a dawng ni a hriat a ni. % Tarlan tawh angin kan member tam takin tunah hian exam an nei mek a. Member-ten i tawngtaipui zel ang u. Inthlanna kan neih tak khan exam hun hi kum dang aiin a ti tlai ta deuh ni. BMCF Inkhawm Programme 15 June, 2008 (Inkhawm hun 3:00pm)

Hruaitu: Pu Bobby D.K Vaiphei Tantu : Tv. Joel Murray Thawhlawm hlan: Tawngtai Rualna Special No. : Nl. Margaret Lalrinfeli Thusawitu: Pi Lalrinpuii

‘A Zia Lo Hle Mai’ Thla hmasa, May 4-23 chhung khan Mizoram lamah chawlh hmangin ka chuang chhuak ve a. Vanneihthlak ka ti hle a; ‘marawhchu, ka duhthu sam chuan hun ka han hmang thei ta chiah lova. Ka duhthusama hun ka hman loh nachhan hi kan Mizoram chanchin ral khat atanga kan lo hriat ve thin, thawm ri va ngaithlak nuam lo tak takte hi a dik a ni tihte ka han hriat chhunzawm vang a ni. May thla chawlhkar thumnaah ni ta in ka hria, LPS chuan In Focus tih programme an buatsaih a, chumi tum chuan Persons with Disabilities Act (PWD act) chungchang a ni a. Mizoram Social Welfare Department lam atangin Officer pahnihin dawhkan an kil a. Tin, Department hrang hrang leh zirna-in lampang atang pawhin mi pawimawh tak tak ten he hun hi an tawiawm a. He inkawm khawmna hi rawn sawi chhawn ka tum lova. Amaherawhchu, he inkawm khawmnaah hian tawngkam pakhat ngaimawh ka nei a. Chu tawngkam chuan ka rilru a la ta riau mai a. Thla khat dawn a ni ta a, chu tawngkam ka hriatna pawh chu; mahse ka rilruah hian a la cham tlat a. Kan hmasawnna tur atana han tarlan thain ka hre ta a ni. Chutia inkawmna an neihnaah chuan rualbanlote chanvo hrang hrangte an sawiho a. Hmasawn a la ngaih nasatzia te, Mizoram sawrkat hmalakna a la beithamzia te chu sawi nasat pawl a ni. Chutia an hamthatna tur an sawi mek lai chuan, nu pakhat a fa rualbanlo nikum lama Delhi a Indepence day hmang tura thlanin Railway Agency atanga concession rualbanlote an pek theih loh thu a tarlang ta tlat mai! Tichuan Railway Agency lama Mizoram lama an hotu ber chuan he tawnkam ‘A zia lo hle mai’ tih, ka thin khei em em tu hi a rawn tarlang ta a. An hotupa hi tunge a nih pawh ka hre chuang lo nain, ani chauh lo pawh, Mizoram lama mipui rawngbawltu tam tak hian he tawngkam hi an lo hmang tawh thin a. Mahni hna pawr tak thup mawi nana hmang hi kan tam tawh a ni. Hei hian kan hnathawh a kan rinawm tawk lohzia te, kan taihmak tawk lohzia te a tarlang chiang hle a. A zia lo hle mai tih ringawt hian a zia na turin kawngro a su don lo tih hi a chiang hle a. Mizote hian hmasawnna tur hi kan lo va la ngah em! A zia na tur hian taihmak kan chhuah a ngai a. Kan rinawm a ngai a. Kan thawh pawh a ngai a ni. India ram state zingah a hnufual pawl kan ni tih hi zep chi pawh a ni tawh lova, hmasawnna hi zuang dawrh dawrhin kan la hmu tlat bawk si, mi state hmasawnna kan hmuh loh vang zawk nge. Nge meng reng chung hian kan hmufiah ngam lo zawk. A zia lohna siam that lehna tur atana zia ber chu a zia lo tawh sa pawh ti zia leh tum a, a zia lo thei tur thei thil lo la awm leh phei chu uluk taka tih a nih hian a ni.

Vol XIII Issue No. 23

Bangalore Mizo Association

Editor Lalengzuala Ph- 9986 25 85 17 Joint Editor C. Lalrinfela Ph- 9844 783 282 Circulation Staffs: Ruby Lalremruati R. Laltleipuii

E-mail: [email protected] Website: www.bangaloremizo.info A man (thla thum) : Rs. 60/Editorial BMA Member nih a pawimawh BMA Membership form te semchhuah a ni mek zel a. Thla hnih chuang zet semchhuah a nih tawh hnuah pawh membership form lut hi sawmnga chauh a la ni a. Member-ten tan kan lak a ngai nasa hle a ni. BMA member hi kum tluanin a nih theih a. Amaherawhchu, tun August thla 31 hma a member ni ve lo te erawh chu BMA Directory lamah an lang ve dawn lo thung a ni. Thil mak ve ang reng tak chu hei leh chen zirna avang leh hnathawhna tur zawngin kan kal tawh a, chung zinga a tam zawk mah chuanin mahni form fill up tur chhiar hmasak nachang pawh kan la hre lo hi a ni. Form satliah a ni lova, pawisa thil tel te a ngaih avangin; chutichung pawhin chhiar hmasak nachang kan la hre lo hi kan mize kawngkhat tilangtu chiang tak a nih a rinawm. Hmasawnna tur pawimawh tak pawh a nih a rinawm bawk a ni. BMA member nih hi thil pawimawh tak a ni a. Mi tinin chhiat that kan tawk thei a, chumi a nih avang chuan BMA Member hi kan ni ngei tur a ni. BMA Membe kan nih loh chuanin BMA hian a tihtur hi a ti thei thin lova. Chuvang chauh pawh ni lovin, mi dangte tanpui ve zawk turte leh kan Mizo hnam zia rang chawi nun zel nan te BMA member nih hi thil pawimawh tak a ni. Sunday vawi khat mah kum tluan pawha inkhawm hman lo tan pawh BMA member hi nih tho tur a ni, a pawimawh dan a inang reng e.

Pathianni Tin Chhuak Chanchinbu

Date: 8th June 2008

Phek Hnihna

Mizoram: % June 6, zirtawp zan dar 8 leh minute 40 vel khan Thuampui-ah Motor lianin Pi Lalhmingmawii in, chhungkaw 3 luah a hnawl a, a hmunah mi 2 an thi a, midang 22 an hliam. Bawngkawn Police Station atanga thu dawn danin he vanduaina thlenga thite hi Capital Travels Bus Driver, Ranjit Paul, Silchar mi leh Thuampui mi, Remlalliana, kum 12 mi an ni. Chetsualna thlen chhan hi Net-Work bus, Thuampui Station-a ding chu a Driver dik tak ni lo, mi pakhatin a khalh chhuah vang a ni a. He Bus hi chak taka khalhin Thuampui Helipad hnuai kawngpui kual lai, kawng thlang lama Truck ding a su a, he Truck hi a lum thla tel ve nghal a, hei hian a thlang lama Pi Lalhmingmawii in, chhungkaw 3 lauh chu a delh chhe vek a, motor pawh hi thui tak a lum a, a chhe hneh hle a ni. He chetsualna rapthlak tak thlentirtu, Network bus khalh chhuaktu hi tunge a nih hriat fiah a la ni lova, a tlanbo chu zawn zui mek a ni tih Bawngkawn Police te chuan Zonet an hrilh a ni.ZONET.IN % May ni 30 atanga tun thla ni 2 chhunga Bangalore-a National Junior & Sub-Junior Boys 7 Girls Muay Thai Championship vawi 9-na-a tel Mizo infiammite chuan Gold Medal 6 leh Bronze Medal 2 la-in Aizawl an lo thleng. Muay Thai Associiation of Mizoram hruaitute hnen atanga ZONET thudawn danin he Championship-ah hian Mizoram atangin Vanlaltlana Reiek, MS Dawngliana Luangmual, Zorammawia Zarkawt, Ngurlianzuala Hunthar, David Lalzamlova Chanmari West, Zothanpuii Zotlang-te'n Gold Medal an la a, Lalthangliana Lungleng leh Lalmuanpuia Chanmari West-te'n Bronze Medal an la a ni.ZONET.IN % Mizoramah tun hnai maiah ruihhlova inchiu thinte zingah HIV Positive an pung a, mi nawlpui zingah erawh za zelah 0.7 HIV positive anga chhut a ni. Hetia HIV Positive zat a pun zel chuan Mizoram chuan a invenna aia hautak zawk, a enkawlna a hmachhawn dawn nia ngaih a ni. He thu hi Mizoram State AIDS Control Society (MSACS) leh UNICEF office, Guwahati tangkawpin an buatsaih Mizorama Targeted Intervention Project hnuaia thawktu mi 44-te hnena HIV/AIDS veite enkawlna lam leh HIV test chungchang zirtirna tur Civil Hospital auditorium-a training neihah tarlan a ni.ZAWLBUK.NET % Zirtawpni, 6th June, 2008 khan Delhi Mizo Zirlai Pawlte chuan Mizo hmeichhe awm tha duhlo 10 zet te kawmna an nei a. An zinga pakhat phei chu Mizoram lama haw tura a hawna turte pawh buaipui tawh a ni. Tun kum hian Delhi-ah hian kum dang aiin zirlai chhukthla thar an tlem deuh ni a hriat a ni. Verse of the Day: Hmeichhe hrin tawh mihring phawt chu rei lo te dam, buainaa khat a ni. Pangpar angin a lo chhuak a, a vuai leh a, hlimthla angin a thlawk bo va, a awm hlen lo. Joba 14: 1-2 PG ACCOMODATION AVAILABLE PG Accomodation available in Lingarajapuram, Bangalore-84 with good facility and food. Contact: PC-a Phone: +91 99804 74918 Rocky: +91 98861 23354 BIKE & EFFECT HRALH DUH Pulsar DTS-i 150 (red) Rs: 30,000 leh Guitar Effect Boss GT-8 Rs. 15,000/- (Negotiable) Contact: 9902824472