Bma Aw 11 Oct 2009

BMA AW An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007

Vol XV Issue No. 28

Bangalore Mizo Association

KEIMAHNI && Silver Jubilee lawmna, kum 2007 atanga lo ruahman leh hun siam chu kan lo hmang zo ta der mai a. Mipuite tawiawmna avangin a hlawhtling thawhkhat hle a ni. Kan hruaitu thenkhatte erawhchu an la buai hle mai. Sum leh pai lam leh thildang chi hrang hrang chhui zui ngai te leh chinfel ngai te buaipuiin an hun an la hmang zel rih a ni. && Pi Mâchhungi, mahni hna lam avanga Orissa zin pawh tluang takin Ningani khan a lo haw. && Pi Zohmingliani (w/o Rev. H. Lalhmingmawia) pawh Zirtawpni khan inzai tenauin a in zai a, tha takin zai a ni. I tawngtaipui ang. && Nl. Thaarie Hnamte, kan Asst. Treasurer pawh Mizoram lamah min zin chhohsan hrih e. && BMA Directory 2009-2010: Member inziaklutte directory chu peihfel a ni a. Biakin kawtah zawrh a ni e. Membership form a la thehluh theih reng a, hruaitute hnenah form lama fill-up a thehluh theih a ni. Directory hi bu khat Rs.60 man a ni a, lei theuh kan tum dawn nia. A copy siam tam a ni lova, chanloh awm thei a ni e. BMCF Inkhawm Programme

18th October 2009 Hruaitu:Tv. Joel Zoramthanga Tantu: Nl. Nancy Lalhriatpuii Thawhlawm: Tawngtai Rual Special Number: Tv. Lalramthlirliana Thuhriltu: Rev. LH Rawsea October Thla Changvawn: Sam 73:28

Pathianni Tin Chhuak Chanchinbu

Date: 11th October 2009 Phek Khatna

Article

A Hmelmawi Min Hmuhtirtu… Dr. Mahminga Sailo

Ka dawn kir a… Hringnun hian tuipui fawn iangin min nghak lo leh ngaichang hlek loin min liampui zung zung a. He hla, ‘A hmel mawi min hmuh tirtu’ tih ka hriatna pawh kum nga chuang a lo vei ve leh reng tawh mai. Ka la hre reng asin; khami zan kha..., 1st year B.V.Sc. & A.H, 2nd semester kan zirlai a ni a. Kan senior pakhat room ah ka zirpui pakhat nen he hla hi kan ngaithla fuhin tha kan han ti mai mai khawp a. Vawi sawm chuang kan ngaihthlak hnu ah pawh, ‘vawi khat leh chiah’ tiin zanlai kan thleng der! Chutah pawh kham lo tak chungin kan tin a, tun thleng hian ka hla duh ber zinga pakhat a la ni reng a ni.

Ka ngaihtuah chiang a… He hla thukzia leh thatzia, ka tana a awmzia a neih nasat ziate, ka nun a a tangkaizia ka hre chiang tual tual thin. Ka lungngaih leh ka beidawn em em laiin hmui phun kher lo pawn rilru ah tal sain thlamuanna ka dawng a; ka hlim leh lawm lai lah in ka lawmna tizualtu leh min tichaktu a ni thung. A chang phei chuan mahni chapona lo langchhuak in, ‘he hla phuahtu hian a hla ropuizia leh thukzia hi a chhut phak ang em le??’ te ka ti lehling zawk mah thin. Hetiang a mite nun chawm thei tur a hlaphuahthiam kan nei te hi a vanneihthlak ngawt mai. “I hnungzui tur hian Lalpa ka theihna te a tlem thin si a, Mite ngaih a beidawnna lo thlen chang hiannin; Channa emaw ka lo ti a, mahse I remruat hi ringtute tan, Chaklo tan chakna a lo ni.” Engkim chan huamna nun kan neih te, engmah lo mai kan nihzia kan in hriat chian a, kan nihna kan pawm thlap hian nun a nuamin a hahdam thin a. Ama’rawhchu kan nunah thil pawm harsa ber leh nunpui khirh ber a ni lawi si. Kan thil lo ruahman leh beisei ang lo hlir a thil a lo thlen changte, vanduai ngawih ngawih bik a kan in hriat lai te hian Ani chuan min theihnghilh ngailo a, a hun takah tanpui vartu hnai reng nih a thulh ngailo. Tin a nihna tak ah chuan kan tlawmna te hi Ama zarah chuan, kan hnehna leh ropuina an lo ni zawk thin a. Hei vang hian tlawmna nun vekin chatuan nunna hial nei tura chhandam pawh kan ni reng a ni. Mahni ka in enlet a, min hmangaih em em tu leh ka thlakhlelh em em, a bul a awm ka nin ngailoh: ka nu in min boralsan ni te ka ngaihtuah let a. He khawvel hi a ho hulh hian ka hria a, tin lei dana ka nu ka hmu tawh lo tur a ka inruat hian pawm harsa ka tiin, awih a harsa ka ti thin. Khawilo kal nikhua a ‘hei hi ka nu tan’, ti a thiante’n (phek hnihnaah chhunzawm…)

Vol XV Issue No. 28

Bangalore Mizo Association

Editor Mâdawnga Hauhnâr Joint Editors Samuel Lalrozâma Hmar Sawmteii Khawlhring Contributors Hminga Pachuau C. Zairemsiama Circulation Managers Isaac Beingachha B. Lalthakimi BMA AW lak man: Thla khat Thla thum Thla ruk Thla sawmpahnih

-

Rs.20 Rs.50 Rs.90 Rs.180

E-mail: [email protected] Website: www.bangaloremizo.info I mobile-ah khan JOIN BloreMizo tih type la, 567678 ah thawn rawh. Bangalore Mizote tana Hriattirna leh thutharte ilo dawng thin dawn nia.

Editorial Mipui kan thuhmun fo lo Mizote hian hmabak thui tak mai kan nei a. Khawvel hi ala tawplo a nih ngai chuan Israel ram lamah kan awm dial anih loh vek pawhin engemaw ti tak chuan kan awm darh niai mai thei e. Thil hrang hrang, nundan phung leh khawsak dante experience tuma kan tih lawr dun dun lai hian kan lo harhfim hman lo ang tihte pawh a hlauhawm hle a ni. Mi tihdan entawn kan chin leh nundan phung kanglang tak hian kan danglam bikna riau hi a tibo thei tlat. Thil zir rau rauah mitena an lo hmuhchhuah tawh thil tha tak, nundan phung tha tak, khawsak dan mawitak te i chhawm nung zel teh ang u. Khawvelah hian mi pakhat ni ve turin kan lo piang theuh a, mahni a awmdan tur inngaihtuah theihnate pawh, inang veklo mahse Pathianin min pe theuh a, chumi hmang chuan, kan khawsakho naah emaw, kan nitin nunah emaw, kan danglam bikna theuh te i hmang tangkai thin ang u. Mahse, midangte ngaichang ve reng chungin ni se.

Pathianni Tin Chhuak Chanchinbu

Date: 11th October 2009

Phek Hnihna

thil an lei changte hian hriatthiam harsa ka ti, mihring ah hi chuan lawm a harsa a ni. Mahse ka nu erawh he lei anchhedawng ngai hian a lo kir tawh dawn silo. Heng tuarna leh lei dana vanduaina a ka ruat te hi Ama remruatna dan ah chuan chakna min petu an lo ni zawk a. Natna te leh hrehawmna ten hmun an chan tawh lohna, Lalnunnema kiang a ka nu a chawl tawh tih ka ngaituah chang hi chuan ka thik lehling zawk thin. Hei tak hi Ama remruat, vanram ngaihna thinlung min siam sak a, Kristian nunkawng ka zawhna a min hruaitu a lo ni. “I tlawm lai hmel hmu turin chapona in ka lo zawng thin che a, Mahse khawvel finna leh sanna zawng te hian e; I hmelmawi an hliah si thin a, Ka lungkham thin sanna leh hmingthanna te, Ka kawng daltu mai an lo ni si.” Kan chapona leh, thei ve ni a kan inhriat avang te’n kan buai fo thin. ‘Enge a nih bik?’, ‘A neih ka ei bik lo’, ‘A ni ve mai mai...’ kan tih bai bai tawh hi chuan kan mizia kan pholang chiang hle thin. Kan theihna leh thiam kan intihna a len poh leh beidawnna a thui ting, kan kal thui poh leh a hnawk a tam tial tial. Pastor pakhat nen a kan titi na a a thu min hrilh pakhat kha ropui ka tiin ani pawh in a tih tur diktak ti a a inhriat thu a sawi. Heti hian a sawi: “Khaw pakhat a bialtu pastor a ka awm laiin, kan khawtlang tan a tha zawk leh tangkai zawk ni a ka hriat angin kohhran hmingin hmunpui lamah thiam ngai leh tul zir tur a mi an tirh hnu ah damdawi dawr kan siam a. Ka theih ang tawk a khawtlang ka hmangaih vang a ka thiltih chu mi thenkhat te’n a nilo zawng a lo la in ka thiltih chu an lo haw em em mai hi a lo ni a. Mahse, Pathian thlarau hriattirna dawng in inngaitlawm takin (mihring mihrinnna ah harsa a ti ve hle) ka diklohna awm miah loh si ah keimah min hawtu te chu remna ka siam pui ta a. A tira kan han inbiak lai phei chuan mi pawh an lo dawngsawng tha lo viau nghe nghe a. Ama’rawhchu ti tur a Pathian in min hrilh kan tih zawh meuh chuan kan inkar boruak a thatphah ta em em a ni” a ti. Hei hi thil thleng tak tak a ni. Tlawmna nun hian mi a hneh thei tih a ti chhiang a, mahse a tan tu zawk nih hi a har em em thung a ni. Hausak leh ropui kan duh luat vangin kan kawngpui te a tlo tur angin kan siam tlo lo a (sum kawngbo awm vangin?). Kan in leh lo erawh sum lut a phulo in a lianin a ropui a, lirthei changkang tak takte neiin kan kawng kawi leh zim takah kan tlan bu ang lawih lawih a. A.., sawi tur a tam mai. Kan nihna sawi vek ta ila, ‘I ti dik chiah’ tih aiin ‘a phunchiar’ tih kan hlawh zawk thin si a. Kan inhriatchian poh leh kan in ei lo tawn a. Heng mahni tawk a (phak bak a ni zawk mah em?) awm leh lan kan tumna hian kan LAL hmel a hliah fo thin. “I hnena ka dil khawvel ro thil zawng te hi, Nei thei ila khawvelah nang ka ngai lo’ng che; I hming lam ka tum ngai lo’ng e, Beidawnna manganna retheihnate min ti chaktu an lo ni e.”

Vol XV Issue No. 28 Bangalore Mizo Association Pathianni Tin Chhuak Chanchinbu

Thusawitu pakhat in fiamthu deuh a a sawi hi ka rilru ah a cham reng thin. “Kan tawngtai a, malsawmna kan dil zawng zawng hi kan Amen rual hian hmu ta vek ni ila, mak ti fe fe kan tamin, mahni malsawmna dil phur zo leh si lo hi kan tam fu lo’ng maw?” a ti. A dikna lai a awm in ka hria. Kan tawngtai pawh hian rilru fim tak leh zah takin kan LAL hi kan be tur alo ni. Kan mamawh tak kan dil a a chhanna kan hmuh hian a nuamin nun a chawm a. Tin, kan tawngtai a hlawhtling nghal mai lo a nih pawhin, tih hram hramna nun min pe a, chu chuan Pathian ah innghah ngamna leh lawmna nun min siamsak zawk thin. A diltu zawk kan nih avangin kan dil zawng zawng hmu vek tur kan nilo tih pawh hi hriat a tul. Ani chuan kan mamawh tawk leh kan tan a tha tur a hria a. He hla in a sawi ang in kan thil dil leh duh zawng zawng hi hmu ta vek ni ila, min petu zawk hi kan theihnghilh mai lo’ng maw? “Ka LALPA remruat dan hi a makin hriatthiam a har lua e, Mite ngaih a vanduaina tinreng lo thleng hi kei misual ber tan malsawmna; Beidawnna leh lungngaihna tawh chang ni lo thleng mah se, Ka LALPA remruatna dan ah chuan a hmel mawi min hmuh tirtu.” Mittui luang zawih zawih khawp a lungchhia emaw, lawm avang a mittui tla chung pawha sak ni mahse a awmzia a bo chuang lo, a chiang tial tial zawk. Kan tan a tha leh dik ni a kan hriat zawng zawng hi Ani tan a tha vek kher lo a. Chuvang chuan Ama hmel kan hmuh theihna tur a kan tan kawng min ruatsak hi zui zel ila. Chatuana a hlim tawp hlau lo a kan fak hun thleng in hlimna famkim, lawmna thuruk chu kan tan lo zual zelin, kan nun par ang a vul mawi ngei ang.

MIZORAM CHANCHINTHAR

## Zirlai an lungawi lo. Gov’t. Higher Secondary School, Saiha-a pawl 11 leh 12 zirlai, Mara Students Organisation (MSO) leh Lai Students Association (LSA) Branch te chuan Thawhlehni khan Saihaa thuthar lakhawmtute kawmin an harsatna sukiang tura sawrkar an ngenna-in awmzia a neih theih loh avangin an lawmlo hle tih an sawi. Zirlai hruaitute chuan Saiha-a MSO Hqrs. Officeah thuthar lakhawmtute kâwmin, an School-a Lecturer Post 39-ah 20 chauh hnawhkhah a nih thu an sawi a, Post ruak 19 a awm thu sawi langin, Science Subject-a Mathematics leh Chemistry-ah chuan Lecturer 1 chauh an neih thu leh pawl 11 leh 12 te a vil hneh loh avangin tun dinhmunah an course chanve pawh an la zir thleng lo tih an sawi lang bawk a, Laboratory Assistant 1 chauh an neih avangin zirlaiten harsatna an tawk nasa hle tih an sawi bawk. ## Fai ber lawmman dawngtute. Mizorama Faina hapta hman chu zawhfel a lo ni ta a. A kharna hun chu Zirtawpni chawhnu dar 1 khan Vanapa Hall-ah hman a ni a. Mipui kal an tha hle. He Faina Hapta Vawi 33-na kharna inkhawmah hian Pu S. Laldingliana, Parliamentary Secretary chu khuallian a ni a, tin, he kharna inkhawmah hian faina lama hma la thate hnenah lawmman pek a ni. Chu’ngte chu Damdawiin: 1. Newlife Hospital, Chandmari 2. Vaivenga Hospital, Dawrpui 3. Aizawl Hospital, Mission Veng School (Middle Section): 1. Gov’t M/S, ITI 2. Gov’t M/S, Chawnpui 3. Gov’t M/S, Electric Veng Veng: 1. ITI Veng 2. Sakawrtuichhun 3. College Veng & Ramhlun ‘S’

Date: 11th October 2009 Phek Thumna

## Eirutute hrem tum. Chief Minister, Pu Lal Thanhawla chuan eirukna lakah sawrkar hnarkaitute fihlim hmasak tum a nih thu sawiin, sawrkarin eirute a hlahthlem dawn lo tih a sawi. Champhai Town Hall-a NLUP Awareness Campaign hmanpuia thusawiin, Chief Minister chuan Mizoram pum khawtlang nunphung siamthat a tul thu leh siamthat hna thawk tura mipuite tanrual a tul thu a sawi ## New Land Use Policy. Chief Minister Pu Lalthanhawla chuan Mizoram mipuite ei leh bar dinhmun chawikâng turin Flagship Programme atan NLUP hman a nih thu a sawi a, kum 5 chhung atan Rs. Vaibelchhe 2500 ruahman a ni a ti. A thawhkhatna atan NLUP hlawhtlinpui thei ngei tur chhungkua engemawzat hnenah pek hmasak a ni dawn tih a sawi. ## Environment & Forest department hnuaia Aizawl Forest Development Agency (AFDA)-ten kum 2006-07 chhunga Mission Vengthlanga an hnathawh ni a an ziah chu a taka hmuh tur awm lo a awm nual ni a hriaiin VL Faka Hnamte chuan RTI Act hmangin Principal Chief Conservator of Forest-ah thil awmzia a zawt chiang a, thil felhlel a awm ngei niin a sawi. VL Faka hian a thil dil hi huntiam chhunga a hmuh loh avangin Mizoram State Information Commission-ah a zualko a, SPIO chu thil awmzia sawifiah turin Sept. 10 khan MSIC chuan koin, PCCF office-a SPIO chuan VL Faka thil dilte hi an pek vek tawh thu MISC chu a hrilh. MSIC hian Sept. 18 khan VL Faka hi a ko ve leh a, ani hian engmah pek a nih loh thu a sawi avangin, MSIC chuan ni sarih chhunga information a dilte pe turin PCCF office chu a hrittir ta a ni. (source:internet)

Vol XV Issue No. 28 Bangalore Mizo Association

Pathianni Tin Chhuak Chanchinbu

INFIAMNA, etc. ## Mizote che tha zel: India rama naupang ( Junior & sub-junior) puala football tournament hlun leh lian ber Subroto Cup 2009 khelh chhoh mekah Mizoram Team (U-17 & U14) te an che tha hle zel a. Mizoram U-17 Team te hian he Tournament tan ni, October ni 6 khan SAI chu 1-0-in an hneh a, Nilaini khan AFBBS chu 1-0 bawkin an hneh. SubJunior (U-14)-ah Mizoram Team te hian an match hmasa berah Bangladesh chu 1-0-in an hneh a, nimin khan Haryana chu 2-0-in an hneh leh a. Kumin Subroto Cup-ah hian Under-17-ah team 32 zet an tel a, under 14-ah team 30 lan tel bawk a. Ram dang team thate pawh an rawn tel nual a, Under 17-ah phei chuan England atangin Army Cadets Force an tel bakah Bangladesh, Sri Lanka leh Nepal school te pawh an tel bawk a ni. ## Quiz Inelna Ropui. Zawlbuk Career Solutions leh LPS tangkawpin Quiz inelna an buatsaih "Mastermind 2009" chu zawhfel a ni ta. Final ah Pachhunga University College leh Vety College te intum in Pachhunga University College te chuan chak zawk nihna an chang ta a ni. Pathumna Mizoram University leh pali na Government Lunglei College te an ni. Pachhunga College aiawhtu te hi Priscila Rinmuanpuii- III Bsc Geology and Henry Malsawmtluanga II BS Pol Sc te an ni. An n pahnih hi tun kum August thla a Shillong a neih, Regional Quiz Competition for North East a champion team te kha an ni. ## World Cup Qualifier: Argentina vs Peru Nizana Argentina leh Peru inkhelah Argentina chuan 2-1 in Peru chu an hneh a ni. An han inkhelh tan atangin Argentina lam hian an khel tha zawk hle a, mahse goal an shoot tam viau na a an pet goal thei meuh lo, vawi tam tak an shoot hman a, Gonzalo Higuain phei chuan goal ruak a missed nghe nghe. Peru lam hian an attacked khat hle mai a, a khelh pawh an khel physical deuh zawk a ni. Half time-ah 0-0. Maradona chu a lungngai ta hle mai. Hun hnihna an tan deuh chiahah Argentina number 9 Gonzalo Higuain chuan a pet goal ta. Maradona hlim lutuk a au nasa. Mahse, minute 90 naah chuan Peru lamin an rawn draw ta (1-1). Hun pek belh (93mins) ah Argentinian Palermo chuan a ti goal ta hlauh mai. Hun tawp a lo ni ta a Argentina chuan 21 in chakna an chang ta a ni. BMA Office Bearers 2009-2010: President : Pi Lalrinpuii General Secretary : Mâdawnga Hauhnâr Treasurer : Blessy Sailo Secretary i/c Games & Sports : Joel Murray Secretary i/c Academic & Human Resources : Alan Lalhriatpuia

Date: 11th October 2009

Phek Li na

English Premier League: Tunkar chu World Cup lam atana inkhel a awm avangin club lampang inkhel a awm lova, a lunglenthlak riau mai. Chanchinthar neuh neuhte – ** Sunderland leh Manchester United inkhelh tuma an referee Mr. Wiley chu Sir Alex Fergussiona’n sawisel ni a media lamin an lo report dan chu diklo tiin, ‘tunlai game dinhmun angah chuan referee te fit dan pawh hi a tha tawk tur a ni’ a ti. ** Chelsea player pali- Michael Ballack, Didier Drogba, Salomon Kalou leh Branislav Ivanovic te chuan an ram ran an khel dawn a ni. ** Samir Nasri of Arsenal chuan Pathianni hmasa khan German Double Club zirlai 10 hnenah lawmman tha tak tak a hlan. Heng Double Club thalaite hi England nena intlawhtawn programme hmanga kal an nih mai bakah, Arsenal inkhel en turte, Samir Nasri hmu turte, tin, football inkhel turte a kal an ni. Fernando Torres Fernando José Torres Sanz hi March 20, 1984 khan Fuenlabrada khuaah a piang. Feet 6’2” a sang a ni a, Liverpool club-ah Striker a ni. Tunah hian Premier League ah goal pet lut hnem ber a ni (8 goals). El Niño (The Kid) tih te, The Eagle tih tein an ko thin.

English Premier League point dinhmun: (as on 10th October ’09) Position 1 2 3 4 5 6 7 8 9 10

Club Chelsea Manchester United Tottenham Manchester City Arsenal Liverpool Aston Villa Sunderland Burnley Everton

Played 8 8 8 7 7 8 7 6 8 8

GD +12 +11 +7 +7 +14 +10 +4 +3 -9 -2

English Premier League: Inrinni (17th October 2009) inkhel turte: Aston Villa vs Chelsea 05:00pm Arsenal vs Birmingham 07:00pm Everton vs Wolves 07:00pm Manchester United vs Bolton 07:00pm Portsmouth vs Tottenham 07:00pm Stoke City vs West Ham 07:00pm Sunderland vs Liverpool 07:00pm Vice President Asst.Gen. Secretary Assistant Treasurer Secretary i/c Cultural

: Pu Josiah Lalchhanhima Ralte : Pu Paul Lalchhanhima : Thaarie Hnamte : Samuel Lalrozama Hmar

Point 21 19 16 16 15 15 13 13 12 10