Do You Love Me

DO YOU LOVE ME? (Translated from Anonymous writer) Tuk khat zing ka tho chu ni lo chhuak tur mawi tak chu ka thlir a. Pathian thilsiamte reng reng chu hemi tuk hian an mawi danglam bikin ka hria. Chutia a thilsiam mawi tak takte avanga Pathian ka fak mek lai chuan ka thutna bulah chuan ka LALPA chu a rawn lang a. Heti hian min zawt a - “Min hmangaih em?” Kei chuan, Äw Lalpa, ka hmangaih a che, ka Lalpa leh Chhandamtu i ni” ka ti a. Heti hian min zawt leh a : “Piangsual ni ta la, min hmangaih tho ang em?” Ka inngaihtuah buai angreng hle mai. Ka kut leh ke ka han en a, ka taksa bung hrang hrangte pawh ka’n thlek kual a; thil nihphung anga ka lo dah mai maite hi lo hmang thei dawn lo ta ila thil engzat tak ti theilovin awm ang i maw ka ti a. Chutah “Lalpa, a hautak viau ang a, mahse ka hmangaih tho vang che”ka ti a. Chumi hnu chuan hetian min zawt leh ta a: “I mit hi lo delin khua hmu thei lo ta la, ka thilsiamte hi i ngaina tho vang em?” Engtiangin nge hmu thei si lovin thilmawi ka ngainat ngawt ang le? Chutah ka vela mitdel tam tak, Pathian thilsiama lungawi ngawih ngawihte ka ngaihtuah chhuak a. “Ngaihtuah thiam a har hle mai, mahse ka hmangaih tho vang che”ka ti leh a. “Bengngawng ni ta la, ka thu hi i ngaithla tho vang em? Chutah chuan ka harh chhuak ta! Pathian thu hriat hi benga hriat mai a lo ni lo, thinlunga hriat hi a pawimawh zawk a ni. Tichuan “Lalpa a khirh hle ang a, mahse ka hmangaih tho vang che”ka ti leh a. “Tawngtheilo ni ta la, ka Hming i fak tho vang em?” Aw ri chhuak thei lovin engtin nge Pathian ka fak ang le? Heti hian a lo thleng a. Pathian chuan thinlung leh thlarau zawng zawnga Amah fak turin min duh a, kan aw mawi leh mawi loh lam a ngai pawimawh ber lo. Pathian fak hi hla saa zai a ni vek kher lo, diriama kan awm lai pawha a hnena lawmthu sawi theih hi Amah kan fakna chu a ni. Tichuan “Hla sain zai tak tak thei lo chung pawhin ka hmangaih tho vang che,”ka ti a. Lalpa chuan he thu hi min zawt nawn leh a : “Min hmangaih tak zet em?” Ka huaisenna zawng zawng sawm khawm chung leh Ama tana ka inpekna lantirin “Lalpa, ka hmangaih che. Pathian tak leh awmchhun I ni” ka ti a. Ka chhannaah chuan ka lungawi hle mai, chhang tha ka inti bawk a. Mahse Lalpa chuan “Chuti ni si, engatinge thil i la tihsual fo?” tiin min zawt leh a, kei chuan, “Lalpa, mihring ve mai ka ni a, ka famkim lo a ni”ka ti a. “Nih leh enga tinge thlamuanga i awm laiin min hlat a, buaina i tawh chauhva ka hnena i tawngtai thin?” Chhanna ka nei lo, ka mittui a luang ta zawih zawih a. Lalpa chuan min zawt zel a : “Biak Inah leh inkhawmpuiah te chauh ka hming fakin i zai a, inkhawm hunah chauh min lam a? engvangin nge hmasial taka i dil? Engvangin nge rinawmlo taka i ngen thin?” Ka biangah chuan ka mittui chu a luang tam tual tual a. “Engvangin nge ka hming hi i zahpui thin? Engatinge Chanchin Tha hi i hril loh? Hun harsa i tawh lai pawha min bel tura ka inpekna hrechang lovin engvangin nge midang bula i lungchhiatna i tihlan? Ëngvangin nge ka hminga rawngbawl tura hun tha ka siamsak lai che a chhuanlam i siam?”

A zawhnate chu ka chhang thei lo. Engtiangin nge ka chhan theih ang ni? Chhuanlam ka nei lova, sawi tur ka hre lo. Engtin nge ka tih ang? Ka thinlung chu a tap chhuak hawm hawm a, ka mittui a tla zawih zawih a, heti hian ka dil ta ngawt a : “Lalpa, min ngaidam rawh. I faa vuah tlak ka ni lo” ka ti a. Lalpa chuan heti hian a sawi a : “Ka Fapa, chu chu ka khawngaihna chu a ni” Ëngtiangin nge heti chung pawh hian min la ngaihdam a, engvangin nge min la hmangaih reng theih?”tiin ka zawt a. “Ka thilsiam i ni a, ka fa i ni e. Ka kalsan ngailo che asin. I lungchhiatin ka kuangkuah che a, ka tuarpui che. Hlim leh lawma i auvin ka nui thin a, I beidawn changin ka chawikang che a, I tlukin ka kaitho thin che asin. I chauh changin ka pawm che a, I hnenah kumkhuain ka awm zel ang, ka hmangaih zel fo vang che” tiin min chhang a. Chutiang tak chuan lungchhiain ka la tap ngai lo. Engvangin nge a lakah ka hel tlat mai thin le? Engatinge Ka Lapa rilru hi ka lo hliam fo thin le?

Chutah heti hian ka zawt ve thung a : “Lalpa, eng ang chenin nge min hmangaih?” A kut a rawn par chhuak a, a kuta an khenna hliam chu ka hmu chiang hle mai. Ka Lalpa ke bulah chuan ka bawkkhup a, tihtakzetin a vawikhatna atan ka tawngtai ta a ni.