Bma Aw: 27th April 2008

BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007 Vol XIII Issue No. 17 Bangalore Mizo Association Pathianni Tin Chhuak Chanchinbu Date: 27th April 2008 Phek Khatna

BMA Sum tuakna Ball Pen man tlawm tak takin lei theih a ni ta e. Member-ten i lei chur chur ang u le. Kan tana tangkai, BMA sum hmuhna tur ni bawkah hian thahnem i ngai tlang ang u khai. % BMA Membership Form a lakchhuah theih leh tan ta a. Memberten form hi fill up zung zung ang u khai. Bangalore a Mizo awm tawh phawt chu BMA Member ni vek tur hian kan inngen a. Kum hmasa lam te aiin member-ten kan then leh rual te hrilh hriat kawngah pawh tan i la ila. BMA Member kan nih loh hian harsatna kan tawh leh thil eng emaw buainaah hian keimahni tan phurit kan insiam a ni tih hi i hre fo ang u. Kan nu leh pa BMA hi thiam takin i dawr zel ang u khai. % Kan Vice-President kalchhuak ta, Pu Joshua Lalrempuia pawh a hnathawhna hmun tur USA tluang takin a thleng tawh a. A hna te pawh a zawm tawh tih hriat a ni a, a hnathawhna turah Editorial Board in duhsakna kan hlan tak meuh a ni. % Zirna kum thar a intan chho mek a. Mizoram lam atang pawhin zirlaite an rawn chhuk thla mek zel a. Zirlai rawn kal tharte kan lo lawm che u a. Bangalore Mizo Association thil tihnaah leh Mizo khawtlang tana mi tangkai tak in nih kan lo beisei reng a ni. Member lo awm nghet tawhte pawhin member lo kal tharte lo chiau au thiam ila, kan theih ang tawkin lo tih tlangnel i tum theuh ang u. BMCF Inkhawm Programme

Kan Khawthlir Khawnge, tun tum chu kan khawthlir (vision) chungchang i han sawi dawn teh ang. Inthlan boruak chi hrang hrangin a khawi lamah mai pawh min chiahpiah a. Chungte hre reng chung leh a hma aia kan khawthlir ti thui thei tur te, a pawimawhna hrechhuak thar lehzual tur tein khua in thlir teh ang u. Mizoten a kan ngaihsan ber ram, USA chuan tunah hian inthlan a hmanchhawn mek a. Khawvel ram ropui ber an ni bawk a, mipui mit pawh a fu nasa hle mai. Khawvel news chi hrang hrangah chhiar sen loh leh chhiar peihawm loh khawp a lang tuktin a. Chutih rual chuan kan awmna state, Karnataka lamah pawh inthlan tur buaiin mipui an buai chho tan mek a. Mizoram lam ang thoin politics an khel ve a ni tih te, Kristiante aiin an politics a thianghlim bik lova, a bawlhhlawh bik chuang lo a ni tih te kan hmu chho mek a. Mizoram lamah pawh inthlan tur avangin tunah hian political party hrang hrangin thu fahrah te te hmanga vote hmuh tumin thu chi hrang hrang leh policy chi hrang hrangte an hmachhawp leh mek bawk a. America ram leh Karnataka state lam kan sawi lovang a; amaherawhchu, kan state Mizoram ngei kan sawi dawn a ni. Hman deuh khan thu mak deuh tak pakhat an sawi thin a, chu chu hetiang hian a ni. Pa pakhat chu Mizorama sawrkarna chelh lai Party office-ah kum eng emaw zat an sawrkar tawh hnuin a leng lut a, chu Ruling Party office-ah chuan an manifesto a dil a, an lo nei tawh hauh lo, an ti. Thil tak tak a nih chuan thil zahthlak ber te zinga mi a ni ngei ang. Kan ram dinhmun hi kan ngaituah chiang lova. Kan politiciante khawthlir hian tun atanga kum 20 a Mizoram awm dan hi a hmu pha lova. Kum 20 chu sawi loh, mahni ruling chhung ngei ngei pawhin an thil tum zinga ‘Kan ti ang’ an tih chu tihpuitlin chu sawi loh, an theihnghilh ta emaw tih tur hial te a ni hlawm. Kan politician-te hi nasa takin kan mawhpuh a, a awm pawh a awm viau, ram hnuk chelh tu an nih tlat avangin. Chutih rual chuan mipuite pawh kan inbihchian a ngai ve tho a ni. Kan politician-te kan beisei dan a dik lova, kan dawr dan a dik lova. Dik lo leh dik lo na na na chu a dik thei lo a ni. Mahni vote ngei mai kan hralh a, chhia leh tha hriatna mawl ber nei tan pawh a tih awm loh tak thil. Kan vote kan hralh hian kan duhthlanna kan hralh a ni tih reng reng kan hre si lo.

27 April 2008

Hruaitu: Pu Josiah L. Ralte Tantu : Tv. Isaac Lallunghnema Thawhlawm hlanna: Tawngtai Rual Thusawitu: Rev. Dr. K Sapthanga

Mizoram hi kum 5 chhung kan kaihhruai dan turah kan chiang lova. Kum nga chhung a kan awmdan tur ngaihtuah na chang hria pawh kan tlem hle. Kum nga hnu lama kan ram awm dan tur phei chu kan la chhut thiam pha lo lehzual a. Kan ram leh hnam dinchhuah nan kan hma hun thlir chungin kan thil tih apiang i ti ang u.

Vol XIII Issue No. 17

Bangalore Mizo Association

Pathianni Tin Chhuak Chanchinbu

Hringnun Editor Lalengzuala Ph- 9972 235 314 Joint Editor C. Lalrinfela Ph- 9844 783 282 Circulation Staffs: Ruby Lalremruati R. Laltleipuii

E-mail: [email protected] Website: www.bangaloremizo.info A man (thla thum) : Rs. 60/Editorial Mi chanchin sawi Hnam a la tet vang te pawh a ni mahna, kan va han inhrechiang thei thin tak em! TV-ah vawi hnih vawi thum a rawn lang a, ‘Khi nu khi chu ka hria a lawm, a englo ve thei lutuk’ ti thei hi kan tam thin ngawt nia. Mizote mize zinga thil chin tha lo taka lang chu mi chanchin sawi hi a ni. Mi pahnih pathum kan awm khawm tawh chuan vawi khat tal hi mi chanchin kan sawi deuh zel mai a. A tha lam aiin a chhe lam thil hi a lar chak fova. Chuvang te pawh chu a niang mi chanchin kan sawi hian a chhe lam hi kan sawi tam zawk em em lenghal. Infak mai hi kan harsat hle a. Hnam dang kan tluk lohna pakhat a ni. Hmai chhan ngei maia infak phei hi chu a dawngtu tan a lawmawmin, a hlu duh hle a. Thil chin than tha tak a ni. Hmai chhan chu sawi loh kan mingaihsan te pawh hi Mizo an nih chuan kan fak duh zen zen lo. Mipa aiin hmeichhiain mi fak an awlsam zawk a, a rel lamah pawh an awlsam zawk deuh zel a. Mipa hi chuan mi kan rel pawhin ‘Kan rel lo, thil pawimawh kan sawi a lawm’ te hi kan ti thla zen zel lehnghal a. Pawl ho thil tihnaah te meuh pawh hian kum upa lam pawh hi an ban loh chang a awm ve fova, a thalai lam phei hi chuan kan uar fal hle. Mahni infak leh sakhi ngalah engmah a bet lova, mi dangte kan fak erawh chuan miin kan bula awm nuam an ti fo thin.

Date: 27th April 2008

Phek Hnihna

Barak Obama

Hmingsanga[Lengzem.info] Thu a sawi thiam a, a zangkhai a, a naupang a, thil a hre hle bawk. Chung thil inbelhkhawm chuan he mihang tlangval hi US President a nihtir thut thei. Obama pa chu Africa khawmualpuia Kenyan mi Barack Obama, Sr. a ni a, a nu mingo, Ann Dunham a ni. A hmingpum tak Barack Hussein Obama hi a muslim hming ruih a, mahse kristian tlangval a ni a, United Church of Christ-ah a lawi a ni. A naupanlai chuan Barry tiin an ko ber thin. Obama nu leh pate hi University of Hawaii, Manoa khuaa lehkha an zir lai atanga inhria an ni. Obama Sr. hi Kenya atangin Hawaii-ah foreign student a in enroll-in lehkha a zir a. Obama pian hnu kum hnihah Obama nu nen hian an awm hrang a, a hnu rei vak loah an inthen zui a. Obama pa hian Harvard Universityah Ph.D. a zawh hnuah Kenya ramah a kir leh ta a ni. Obama hian a pa chanchin hi a hre chiang lo hle. A chhungten a pa chanchin an sawi te, thlalak an kawhhmuh atang te leh kum 1971 a rawn tlawh bak chu Obama hian a pa chu a hre chiang lo hle. Kenya-ah a kir leh a, kum 1982 khan lirthei chesualah a thi ta si a, suangtuahna leh mitthlaah mai lo chuan Obama hian a pa chu a hre reng ta lo. Obama hringtu Barack Obama Sr. kha Muslim chhungkuaa seilian niin Muslim anga enkawl a ni a. Tun hnu-ah a han chhui kir lehin Obama chuan a pa kha Muslim anga enkawl ni mah se Pathian awm ring lo mi niin a ngai. A pahrawn pawh hian sakhua hi thil tangkai teh vakah a ngai lo bawk. Chutiang mi tena an hrual chung chuan Obama chu kristian a ni tlat mai a, a mak zawk hle. Rawlthar lungmawl a nih laiin, thlah-pawlh a nihna chuan a rilru a tibuai hle a. A rilru hah avangin zu, ganja leh cocaine te a tih phah a. Mahse a tawpah rilru fim puin hma lam a pan a, mi pangngai mai ni lovin, mi pangngai chung lamah a invawrh ta hial zawk. High school a zawh hnuah Hawaii chhuahsanin Los Angeles-ah a pem a, Occidental College-a kum hnih a zir hnuah Columbia University, New York-ah a insawn leh a, kum 1983 khan BA-a zo. Kum 1988-ah Harvard Law School-ah dân a zir zawm a. Kum 1990-ah an college zirlai pawl Preisident a thlan a ni ta hial a. Harvard Law School chanchinah an college a din atanga kum 104 chhunga mihang president thlan tlin hmasa ber a ni. Kum 1991 a Law degree a neih hnuah hna hrang hrang a thawk a. Kum 1993 atangin University of Chicago Law School-ah constitutional law zirtirin a thawk leh a, kum 2004 a US Senate inthlanah Illinois state atanga thlan a nih khan zirtirna hna chu a chawlhsan ta a ni. Kum 1992 ah Michelle Robinson nen an innei a, fanu pahnih Malia Ann (1998) leh Natasha (2001) an nei. Lehkhabu pahnih a ziak tawh a, a hmasa zawk chu Dreams from My Father: A Story of Race and Inheritance (1995 a chhuah) a ni a. He lehkhabu chhuah hnu lawk thla reiloteah a nu Ann Dunham chu chhûl cancer natna vangin a thi a ni. He lehkhabu hi Grammy Award for Best Spoken Word Album (2006) a ni a. A lehkhabu pahnihna chu The Audacity of Hope: Thoughts on Reclaiming the American Dream (October 2006) a ni a, 2008 Grammy Award for Best Spoken Word Album a la leh bawk. Obama lehkhabu lei tura mi tamtak lokalte lehkhabu leiah chuan a hming a sign sak a. A lehkhabu review-tu Michael Tomasky chuan, “Mipui lo pungkhawm chuan Obama thinlungah US President nih duhna a siam a, heta tang hian a tum ta a ni,” a ti hial. He mihang tlangval hi US president ni mai thei dinhmunah a ding ta. Ni ta se engtinnge hma a lâk ang? George Bush-a khawvel chawhbuai hi a siamtha thei ang em?

Vol XIII Issue No. 14

Bangalore Mizo Association

Bangalore Chanchin % Kar kalta lam ngaihtuah chuan tlemin boruak lum lam a zia awm deuh tan tawh a, vawiin hian a lum lai berin 33oC, a vawh lai berin 22oC a ni anga, kar tawp lamah chuan boruak lumlam hi tun aia tlahniam tura la ngaih a ni. % Kan hma lawka inthlan lo awm tur chuan a vawrtawp a thleng dawn ta a, politician-ten tan an khawh nasa hle a. Inthlan buaipui tu tur lam pawh an inpeih fel thawkhat tawh hle. Chutih rualin Bangalore chhung leh a chhehvel a kawng siamthat hna pawh nasa takin a kal mup mup reng a. Airport thar leh hlui chungchanga inhnialna lah chiar tur a awm reng bawk. Tin, misual tu tih hriat loh ten hnathawk bang ho rawk/kutthlak thawm hriat tur a awm nawk bawk. Mizoram Chanchin % Iraq-ah Mizo Tlangval. Lalremruata s/o Rev Lawmsanga, Khatla, chu British sipai-ah a tang a, rei lo teah Iraq-ah a rammu dawn. Remruata hian April ni 18, 2007 khan British Army dik tak ni turin Catterick, New Castle-ah Passing Out Parade a hmang zo a, Mizo chhulchhuak zinga British Army dik tak awm chhun nia hriat a ni. Royal Regiment of Fusiliers a zawm a, an battalion hi Germany-a in-base an ni. Tunah hian kar hnih chawlh an nei a, a nu leh pa hnenah a awm mek. May ni 2 hian Germany-ah an awmna turah a kal ang a, thla khat vel a awm hnuah, Irag-ah an kal dawn a ni.ZAWLBUK.NET % Khawmawi-ah hel man. Lunglei District chhung Khawmawi bula Kawrawng lui bulah April ni 22 chawhnu dar 3 vel khan Chin National Confederation (CNC) hel nia inchhal mi pathum chu 41 Assam Rifles patrolling-a chhuak ten an camp siam atangin an man. An kut atang hian .22 rifle leh a mu pakhat an man a ni. Heng mite hi Vanlalmuana (21) s/o Lalbuaia, Palewa, Myanmar; Nainai (21) s/o Naiki, Kanpelat, Myanmar; Powbe (24) s/o Thasei, Matupui, Myanmar te an ni a, nimin piah khan AR te hian Lunglei police te kutah an hlan

Pathianni Tin Chhuak Chanchinbu

a, nimin khan Lunglei District Jailah thawn an ni.ZAWLBUK.NET % Book of the Year ’07. Mizo Academy of Letters chuan kum 2007 Book of the Year atan “Zofate Zinkawngah (Zalenna mei a mit tur a ni lo)" R. Zamawia ziak chu an thlang a ni. 1989 atanga Book of the Year lo thlang tawhtu MAL te hian 2007-a chhuak lehkhabu 133 atangin lehkhabu tha ber hi an thlang a, Originality & Creativity (mark 40), Language (mark 30) leh General Impression (mark 30) hmang tein an teh a ni. %April ni 26 Mizoram Salvation army dincham. Nimin ni 26 kha Mizoram Salvation Army a dincham a ni a, Zoram puma sipai pawl te chuan he hun hi urhsun takin an hmang a, Central Division sipai pawl thalai te chuan an dincham pual hian Aizawl Temple ah damlo mamawhtuten an hman atan thisen an pe. Kum 1917 April ni 26 a, Mizo tlangval German sipaia tang turte Aizawl sipai lammual a an intlar mup mup laiin Mizo zinga Salvation Officer hmasa ber Lieutenant Kawlkhuma chuan Pathian sipai ni a, zoram a Salvation Army din turin Aizawl a lo thleng ve chiah a, hemi ni hi Salvation Army te chuan zoram sipai pawl ni atan kumtin urhsun takin an hmang zui ta a ni. Nimin ni 26 khan Corps leh Society tam tak chuan hnatlang neiin Sipai dincham pual hian hun an hmang a, mimal in, Biakin leh sipai pawl pisa pui ah te chuan zing ni chhuah atangin sipai pawl puan zar chu pawn ah a langsar thei ang bera zar a ni.BUANNEL %Ambassador kaisang. Bulgaria rama India ram palai, Ambassador hna thawka awm mek, Pu Laldingliana chu a kaisang a, sorkar laipuia Secretary puitling tlukpui dinhmunah dah a ni. Pu Laldingliana hi Mizo zingah, Pu P.Rohmingthanga tih lohvah chuan sorkar laipuia Secretary puitling tlukpui hmasa ber a ni. Pu Laldingliana hi Bulgaria ram khawpui, Sofia-ah India ram palai, Ambassador a nih bakah Macedonia rama India sorkar palai hna a kawp

Date: 27th April 2008

Phek Thumna

tel a, a kaisan tak avang hian hna thar pek a nih dawn leh dawn loh erawh hriat a la ni lo.BUANNEL % District ngiatin Hnahthial atangin Long March. Hnahthial Dist Demand Committee te chuan Chief Minister thusawi bawhzuiin hun rei taka atanga Dist an ngiatna chuan awmzia a neih theihloh avangin April ni 23 zing khan Long March nei turin Hnahthial an rawn chhuahsan a, kawng rawn zawh te hi an vaiin mi 85 an ni a, Rawpui leh Pangzawl atangin mi 5 vel ve vein an zawm nia thudawn a ni a, an kal tirh lam chuan harsatna lutuk nei lovin April ni 25 khan Phulmawiah an riak a, hemi hnu hian tluang taka rawn kalin zirtawp zan khan Aizawl daipawnah an riak a, nimin khan Aizawl an lut ta a ni. Hnahthial Dist Demand Committee Long March rawn nei te hian nimin April ni 26 chhun dar 12 khan Bawngkawn rawn lutin Zemabawk North-ah Aizawla Hnahthial khua zirlai te chuan thei tui an lo in tir a, kawng an zawh hnuah hmalak zel dan tur relin Mizo Students Union Pisa-ah awmhmun an bengbel nghal.BUANNEL % Man chanvea ei-in lei theihna hawng dawn. Salvation Army-in mautam tam tuarte tanpuina atana a man chanve a tam tuarten ei leh bar an lei theihna tura hmalakna 'Fair Deal Centre Project' chu nimin zing dar 7 khan Vanapa Hall-ah neih ani a. Commissioner B. Donald Odegaard, IS for Programme Resources, IHQ London chuan he project hi a hawng a, Fair Deal Centre-a dah tur eitur te a vailiam a ni. Cheng nuai 120 chuang senna tur Fair Deal Centre hi Darlawn, Kolasib leh Saitual-ah te dah a ni a, buhfai, dal leh tel te dah a ni ang. He project atan hian Sweden leh Netherlands Territory ten IHQ-a International Emergency Services kaltlangin an rawn tum a, Centre 10 hawngin May thla atanga September thla thleng khian tam tuar thlanchhuah, Fair Deal card holder chhungkaw 5000 te chuan thlatin buhfai quality tha tak kg. 20 tel litre 1 leh dal kg. 4 chu a man chanve in an lei thei dawn a ni.BUANNEL

Vol XIII Issue No. 14

Bangalore Mizo Association

Pathianni Tin Chhuak Chanchinbu

Khawvel % Nimin khan Casablanca, Morocco a mattress factory pakhat ah kangmei nasa tak a chhuak a, mi 55 an thi a 12 an hliam ani. He kangmei hi chhawng hnuaiber atanga chhuak niin chhawng dangah a kangkai vat a, kangthelhtu pawl a thawk mi 100 chuangin darkar 3 vel zet thelh tuma an beih hnuah an thelh theita hram ani. % Nimin zing khan Palestinian Hamas hruaitu Talat Marouf fanu Maryam Marouf, kum 14 mi chu an chenna inah Israel sipai ten an kaphlum. Hamas pawl hruaitu Talat Marouf hi Israel sipai ten man tumin inrinni zinglam khan a chenna in an luhkhunga, Maryami bakah hian a unau dang 2 leh anu pawn hliam natak an tuar ani. % Friday tlai dar 6:45(IST) khan Sri Lanka khawpui Colombo ah chuan bomb a puak a, mi 23 thiin 52 in hliam an tuar ani. He bomb hi bus chhungah kam niin, bus hi khawpui lunlai taka a din hnuah bomb cu tihpuah ani a. Sri Lanka sawrkar chuan bomb tipuaktu ah Liberation Tigers of Tamil chu puhin nasa takin a dem ani. % Dalai Lama chuan remna zawnga inbiakna tur anih chuan China ram hruaitu te chu engtik lai pawhin a be thei reng tih apuang. He thu hi nimin khan Tibetan media lamin an chhuah a, chutih rualin China lam media vethung chuan Dalai Lama hi demin China in Olympic athlentur ah harsat bulpui ber siamtu ani an ti. % India mi Britain a awm Lakshmi Mittal chu Britain a mihausa ber ah vawiin a chhuak Sunday Times Newspaper chuan a thlang leh ta. He nihna kum 4 chhung a chelh na tur ani ta a. Mittal hian an chhutdan chuan Pound 27.7billion vel neiin an chhut a, hetih lai hian Queen Elizabeth II chuan Pound 320 million nei a chhut ani thung. David Beckham te nupa poh mihausa list ah hian tel vein Pound 125million vel neia chhutsak an ni. % Mexico ram Tijuana ah chuan inrinni zinglam khan khawpui chhungah dugs zuar pawl 2-te chu car a inum pahin an inkap chiam a, he thilthleng avang hian mi 13 in nunna an chan a mi 9 in hliam an tuar a ni. He thilthleng avanga a thita te hi drugs zuartu pawl pahnih ami te vek nia hriat an ni. % Tunlai hian Japan ramah mahni intihhlumna chi kha alar hle a, detergent(sahbon emo a phut emo) leh bath lotion(vun tihmawina atan a sahbon aia inbualna atana hman) chawhpawlh hmanga rim lo chhuak Hydrogen Sulphide chuan mi 50 lai tun thla chhungin a suat toh ani. A hnimtu mai bakah a bula lo dingve tan poh he rim hian thihna a thlen thei ani.

Date: 27th April 2008

Phek

On this day
1927 : Coretta Scott King, Martin Luther King nupui pianni.
1960 : Togo ram chuan France ram atangin zalena a hmuh ni.
1990 : Axl Rose leh Erin Everly te inneih ni. Ni 27 hnuah an inthen leh nghal a ni.
2005 : Passenger phur thlawhtheihna lianber mi 840 chuantheihna A380 thlawhchhuah hmasak ber ni. Infiamna % Nizan inkhel result: Chelsea 2–1 Manchester United Birmingham 2-2 Liverpool Sunderland 3–2 Middlesbrough Manchester City 2 – 3 Fulham Wigan 0-0 Reading Tottenham 1–1 Bolton West Ham 2–2 Newcastle Zanin inkhel turte: 7:00pm Portsmouth - Blackburn 9:30pm Everton – Aston Villa Monday zan(Tuesday zing): 1:30am Derby - Arsenal Match hnih khelh tur ala awma Chelsea leh Man Utd hi points ah inzat chiahin goal difference ah Chelsea hian 16 in Manu hi an la phalo ani. % Spanish League Barcelona 0 – 2 Deportivo Murcia 0 – 0 Sevilla % Champions League Fixture: 29 April, 19:45(GMT) Man Utd – Barcelona 30 April, 19:45(GMT) Chelsea – Liverpool % Roger Federer chuan Monte Carlo Masters ah final a thleng leh ta a. Final ah Rafael Nadal nen an intum dawn a ni. Fing-tometer (i mawl nge i fing?): 1. Thil a tihro nasat pauh leh a huh nasa? 2. A kawr I kheh a, a chhung I chhum. A pawn I ei a, a chhung I paih? 3. 25 atangin vawi engzat nge 5 I paih theih?

Verse of the day: Felnain hnam a chawimawi a. Sualna erawh chu hnam tin tan hmingchhiatna a ni. THUFINGTE 14:34

BMA Office Bearers 2008-2009: President : Rev PC Lalduhawma Vice President : Pu Jessiah L Ralte General Secretary : Mâdawnga Hauhnâr Asst.Gen. Secretary : Lalengzuala Treasurer : Rebecca Lalmalsawmi Assistant Treasurer : Blessy Sailo Secretary i/c Sports : R. Lalremruata Secretary i/c Cultural: Terence Lalthlamuana Secretary i/c Academic & Human Resources : Lalrothara Tlau