Qurrat-ul-aein Haider Kay Navaloon Kay Kirdar

Qurrat-ul-Aein Haider kay navaloon kay kirdar

Maqsood Hasni

Kisi bhi kahani kay palat ki kamyabi ka inhasar os kay kirdaroon ki kar’gozari par monhasar hota hai. Kirdaroon say vaqeyaat qudrati ya fitri toor par sar’zad hotay hain ya wo vaqeyaat oon say sar anjaam patay hain. Agar oon say koe alag say aur omoom say hat kar vaqoo main aata hai to wo qari ki khasusi tovajo hasal kar laitay hain. Es tara qari baray shooq tovajo aur bila’oktahat wo tehreer parh jata hai. Qari in doo soratoon main hi oon kay sath reh sakta aur ghol mil sakta hai. Issi hawala say woh oon say nafrat, mohabat, hasad, boghaz, hum’dardi, ranjash aur anaad palta hai. Ager qari kay zehan main kisi bhi noeat ki halchal paida hoti hai to yah os palat ki kamyabi ki daleel hoti hai. Qurrat-ul-Aein Haidar kay kidar moashray ka hisa hotay hain. Oon ka khameer miti say jura rehta hai. Woh Bar-e-Sagher ki zindgi kay bazar main chaltay phirtay nazar aa jatay hain. Oon ki naqal-o-harkat qari kay liay koe nae aur alag say nahain hoti. Oon ka eak moasharti ta’araf mojood hota hai. Oon ka samji hawala say role qabal-e-zikar na’sahi likin woh apna eak samji moasi aur moasharti vojood zaroor rakhtay hain. Qurrat-ul-Aein Haidar kay bunyadi kirdaroon ka ta’alaq ta’alqa’dar tabqay say hota hai. Oon ka omoom say itna gehra reshta na’sahi likin omoom ki zindgi main oon ka amal dakhal zaroor rehta hai. Woh apna mukhsus samaji, masarti aur moashi saliqa zaroor rakhtay hain. Bonyadi kirdaroon kay sath taisray aur chothay tabqay kay kirdar bhi kisi na’kisi hawala say monsalik rehtay hain. Yah taisray aur chothay darjay say mota’alaq kirdar ziyada dair ya ziyada door tak nahain chaltay ya phir kabhi kabhi nazar aatay hain likin kahani kay hawala say apnay naqosh choor jatay hain jab’kah

dosray tabqay say motalaq kirdar bonyadi kirdaroon kay sath chaltay rehtay hain likin oon kay ma’bain tafreeq aur tabqati diwar hael rehti hai. Yah tabqa tafreeq aur tabqati boad khatam karnay ki her momkina koshesh karta hai likin bonyadi kirdar onhain hadood tajavaz karnay ki ijazat nahain daitay. Qurrat-ul-Aein Haidar kay navaloon main un’gint zimni kirdar bhi mojood hotay hain. Yah lamha doo lumha kay liay namo’dar hotay hain. Es kay baad oon ka soragh nahain milta. Oon say mukhtasar molaqat ya nashist zehan say mehav nahain ho pati. Oon ka apna eak ta’asar zaroor hota hai. Meaz eak tool honay kay ba’vajood oon kay navaloon kay hawala say oon say motalaqa samajyaat say inkar nahain ho sakta. Mokhtasar se molaqaat ya nashesht kay tehat apnay tabqay ki dhondli se tasveer aur apna samaji ta’araf choor jatay hain. Qurrat-ul-Aein Haidar kay kirdar bohat kuch alag say karnay ki aarzo rakhtay hain. Alag say karnay ki khaesh aur tamana oon main awal ta aakhir mojood rehti hai likin oon ki tamanaein aur khaeshain tashn-e-takmeel hi rehti hain. Onhain halaat ki nazakat ka andaza ho jata hai. Waqt ki zaroratoon say aagah hotay/rehtay hain. Samaji hawaloon say bhi oon ki nazar hatnay nahain pati. Woh jantay hain aisay main kiya hona chahiay ya onhain kiya karna chahiay. Woh apna role ada karnay kay liay mashavrat kartay hain, mansobay banatay hain. Moqa mahal ki talash main rehtay hain likin kuch nahain kar patay ya oon say kuch nahain ho pata. Yah almiya oon kay sath hamaisha rehta hai kah wasael mowaqay aur salahiat honay kay ba’vajood kuch nahain kartay ya kuch nahain oon say ho pata. Oon kay damun main oon kay apnay hawala say zabani jama kharach kay siwa kuch talash ho pata. Qurrat-ul-Aein Haidar kay navaloon kay palat tahair’khaiz nazaryati aur inqalabi noeat kay hain likin oon kay kirdaroon say kuch bhi tahair khaiz aur inqalabi moamla ya waqeya, jis say oon ki ema jhalkati ho ya woh aisa karnay ja rahay hoon, nahain hota. Jo kuch bhi hota hai oon kay kirdaroon kay tavasat say qudrati ya fitri toor par ho jata hai. Essi hawala say oon kay inqalabi aur tahair khaiz palat apnay anjaam ko pochtay hain. Qurrat-ul-Aein Haidar kay bonyadi kirdaroon kay maqalmoon kay hawala say tahair khaizi aur inqalabi azaem samnay aatay hain. Dar’asal Qurrat-ul-Aein Haidar tarikh ki naval nigar hain. Tarikh kay zari-e-asar tehzeeb/kalchar ki jhalkiaan bhi dikhae daiti hain. Es moamla main oon kay kirdar moawan sabat hotay hain. Mokalmoon kay hawala say ya kirdaroon kay hawala say qudrati toor par sar’zad honay walay waqeaat kay zareay ehad-ba-ehad ki tarekh nigari ka amal jari–o-sari rehta hai. Koe Qurrat-ul-Aein Haidar sakhta tarekh say motafiq ho ya na’ho yah zaroor teh pa jata hai kah qari tarikh kay tasalsal say aaghi hasal kar raha hota hai. Agar yah kaha ja’ay kah Qurrat-ul-Aein Haidar nay apnay kirdaroon kay hawala say apni marzi aur mansha ki tarikh sazi ki hai to yah baat kisi haad tak ghalt aur bai bonyaad na ho gi. Oon kay haan rang’bazi ka onsar siray say mojood nahain. Abdul Haleem Sharar ya Naseem Hijaji nay yaqenan rang’bazi say kaam liyya hai. Oon ki es rang’bazi kay sabab oon kay naval ala darjay ki awami maqboliat aur pazirae rakhtay hain. Oon kay bar’akas Qurrat-ul-Aein Haidar nay mukhsus zehaniat aur nazariyaat kay zair-easar yah asloob-e-takalam aur taraz-e-ada ekhtayar nahain kiya. Qurrat-ul-Aein Haidar kay kirdar lachak’dar hain. Woh zidi aur hat dharam nahain hain aur na’hi nazriay kay atal rehtay hain. Woh apnay nazriay say hat jatay hain. Monharaf ho jatay hain. Eak sata par aa kar apnay hi nazreay kay khalaf kar jatay hain. Woh jis nazreay kay khalaf hotay hain os say motalaq bohat kuch kehtay hain likin eak waqt aisa bhi aata hai kah woh mokhalif nazreay kay pairo ho jatay hain ya kisi na’kisi hawala say os ka hisa ban jatay hain.

Qurrat-ul-Aein Haidar kay kirdar mukhsus koryay say motalaq hotay hain. Oon ka jina marna ossi korray say jora rehta hai likin bohat dafa qool-o-fail kay lihaz say apnay mukhsus korray tak mahdood nahain rehtay. Os korray say hatnay ya fikri toor par os ka na rehnay kay ba’vajood oon ki wapasi ossi korray main hi hoti hai. Qurrat-ul-Aein Haidar kay kirdaroon ka fikri shaoor oon kay badaltay nazriyaat kay hawala say parwan charta hai. Goya Qurrat-ul-Aein Haidar nay apnay nawaloon ki kamyabi kay liay yah atkal pasand ki hai Jo qari ko kisi dosray naval’nigaroon say mamtaz karti hai. Qurrat-ul-Aein Haidar kay navaloon kay kirdaroon main eak cheez moshtarik zaroor hai kah oon kay kirdar apni asal ki janib lottay hain. Qurrat-ul-Aein Haidar kay kirdar, kirdar kam bai’chain rohain ziyada hain. Onhain kisi karwat sakoon mayassar nahain aata. Es ki vaja yahhi ho sakti hai kah amal say door hain. Meaz mansobay banatay hain. Guftagu kartay hain. Chahtay hain kah kuch kar gozrain likin kar gozarnay ki himmat nahain kartay halankah onhain kar gozarnay kay mowaqay bhi mayassar aatay hain. Woh moqa say faeda othana nahain jantay. Khadshaat ka bhoot onhain kuch karnay nahain daita. Waqt ka dhara onhain apni marzi kay motabaq baha’ay liay jata hai. Kitni ajeeb baat hai kah kam’tar tabqay say motalaq kirdar jo lamha doo lamha kay liay namodar hotay hain moamlaat ko manzal tak lay janay ka zareya ban jatay hain ya kuch na’kuch honay ya palat ko dil’chasap bananay ya palat ko aagay barhanay main kaoidi kidar ada kartay hain. Ghotan aur bai’chaini oon kay haan bhi pae jati hai. Es ki vaja oon kay karnay ki salahiat hai. Woh kuch karna chahtay hain likin palat kay hawala say karna oon kay hisa main nahain hota. Yah kidar Qurrat-ul-Aein Haidar kay navaloon ki jan hain. Inhi kay hawala say naval kisi haad tak dil’chaso ho jata hai. Qurrat-ul-Aein Haidar kay navaloon kay bonyadi kirdar tanawo’pasand hain. Ranga rangi aur gehma gehmi oon kay apnay hawala say tarkeeb-o-tashkeel nahain pati. Baila hi ko lay lain woh chotay aur kamein tabqay say mota’alq hai. Tasalsal say ghabrati hai. Tabdiliaan lanay ki apni si sae bhi karti hai. Os ki her koshesh ki hosla shikni hoti hai. Baila kay kirdar ka Dipti Nazir Ahmad kay Kaleem say moazna kar daikhain: donoon tehraosay ghabratay hain halankah Kaleem ka ta’alaq kami kamein tabqay say nahain. Qurrat-ul-Aein Haidar kay kirdar awal ta aakhir insan hi rehtay hain. Oon say koe fooq-ul-fitrat vaqya sar’zad nahain hota. Yahhi sorat en kirdaroon kay nazaryaat ki hai. Oon main halaat aur zarorat kay motabaq tabdili aati rehti hai. oon kay kirdar apni zaat kay hawala say baray masoom aur bai’zarar hain. Oon say kisi ko koe khadsha la’haq nahain hota kah woh kisi moor par auroon ka na’qabal-e-yaqen bora ya bhala kar sakain gay. Qurrat-ul-Aein Haidar kay navaloon kay bonyadi kirdar batni hawala say khokhlay hain. Oon ka andar hamaisha tazabzab ka shakar rehta hai. Kain na’karain kay gardaab main phansa rehta hai. Haan apni waza’dari her moor par qaem rakhtay hain. Wazay’dari kay liay koe kasar otha nahain rakhtay. Qurrat-ul-Aein Haidar kay kuch kirdar apni zaat main mast hain. Onhain auroon say kuch laina daina nahain. Na dakhal daitay hain aur na’hi modakhlat pasand kartay hain. Kuch kirdar aam logoon say mail molaqaat pasand nahain kartay. Oon kay nazdeek apni (fikri) sata kay logoon say milna hi kar’aamad sabat ho sakta hai. Kuch kidar aisay bhi hain jin kay khayaal main tamam kharabioon aur boraeoon ki

jar dosray tabqay kay log hain. Oon kay nazdeek yah log sodhar paida karnay kay liay nahain hotay balkah banti ko bigartay hain. Qurrat-ul-Aein Haidar kay kirdaroon ki asal khobi yah hai kah woh wapasi kay darwazay band nahain kartay. Woh bairiaan nahain jalatay. Wapis mornay ki salahiat oon main bahar’toor barqarar rehti hai. Goya oon kay kirdar gher lack’dar nahain hotay. Oon ka kirdar wazay aur sidha sada hota hai. Intahaoon say wapasi omoman na’momkin hoti hai. Likin Qurrat-ul-Aein Haidar kay kirdar apni asal sorat kay sath wapis aa saktay hain. Tahair oon kay kirdaroon par fit nahain aata aur na’hi qari ko chonkatay hain. Baila kay hawala say tahair paida karnay ki gae hai likin yah tahair intahae nichli sata ka hai. Yah qari par kisi qisam kay naqosh moratab nahain karta. Qurrat-ul-Aein Haidar kay kidar tang nafsi ka shakar rehtay hain. Yah ghotan qari ko na’gowar guzarti hai. Tafri ka saman na milnay ki surat main oktahat ka shakar ho jata hai. Qari ghotan ki fizamain en kidaroon kay sath ziyada door tak janay say qasir-o-ajiz rehta hai. Qurrat-ul-Aein Haidar kay anglo-indian kirdar apni noeat kay hain. Yah guftagu aur nazriyaat kay hawala say daisioon say qate mukhtalif hain. Yahaan tak kah eak hi wasaib main oon ka rehna sehna daisioon say alag sa hota hai. yah kirdar baray masoom say hain. Enhain moawan kirdaroon ki saf main bhi nahain rakha ja sakta. Haan albata qari oon ki naqal-o-harkaat aur guftagu say lutaf’andoz zaroor hota hai. Kuch kirdar aisay bhi hain jo badaisi ya anglo indyan nahain hain likin angraiz sa bananay ki koshesh kartay hain. Yah apni shanakht bananay main na’kaam rehtay hain. En ki kar’gozari yahaan tak hi mehdood rehti hai kah woh angraiz sa mehsus hoon. Zahir’dar Baig kaisa sahim socity main apna vajood rakhta hai. “Ovar kot” ka hiro bhi essi qisam ka kirdar hai likin apna vajood rakhta hai. Socity main os ka apna zati hawala kabhi dam nahain torta. Qurrat-ul-Aein Haidar kay haan na’siraf mukhtalif qisam ki zobanain bolnay walay kirdar miltay hain balkah khud’sakhta zoban bolnay walay bhi miltay hain. Kuch kirdar lehja kay hawala say apni shanakht karwatay hain. En kirdaroon say koe ajeeb, alag say ya hairat’naak waqiya sarzad nahain hota jo naval main dilchaspi ka sabab ban sakay. Sharar, Sarshar, Saroor aur Omra-o-Jan ki tara Qurrat-ul-Aein Haidar kay niswani kirdar moharak jan’dar aur shan’dar hotay hain. Qurrat-ul-Aein Haidar nay apnay navaloon main nojawan tabqay ko namaendgi di hai. Oon kay kirdar jins ko shaed shajar-e-mamnoa samjhtay hain. Jins kay moamla main idhar other ho jatay hain ya es mozo ki taraf nahain aatay. Zehni qorbat kay ba’vajood shadi oon ka moqadar nahain banti.