Déngi Bérbunkadu

Bérbunkadu Dengi! By Dr. Azágua

Ó Déngi! Ó Déngi! Ki bentu ki traze-bu? Fra-m ki bentu ki traze-bu?! Bo é pior ki satanás! Pamó bu kal xa-nu en pás! Bu ben spórti Lâ di nórti Sen pasapórti Má du ta da-u kórti! Bu ben sen lisénsa Sen bensôn Tanbê du faze-u senténsa Sen dor na korasôn! Ó Déngi! Ó Déngi!... Pamó bu kal ba bu terra?! Ba bu terra! Ba fási! Más fási ki bu pode Pô ka ba leba pó Na tésta má na tôtís! Obí… Du ta da-u ku pó Du ta tra-u ku pó Du ta lonba-u pô Du ta xagua-u pó Di nôti tê manxê! Dj’obí? Bárbunkadu fatuzés! Ba! Ba ta bai!... Ba fási própi Pô ka spreadu Dentu kêl ôdju di diabu!

Kêl bentu ki traze-bu El-mé el ta torna leba-bu! Bai! Ba ta bai! Ben ku kêl ôdju grilidu Ku kêl denti falidu! Bu ka ten brigónha bo lâ! Pêli di bu kara stâ kurtidu Más ki pêli di tudu barkinu! Bu pêli stâ más franzidu Ki tésta di Txalinu! Ben! Ben, satanás! Ben ku kêl kara lerés Sima fatuzés! Sima kêl bódi di Simianu Sima kêl burru Xalé di Keitanu Sima kêl tôru di Kintilianu Ku kêl dôs gánxu sima denti katxás Ku kêl dôs txífri sima kabra di Djózé Stikadu pa séu sima saúdi Ta garanhâ sima karangêju! Sondâ bu ben! Bu pode ben! Berbunkadu fatuzés! Bu ka n’un Muzés! Ba! Ba bu terra, disgrasadu!... Ba gósin! Gósin própi, pô ka nterradu Sen nodjadu Lokadu ku séti kadiadu!