Hmarhai Scheduled Tribes List-a An Ngirhmun

Hmarhai Scheduled Tribes (ST) List-a An Ngirhmun Ziektu: Malsawmthang Keivom Manipur State ah “The Scheduled Castes and Scheduled Tribes Orders (Amendment) Act, 1976” dungzuiin Hmarhai khawm Manipur state-a dingin ST ah zieklut an nih. ST List Sl. No. 7 ah ‘Hmar’ tia ziek a nih. Hitaka a pawi deu pakhat chu ei Hmar pahnam hnuoia mi hieng ‘Aimuol/Aimol, Anal, Chiru, Chothe, Kom le Maring’ hai hi a hranin an lo zieklut ta dai el. Ka ngaidan chun ‘Any Hmar Tribes’ ti amanih, annawleh ‘Any Hmar Tribes, including Aimuol/Aimol, Anal, Chiru, Chothe, Kom & Maring’ ti damin lo zieklut hlau el hai sien chu a tha ding bah. Meghalaya State ah “The Scheduled Castes and Scheduled Tribes Orders (Amendment) Act, 1976 and The Constitution (Scheduled Tribes) Order (Amendment) Act, 1987” dungzuiin Hmar hnam chu Meghalaya state-a dingin ST a zieklut a nih. ST List Sl. No. 6 ah ‘Hmar’ tia zieklut a nih. Hitaka pawi ang reng pakhat nawk chu Hmar pahnam sunga mi ‘Biete, Changsan le Hrangkhawl’ chu Kuki hnuoi ah zieklut an ni ve thung. Mizoram state ah “The Scheduled Castes and Scheduled Tribes Lists (Modification) Order, 1956 and as inserted by Act 81 of 1971” dungzuiin Hmar hnam chu Mizoram state a dingin ST-a zieklut a nih. ST List Sl. No. 5 ah ‘Hmar’ tia ziek a nih. Hitaka khawm hin ‘Biete, Changsan le Hrangkhawl’ chu Kuki hnuoia inthangtir an nih. Nagaland state ah “The Constitution (Nagaland) Scheduled Tribes Order, 1970” hi Nagaland state-a hmang a n’a. Nagaland state sungah Hmar hi ST ah zieklut lo a nih. Kuki ruok chu a thang. Tripura state ah Tripura a khawm “The Scheduled Castes and Scheduled Tribes Orders (Amendment) Act, 1976” hmang a nih. Amiruokchu Tripura sunga dingin ‘Hmar’ chu a thang ve nawh. Hmar pahnam pakhat ‘Hrangkhawl’ chu ST List Sl. No. 9 (xvi) ah a thang ve. Arunachal Pradesh state ah “The Scheduled Caste and Scheduled Tribes Lists (Modification) Order, 1956” hi Arunachal Pradesh state-a hmang a nih. ‘Hmar’ an zieklut ve nawh. Hmar pahnam lai a mi ‘Galong’ chu a thang. Galong tia rikawt hi ‘Darlawng’ ei ti hi a nih. A kotuha’n ‘Darlawng’ an ti thiem naw lei a ‘Galong’ an ti ni awm tak a nih. Assam state ah “The Scheduled Castes and Scheduled Tribes Orders (Amendment) Act, 1976” dungzuiin Assam state-a ‘autonomous districts’ sunga um Hmarhai chu ST a zieklut an nih. Hitaka ‘autonomous districts’ ei ti chu N.C. Hills le Karbi Anglong an nih. Cachar le Assam ram hmun dang danga um (autonomous districts sung tiemsa lovin) Hmarhai chu ST-a thanglova ngai an nih. Autonomous districts sunga um nilo, traibal ST-a zieklut chu ‘Cachar-a Barman hnam, Boro le Borocachari, Deori, Hojai, Kachari/ Sonwal, Lalung, Mech, Miri le

Rabha’ an nih. Hienghai lai a ‘Kachari’ hnam hi ‘autonomous districts’ sunga um khawm ST-a ngai an nih. A danghai ruok hi chu ‘autonomous districts’ sunga ST list ah an thang ve nawh. Cachar-a Hmar inchuklai thenkhat sawrkar-a thangna zawngha’n harsatna an hung tuok tan mek. Thang ei lak vat vat a tul tak zet. Assam ram sunga Hmar um hrim hrim chu ST list a thang dinga ei ngen makmaw a nih. Ei zieklut pha leh ‘Any Hmar Tribes’ annawleh ‘Any Hmar Tribes, including Biete/Biate, Changsan, Hrangkhol, Darlawng, Vaiphei, etc.’ ti ngei ngei bawk ding. A tam thei ang tak inhuoptir thang a tih. Hi hi ei inpumkhatna, ei lien nawk zuolna ding le ei damna ding pawlisi a nih. Hi khela ka hang zepsa nuom pakhat chu Hmar hnam po povin ei tiem thei ding Baibul sut hi a nih. Chu Baibul a chun ei tawng bulpui hieng Biete tawng, Hrangkhawl tawng, Darlawng tawng, etc. hai hi zep lut pei in la. Baibul bu thar ei sut zatin zep rawn deu deu pei in la. Ei renga ta dingin a tiem inhawi deu deu pei a tih. A tawpa chu ei rengin Hmar tawng ropui le hausa tawk tak, kim taluo ringawt el, Greek tawng khawm hrilfie thei hiel ding Hmar Tawng ei hung siemsuok ding a nih. Chu ni hung tlung ding chu ei thlir zing a nih. Hi pawrawkram hi HSA, HYA, Hmar Inpui, Hmar Thalaipawl, annawleh Hmar Kohran inzawmkhawm, pakhat tak chun ro phan thei ngei ei tih. Ei unauhai khawm ei hril vawng tul bawk a tih. Inhretuoa ei thaw chun hma khawm la tlang thei ei ta. A tha hle ring a um. Iengtinam ei ngai? [C]2006 Sawrtui Monthly & [C] 2007 Hmar Resources Online