Darthlalang 4 July 2009

‘Nang Malsawmna ni ang che’

Motto: * Hun awl hmanthat * Kristian nundan tha ngaihsan * Zofate hmasawnna ngaihtuah

Provisional Permit No - 25 of 2004: Vol - XVIII

Thuvawn ‘YMA chu tanpui ngaite tanpuitu a ni’

Thupui : ‘Khawtlang Nun Siamthat’

Issue No.34 4th July. 2009 (Inrinni) :

Estd. : 24. 10. 1994 Darthlalang Chanchinbu,

Branch YMA,

Serkawn :

Kartin

Chhuak

Phek 1- na

YMATHUHLA Chanchin kan lakkhawm lai hian kan veng chhung atangin heng a hnuaia kan tarlante hi Christian Hospital Serkawn-ah an awm. 1. Pi Tlanghmingthangi Sec-I 2. Tv.Lalpianmawia Sec-V 3. Np.Remsiamkimi Sec-I 4. Tv.V.Malsawmtluanga Sec-III Dam taka an chhuah leh thuai kan duhsak e. Tunkar chhunga kan member Christian Hospital Serkawn-a thisen pete; 1. Pu F.Laltlanzauva Sec-II 2. Pu J.Lalthanchama Sec-I 3. Nl.Saihlupuii Sailo Sec-I 4. Pu T.Laltanpuia Sec-II 5. Lalsawmliana Chawngthu # Mizoram University hnuaia BA. Final result chhuakah C.Lalbiakkima s/ o Pu C.Lalnunmawia Section-IV leh Nl.Rothangpuii Sec-III te an pass a kan lawmpui hle a ni. Tin, ZD.Lalbiakpuii d/o Pu ZD.Rual-chhawnzova Sec-V pawhin Gov’t Public Girl’s College Chandigarh atangin BA 1st Div-ah a pass bawk a, kan lawmpui hle a ni. Tunah hian MA zir leh turin a inbuatsaih mek a ni. # Tunkar thawhtanni zingkar khan Serkawn Multi-purpose Co-operative Society (SMCS) kum 2009-2011 chhunga hruaitu thlanna neih a ni. Chairman : Pu C.Vanlalmuana V.Chairman : Pu C.Lalsawmliana Secretary : Pu H.Hrangchhuana Treasurer : ZD.Lalbiakchhungi Tin, Managing board member mi 3 an thlang chhuak bawk a ni. S.YMA O.B te’n inthlanhi an buaipui a ni. # Karhmasa Ningani zing khan VC.Serkawn kaihhruaina hnuaiah kan khawtlang a BPL chungkua atanga in leh lo nei lo te, in sakna dawng tur thlanna neih a ni a, Hetah hian kan khawtlanga NGO a hruaite nen an thlang chhuak a ni. # Upa VL.Ngena Sec-V chu Aizawl-ah in check-up turin tunkar thawhtanni khan an kal. # Dt.8-11,7.2009 chhung hian Ramzotlang Unit BMP te Pu K.Lalmuanawma Speaker-a hmangin Salvation Camping Biak In Hall-ah an nei dawn a ni. # Tunkar thawhlehni khan kan Pro.Staff Tv.V.Malsawmtluanga chu a rilphir C.H.S-ah an zaisak a ni.

Lawmthu: Serkawn Village Education Committee chuan Education Committee hmalak zelna atan Rs.1000/- an pe a ni. Tin, Serkawn Multi-purpose Co-operative Society (SMCS) chuan PA System Donation atan Rs 500/- an thawh bawk a ni. Heng tanpuina pe tute chungah S.YMA chuan lawmthu a sawi a ni.

Thutthleng siam hnatlang: Vawiin (Inrinni) Nileng hian Serkawn Branch YMA Executive Committee member te chuan Bazar Shed Serkawn pheiah thutthleng siam hnatlang thawh tur ani a. Executive Committee memberte tlawmngaia hnatlang thawhnaah hian kal theuh turin kan inngen a ni. Mistiri bungrua nei chuan thawhchhuahpui kan tum dawn nia.

Chanchinbu tha thlanna: Central YMA chuan Kum 2008 chhunga Branch YMA chanchinbu tha thlanna a nei leh dawn a. Kan Branch chanchinbu ‘Darthlalang’ pawh hemi atan hian kan thawn ve a ni. Chanchinbu tha thlanna a endik dan (criteria) chu hetiang hi a ni. 1. Editorial 2. Regular Feature 3. News Reporting 4. A YMA em ? 5. Layout 6. A endiktute ngaihdan.

Section-I thuhla: Karhmasa inrinni khan Section -I YMA te chuan Serkawn Signboard Zotlang penga tar tur rawnghnawih that leh Khawlai tihfai hnatlang neiin, nilengin hun an hmang a ni.

MHIP Hriattirna 1. MHIP DAY :a) Dt.6.7.2009 (Thawhtanni) hi MHIP Day a ni a, zing karah MHIP te’n BCO Compound samfai hnatlang neih tur a ni. b) MHIP Day hi chhun lamah Community Hall Ramzotlang Serkawn-ah programme hlimawmtak hman tur ani a. Zing Dar 10:30-ah tan tur a ni. MHIP member zawng zawngte he kan day hi ngaipawimawha kal theuh turin kan inngen a ni. 2. MHIP Puanthui khawl :MHIP Serkawn Branch chuan puanthui khawl 5 ( panga) kan nei a, he puanthui khawlhi a hawhdan fel taka siam a ni. Hawh duh te’n kan lo hriat-ah kan han tarlang ang e. a) Khawl hawh man thla khatah Rs.30/- zel a ni. b) Khawl hi term neiin mi pakhatin thlaruk chhung a hawh theih ang. c) A hawh hun chhung a ralin a khawl hawh leh a hawh man pek tlak nghal zel tur a ni. d) Khawl hi a hawh chhunga a chhiat chuan a siamthat hi a hawhtu mawhphurhna a ni ang. e) Khawl hi a tha-in a la chhuak anga, a tha-in a pe let leh tur a ni. f) Khawl hi President/Fin.Secretary hriatpuina chauh lo chuan a la chhuak tur a ni lo. Heng kan dan siamte hi Ni 1.7.2009 atanga hman tan tur a ni. Sd/-Lalnithangi President, MHIP Branch Serkawn

Sd/-RK.Lalhlimpuii Secretary, MHIP Branch Serkawn

Issue No.34 4th July. 2009 (Inrinni) :

Vol - XVIII

Darthlalang

Editorial Board - C.Lalbiakzuala

Editor

Mb.9862611372

Joint Editor - ZD.Lalnunmawia Mb.9436157169 K.Lalruatkima Mb.9436154185 News Editor - R.Lalbiakkima Lalbeiseia Pachuau Lalruatkima Renthlei Manager

- B.Lalhmangaihkima

Circulation Managers C.Lalbiakliana R.Lalmalsawma Production Staff Lalchhanhima Ralte David Zonunsanga K.Laldinliana V.Malsawmtluanga R.Lallawmzuala

‘Tanpui ngaite tanpuitu’ YMA chu tanpui ngaite tanpui a ni a. Tanpui kan tih hian kan rilruah, pawisa pek, In sak sak, hnatlang-a tanpui, chhiatni/thatni a tanpuihi, kan rilruah a lang lian viau mai thei. A dikna chen pawh a awm a ni. Chutihlaiin,YMA hmalakna tam takah hian ’Tanpuitu’ a nihna hi kan hmuh thelh fo thin. Serkawn Branch YMA hnuaiah hian Committee peng pawimawh tak tak a awm a. Kawng hrang hrang a kan khawtlang tan leh, mimal tinte tan a an hnathawhhi eng nge anih? tih kan hriat a pawimawh. Zau zawka kan ngaihtuah chuan ‘Tanpui ngaite tanpuitu’ pawimawh tak chu ‘Committee peng’ te hi an ni. Tanpui nan sum leh pai an sem kher lovang, mahse an hmalakna te hi kan tan vek, tun hun leh nakin hun atan a ni tih hria ila, YMA Thupui ‘Tanpui ngaite tanpuitu’ ti hlawhtlingtu pawimawh tak an ni. Kan khawtlangin zirna a hma kan sawn theih nan a kawng hrang hranga hma la tu Education Committee te hmalakna te hi, a va pawimawh em? kan sawi vek seng lovang. Sanitation Committee hmalakna te pawh; Relief, Library, YMA chhang, Property, P.A, Ruihhlo Do Co-Ordination Committee te an hmalakna sawi vek lo mah ila, thil tha, kan mamawh hun a pianga tanpui vartu hnai reng an ni tih i hre thar leh ang u. A tawp berah chuan YMA hnuaia Darthlalang Committee hmalaknain Darthlalang chanchinbu kartin tihchhuah a ni a. He Darthlalang chanchinbuah hian a duh apiangte tan, kan khawtlang hmasawnna kawng hrang hranga, kan vei leh kan ngaih pawimawh, kan duh zawng infiamna, rimawi, hriselna etc. te chhuah thin ila, “Darthlalang chanchinbu” kal thlang hian YMA thupui ‘Tanpui ngaite tanpuitu’ tihlawhtlingtu pawimawh tak kan ni theuh thei ang.

Chanchinbu,

Branch YMA,

Serkawn :

Kartin

Chhuak

Phek 2 - na

KOHHRAN PROGRAMME Karleh chhunga BCM Serkawn leh Ramzotlang Programme tlangpui chu hetiang hi a ni. BCM Serkawn : Upa V.Lalrinmawia (Chairman) Rev.F.Sangvela (Thusawitu) Pathianni zan : Upa Pc.Rochungnunga Thawhtan zan : TKP Inkhawm Nilaini zan : Upa Rodawla Inrinni zan : Upa LT.Muana BCM Ramzotlang, Serkawn Pathianni zing : Upa F.Lalhnuna Pathianni zan : Rev.Dr.CL.Hminga Thawhtan zan : TKP Inkhawm Nilaini zan : Camping Speaker Inrinni zan : Follow-up Programme Pathianni zing

Serkawn BMP Fellowship Prog. Missionary Sunday pualin Kohhran pumhuap Fellowship neih anih dawn avangin a hranpain S.BMP te’n fellowship neih a ni lovang Ramzotlang BMP Fellowship Prog. Missionary Sunday pualin R.BKHP te nen Joint Fellowship Community Hall ah neih tur a ni.

‘Engnge ni i hming awmzia ni le?’ I hming a thumal awm te kha han zawng chhuak la chumi hnu chuan han zawmkhawm teh le,a hma a i la hriat ngai hauh loh, i hming awmzia chu hriattirin i awm dawn a ni. Saptawng thumal atanga lak anih avangin Mizo tawng chuan a dang deuh mai thei. e.g.Mami chu M=Mi hlawhtling hma,A=rilrua thil vei neih chuan ngawi thei mi tak,I=A changa thinchhe mi tak a ni.tihna a ni.I hmingah hawrawp in ang a awm chuan a chunga mi ang khian, M pahnih awm ta se..chutiang zelin... A- I rilru a thil awm emaw vei bik riau i neih chuan i ngawi thei hle ang. B- Hmelthar nen a in in tawn changin mi fimkhur tak i ni thin. C- Tih pui vel nuam tih riauna nangmahah khan a bet tlat a,chu chu lan chhuah pui zak suh. D- Mi chunga rinna nghat thei lo mi tak i ni. E- Mi phur thei tak i ni. F- Mi zawng zawng ngainat leh hmangaih i ni. G- Mi hriatthiamna ngah tak i ni. H- Mi thil tih dik loh leh tihsual vel lo tihdik sak (judgemental) ngai miah lo i ni. I- A chang chuan i thinchhe ve hle thin. J- Mi itsikna ti na tak i ni. K- Thil thar lawm tak i ni. L- I tan chuan hmangaihna hi thil hriatthiam har tak a ni. M- Mi hlawhtling hma tak i ni. N- Hnathawh nuam ti mi i ni a,mahse,hnathawh laia chawlh duh fo mi ni bawk. O- Mi rilru zau tak i ni. P- Mi hriatthiamna nei lo tak i ni a,nangmah chauh in dah pawimawh mi i ni. Q- Mi verther tak a langa that tum mi (Hypocrite) i ni. R- Khawtlang thil tihna ah mi in hmang tak i ni. S- Mi rilru zim tak i ni. T- Thil tih tumna lian tak nei mi i ni. U- Mi dangte tluk tum ve zel mi i ni. V- Mi frank tak i ni. W- Mahni a awm cheuh cheuh nuam ti mi i ni. X- I thil tih turah mi dangte thurawn i la ngai lo. Y- Buaina i siam thei hle. Z- MI dangte tibuai reng mi i ni.

Vol - XVIII

Issue No.34 4th July. 2009 (Inrinni) :

Darthlalang

Chanchinbu,

S.M.R. TITI (KA HMANGAIH RENG ANG CHE) Ruata.(4 Cabin).Sec IV “Tuahpui leh vau an vul hunah” tiin duhthu kan lo sam ve a; mahse,hun liam chak tak mai chuan hriat loh karin tuahpui leh vau vul hun pawh hre chiang hman loin kum chanve hmel min hmuh tir leh ta reng mai. Nikir thla kan han chuan kai meuh chuan hringnunah bung thar kan kai a. A themthiam deuh kan U R.Tluanga te chu chhangchhe pa an ni dawn ta reng mai.(Mr&Mrs Tluanga te ka lawmpui a che u,fanau maltluan chawiin,khup thum hmuin dam mawlh rawh se). Tlangval charms ngah, Tv David-a pawhin,semi final a thlen takah chuan final thlen ve thuai a tum niin a sawi bawk a. Kan naupan laia tlangval ni tawh,tun thlenga a hming hmaa TV title dah la ngai,Tv U Bt-a pawhin amah chauha a khumlaizawl luah rei a tum tawh loh thu a sawi ve bawk. Kawr phelh meuhin a sawi a,a thusawi hi tisa ah chantir thei tak ang maw.... Hun hian tui lian angin min len bawk mahse,BCM rama nipui sikul chawlh laia raldo nunchan kan zir laite kha kan hriatrengna ata hi a len bo ve thei chuang hauh lo. Kan inbihruksiak laia,(tuna) Tv Hmingchhuana (Sec IV) ka phuar ngheh avanga a trah vakte,Tv Fakte-a (Sec IV),vawihuih hrui ka thrial tir te kha mitthlaah hian a cham reng thin. Khang thil thleng avang khan, hun hian, kan hriatrengna ata hi a thai bo thei lo a ni. Heng thil thleng piah lama min hriatreng tir tu zawk tak chu,kan chettlatna ram,BCM ram hi a ni. He BCM ram zet hi chu kan veng tan hi chuan a hluin kan veng tan hian hmun pawimawh tak pakhat a va ni chiang em. Kan veng tana malsawmna tam tak thlen tu anih ziate hi i lo ngaihtuah ve ngai em? Chhuak hmasa lamahte pawh,he ram leh kan venga thing hmun leh thingte humhalh tur a thahnemngaite au aw kan hmu thin.Kan veng tana an pawimawhzia leh an tangkaizia hre tu tan chuan hmangaihna thinlungpua “Ka hmangaih reng ang che’ tih hi thil tih awm reng a ni a sin.Veng dang ami te’n, ‘In veng chu a nuamin,a boruak te a thiang nuam si”an tihna chhante pawh hi,a cheng a te kan hmaifang a fuh vang chu a ni teh meuh mai, mahse,a chhan bulpui ber zawk chu eng dang vang ni lovin, BCM rama thing a la tam vangte,thing hrim hrimah kan veng kan la hausak vang a ni. Tun ang hian thing leh thing hmun hi tam lo se chuan,khawvelin global warming a buaipui tlut tlut lai hian kan veng dinhmun tur pawh hi ngaihtuah zui tham tak a ni ang. Hmasawnna in a la tichingpen lote pawh hi a lawmawm ngawt a sin. Economist ho chuan, “Hmasawnna dai khat dai tur chuan kan thil neih pakhat kan hlan a ngai thin”an lo ti a, mahse hmasawnna avang chuan, kan veng tana ngawi renga hna hahthlak tak,kum tam tak lo thawk tawh tu te,thing leh thing hmunte hi i hlan lo ngam thin ang u. Hmasawnna rahbi kan rap dawn anih pawhin kan thing leh thing hmunte ti chereu lo zawnga rahbi rah ngam hi veng fing nihna a ni ngei ang. Theih ni se, Tv Rempuia te (Sec IV) angin hmangaihna thu han chhamphual thiam i la chuan, lo thik tawk tur an awm tih pawh hre chungin,an hna thawhthat avangin kan venga thing leh thing hmunte hi ka hmangaih thu ka chham khum ngei ang. Amaherawhchu, mi tih leh zawh angte hi a bi kimin a zawh theih si loh. Mahse,mitin hian kan phak ang tawkin tih theih kan nei a,a tha thei ang ber a, kan beih chuan rah tha a chhuah bawk thin. Chuvangin keini pawh hian, hmangaihna thinlung pu a, “Ka hmangaih reng ang che” ti chungin kan venga thing hmun leh thingte hi kan phak ang tawka a tha thei ang bera humhalhin,i enkawl zel ang u. Hei hi, Serkawn Mi kan nihna anga kan hlenchhuah tur chanvo pawimawh tak,kan ko a innghat a ni.

Branch YMA,

Serkawn :

Kartin

Chhuak

Phek 3 - na

Issue hmasa chhunzawmna ELEMENTARY LEVEL-A EDUCATION QUALITY THLAKHNIAM CHHAN (A Dicussion at BRC Tlabung Block) 2. Naupangte: a) Complex nei an tam; an uniform te, school bag & accessories hrang hrang te an neih chhiat vangin. b) An thatchhe ve hrim hrim. c) Malnutrition vanga rilru chaklo an awm thei. d) TV, Vedio/Computer games ,etc. an uar lutuk. e) Home work tih chungchang etc-ah te nu leh pa leh hotute thu awih lo hrim hrim an awm. Note: Naupangte hi chu kaihhruai tur an ni a, mawhphurhna tak tak chu puitlingteah a innghat lian zawk tih hriat reng tur a ni. 3. Society-ah Competitive Spirit a awm lo: a) Naupangte zingah inelna rilru pu an tlem. b) Khawtlang leh Kohhran etc programme tam lutuk karah naupang zirna kan ngaihthah fo. c) An zirna pui thei tur programme (eg: Quiz, Spelling Bee, etc) siam sak an ni ngai meuh lo. 4. Courses & Curriculum:a) Naupangin a zawh loh tur subject thenkhatah telh ang a report a ni. b) Naupangte tuipui miah lo tur tih chiang sa zirlaibuah, a bikin Lit. subjects- Mizo, English etc-ah a awm ni a report a ni. c) Text bu thenkhatah Lesson a tam mah mah niin zirtirtu thenkhat ten an sawi bawk. (Lesson Plan tha tawk a buatsaih nena manage theih chin chauh siam thin ni se) 5. School Building etc. (Environment Friendliness): a) School tam zawk chu a building sak dan leh rawng hnawih-te naupang tana ngainat awm a ni lo. School kal chakna an neih theihna tur a hmalak a tul. Maintenance fund hman tangkai ngei ni thin sela. b) Co-curricular activities an nei khat a, tihpui tha peih school an vang. c) Location dik tawk lo a tam. Ri bengchheng tamna te, awihpang chhengchhe lutuk te, etc. d) Plantations (thingkung, pangpar, etc) nei tha an awm tlem. 6. Mipui moral a hniam: a) Quality aiin Mark Sheet kan ngai pawimawh a, quantity kan thlahlel zawk bawk. b) Intensive study aiin cramming system a hluar. chhunzawmna tur

VolVol - XV Issue No. 2 .3rd November , 2007 (Inrinni) - XVIII Issue No.34 4th July. 2009 (Inrinni) :

: Darthlalang Darthlalang Chanchinbu, Chanchinbu, Branch BranchYMA, YMA, Serkawn Serkawn : : Kartin Kartin Chhuak Chhuak Phek Phek4 -3-nana

KHAWTLANG TANA MI TANGKAITE - Rinkima Pa

Tawng upa : - R.Hmingliana

Khawtlangah hian mimal tinte hian tangkaina kan nei theuh a. Amaherawhchu, khawtlang tana tangkai rau rauvah a nawlpuiin kan thiamloh leh kan tih remchang vek lem lo pawh awm thei a ni. Chhiat that nikhua leh hun danga kan khawtlang tana mi tangkai thenkhatte tuntum chu in thailang ve hrim hrim teh ang :Mistiri : A bik takin khawtlangin chhiat kan tawh nikhua hian heng mite hi an tangkai hle. Kuang siam leh thlan siam hi mahni chanpual ang maia ngaiin khawtlang hmel an timawi thin a ni. Anni hi nitin hlawh chawpa eizawng an ni a, chuti chung chuan khawtlangin kan mamawh hunah an tlanchhe ngailo a ni. Lirthei neite : Chhiat kan tawh apianga a tul ang anga hman tur lirthei thawh chhuahpuitute hi an hluin lawmthu hrilh an phu khawp mai. Tlangau : PA. System hmanga tlangau thinte hi khawtlang tan an tangkai hle bawk a.Tlangau ngai kan pek khawm chi hrang hrangte min au sak nghal zar zar hi thil hautak leh buaithlak tak a ni ve tlat mai. Anmahni remchan hun nilo, au a tul huna au mai tur hian tlawmngaih chhuah a tul hle a, mipuite pawhin an dinhmun hi kan hriatpui a tul hle a ni. Furniture Worshop nei tute : Tunhma a thinga thlan hung anih lai khan kan khawtlang thingzaina khawl neitu te hian a thlawn vekin min zai sak thin tih kan hre tawhlo mai thei.Tunah chuan thlan hung ni tawh lo mahse, kuangsiam hian atul angin Furniture worshop neitute hian a thlawnin, an hmun hmate leh khawlte phal takin min hman tir thin a ni. Tam tak chuan kan hre lo mai thei a ni. Heng mi te hi kan tangkaipuiin kan samkhai phah hle a ni

MAU TAM LEH THING TAM CHUNGCHANG Kum 50 danah mau a tam lova, kum 48 danah a tam zawk thin. Kum 48 danah a tam zawk thin. Kum 48 dan tih awmzia chu, a kum 49-na zelah tihna a ni. Hmanlai ata mizote thil sawi dan hi, ‘a chiah chiah’ a ni ngailo hle a, ’a veltham’ in tih kan sawi thin. Buh neih zat sawi nana phur kan tih pawh hi, khawnvartui tin a lo chhuah hma kha chuan a inzat vek hauh lo. Chhip zawn/kakzawn/silai zawn ete kan tihte pawh inanglo tak an lo ni. Vawk len zawng sawina sum 5/6 kan tihte pawh, a sumtu pa len leh tet azirin a dang thluah mai a ni. In kan sak dawn pawhin, a dung lam hlam 7 a vang lam hlam 3 tih vel kha kan sawi dan a ni leh mai. Tu hlam nge tih a awm lova, a neitupa hlam kha rin tur a ni mai. Chutiang chiah chuan Mau tam chungchang Pawhhi, “kum 50 danah” kan ti awlsam mai thin niin a lang. Khaimah aw :

Pu. Zorema’n a ti.... Vawikhat chu mi pakhatin, Pu.Zorema bathlara khuai awm chu lak a duh thu a hrilh a. Pu. Zorema erawh chuan heti hian a chhang a ni. “Ramhnuai leh hmun dangah awmna tur tamtak a awm laiin, ka bathlarah an rawn awm ve a ni a. Chuvangin, thlamuangtakin heti hian awm ve mai rawh se” tiin. Nikum khan BHSS Hall bathlara khuai awm chu tute’n emaw an la tawh a. Kuminah hian YPC Hall luhkapui leh a char lamah khuai an lawi leh tlat mai, a vanneihthlak hle mai. Heng khawibu pahnihte hi an rauh thlenga kan zuah thei anih chuan, Serkawn hi mihring chen nana hmun nuam takah kan duang chhuak mek tihna a ni ngei ang.

MALSAWMTLUANGA MELTE SERKAWN tih inziak lehkhathawn dawn a ni a. Hemi address hria leh ni chuan Darthlalang Editor hnenah July ni 5 hmain lam theih a ni ang.

Darthlalang man Tun tum hi Darthlalang man khawn hun a lo ni leh ta. Agent te’n A man khawnna bu nen fel takin a man hi khawn turin kan inngen a ni. Tin, June thla a Darthlalang man kan hmuh zat chu Rs.3100/- a ni.

Mizote chhut hlat theih hla berah chuan, 1863-ah mau a tam a. Mau tam kum: 1863, 1911, 1959, 2007, 2065 Bihchianna :1863+48=1911 1911+48=1959 1959+48=2007 2007+48=2065. Hetiang zel zelhi thing tam dan pawh a ni. Mau tam atanga Kum 18-naah thing a tam thin. Entirnan : Mau Tam Thing tam 1863+18 = 1881 1911+18 = 1929 1959+18 = 1977 2007+18 = 2025

Lehkhathawn neitu hriat loh

Darthlalang ti ti ‘Serkawn Ka Serkawn’ kan tih hian kan rilruah thiamna sang zawk leh nei nung zawkte kutah leh tih turah kan dah palh a nge ? KAN ‘Khawtlang tana mitangkaite’ kan ni thei theuh a ni. SMS-a thutha pui pui thawn thin pawhin, chanchinbu-a chhuah meuh tur chuan, thuziak kan huphurh leh deuh thin. Mi thuziak atang te hian ‘Eng nge hlawkpuina ka chharchhuah theih ang’ tih rilru pu chungin chhiar thin ila, hlawkna pakhat tal i chharchhuah ngei kan beisei e. BCM Compound-a rulngan bu la awm te hi a hlu ve tlat, hrethiam em ?? ‘Darthlalang ti ti’. ‘ Hmasawnna chuan harsatna a keng tel thin ‘A thatna leh a tangkaina anih dawn chuan, a harsatna sut kian dan kan zawn tlan a pawimawh fo.

Published and Edited by C.Lalbiakzuala for and on behalf of Branch YMA, Serkawn : Printed at BPP Serkawn ,

500 Copies