Pendones-Picu Tiatordos-Collau Capiella-Pendones Nel pueblu casin de Pendones (782 m.), garramos la carreteruca que sal al NE, pela manzorga del valle del Riu Pendones, soslayando dos desvios a la manzorga y cruzar un regatu hasta cruciar per un ponte el riu Faya; al pocu garramos una desviu a la manzorga, que sube en vueltes pasando pola mayada Sen de la Vara; agora'l camin faese llanu alcontrando la mayada La Palombar (1060 m.), onde'l camin sal a la izquierda y metese en la Foz de la Palombar; esguilando pela senda salimos al mayau'l Plaganu (1320 m) con cabanes esfarraplaes y fonte. El pindiu camin sigue monte arriba, faciendo amplios zigszags hasta atopanos el mayau Tiatordos (1540), onde ya güeyamos perguapos paisaxes. Pa subir al Tiatordos vamonos un pocu a la manzorga p'arrodiar el roquedu, y esguilar pola caliza hasta algamar la picorota del maxestuosu Tiatordos (1951 m.), coles meyores güeyaes de la Cordillera Cantabrica. Baxamos, empobinandonos al O, dexando'l mayau Tiatordos a la manzorga, y manteniendo'l sentiu hasta'l mayau Piedrafita (1550 m.), garrando'l camin inferior hasta Bormanfoyu; seguimos caminando a media lladera Sur del Picu La Carrasca hasta'l collau Capiella (1438 m.), otru sitiu pergüapu. Dirixiendonos pal Sur atoparemos el mayau'l Juacu (1290 m.), onde colamos pela manzorga, baxando per un frondosu bosque hasta les cabanes de la Quemada (955 m.), pa poco dempues llegar a la parte alta del pueblu de Pendones, onde finiquitamos esta clasica ruta montañera. Recorriu : 16 kms. Subida : 1.170 m. Baxada : 1.170 m. (Datos aproximaos)