Mental Health

MENTAL HEALTH

-C.Lalnuntlinga (Manuna)

‘Mental Health’ han tih hian a huam zau thei angreng viau mai a. Mizo \awng chuan, Rilru Hrisel emaw, Rilru Kim tihna emaw a ni thei awm e. Chutih rualin Mental Health tih hi tun thlengin khawvelin a pawm tlan theih tura hrilhfiahna a la awm lo a ni an ti! Chutiang khawpa awmze ril, pawimawh em em si chu a ni. World Health Organisation (WHO) chuan Mental Health tih chu,“Mihring tungchova kalte nuna thil thleng leh inthlakthleng tinreng karah, keimahni leh kan chhehvela mihringte leh thil dangte nena inremna leh inlaichinna dik vawn him zel theih nana rilru hrisel/kim neih fo hi a ni,” tiin an lo hrilhfiah a ni. Fakna hla siamtu chuan, “Fak zai vawr rilru thianghlim, a mawi tuktin par aiin,” a lo ti hial a! He hla phuahtu hian rilru thianghlim leh hrisel chu tuktin par aia mawi ni hialin a sawi. Rilru thianghlim leh hrisel chu siamtu tân pawh hmuh a nuam a, mi dangte tâna harsatna siamtu ni lovin malsawmna thlentu a ni zawk \hin tihna a nih chu. Khua leh tui \ha ni tur chuan mi rilru dik leh hrisel kan nih a ngai a ni. Mi rilru hrisel chu a nun dan a dik a, mi dangte tân malsawmna a ni ngei ngei \hin. Mi dangte harsatna siam a duh ngai lo va, a nun a uluk a, in\henawm khawvenna thuah pawh harsatna siamtu a ni ngai lo. Kohhran leh khawtlang tân malsawmna a ni a. Rilru dik leh thianghlim a put miau avangin mite ngainat leh nel a hlawh a. Ama hma sial takin thil a ti ngai hek lo. Mi rilru hrisel chuan a \hatna aiin mi dangte \hatna tur a ngaihtuah tlat avangin mite fak pawh a hlawh hle reng a ni. Hriselna lama mi thiamte chuan taksa damna ringawt hi hriselna-ah an chhiar lo. Hriselna dik leh famkim nei tur chuan, taksa, rilru leh thlarau a dam a ngai a ni an ti. Taksa dam mah se i rilru a dam si loh chuan hrisel i la tling lo va, i rilru hlim mah se i taksa a dam si loh chuan hrisela chhiar theih i la ni ngawt lo. Chuvangin taksa, rilru leh thlaraute chu pumkhat an ni a, \henhran theih an ni lo. Mi hrisel pang chu a dam ngei a, hlim pawh a hlim \hin. Harsatna leh buaina a tawh pawhin huai takin a hmachhawn ngam a, sukianga chingfel turin chakna leh theihna pawh a nei a. A vuivai lo va, mi dangte khawsakpui a thiam a, mi dangte tân a \angkai \hin. A thlarau nun thlenga a ngaihtuah \hin avangin a nun a vawng uluk em em a, amah mai ni lo, a chenpui leh mi dangte nena khawsa ho thei turin a nun a hmang a, rilru fim tak a pu a. Chutiang mi chu a ni Mi Hrisel dik tak chu. Damna kim nei tur chuan taksa rilru leh thlarau a dam a ngai tihna a nih ber chu.

Taksa natna leh hrisel lohna te hi chhan hrang hrang a awm thei a. Ei chhiat vang te, natna hrik vang te, kan vela thil thleng leh taksa khawl fel loh vang tein a damloh theih a; chutiang chiah chuan rilru pawh a dam lo thei a, chhan hrang hrang hrang avangin rilru natna (Mental Disorder) chi tam tak a awm thei a ni. Rilru dam lohna hi taksa dam lohna ang em chuan ngaih pawimawh hlawh lem lo mah se nghawng erawh a nei nasa thei hle thung a ni tih erawh kan hriat reng a \ul a ni. Mizote hi mi chanchin a chhe zawnga sawi te, mi rel leh an chanchin \ha lo lai sawi nuam ti tak mai kan ni a. Mi fel leh \ha tak nia lang pawh an chanchin \ha lam aiin a chhe lam sawi nuam kan ti fo \hin. Hetiang hi mi rilru hriselte awm dan chu a ni thei lo vang. Mi dangte rel ngai lo, mi chanchin a chhe zawnga sawi ngai lo, mi chanchin a chhe lam aia a \ha lam sawi nuam ti mi, mi dangte tâna malsawmna nih tum tlat mi; mahni hma sial taka thil ti ngai lote hi mi rilru dik leh hriselte zia chu a ni zawk a ni. Bible chuan, “Rilrua khat liam chu kain a sawi \hin a ni,” a ti a. Kan rilrua put hmang leh awm dân azirin kan nun dan pawh a danglam \hin. Mi rilru dik lo tân nun dik theih a ni lo va, mi rilru dik leh hrisel chu an nun pawh a dik \hin avangin, Doctor-te chuan taksa hriselna an ngaih pawimawh ang thoin rilru hriselna pawh an ngai pawimawh reng a ni. Mihring rilru hriselna a pawimawh rualin rilru hrisel lo pawhin mihringah harsatna nasa tak a thlen thei a. Rilru hrisel lo han tih hian chi hnihin a \hen theih a. Pakhat chu mi â kan tih mai ang hi an ni a. Chutiang mi chu chenhopui pawh an harsa hle a ni. Chutih laiin \henkhat thung erawh chu mi â tia han chhal tur ni em si lo. Han en thuak pawha mi pangngai ang chiaha nungte an ni thung a, han belchiana mi pangngai an nih lohna hriat theih chauh te an ni thung a. Hetiang ang harsatna neite hi kan chhungkua-ah an awm a nih chuan chhungkua a hlim thei lo va, chhungkaw nun a buai \hin a ni. Chuvangin rilru lam harsatna hi chhungkaw tin chunga thleng thei a nih avangin ngaihtuah ngun pawh a ngai hle reng a ni. A pakhat zawkte erawh chu chu mi pangngai rilru pu, mahse rilru put hmang dik lo tia han sawi theih turte an ni thung a. A enga pawh ni se heng zawng zawng hi rilru hrisel lo chuan a huam thei vek awm e. Chuvangin rilru lam harsatna neite hi hmuh hmaih chi an ni lo va, chhungkua leh khawtlang nunhona kawnga harsatna thlentu an nih fo avangin ngaihthah chi an ni hek lo. Rilru lam harsatna nei (Mental Disorder) hi chi hrang hrang tam tak a awm a. World Health Organisation buatsaih, International Classification of Disease-10 (ICD-10) hi pawm tlan ber a ni a. Europe-ah phei chuan hei hi hman tlanglawn ber a ni an ti. Chung zingah chuan, Organic Mental Disorders-Thluak natna leh dik lohna vanga rilru buaina te, Mental Disorders due to Substances Use-Ruihhlo hman avanga harsatna leh buaina te leh chi dang tam tak a la awm a ni. Heng chhan dang avanga

rilru buaina leh harsatna te hi buaina tham a ni a, chhungkua leh khawtlanga buaina leh harsatna thlen \hintu a nih avangin ngaihthah chi rual a ni lo. Chuvangin Rilru Hriselna hi khawvelin a ngai pawimawh em em a, India Sorkar pawhin a ngaihthah lo. Kum 1964 a\ang khan India ramah hian rilru kim lote dinhmun enfiahna neih \an a ni a. Kum 1980 thleng khan khawpui 6 vel dinhmun chu vawi eng emaw zat enfiah a ni a. Pondicherry khawpuia mi chhe veng (Slum) chu kum 1964 khan enfiah a ni a, mi za zela 1 chu rilru kim lo an ni a. Kum 1975 khan Calcutta khawpuia mi chhe vengah chuan mi 100 zela 10 chu rilru kim lo an ni tih hmuhchhuah a ni bawk. Tin, kum 1980 kum khan Amedabad khawpuia mi \ha vengah chuan za zela mi 5 vel chu rilru kim lo an ni. Hetiang taka rilru hriselna hi a hlut avangin ram changkang leh chinchang hria apiangin an ngai pawimawh a. India ram pawhin kum 1767 daih tawh khan rilru kim lote dahkhawmna (asylum) a lo nei tawh a. He mi hnu hian India ram khawpui hrang hrang, Bangalore te, Madras leh Varanasi-ah te rilru lam harsatna neite enkawlna hmun a lo din tawh nghe nghe a ni. Kum 1905 hma lam kha chuan heng rilru lama harsatna neite hi civil sugeon kutah a awm \hin a. Amaherawhchu Lord Morley, Secretary of state for India rawtnain rilru kim lote hi a bika enkawl turin rilru doctor kan tih mai-Psychiatrist kutah dah a lo ni ta a ni. Kum 1981 a lo her chhuah meuh chuan India ram pumah Mental Hospital 42 lai kan lo nei ve ta der mai! Khum pawh 20000 chuang zet a awm a. Heng bakah hian Damdawi In pangngai, Psychiatric Department hawnna khum 15000 vel a awm bawk a ni. Amaherawhchu India rama mipui kan tam dan leh rilru lam harsatna nei kan tam dan ngaihtuah erawh chuan hmasawnna tur erawh kan la nei tam hle niin a lang. Khawvelin hma a sawn zel a, Aizawl Civil Hospital-ah pawh kum sawm vel kalta a\ang khan Psychiatric Deparment kan nei ve ta reng mai! Tunah chuan rilru lam harsatna lama mi thiam bik (Psychiatrist) pawh kan nei nual tawh a ni awm e. Kawng hrang hrangin Mizoramin hma a sawn a, rilru lama harsatna neite tân pawh kawng thar a inhawng zel hi hmasawnna ropui tak a ni tih loh rual a ni lo. Rilru kim lo han tih hian kawng tinrenga rilru pangngai pu pha lo leh ruihhlo ngaite pawh a huam tel bawk a ni. Rilru hrisel lo hian khawtlang nunah nasa takin rah \ha lo a thlen thei a. Ram leh hnam tân harsatna a thlen thei bawk a ni. Tuna kan sawi tur, rilru hrisel lo leh rilru put hmang dik lo te erawh hi chuan hlemhletnate a hring chhuak a, eirukna leh duhamna dik lo taka thiltih te pawh hi rilru hrisel lo rah chhuah vek a ni.

Rilru hrisel lo chuan thil \ha lo tam tak a hring chhuak \hin a, chung zingah chuan ruihtheihthil leh ruihhlo tih duhna hial a thlen \hin. Tin, nupa nun buai leh in\henna te, chhungkaw kehchhia te pawh hi rilru dik lote ze \ha lo tak pakhat chu a ni. Chu mai a ni lo, hurherhna leh nun kawng dik lo zawh duhna nei a, KS te, mawngkawhur leh hmeichhia leh hmeichhia inngaihzawnna te pawh hi rilru hrisel lo hrin chhuah vek a ni. Nun beidawnnna leh tualthah duhna te, mahni nuna pawh zah zo lova mahni intihlum duh hial khawpa rilru beidawng min puttirtu pawh hi rilru hrisel lo a\anga lo piang a ni. Sawi hmaih hauh loh tur chu, mi rilru hrisel lo chuan duhamna leh rualawhna dik lo an neih tlat avangin ruk ruk pawh an hreh lo va, pawisak an nei hek lo. Ram leh khawtlang tân mi hnawksak an lo ni ta mai \hin a ni. Chung zawng zawng chu rilru hrisel lo hrin chhuah vek a ni a, a tawi zawnga sawiin ‘Sual tinreng bul chu rilru dik lo leh hrisel lo hi a ni,’ ti ila a dik ber mai awm e. Dik chiah chuan rilru hriselna hi taksa hriselna aiin a hlu zawk a ni ti ila a kan uar lutukin a rinawm lo. Taksa hrisel lo chuan ama chungah chauh harsatna a thlen a. Chutih laiin rilru hrisel lo leh thianghlim lo erawh chuan ama chungah mai ni lo, chhungkua, khawtlang leh ramah harsatna a thlen thei a, a tawi zawnga sawiin, ‘khawtlang tâna mi hnawksak, ram leh hnam hmelmate hi rilru hrisel loin a hrin chhuah a ni,’ ti ila a dik ber awm e. Mi rilru hrisel lo chu ram leh hnam tân anchhia a nih theih laiin mi rilru dik leh hriselte erawh chu ama tân malsawmna a ni phawt a. Chhungkuaa a chenhopui ten a rah an tel a, ram leh khawtlang tân malsawmna a lo ni ta \hin a ni. Chutih rual erawh chuan Mizoramin Mental Health hi eng ang takin nge kan mamawh a, Mizote hi eng ang taka rilru hrisel lo nge kan lo nih tih erawh kan ngaihtuah ngai lo mai thei. I han zirho teh ang: Mizoramah hian mihring kan tam lo va. Kum 2001 chhiarpuia a lan danin Mizoramah hian mihring maktaduai khat pawh kan la tling lo. Chutih rual erawh chuan nun kawng dik lo zawh kan tam em em a, hmeichhiatmipat kawnga nunkawng dik lo zawh te, ruihtheihthil avanga harsatna tawk te, rilru lam harsatna neite kan tam hle mai. Heng thil mai pawh hian rilru hriselna lam inzirtirna \ha kan mamawhzia chu a lantir thei awm e. Kan chanchinbu kawma kan poster dah duhzawng te hi a va han thianghlim ta lo em! Lehkhabu ziaktu tam takte pawh an fihlim bik lo! An sawi danin, ‘A kawma thlalak sexy deuh dah hian lehkhabu/chanchinbu hralh a tinuam’ an ti. Ngaihtuah a va han tithui tak em! Sum hmuh theihna a nih chuan a thianghlim em? A dik em? Mi tân a \halo em? Tih ngaihtuahna hi Zoram mi tam takte chuan kan nei ta lo. Hei hi a ni Moral Corruption chu!

CD library-a i luh chuan Film chi hrang hrang hawh tur tam tak i hmu ngei ang a, blue film, action, comedy leh love story chenin. Mahse Pathian thu lam hawi film erawh chu film dang a tam dan ngaihtuah chuan khawvar lam arsi tluk zeta vang zuk ni tlat a! Dawr neitute dem ngawt chi a ni lo, a chhan ni zawk chu hetiang Gospel lam hawi film demand a awm tawk lo vang a ni mai. Eng vangin nge kan duh loh? Kristian ram ka ni lawm ni? Kan Bible-in, “A nilo lamah an pêng ta vek a” a tih kha a va dik tak em! Zoram mipuite hi kan rilru a dik tawh lo a ni! A nih leh engati nge Aizawla kan Cyber Cafe te hi uluk taka pindan (Cell) nei thlip thlepa kan tih tâk vek mai? India ram khawpui danga Cyber Cafe-ah te chuan Mizoram anga pindan siam khip khep hi compulsory-ah chuan an dah ve lo niin a lang! Kan website en duhzawng te hi a va han bawlhhlawh tak em! Hei hian hmeichhiat-mipat kawngah humsual dai duhna nasa takin min pe a, hur sualna kawngah nasa takin min hruai lut mêk niin a lang. He thilah pawh hian Kristian aiin Kristian lote hi an thianghlim zawk a ni mai lo maw? Aizawl khawpui veng \henkhat, veng chengker leh chengker lo deuhah te i kal chuan kawng kamah, ‘Helai hmunah hian Bawlhlawh paih phal a ni lo’ tih intâr i hmu \euh ang. Mahse chung hmunah chuan tharlâm tak taka bawlhlawh paih erawh a ni lawi si! He thu, ‘Bawlhhlawh paih phalloh’ tih hi notice tlanglawn ber pakhat, mahse zawm hlawh lo ber te zinga mi ni hial awm e! A hmunah thil kan ti lo a, a hmun loah thil kan ti a, a hun leh hun lo pawh kan thliar hek lo. Kan office hnathawktute pawh an dik ta lo, tlai taka kal leh hma taka haw tum an va han tam ta em! Pute awm loh hre rana haw hmât theih \um hlah ngai miah lo leh, mahni ta anga en thei lo sawrkar hnathawk Zoram hian a hring tam lutuk ta a ni! Engtikah tak kan sawrkar hnathawkte zingah hian chawlh lâk recommend te hi ngai ve thei tak ang maw? Kan Director leh Officer \henkhatte eiruk chauh hi em ni kan sawi kan sawi dawn? Mahni theih chin china eiruk hnial lo kan ni ve tho lo maw? Kan rilru hi a kal sual tawh a, heng a\ang mai pawh hian rilru hrisel kan mamawhzia chu a chiang awm e. Sawrkara hna leh ham\hatna hmu tura tihpuitu hmu leh neite kan sawisel a, ‘a Fair lo’ kan ti \hin. A dik e, a fair tih rual a ni lo. Mahse Zorama mi tam zawkte hi chuan chutiang ang tithei dinhmuna kan din chuan, ‘Mite tih dan a lawm’ tiin; ‘Hlauh taka’ kan ti lehlawi si! Khawiah nge dikna hi a awm tak? Kan rilru sukthlek hi a va han dik lo thui tawh tak em! Zirtirtu tam takte pawh hi an dik ta lo. Private kan nih lai leh sawrkar hnuaia kan thawh laia kan result leh kan awm dan te hi a inthlau lu deuh a ni. Hei mai pawh hian kan rilru dik lohzia chu a lan tir awm e. College lecturer-te hlei hlei hi asin sawi kai, chhan awm mumal loa class la peih lo leh chawl tawp tawp \hin te, zirlaite hmangaihna neih miah lova hlawh hmuh nan chauha thawk \hin zirtirtu hi Zoram hian a nei tam lutuk tawh a

ni lo maw? Zirtirna a tui si lo, hlawh laka tui hle si hi ‘Phung velh’ an sawi ang maiin an la pung mêk zel si..! Zirlaite pawh kan dik chuang lo. Zirlai kan nihna kawnga kan mawhphurhna kan hlen chhuak lo fo. Exam hall-a kan awm dan pawh a dik lo deuh lo maw? Sumdawngte pawh hi an dik ta lo. Uchuak taka hlep tumna rilru te hi Pathian thu nen hian a inkalh mai lo maw? Zoram hian dik taka sumdawngtu kan va han mamawh ta em! Duhamna hian min va han eichhe nasa tawh tehlul em! Hausak thut tumna leh dik leh diklo pawh thlu lova hlep tumna pawh hi corruption hi chuan a huap vek si a. Chumai a ni lo, Sales Tax leh VAT te pawh hi sumdawng tam takte tân chuan hman dik loh theih tak a ni!! Hman deuha Aizawl daily newspaper pakhatin chhiartute a\anga ngaihdan an lâkkhawmah chuan, ‘Mizoram hi Kristian ramah i ngai em?’ tih zawhna chu za zela 54 (54%) te chuan Kristian rama an ngaih lo thuin an chhang! Chu mai a ni lo, hman deuha Kristian pawl pakhatin survey an neihna-ah chuan Pathian thu lam tihchhuahna, GOD Channel chuan Mizoramah entu a neih meuh loh thu an sawi a nih kha! Chu chu kan nih dan leh mite min hriat dan a ni tawh a ni. Sawi sen a ni lo, zep thu a cheng hek lo. Zoram hian kawng dik lo a zawh a, kan rilru hrisel lo siam\ha tur hian zirtirna \ha leh dik kan mamawh tak zet a ni. Vanneihthlak takin Mizoram kilkhawr takah pawh ram hmangaihtu leh rilru hriselna ngai pawimawh an lo awm ve zel mai! Mi \hahnemngai leh mi thiam zawkte hmalaknain, kum 1992 September thla khan, Richmond Fellowship Society (India), Bangalore bultumin Mizoramah, Community Mental Health Workshop neih a ni a. He mi rahchhuah hian, Mizoram mipuiten rilru hriselna lama hma kan lo sawn zawk theih nana hmalatu pawl, Volunteers for Community Mental Health (VOLCOMH) chu Sep 23, 1992 khan din a lo ni ta a ni. Mizoramin rilru hriselna lam atâna rahbi thar kan kai hi a lawmawmin hmasawnna thar a ni tih loh rual a ni lo. He tlawmngai pawl hian thiltum pawimawh tak tam a nei a, chungte chu: Rilru hriselna leh damlohna chungchanga hmangchang hre tura mipui mimir zirtir te, hnam nunphung mila vantlang \hatna turin rilru lam hriselna kawnga \anlak leh nunphung kal sual avanga chhiatna tawh mai theih thil ven him te, rilru lam tlâk chhiat avanga tuar mekte chhanchhuah a, nun chhenfakawm leh \angkai an neih theihna tura beih te hi an thil tum leh an innghahna a ni. Tin, he pawl hian hmachhawp tam tak a nei a, a pawl hming leh din chhan a nih angin mipui vantlang ten rilru hriselna lama hmasawnna an neih theih nan te, chung thil tihhlawhtling tura \anlak leh zirtirna (awareness) pekte hi an hmachhawp chu a ni.

VOLCOMH hian hmalakna kawng hrang hrangin a nei tawh \hin a. An hmalakna hmasa zinga langsar tak pakhat chu kum 1993-a World Mental Health Day puala High School thlan chhuahte puala kawng zawh an huaihawt kha a ni awm e. He kawng zawhah hian Banner leh Poster-te an târ a, he ni pual hian rilru hriselna pawimawhzia tar langin, au hla(Slogans) an nei nghe nghe a ni. He tlawmngai pawl zahawm tak hian hruaitu \ha tak tak leh mi thiam tak tak a nei nghal a. An hmalakna pawh langsar lutuk ni hran lem lo mah se, a pawimawh em em thung a ni. Chung an hmalakna zingah chuan, kum 1993 kuma Aizawl khawpui chhunga rilru lam harsatna nei enfiahna an neih te, kum 1995 kuma ruihhlo tih chhan chhuina an neihte leh seminar an buatsaih te hi he pawl hmalakna \henkhat chu a ni awm e. He pawl hmalakna langsar leh chhinchhiahtlak tak pakhat chu, kum 2001, May ni 1 khan Hmeichhiat-Mipat kawnga hmumsual dai mekte tân tluk luhna, Drop-In Center a hawn hi a ni awm e. He center hi tun thlenga la enkawl chhoh zel a ni a. Hmeichhiat-Mipat kawnga hum sual dai hmeichhiaten tluk luh nan an hmang \hin a, thurawn inpekna leh an dinhmun a zira hetiang lam harsatna neite \anpuina hmun atân an hmang \hin a. He Drop-In Center hi mi tam takte tân malsawmna a ni tawh a, malsawmna a la ni zel dawn pawh niin a lang. Hetianga ram leh han hmangaihtu kan nei hi kan vannei tak zet a; rilru hriselna lama hmalatu pawl dangte pawh la din belh zel se a \ha hle awm e. Mizo thufng chuan, “Kawi pawh a kâwm a \hat chuan a rah a \ha,” a lo ti a. A dik hle awm e. Thing chhia a rah \ha ngai lo va, thing \ha erawh a rah \ha nge nge \hin. Kawi pawh a inphumna kawm a \hat chuan a rah pawh a \ha a, a kawm a \hat loh erawh chuan a rah pawh a \ha thei ngai lo. Chutiang chiah chuan mi rilru dik lo chuan rah \ha an chhuah thei ngai lo. Mi rilru \ha lo pu mi chuan thil \ha a ti thei tak tak lo fo. Mizo thufing vek chuan, “Mi awkhrâwl an hlawhtling rih thei, an thlu chhe thuai \hin,” tiin a lo sawi a, hei hi sap hoin Mental Health an tih nen hian a kar a hla lo hle a ni. Rilru dik lo leh \ha lo chuan nun dan \ha lo a hring a. Mi nun dik lo chuan thil \ha lo an ti a. Mi dik lo leh pamham, mi duham leh dik lo taka hlawhtlingte chu a tirah awhawm ve viau \hin mah se hun rei a daih ngai lo a ni tih Mizo thufing hian min zirtir a ni. A tawi zawnga sawiin, ‘mi rilru hrisel lote chu a tirah lo hlawhtling ve viau mah se belhchian a dawl lo,’ ti ila a dik mai awm e. Mi nun dik leh rilru tluangte chu mite ngaihsan an hlawh a; malsawmna pawh an dawng nge nge \hin. Chuvangin kan pi leh pute hunah hian tunlai angin, Rilru Hriselna (Mental Health) lam inkaihruaina dan leh inzirtirna (awareness) nei lem lo mah se an nunah a bet tel tlat thung a. Mi rilru dik lo leh pamham, mahni \anghma hai taka thil ti \hin te hi chu tu mahin an ngaisang ngai reng reng lo.

Sap thufing chuan, “Tihadamna aiin invenna a \ha zawk” a lo ti a. A dik hle awm e. Rilru kim lo leh dik lo, hrisel loin a hrin chhuah, ruihtheihthil avanga harsatna te, hmeichhiat-mipat kawnga harsatna te leh chhan dang avanga harsatna kan tawhte hi siam\hat theih chu a ni ngei mai. Amaherawhchu heng avanga harsatna tawkte siam\ha leh tura sum leh pai sen hi a a hautak em em a, awmzia a nei thui lutuk lo niin a lang bawk. A awmzia chu rilru hrisel loin a hrin chhuah te siam\ha leh tura beih vak ai chuan hetiang lama harsatna la tawk ve lote venhim hna hi ngai pawimawh ta ila a let tam takin hma kan sawn zawk ngeiin a rinawm a ni. A pawimawh ta ber chu, ram leh hnamin rilru hriselna lama hma kan sawn zel theih nana theihtawp chhuah hi a ni awm e. Taksa, rilru leh thlarau damna kan chan tlan theih nan chhungkua a pawimawh a, tlawmngai pawlte pawh kan awl thei bikin a rinawm lo. Chu mai a ni lo. Kohhran lam pawhin rilru hriselna lam kawngah hian tun aia nasa zawka \an kan lak a \ul hle. Rilru hriselna hi Pathian thu nen a kal dun tlat a, \henhran theih a ni lo. Lal Isuan, “Miin i chunga an tiha a i duh tur ang bawkin mi chungah pawh ti ve rawh” tiin min zirtir a. Ngaituah ngun poh leh a ropui a, kan vawn reng a \ha awm e. Chu mai a ni lo, “Nangmah i i hmangaih angin i vengte hmangaih rawh” tihte hi rilru hrisel zia tur pakhat chu ni awm tak a ni. Mahni harsatna siamtu chu keimahni vek hi kan ni fo. Mahni inhmangaih anga vengte hmangaihtu chuan mi dangte harsatna a siamin a rinawm lo. Chuvangin mahni inhmangaih anga vengte hmangaihtu chu khua leh tui \ha a ni lo thei lo. Chuvangin rilru thianghlimna hi Pathian thu nen a inhmeh a, Kristiante zirtirna nen pawh a kal dun tlat a ni. Mi rilru kim leh mi rilru hriselte chuan amahah a in hmangaih angin a vengte a hmangaih a, mahni \anghma a hai lo va, rilru thianghlim tak a pu \hin. Chutiang mi chu ringtu \ha, rilru hrisel a ni. I taksa, rilru leh thlarau hriselna chhawrtu hmasa ber chu, ‘Nangmah’ i ni a. Mi rilru hriselte chuan hlimna thuruk, mi dangte hriatpui loh an nei a, a chenhopuite tân a hlu a, ram leh khawtlang tân malsawmnna an ni \hin a ni. Chuvangin mi tinin rilru hriselna lama hma kan sawn zel theih nan \an i la thar zel ang u.