Global Warming

��Chi tam tak thlaha lo pungin, leilung hi luah khat ula, in thu thuin awmt�r rawh u; tuifinriata sangha chungah te,chungl�ng sava chungah te, thil nung leia bawkv�ka kal zawng zawng chungah te thu nei bawk rawh u,� a ti a.� (Gen. 1:28) Easter Island, Rapa Nui tia hriat bawk chu Chile leh Tahiti inkara awm a ni a, khawvel thliarkar zinga pilril ber pawl a ni. Mahse, an chenna ram an tihchereu nasat lutuk avanga anmahni pawh thi mang vek awmchhun an ni! A chunga Bible chang kan tarlan ang hian Pathianin leilung a siamtirh khan mihringte chungah thuneihna sang tak a pe a, mahse chu thuneihna hman sual erawh chu mihringte tan chhiat hlen derna a ni lawi si. Easter Island-a chengte pawh hian Pathian thilsiam zahawm tak takte enkawl dan an thiam loh avangin an chhiatna turin �thang� an kam a ni. An chanchin hriat tur a awm tam lo hle. An chenna ram an tih chereu nasat lutuk avangin hun rei lote chhungin an mang vek tih erawh chiang taka hriat a ni thung. Thing an kit nasa a, a r�m avangin lei min leh tawlh a tam a, ram a chhe tial tial a, sava leh nungchate tan awm ngaihna a awm lo va. Ruah a sur tlem tial tial a, thlai a to thei bawk si lo. An eizawnna ber sangha man turin lawng tuk tur thing a awm bawk si lo. An chaw ei an thlak a ngai a, ar leh sazu an ei ta a, a hnuah phei chuan an mihringpuite sa pawh an ei hial mai a ni! Tichuan he hnam hi an chanchin pawh chhui zui theih mang lovin an lo mang phah ta hial a ni. Tin, Pacific thliarkar pakhat �Vanuatu� pawh hetiang deuh bawk hian kum 2005 khan an lo rauhsan deuh titih tawh bawk a ni. Pathianin mihringte chunga thuneihna min pek, �thilsiam dangte chungah thuneihna� kan hman sual avangin kan chenna khawvela nungcha tam takte chu hmuh tur pawh awm lovin an boral zo tawh a. Scientist pakhat, Isaac Asimov-a chuan, �Leilung pian tirh atanga nungcha lo awm tawh zawng zawng zaa 90 te chu an thi zo vek tawh,� tiin a sawi hial. Heng avang hian harsatna kan tawk mek a ni. Pathian hian a thilsiam nungchate hi khawvela awm mai mai turin a siam lo va. Thilsiam dangte nena inringtawn vek turin a siam zawk a ni. Khawvela thil nung engmah hi amah mai chuan a dam khawchhuak thei lo vang. Pathian thilsiam zinga hlu ber, �mihringte� pawh hi thilsiam dangte tel lo chuan kan dam khawchhuak thei lo. Mihringte leh nungchate hi inring tawn vek tura siam kan ni a, nungchate pawh thilsiam dangte tel lo chuan an nung thei lo va, an inring tawn vek zawk a ni. Hei hi science tawngkam chuan �Ecosystem� an vuah nghe nghe a ni. Hetianga inring tawn vek tur kan nih lai hian kan vela nungchate leh ramngawte nasa taka kan tih chereu mek avang hian kan hmabak hi a duhawm lo hle a ni. India ram president hlui, APJ Apdul Kalam chuan kum 2070-a khawvel awm dan tur a ziakna, �Letter in the Year 2070�-ah chuan mihringten kan chenna ramngaw kan tih chereu mek avanga harsatna kan tawh nasat turzia a tarlang a. Chung zingah chuan tui lama harsatna namenlo kan tawh tur thu te, chunga avanga natna tha lo tak tak kan tawh tur thute a tar lang a, kum 50-a upa pawh kum 85 hmel an put tawh tur thu te, mihring dam rei zawng chawhrual (Life Expectancy) pawh kum 35 chauh a nih tawh tur thu te, khawkheng nasa taka a thlen tawh tur thute a tarlang a. Mihringte chuan kan dam khawchhuah nan kan beih a ngai tawh dawn nia a rin thute a sawi. �Chutih hunah chuan boruak thianglim hip tur kan hmuh tawk tawh dawn loh avangin Sorkarin boruak hip tur a sem a ngai tawh ang. Tin, ram thenkhatah chuan tui a van tawh avangin police ten lui tui an ven a ngai tawh dawn a, kan fate chuan, �Ka pa, engati nge tui a awm loh?� tih chu min zawhna a ni ang. Tunah ngei pawh kan faten tui in tur leiin sum an seng tawh a nih hi!� tiin. Heng thilte hi thleng tak tak thei lo turah i ngai a ni mai thei. Mahse, tun ang zela khawvel a kal chhohva, kan chenna ramngaw leh nungchate kan ti chereu a nih chuan kum 100 lo awm leh turah chuan Mizoram ngei pawh hi a chenna tlak a ni tawh lo mai ang tih a va hlauhawm em! Scientist-te chuan kan chenna khawvela boruak hian kum tinin lum lam a pan zel niin an sawi a. Kum 10 kal liam leh turah phei chuan nasa takin boruak hian lum lam a pan dawn niin an sawi a, hetianga kan chenna khawvel boruak lo lum chho zel hi sap tawng chuan, �Global Warming� an vuah a ni. Hmar tawp vur hi km maktaduai 7 vel zeta zau a ni a, chawhrualin metre 3 zeta

chhah ang a ni. Mahse, kan chenna khawvel lo lum cho zel avangin heng vurte hi nasa takin a tui mek a. Heng hmar tawpa vur te hi tui ta vek ni se tuifinriat chim chin hi metre 7 zetin a sang dawn a ni. Chhim tawp lama vur awm chu hmar lam aiin a tam fe zawk a, khawvela vur awm zawng zawnga zaa 91 zet a awm a, heng vurte hi tui ta nise tuifinriat chim chin hi metre 60 zetin a san phah dawn bawk a ni. Chutiang a nih chuan Bangladesh leh Netherland te tan chuan a hlauhawm thei hle ang. Mi thiamte chhut danin kum 1750 atanga chhutin lei tuamtu boruaka carbondioxide (CO2) pun dan hi 31% zet a ni! Hengte avang leh chhan dangte avangin khawvel hian lum lam a pan mek zel a, tuifinriat chimchin pawh kumtin a sang chho mek zel a ni. Kum 1961 leh 2003 inkar khan chawhrualin tuifinriat chim chin hi kumtin 1.8mm-in a sang a, kum 1993-2003 inkar phei kha chuan chawhrualin kum tin 3.1mm-in a sang a ni. Khawvel hian lum lam a pan deuh deuh dawn a, Inter-govermental panel on Climate Change (IPCC)-in a chhut danin tun kum zabi tawp lamah chuan khawvel lumna hi 1.1oC atanga 6oC thlengin a sang chho dawn niin an sawi. Indian Ocean-a awm, thliarkar mawi leh zinmite hmun ngainat em em mai, Maldives chi sea level atanga feet 7-8 chauha sanga awm a ni a. Tunah chuan khawvel lum zel avangin tuifinriat chim chin a lo sang zel a, tunah hian a thliarkar pumpui hi pil mai hlauhawmin a awm mek niin earthdaynetwork chuan a tarlang. Khawvel hmun hrang hrangah khawlum avangin ram zau tak tak a kang a, khawkheng avangin tampui mitthi a thleng reng bawk. Mizoramah pawh khaw ro lutuk avangin ram zau tak tak a kang duai duai a, in leh lo tam tak a kangral a, ram kang avanga nunna chan pawh kuminah an awm nual a ni. Chu mai a ni lo, tui thianghlim in tur hmuh zawh loh avangin mi tam takin tui thianghlim tawk lo an in a, kawthalo, santen, khawsikpui, mitliam etc. an vei phah thin. Southeast Asia leh Africa khawmualpuia thihna zaa 8.5%-7.7% vel hi chu khawthalo vang a ni! Ram rethei leh ram thang mekah chuan khawthalo hi thihna tlanglawn ber a ni hial! Kum 1998 chhung ringawt pawh khan khawvel pumah kawthalo avanga thi hi maktaduai 2.2 zet an tling niin WHO chuan kum 2000 khan a sawi. WHO vek hian khawvel pumah kum tin tluklehdingawn li zetin kawhthalo natna kaihhnawih hi an vei thin thu a sawi. Chuvangin kan chenna khawvel boruak lo lum zel chuan tui harsatna a thlen a, tui thianghlim tawk lo in avang tein mi tam takin an nunna an chan phah ta thin a ni. Hei pawh hi ramngaw kan tihchereu avanga thleng a ni. Kan chenna khawvel hi boruak chi hrang hrangin a tuam chhuak vek a, chungte chuNitrogen (78%), Oxygen (21%), Argon (0.9%) te hi a tam zual an ni a, chung bakah chuan, Carbon dioxide te, Nitrogen te, Hydrogen, Helium leh Ozone te an la awm leh bawk. Heng boruak chi hrang hrang kan han sawi tak zingah hian kan chenna khawvel lo lum zel (Global Warming) kawnga mawhphurtu ber chu Carbon dioxide (CO2) pung chak lutuk hi a ni. He boruak hlauhawm tak hi thil siamna hmun (Industry) atang te, lungalhthei hal atang leh automobile atang tein a insiam chak em em a. Carbon dioxide hian awlsam takin boruak a tilum thei a, chuvang chuan Global Warming thlentirtu ber chu Carbon dioxide hi a ni. Motor hian boruak hlauhawm tak tak a tichhuak thin a, chung te chu: Carbon monoxide (CO), Carbon dioxide (CO2), Sulphur dioxide (SO2) leh boruak thalo tak tak te an an ni. Chuvangin ram changkang leh lirthei tamna hmunah chuan boruak hi a bawlhhlawh thei hle. Entir nan car pakhat chuan mel 20 tlan nan petrol littre 3 vel lo hmang ral ta ang ni se, car pakhat hian a tlan theih chhungin Carbon dioxide Ton 50 zet a tichhuak hman a ni an ti. Chuvangin lirtheite hian hetiang taka boruak thalo an tihchhuah tam avangin kan chenna khawvelah Carbon dioxide a lo tam a, kan chenna khawvel hian a ni telin lum lam a pan zel mai a ni. Heng boruak tha lo hip raltu tur ramngawte kan tih chereu avangin kan chenna boruak a danglam nasa tawh hle. Ramngaw kan vah chereu nasat lutuk avangin ruahtui tlak dan a mumal lo va. Chu chuan boruak nasa takin a tilum ta a ni. Carbon dioxide hi thlai leh thingte nunna hnar a ni a, mahse mihringten ramngaw kan tih chereu nasat tawh em avangin kan chenna khawvel hian lum lam a pan zel lo thei lo a ni. Heng bakah hian Mizorama kan uar thar, Green House pawh hian Carbon dioxide a pek

chhuah tel avangin khawvel boruak lo lum zelah hian mawh a phur a ni. Tin, heng bakah hian Chlorofluorocarbons (CFCs), Methane, Nitrous oxide hydrofluorocarbons (HFCs), Perfluorocarbons (PFCs) leh Sulfur hexafluorane (SF6) te pawh hi khawvel boruak tilumtute an ni a. Tin, kan chenna khawvel hi nizung hlauhawm, Ultr-Violet Ray an tih mai laka vengtu boruak chi khat a awm a, chu chu Ozone a ni. Ozone hi Stratosphere an tih maia awm a ni a, Km 50-55 vel zeta chhah a ni a. Amaherawhchu mihring ten boruak hlauhawm tak tak kan tihchhuah nasat em avangin Ozone hi nasa takin a pan tawh a, hmun thenkhatah phei chuan Ozone hi a pawp tawh hial niin an sawi. Chuvangin boruak tha lo kan tichhuak tama, Ozone hi a pawp zel a nih chuan ni chuan khaw lum mai bakah vun natna hlauhawm tak tak awlsam takin kan vei phah thei bawk a ni. Ram changkang leh hnam fing zawkte chuan environment tibuai lo zawnga power siamchhuah te an uar tawh em em a, thli atanga electric current siam chhuah te, ni zung chakna hman tangkai te hi kan chenna boruak lum zel tur ven nan a pawimawhzia an hria a, Energey hman nawn theih (renewable energy) hlutzia an hre thar a, kan environment tibuai lo zawnga hmasawnna (Sustainable Developement) pawh ram changkang chuan an kalpui nasa tawh hle. Fridge-ah pawh �Environment Friendly� tih te, �CFC Free� tihte an ziak a, mifing leh changkang apiangin environment humhalh hi an ngaih pawimawh a ni. UNO Secretary General, Ban Ki Moon chuan environment humhalh kawnga tanlakpui turin khawvel kohhran hrang hrang inzawmkhawm pawl (World Council of Churches) hotute a lo ngen hial tawh. WCC khawmpui vawi 6-na (1983, Canada)-a neih pawhin, �Dikna, remna, muanna leh thilsiamte inpumkhatna� tih thupui an lo thlang tawh a, kum 1991-ah pawh khan �Thlarau Thianghlim, lo kal la, Thilsiam zawng zawngte Tithar leh rawh� tih thupui an thlang leh hial bawk. Khawvel hmun hranga hranga Kristiante chuan Pathian thilsiamte duat leh enkawl an tulzia hi a hria a, nasa takin hma an lo la tawh a ni. Mizoram Presbyterian Kohhran pawhin kum 2008 khan Nilai leh Beihrual thupuiah, �Kristiante leh Pathian thilsiam dangte� tih chu an lo zirho tawh a, thilsiam dangte hlutna leh humhalh an tulna te chipchiar taka zir a ni. Kum 1972, June ni 5 - ni 10 chhung khan UNO chuan Stockholm-ah Environment humhalh dan tur ngaihtuahin Conference pawimawh tak mai a lo ko tawh a. Hetiang taka thil pawimawh a nih avang hian Stockholm-a an inhmuh khawm hnu kum 20, 3rd-14th June, 1992 khan Brazil khawpui, Rio-de Janeiro-ah ram 178 zet atangin palai an kal khawm leh a, Stockholm-a an inhmuh khawm ni, June ni 5 chu kan chenna boruak vawnhimna ni, World Environment Day-ah an lo puang ta hial a ni. Tin, 1997 (6-11 December) khan Kyoto (Japan)-ah khawvel ram hrang hrang 169 atangin kan chenna khawvel kan tihchhiat zel loh nana hmalak dan turin ngaihtuahin ram hrang hranga mi thiam rualte an kalkhawm leh bawk. Mizoram sawrkar pawhin ramngaw humhalh hi a ngai pawimawh thar em em a; environment venhim nan sum pawh a seng tam tawh hle. Kan chenna boruak, thing leh nungchate humhalh turin Environment & Forest Department lian tak kan nei a. Anni hmalakna avanga hian ramngaw tha tak tak kan la nei a, Wildlife Sanctuary pawh hmun 12 zetah kan nei a, a zau zawng pawh 1189.25 Sq.Km zet a ni. Hei hi Zoram tan rohlu a tling a ni. Tin, Wildlife Protection Act te pawh kan nei a, khauh zawka kalpui a hun ta hle. Kristiante tan phei chuan Ramngaw leh Nungchate Pathian thilsiam duhawm tak tak an ni tih kan hriat a, a humhalh lama tan kan lak hi a hun ta. Kan sawi tawh angin an tel lo hian mihringte hi kan nung thei lo. Chuvangin, kan chhehvel ramngaw leh nungcha humhalh hi a Kristian hle. Kum 1854 khan America President, Frankling Piece-a chuan Red Indian-ho lal pakhat, Chief Seattle-a ram zau tak mai chu leiah a dil a. A chhanna chu a thu a mawi em avang leh a ropui em avangin Chief Seattle-a lim chu Washington khawpuiah an din phah hial a ni. Chief Seattle-a chuan president-in a ram lei a dil chungchangah chuan mawi tak leh thiam takin nungchate leh ramngaw hlutna tarlangin hetiang hian hmawr a bawk a, �Nakinah chuan ramsate hi an la chimit ang a, ram pilrilah mihring an la zi mur mur ta ve ang. Chutih hun, tlang pang hring mawi em em maite thirzai tawng theiin a bawh hunte chu keini chuan kan hmu ngam lo va, hmuh pawh kan duh

hek lo, Ngaw dur a bo zo vang a, nungcha an bo zo vang a, dam khawchhuah hram tumin kan bei dawn a nih chu le.� tiin. Chief Seattle-a, Kristian ni lo pawhin hetiang taka nungcha leh ramngawte hlutna a hria a nih chuan keini thangthar lungfing zawkte hi chuan rilru fim pu ila, kan dam khawchhuah theih nana ramngaw leh nungchate humhalh tur hian ke i pen zel ang u.