Faith Movement( Upna Tawh Kalsuanna

UPNA TAWH KALSUANNA Faith Movement Thu masa: 1. 1900 khit ciang in Pentecostal movement hong piang a, tua siksanin EW Keyon, Smith Winglesworth te’ tungtawnin Faith movement hong mengkhia hi. 1960 kum khit ciangin Kenneth Hagin, Oral Roberts, Kenneth Copeland cihte’ tungtawnin tuciang kizom suak hi. 2. Chrismatic Movement 1950 khit ciangin, Englican Pawlpi sungpan hong kipan khia a, Pawlpi tuamtuam ah hong kizomzom hi. Full Gospel Business Men’s fellowship, 1960 khit ciangin, leitung bup ah Kha Siangtho nasepna hong kizel sak hi. 3. 1970 khit ciangin USA khangnote’ tungtawnin Jesus Movement a kici mi khangno mihoihlo tampite’ sungpanin hong piang khia hi. Zomite’ sungah hong tunna: I theihsa mah bangin Kha khanlawhna, thaksuah kikna pen 1960 khit ciangin meikuang bangin hong kipan a, upna, lawpna,kalsuanna tuamtuamte a munmun ah kimu khia thei hi. Tua sungpan in Faith Movement, Charismatic movement leh khangno sungah khanlawhna kei muh dan tawm khat kong pulak nuam hi. Khangno sungah Khanlawhna: 1970 USA ah Jesus movement thupiang tungtawnin, Zogam ah zong Sia Hau Lian Kham nasepna tungtawnin khangnote’ lakah nakpitakin Kha khanlawhna hongpiang hi. Hih khanlawhna tungtawnin tulaitak i muh theih dingin, Pa En Lam Cin, Pa Zam Cin Hau, Pa Zam Khan Suan, Sia Zam Lam Thang, Rev. Go Za Nangte leh tuhun a Pasian nasem minthang tampitakte ahi hi. Zogam hong tunna: Faith Movement tawh kisai in, 1978 pawl a kipanin Pasian mizat Watchman Nee laigelhna tungtawnin Jesu tawh sihkhopna nuntak khopna leh gualzawhna thu nakpi in Tedim gam ah Sia Sian Cin Thang tungtawnin hong kigen masa a, tua tawh kizomin, Upna tawh Kalsuanna, (faith movement) hong kipan hi. 1979 pawlin Sia Sian Cin Thang, Sia Than Seia, Sia Gin Do Dal, Sia Gin Khan Do, Sia Hri Kar le Sia Son Khaw Kamte kalkhat sung Tonzang khua, Pu Thang Cin Kham in lui sungah antan thungetna tawh Pasian maizonna nei uh hi. Oral Robert in pilna nei hilo napi in Upna tawh University na lam a, Kenneth Copeland, Kenneth Hagin te in Pasian nalamdang tawh nasem thei ahih leh ei Zomite zong Pasian in Ama nalamdang tawh nalianpi hongsem sak thei ding hi, cih Upna tawh kha nih sung Pasian kamciam bangin zatkhiat ding khensatna tawh khualzin khia uh hi.

1

Upna tawh Pulaakna: Pasian nasepna ciangtan lo ding cih bulphuhin, Upna pulakna, mimal kimciat in kinei hi. Upna tawh a pulaakte uh: Leitungah Bank sawm nei ding, Tonzang khua ah, kha thalakna center hong ding leitung muntuamtuam panin, kha thu tawdingin vanleng tawh Tonzang ah hong pai ding cih pulaak hi. Hongkong ah Pasian nasepna Headquater phut ding mizawng mi cimawhte huhin lungdamna thu tang ko ding, Kha mangthang awn 10 na lamdang tawh kikhel sak ding, leh a mau ading ciat zong tampi Matt 18:19; Late 81:10b bulphuh in upna tawh pulaakna nei uh hi. Khua Hun tungah Thuneihna: Nanglemvum dawnah kahtoin zingtung a kipan guahciin in meipi kai hi. Mualdawn tunciangin Pasian phatin, Jesu mintawh guahpi leh meite thupiakna nei uh a, thakhat thu in meikaite hong veng in, khua hong pha hi. Phaiza khua ah phalbi zingtungin khua hunte i uk i hikei hi, cih Upna tawh a makaipa Sia Sian Cin Thang tuivottawh hong kisil masa a, a lawmdangteng zong upna tawh tuabang in tuivot tawh hong kisil khin uh hi. Upna Khaici tuhna leh Piakkhiatna Piakkhiatna tawh thupha lakding (hun,sumlepaii, neihlelam)tetawh kisinin thu-um mite zong nakpi in hanthawn a, tuatungtawnin in Tungzang le Tuithang khua a om thu-ummi a zakha leh a sin kha tengin phattuam pih in mi te zong hawmsawn uh a, Tedim gamsungah zong kizel hi. A gah: A puan-ak thum a neih sungpan nihpia khia a, kumkhat sungin, puanak 5 leh ansing mawtaw dimin amawkna in kipuak hi. Pulaakkhiatna: Pasian in ideihtelna thupi sak mahmah a, ipulak bangbangin piang hi, cih thu tungtawnin Tonsim panin Aizawl paina ding pulaak natek zui in a nuam apulakten, mawtaw tungah tutna nuam ngah in, phamawh kei a cite in tutna nuamlo mawtaw nungah vokhonte tawh tuangkhawmin, apulak na bang tek uh ngah hi. Churachandpur panin Imphal pai nuamtengin pulaak a, phamawh kei a cite mawtaw laplo in, a pulaak teng paikha uh hi. Aizawl ah upna tawh pulak in Topan Suit hongpia ding hi, ci-in puan khuisai ah upna tawh kiteh uh hi. Asawtlo in ngah kim uh hi. Bus car tungah a tuan uh ciangin palik, galkapte Jesu mintawh hen uh a, amaute’ hun checking a tun ciangin, check nawnlo in pai san suak pahpah uh hi. I lungsim hoihlo bek thamloin, ivan hoihlo peuhmah lawnkhia ding, tua hi leh Topan a hoih vive tawh hong dim ding hi cih upna tawh pulaakin gam ta uh hi.

2

Pasian mizatte tawh kimuhna: A inn a kat tumkhit ciangin, a sum neih Rs.400 tawh a innkang vuitungah bokin Pasian tungah a nuntakna a ap khitciangin Aizawl khuasungah Taihinn pi li a lam kumkhat khakhat ta Evangelist a vak Pu Hrang Chuan mihau te’ inn tunguh hi. Pu Hrang Chuan kamsan nateng, a banban in tangtung a, tu in a tamzaw tangtung kimkhin hi. Pasian na lamdang tawh a nung a, Kaisara tawh kimu uh hi. A mah pen tuitungah Jesu bangin lam pai thei ngei hi. A paipai na-ah Kawllu khu khuk bangin guah zulo hi. Misi sa thokik sak hi. Tua bangin 1986 dong kumsimin kimuhkhopna nei in, “Praise God Fellowship” min tawh conference leh thalakna nei den uh hi. Kawlpi, Haka, Falam, Tedim, Tonzang cihte ah kimuhkhopna nei kawikawi uh hi. Charismatic movement: (Full Gospel movement kipat khiatna) Full Gospel Business Men’s Fellowship, makai Demoss Shakarian tungtawnin leitung gambup ah Pawlpi tawh kisai lo business nasemte’ tungtawnin leitung mun tuamtuam ah khanlawhna hong kilawh hi. 1987 a kipan Dr. Cin Khen Mang (Bawmkhai) in Singapore panin Yangon ah hong tunpih a, Full Gospel Business Fellowship makai pi hongsuak hi. Tua mah tawh kizui in, Dr. Kenneth Kham Go Mang in Full Gospel upna leh phatna leh biakpiakna Yangon ah hong tunpih a, Full Gospel Center ci-in Yangon ah hong phuan hi. Dr. Cin Khen Mang in Kawlgam sung mun tuamtuam ah F.G.B.M.F phuat ding hong kipat ciangin Zogam panin tangmi President dingin, Sia Gin Do Dal Hakha Chapter (8862), Kalaymyo Chapter Sia Mang Sian Thang, Sia Than Seia Tedim Chapter, Sia Sian Cin Thang Tonzang Chapter, cihbangin International ciaptehna tawh hong phuan khia uh hi. Tua tungtawnin abeisa in phatna leh biakpiakna, kamtuamtawh lasaknathak le Kha Siangtho letsong te zatkhiatdante Pawlpi tuamtuam ah Ministry tuamtuam le mimal tungah zaitakin, hong kizel semsem ahi hi. Thu khupna: Kha khanlawhna a pian ciangin, thakhat thu a hongpiang hi zaw lo in, mun khat ah hong piang masa a, tua panin muntuamtuam ah meikang bangin hong kilawh toto hi zaw hi. Leitung mun tuamtuam a, apiang te zong a sawtlo in Kawlgam le Zomi te’ lakah zong hong ban a hi hi. Hih bang i gen ciangin Khanlawhna pi sung ah mi tuamtuamte leh kalsuanna a tuamtuamte zangh a, Kha khanlawhna hong piangsak cih kimu thei hi. Tua mah bangin, i Zogam Kawlgam khanlawhna sungah Pasian in hong zat khak mi tampi om ding a, khat le khat a kithei khalo zong om kha thei ding hi. Bangbang ahi zongin Kha khanlawhna a piannak leh tua sunga akihel khate aham pha ngiat i hi a, ikha lungsim pumpi i nuntaknate Pasian in hong laptoh ciatna zong ithei ciat hi. Hong tung ding Kha khanlawhna ah zong a munmun ah hong zatna dingin ki-ap ciat ni.

3