Ensera Tekura 1.docx

ENSERA TEKURA "Pisang Tekura"

Bala jelu mupuk bepangan baru. Sida badu agi ringat ngagai Pelanduk seduai Tekura. Hari siti Jugam mai Tekura berumah. Seduai betampung dua pintu aja. Seduai lalu mupuk beramu. Ramu pan chukup, rumah pan lalu dientakka seduai. Lebuh rumah udah tembu, seduai lalu ngiga utai bukai ke dempa. Terubah Tekura nurun lalu dititihka Jugam. “Enda pia, manah tua mupuk bekebun pisang. Enda manah tua beridupka buah kampung,” pia ku Jugam. “Amat kena runding nuan, Sambi,” pia ku saut Tekura.

Jugam seduai bulih seduai lalu nanam tambak pisang semak rumah seduai. Nyadi pisang Jugam enda tau besai laban mayuh diempa iya upa. Enggi Tekura galak bendar. Diatu, pisang Tekura mupuk bebuah. Lama agi, majak mayuh ga pisang Tekura mupuk bebuah. Lama agi, mayuh agi ga pisang Tekura nungkul tang pisang Jugam lalu nadai bebuah. Lebuh Jugam meda buah pisang Tekura nyau midar, reti nya baru kuning, iya lalu minta diri niki pisang nya. “Oh, Sambi !. Uji aku niki buah pisang nuan nya ke diempa tua,” pia ku Jugam. “Oh, enda tau Sambi !. Tua ga sama bisi pisang ke diri empu,” pia ku saut Tekura.

Nyadi Jugam, nemu pisang diri enda tau bebuah laban selalu diupa iya. Iya majak madahka diri deka niki buah pisang Tekura. Pia mega Tekura sayau ke pisang iya ditiki Jugam. Nyau kepuas seduai bekelikuhka nya, dia Jugam enda liat ati lalu niki pisang Tekura. Nama dih jaku tudah Tekura tak besap-besap mata ngilaka Jugam niki buah pisang iya. Lebuh datai ba puchuk, dia Jugam lalu bepakaika buah pisang. Kupak seleka, tikau ga umbang.

Anti Tekura meri enda ga meri. Dia Tekura lalu nyabak teki-teki: “Hi-hi Umbang embuang Isi enda embui Hi-hi Umbang embuang Isi enda embui”

1

“Eh, nama agi dianti aku ditu !. Buah pisang udah ga abis diempa Jugam,” pia ku putap Tekura.

Kenyau ari hari nya iya ngiga akal dikena iya malas penyai Jugam. Antara dua-tiga hari udah nya, dia seduai sama-sama nurun ngiga buah ke kampung. Diatu Tekura udah bulih akal. Lebuh iya tepedaka unak semambu, dia iya ngaitka kapir iya ba unak. Iya lalu betayuntayun ba unak nya nimang diri munyi tu: “Ayun, Uang ayun Upa uyas ungkol isang Ayun, Uang ayun Upa akai uah isang Nyin apai betugal kurung Bebaju burung Nyin indai betanggui seraung Beseluk lintung Naka pengelenggau ati Ke apai seduai indai Naka udah meda baka tu Pan pama mih ” “Sapa dipeda nuan dia, Sambi?” pia ku Jugam.

Tekura enda nyaut, tang majak nampung nimang diri. “Sambi, sapa dipeda nuan dia?” pia ku Jugam. “Apai seduai indai enggau sida bukai sama benung nugal di sebayan din,” pia ku saut Tekura sikuk-sikuk ngaga diri nyabak, sinu ati.

Dia mih Jugam bengap-bengap ngemataka Tekura berua tunsang ba unak semambu, enda badu-badu nimang diri. Jugam nyau enda liat ati agi. Iya mega keran deka meda sebayan nugal baka ke dipeda Tekura. “Ulih aku enggau nuan berua dia Sambi?” pia ku Jugam. “Oh, enda nuan tau!” pia ku saut Tekura. 2

“Tubuh nuan berat. Tambah mega, enggai ke sebayan tak lari meda pemesai gamal nuan,” ku iya. “ Enti nuan enda ngasuh. Aku tarit nuan ari nya lagi,” ku Jugam. “Anang nuan nguji berua baka aku, enggaika nuan tak bebadi ngapa,” ku Tekura. “Enti sema aku tak mati labuh ari nya lagi, nadai ku enggau iya. Jampat agi ga betemu enggau sida apai sida indai di sebayan din,” ku Jugam. “Barang iya. Enti nuan tak keras, enda ga aku nagang nuan berua,” pia ku Tekura.

Udah nya, Jugam lalu niki ngagai randau semambu. Unak iya pan panjai. “Nuan bepegai rat ba randau semambu tu. Aku ngachukka unak ba burit nuan,” ku Tekura. “Au, jampatka agi, awakka lengkas meda sida apai din,” pia ku Jugam.

Tekura lalu ngachukka unak ba burit Jugam. “Bisi nuan meda sida apai enggau indai nuan di sebayan din?” pia ku tanya Tekura. “Tak lalu nadai ayan sida tu,” pia ku Jugam. “Anang guai !” pia ku Tekura. “Apin chukup dalam unak tu.”

Jugam rauh-rauh madahka diri pedis, Tekura enda ibuh. Udah nya, tak lalu ditayunka Tekura. Peda tak merubus perut Jugam pansut ditarit unak. Enda lama udah nya, Jugam pan lalu bekalih tunsang. Dinga nyawa iya tak merap sekali agi. Udah nya lalu enda engkeretik agi. “Lapa nuan bakanya dih Sambi?” Tekura nanya tang Jugam enda nyaut agi. Iya udah mati. “Ukai semina ulih meda sida sebayan nugal sambi tu, tang lalu enggau sida din,” pia ku Tekura gaga meda Jugam udah mati. 3

Tekura lalu mulaika diri ngagai rumah iya empu. Lebuh meda rumah Jugam nadai nguan agi, dia Tekura serebana lalu bejaku enggau diri empu. “Enti nunda, patut bagi bela mih buah pisang. Nya baru ati sama lantang. Tang ga enda sebaka ati, laban bisi amu ari pangan,” ku iya. “Enti asai ati aku diatu, enda aku malas penyai Jugam enggau aku. Tang Jugam ga enda meretika ati orang bukai,”ku iya.

Iya lalu bepantun: “Getil isi orang, getil isi diri”

4