El Pirata Tagal

El PirataTagal

©2006 by a.r.enriquez All rights reserved

1

El PirataTagal

1

El Pirata Tagal By Antonio Enriquez

1.

Aquel noche de 17 de December, 1636, ya lliga na La Fuerza Real de San Jose, un mensajero del tribo Lutao. Muerto-muerto el di suyo caballo. Ya sale le na Sangali, este, serca de 10 leguas lejos del nuevo poblacion, que se llama New Samboangan. Ese mensajero, con el nombre Iba, derecho ya reporta con Capitan _____ Gonzales, el encargao del fortaleza. Ta hipa le de cansancia y ta tembla le de susto. Kay, ya habla le con el capitan, ya mira le y su maga uban Lutao, con el maga barco pirata del Datu Tagal. Ta pasa na sila na Tictaun isla despues de sale na Masinloc Anchorage. El direction del maga piratas na direction de Sibuguey Bay. “Asegurao vos que ebos ya mira con Datu Tagal para Sibuguey Bay?” “Si, Don Capitan Gonzales. Y hende lang yo, tiene pa gayot yo maga uban que ya corre na a playa para mira con el maga pirata barco.” Despues de man dismiss ele con el Lutao mensajero, que ta templa ba kay sabe le cosa el pasa kanila si ya pundia El Pirata Tagal, el capitan ya precura busca por que si Datu Tagal nuay bolve derecho kanila na Cotabato. Sabe le que bien cargao gayot de plunder y loot ese maga barco pirata. Mas de seis meses ya si Pirata Tagal ta man plunder na Visayas, y ya lliga na di suyo oido que bien mucho gayot slaves y oro ya puede ele saca na maga pueblo y iglesia. Pero embes ta anda le na direccion del Sibuguey, pa afuera del di suyo normal ruta na Moro Gulf.. “Nuay otro razon,” ya habal el capitan con ele mismo. “Sino hende pa le satisfecho cosa le ya man plunder na Visayas y na _______. Pues, quiere pa gayot ele umenta di suyo maga plunder. Pureso ya directa le di suyo pirata fleet aqui na maga barrios na eastern coastline di atun: Manicahan, Bolong, Curuan, Vitali, y otro maga barrio pa.” Pues, acabar de man assemble todo maga barco que ya man renovate sila adentro de cuantes semanas antes, ichando mas canyones y ya umenta el largor para puede pa umenta maga bela (antes de lliga el mensajero, ya prepara ya sila todo que necesita para pella con el Pirata Tagal) Capitan ____ Gonzales ya ase apas con el Pirata Tagal na Sibuguey Bay. Tiene tres dias despues ya abisa con ele el Lutao Iba que ya mira sila con el Pirata fleet ta pasa na di ila barrio na Sangali. Ya lliba le con ele dos leaders del nuevo formao compania de Lutao y Subanon, Samboangan Voluntariios: el former datu Tongab Macombong y datu Macombong the Elder. Ahora Christiano ya, ta llama kanila Santiago the Handsomest y Felipe the Eldest.

El PirataTagal

2

Este que lliga pelea, ese el primer pelea de este dos former datus na mar or tiera, ya el compania del Samboanga Voluntarios abajo de Espanya. Bien quiere gayot sigui si Father Pedro Gutierrez, pero si Capitan Gonzales no quiere toma el responsibilidad si cosa man pasa con Father Gutierrez. Ese padre hende lang basta-basta se de padre: ele el primer jefe del Jesuita residencia aqui parte del Samboangan peninsula, na Dapitan, and ele el lla liba con el primer migrasion de maga Christiano Lutaos de Dapitan para forma el primer settlement aqui na Samboangan juntu na maga Subanon de aqui. El leader di illa maga Lutao ese gane si Pedro Piantong, que en cuantos tiempos ya tiene titolo responsible de “don.” El quien ya sigui un joven Jesuita padre. Kay nuay barco de Espanya puede sale, especialmente para querra, sin padre para mira el necessidad de espiritu del maga soldao. Cuando ya sale ya el naval fleet, tiene dos discontento official na pantalan. El primer gane si Father Gutierrez. Ese padre quiere gayot ele talla presencia le todo maga actividades, militar, civil, o religioso ba. Ta cre le que nuay cosa el pasa si nuay su persona. Y el otro el former datu del maga Lutao, si Senyor Pedro Piantong. Su razon otro gayot con el razon del padre: si Piantong quiere venga con Sultan Kudarat cosa con ele ya ase, aquel gane abuso y opresion con ele y di suyo maga hente. Masquin man hende directo su venganzu con Sultan Kudarat conforme le. Y coneste si Datu Tagal bien conforme gayot le kay ese si Tagal el favorito hermano di suyo.

El PirataTagal

2

2. Na primer dia ta ase sila apas con el Pirata Tagal, el primero village ya pasa sila na este del presidio ese el Mariqui point, casa del maga Samal, y despues norte este el islad Tictauan despeus del channel con el mismo nombre. Nuay pa un ora despues, ya lliga sila na agua ta llama Masinloc Anchorage, enfrente se na bocana de una grande rio na Samboangan. Poco adentro de ese bocana es el anciano trading port el llama quita Old Samboangan para hende quita man confuse con el New Samboangan. Y mas adendro pa o lampas na Old Samboanga trading port, talli ya el sitio de Molumuluan. Debe icha se na memoria di atun kay ese sitio despues de tres centuries el queda main headquarters di General Vicente Alvarez cuando ta pella le contra con el maga Espanyoles para el independencia del maga Filipinos. Despues del bocana, maga media de hora o mas, el naval fleet del Espanyol ya pasa sila con el isla de Sacol. Ese isla tamen debe quita icha na memoria kay ese es el isla del grand Datu Mandi, que ya man pabor con el American invaders embes con General Alvarez quen el di suyo boyhood friend y egual sila nacido de Samboangan: el differentia lang kay el latter Christiano, y el former Islam, or Moro. Na segundo dia ta viaja sila na underbelly del thumb-like potrusion del peninsula. Aqui ta encontra quita el maga barrios de Vitali, Bolong, y Buenavista; na port side del maga barka Espanyol. Ta bisia su Capitan Gonzales maga structures o ruins de maga casa que ya quema el Pirata Tagal. Sabe gayot le que el mira le pueblo o barrio ya quema si Datu Tagal acabar de man loot ele. Tupao gayot ele na di suyo creer, kay acabar del sitio Buenavista ya mira sila un village, mas grande pa con el Buenavista, que cosa lang tu puede mira el maga quemao poste y tiene vez pedacito wall de casa o sino del tiengue. Ya pundia sila, y despues ya abaha sila na village. Cuantos minutos ya pasa nuay ni un villager ya abuya or encontra kanila. “Cosa tu ta pensa, Datu Felipe? Ya abandona sigurro el maga villagers aqui con el di ila pueblo?” “Ta mira yo, Capitan Dn. Gonzales, que ta esconde lang sila kanaton. Ta observa lang anay sila, si amigo ba o contra quita.” “Espera kita un rato, Capitan,” ya man suggest si Senyor Felipe the Eldest. “El dimiyo, talli lang sila na detras di illa village, o si no ba alla na maga cueva na slope de ese maga monte-monte cerca lang aqui.” Bien callente gayot el sol alla, kay hende lang el maga casa y tiengue ya quema pero el maga pono de frutas y coco. Pues bien gayot apierte el lugar, nuay ni sombra areredor kanila na a playa. Y el capitan bien gayot ele ta suda kay ta usa ‘le di suyo mail coat y steel helmet; dol atentro le de oven.

El PirataTagal

1

“Bueno siguro bira ya quita na barco,” ya habla el Capitan Gonzales. “Si ta alli sila escondido, baka tiene pa gayot sila medo masquin con quien: Christiano ba o Moro piratas.” “Cuantos minutos ya lang, Capitan Dn. Gonzales,” habla si Senyor Felipe the Eldest. “Hende caja ta man kamali el dimiyo extra sense, kay dol ta sinti yo na dimiyo bukok ta abaha ya sila para aqui kanaton.” “Buieno, Datu Macambong. Esperq quita … pero un ratito ya lang.” Nuay pa tarde despues de ya habla si Capitan Gonzales, tiene ya abuya na un costao del village serca de un dozena del maga inhabitantes. Masquin aquel distancia, ta puede ya sila mira que mas alto este maga hente con el normal altor del maga Indios aqui na isla. Armao sila con lansa y bow and arrows, nuay masquin un pusil, y surpresa … si hende ta ase loco el di ila ojos, un bantac, poco alto lang de un enano, in frente, el amo que ta lliva kanila para na mar. Cuando ya pare ese diutay hente enfrente di Capitan Gonzales y con el dos Macombong hermanos, ya pregunta sila dayon con ele porcasa di Datu Tagal. El ya conbersa una el mas alto official del maga Samboanga Voluntarios, si Senyor Felipe Macombong the Eldest: “Ya pasa ba aqui si Datu Tagal? Ya mira ba camo el maga barco del maga piratas?” “Hende ba tu ta mira con ese maga casa y tiengue ti amun bien quemao! Hasta maga pono de frutas y coco ya quema. Na, no puede tu ese habla que kame mismo ‘se ya quema!” “Cuando man el Pirata Tagal ya quema el de vos. lugar? “ “Cuantos dias ya ya pasa,” contesto el bantac, serca un pies de bajo con el alto uban de siyo que armao con nativo armas lang. “Ta cre yo que ya sale ya sila man loot el pueblo de Mindoro, Cuyo, y Calamianes, kay lleno gayot el di illa barco del maga captivo Christianos. Ya puede sila saca cuanto biloc del di amun maga dalaga, ya saca sila di amun maga cabrito …” Ya para le dayon cuanto ya mira le ya abaja el maga Jesuitas na un rowboat. Dayon ya pregunta le si ese ba el maga shaman del maga Cristianos alla na fortaleza que nuevo lang ya acaba, y por que ta usa sila maga camisa de maga mujer. Ya contesta el capitan que hende se maga shaman sino maga padre se di illa, y hende ese camisa de mujer pero ese ta llama sotana. Na di suyo lang opinion, ya continua el bantac leader, mafuerza se maga padre del Cristiano kay el fortaleza donde sila ta queda bien grande gayot y bien mucho maga canyones, que mas grande pa con el lantaka del maga Moros y paganos como kanila. Y hende pa le ta ulvida aquel dia el maga soldao del fortaleza ya buga con armas de fuego con el maga Moros de isla y del mar. Aqui ya acaba el conversation. ❀

Una vez ya bira sila na di illa barco, el Capitan Dn. Gonzales ya manda man doble de corre el di suyo naval fleet. Ya habla le con el di suyo maga official, no acuanta el whip na detras del maga ship rowers. Kay si hende sila apura, ta asegura ‘le que si Datu Tagal el escapa na di ila mano. Y el maga look-out debe tiene ojos de aguila para con el maga pirata.

El PirataTagal

1

Pero cuantos dias ya ya pasa nuay ni sombra del Pirata Tagal: todo lang cosa sila ta mira el maga rastro del maga quemay barrio o iglesia. Pues ya ase un decision si Capitan Dn. Gonzales: immedietamente, embes dol rabo sila ta ase apas con el Pirata Tagal, el cambia sila curso y curta across del bay para este na Olutanga Isla. Como un elongated braso culgao na media del bay de Sibuguey y Illana. Alli na Olutanga isla el espera sila con el Pirata Tagal. Nuay otro lugar sila el pasa para volve na di ila base na Buhayen. Todo ya habla ay, incluendo el head del missionaries que ta sigue con el expedition, Father Flavio Larracochea. Pues ese ya era el ase sila para asegurao el coji con el favorito hermano di Sultan Kudarat, y tambien para castiga con el horror y plunder del maga Cristiano pueblo. Nuay pursigue kay el dos Subano hermanos Macombon, si Felipe el Mayor y si Santiago el Mas Guapo ya informa que tiene sila mas buen plano. Hende acustumbrao si Capitan Gonzales que uno di suyo Indio official el dale di suyo opinion. Pero sabe le que este dos man hermano hende lang esos Indio official, pero el maga hijo di Nayac el Mas Guapa Subana Princess de Pulong Bato. “Y cosa quiere habla el dos maga hermanos Macombong?” El ya contesta el mayor hermano, si Senyor Felipe: “Nuay mucho differensia con el di tuyo plano, Capitan Dn. Gonzales. Sino embes de espera alli na Olutanga, man derecho quita na Punta de Flechas. Alli ta asegura ya el encontra kita con Datu Tagal.” Hende lang un poquito ‘le ya duda con ese plana. Kay cosa man ase ‘lli si Datu Tagal. Nuay man nada alli na Punta de Flechas sino el alta y acudo cliff de piedra; nuay ni un casa alli, masquin shed; y nuay barco ta pundia. Y nuay ele oi que alli na Punta de Flechas tiene agua para bibi que necessita si Datu Tagal para su maga marino, si conset sila. Ta duda gayot ele, y ya habla le con Senyor Felipe el Mayor. Con mucho excusa, si Senyor Felipe el Mayor ya explica por que ele asegurao ta ‘lli si Datu Tagal. Kay alli, ya habla le, sila maga tribo Samal, Lutao, Badjao, Subano, o Joloano ba --- paganos, animists, o Islam --- basta bueno el pescada o mission, ta oprese sila maga gifts con el goddess del mar. Y despues para sabe el di ila fortuna, tira sila na cara del stone cliff con lansa o pana. Si el lansa o pana el clava na stone cliff, pues tiene buen fortuna; si hende, el tiene mal suerte. “Y otro pa,” ya omenta si Senyor Santiago el Mas Guapo. “Sabe quita que ya quema si Datu Tagal el maga casa y iglesia aqui na costa, pero un golpe lang ya desaparese le. Por que man? Kay nuay le continua viaje northeast; pureso nuay mas quita mira otro maga quemao pueblo.” “Sigui, datu. Ta oi yo.” ya habla Capitan Dn. Gonzales. “Embes, ya man viaje directamente southeast kay da-an ya se na su cabeza: el quema lang ele maga pueblo aqui na costa, y despues derecho le na Punta de Flechas para pidi gracias alla con el goddess de mar .” “Y ta pensa tu que si man derecho kita ahora dayon, el alcansa pa kita con ese infamoso pirata?” “Si-si; nuay yo duda que puede pa kita alcansa si derecho kita sale para na Punta de Flechas. Por que sabe quita, como ya habla el Lutao Iba y aquel bantac datu que el maga barco di Datu Tagal lleno de slaves y silver and gold del maga iglesia. “Como bien successful el di suyo raid na Visayas, Mindoro, Cuyo y Calamianes, mucho gayot ele para dale gracias y offerings; pues, y el tarde ‘le alla.”

El PirataTagal

3

El PirataTagal

5

3. Pues, deberas gane, ta ‘la el Pirata Tagal na agua de Punta de Flechas: el entero fleet di suyo, un grande garay, quatro pancos, media dozena de fast salisipans, y maga treinta outrigger canoes. Nuay ni uno que ya sumi durante el di suyo pirata raid, tiene siete meses despues de saler ele na di suyo lair na Buhayen. Mas de 1,200 piratas tiene alli na di suyo flotilla. Tiene ya pasa maga media hora que el maga piratas ta tira lansa y pana na cara del stone cliff: hende todo ya claba na stone cliff, tiene ta cay lang na agua. Aquellos ya tira su lansa o su pana ya promete dale mas grande offering para el goddess del mar aqui el tiene lastima con ele. Acabar de tirar di illa maga lansa y pana, tiempo ya para dale el offering con el goddess del mar. Con mucho embroidered vest, y el kris con su handle embedded con precioso rubies y diamande, y maga ornamentos que maga savages ta usa para buga con el maga mal spiritu colgao na di suyo pescueso, si Tagal el Pirata parao na bow di suyo garay. Alto gayot su pecho con pride y hambug. Como un actor de theatrico, ya extende le su dos manos que bien lleno de maga precioso piedra, oro, trinkets, necklaces, brooches, earrings, pins, medallions, y cosa del iglesia: como golden chalice and scepter. Tiene de ese maga precioso cosas ta kay ya na di suyo maga mano masquin nuay pa ele tira conese na agua para con el goddess del mar. Despues, con un gran grito, ya tira le todo cosa na su mano, el action como ta rega le conese maga precioso cosas, na agua. “Aaayyyiiieee, aayyiieee, Allah!” ya grita tamen suyo maga piratas. Y despues ya manda le saca con el mas joven y mas guapa dalaga na maga ya captura le na Calamianes isla. Y ahora embes de precioso piedra na su mano derecha, ta agara le un dagger, y alli pa le parao na bow del di suyo garay. Un dalaga, que bien bonita, joven, y innocente como un nymphet ya lliva el maga pirata con el di illa datu Tagal. Amarao su dos mano na di suyo detras, suyo pelo largo hasta na di su ombro calcag, y di suyo camisa bien masusio y tiene maga roto. Agachao elle kay tiene gayot le miedo mira con el Pirata Tagal, y su chin ta man shake, su ombro ta templa, y el corazon di suyo ta palpita contra na di suyo pecho. “Ah-ha, una bonita virgin para el goddess de mar,” ya grita si Datu Tagal, alsando su cara para na direction del stone cliff. Con su isquierda mano, agarando le na pelo del nymphet ya hala le con ese para con nele. Antes tu que puede sera tu ojos, ya man plunge ele con el di suyo dagger na pecho del nymphet, y despues, ya debolve le su daggar na caja y con aquel mismo mano que ya agara con el dagger ya hala le con el corazon del nymphet. Ya alsa le el corazon de ese virgin ariba de su cabeza para mira todo di suyo maga hente, gritando: “Goddess of the sea, acsepta el di miyo human sacrifice!” “Aayyyiiieee, aaayyyiiieee!” ya grita tambien el di suyo maga followers. Con el mano que ta agara na largo pelo del nymphet, ya rempuha le con ese virgin na agua. Ele y el otro maga piratas ya acacha para mira con el cuerpo, na nuay mas corazon, sumi na mar.

El PirataTagal

1

Pero embes de sumi, ya man lutao el nymphet, con su cara pa ariba ta mira na cielo. Dol acustao lang ele na cama, derecho el di suyo cuerpo, y el pelo derecho na agua embes de anda abaho na agua. Cuantos secondos lang ese ya pasa, pero dol cuantos horas ya na pensmiento del maga piratas. Y cuando ya empesa sumi el nymphet na agua, hende pa cabeza o de pies; parese ta man lutao pa le siempre, pero con este differensia: poco a poco el cuerpo del virgin sacrifice ta sumi le y ta queda mas lejos y lejos na vista di illa. Como hende este natural suseso ta mira sila, el maga piratas que bien supersticiosio ya tiene miedo. Ta pensa sila que el goddess of the sea nuay quiere acsepta con el virgin nymphet, y rabiyao kanila. Antes de puede pa sila pensa mas, ya curta se na un grito, y cuando ya bira sila cara donde ya sale ‘se --- ya mira sila con el di ila datu Tagal ta man shake el corazon has ta bula el sangre aqui y alla y despues ya echa se na su boca y adelante di illa ya lambe le el sangre y despues ya come con el corazon. Ta puede gayot mira el maga pirata con el di ila datu ta mascucha con su tiente colorao de mascada, y ta man tulu pa el sangre na corners del di suyo boca. Bien caliyao gayot todo. Como todo maga ojos ta mira con el Pirata Tagal, nuay sila sabe que el cuerpo del nymphet ta subi ole na agua. Como ya sumi le antes, su cuerpo dol acustao na agua, derecho el cuerpo de cabeza de pies, equal si ta acusta prostrate na cama. Uno de aquelos na adelante del flotilla el primero ya mira conese abnormal scenario, pero na susto nuay puede grita; ya insenya y insenya lang ele con di suyo deto con el virgin cuerpo. El di suyo uban ya puede mira donde le ta insenya, y estos, hende como con ele although egual con miedo, ya grita dayon. Mas suena pa di ila maga voce que cuando ya oi kita grita con el datu cuando ya oprese le el human sacrifisio. Masquin el datu, cuando ya mira ‘lel el virgin nymphet dol ta resusita na agua, ya nervia le. Siguro el goddes of the sea nuay acsepta di suyo offering, y ahora ta debolve con ese cuerpo del nymphet. Debe le sale aqui immediatamente, antes de pasa malo con ele y el maga hente di suyo el realiza que hende amo cosa ta pasa. Derecho, sin esperar ni un minuto mas, ya ordera le con el di suyo flotilla sale na agua de Punta de Flechas y abri todo el di ila maga bela para viaja sila para na di ila santuary na Buhayen.

4.

El PirataTagal

3

Tiene sinco dias ya ya pasa cuando el Lutao Iba ya reporta con Capitan Gonzales alla na fortoleza de La Fuerza Real de San Jose presencia del Pirata Tagal na Sibuguey Bay. Desde aquel tiempo nuay sila ni una vez mira con el pirata fotilla. Poco temprano de este dia, si Senor Felipe el Mayor, sin esperar el permiso para entra despues lang de un tuktuk na puerta, ya entra derecho na cabin di Capitan Gonzales, y ya habla: “Capitan Dn. Gonzales … el flotilla de los piratas tiene ya maga tres leguas, southeastward! Si apura quita puede pa man trap con Pirata Tagal alli na Punta de Fleches antes de puede ‘le sale.” “Nuay sigurro mira kanaton el Pirata Tagal?” “El ta subi sol na este na di ila cara … y si apura kita ta tira ya kita con el flotilla del maga pirata antes de puede sila mira kanaton.” “Pues, Senyor Felipe, cosa pa bos ta espera …. Dayon ya abri todo-todo el di atun maga bela, y con el rowers aranka con el di ila padel todas-todas ….” “Si, Capitan Dn. Gonzales. Immedietamente!” ❀

Derecho con el garay del Pirata Tagal el di atun maga warships ya ataca. Quatro salisipans, dos cada costao, ta sigui como defensa con el garay. Ni uno del maga pirata aqui na di ila barco, masquin si Datu Tagal mismo, ya puede dayon mira con el Cristinao fleet que ta ataca. Por casa kay el tempranito ta subi sol na cara di ila, y na detras di Capitan Dn. Gonzales ta ataca fleet. Grande gayot el advantage di ila contra con el maga piratas: el di atun Cristiano fuerza ta puede mira kanila buena mente gayot, pero el maga piratas no puede mira, dol maga bulak. Cuantos minutos ya pasa sin un bala ya contesta el maga piratas con el fuego ta sale na Cristinao fleet. Tiene maga diutay barco, el maga canoe, ya tupa y tiene ya sumi, y masquin con el garay y di suyo escort salisipan ya tupa tamen cuantos balas antes si Pirata Tagal ya puede disperta, como uno ta sunya, y ya realiza cosa ta pasa, que el di suyo pirata flotilla ta man sea-ambush el maga Cristiano barco de guerra. “Allah tien lastima!” ya grita si Pirata Tagal na bow de su garay. Y despues don el maga di suyo tiniente: “Kulu di tu puta madre! Adelante! Supla con el di inyo maga slave rowers hasta el detras di ila man laput-laput de lastigo. Adelante! Adelante! Alli na di inyo infrente el maga Cristinao. Mata con todo maga taero!” Masquin apiqui ya gayot si Datu Tagal, grande pa gayot siempre di suyo confiansa. Kay hende ba nuevo lang ele ya acaba tiene successful raids na maga Cristiano pueblos? Con di suyo drawn kris ta grita le que man abante sila, derecho na maga tacome-puerco infidels. Y el di suyo maga tiniente y piratas ya peca sila con di ila kris para ase alboroto y icha animo con todo, mientras el lordemas maga pirata, tiene maga 1,200, ya empesa dira di ila lansa y pana. Mucho de ese, sino serca todo, hende ta alcansa na Cristiano fleet. Na di ila ansias, ya tira sila masquin lejos pa el maga Cristiano. Y otro, el nuevo sol que ta subi pa na di ila cara, ta ase kanila bulak todo cosa na adelante di ila. Y hende lang no puede le mira muy bien con el contralio, di suyo cuatro pancos, y otro dos salisipan, y el maga raiding canoes, todo bien armao, lejos pa gayot sila para puede usa ifectamente di ila musket y lantaka o canyon. Y si tira man sila, el desgracia ali

El PirataTagal

2

que el di ila bala y canynes bolas el kay o tupa con el garay di Pirata Tagal embes na contrario Cristianos. En este momento, si Capitan Dn Gonzales ya man order con el di suyo maga teniente: “Bira media esquierda … ahora mismo!” Todo el maga barco Cristiano ya bira como ya instructo kanila. Cosa ya pasa cuando ya ase ese maneuver este: broadside del Cristiano fotilla ya enfrenta con el barco pirata; pues, todo el canyon, diutao o grande, na broaside del maga barco y canoes apuntao na flotilla pirata. Pues, este seis barco de guerra Espanyol --- cuatro renovated y dos nuevo --- con el addisional canyones, ya tira hunto y concentrao fuego. Bien exacto gayot el di illa tiro, y antes de aclara el umo del canyon tiene ya ya sumi maga barkos del piratas: une del quatro salisipans, dos ta quema y di ila bela ta man uput na fuego; y el mismo command ship garay ya tupa cuandos projectiles, y como un grand pescao que esta irido ta nada le pa costao con su rabo (rudder) poco-poco ta move, isquierda y derecha, sin exacto direction, puede kita abla eratic. Mientra duro el peleyo del naval, cosa tu ta pensa el bien atractivo o absurto scenario que ta puede mria, el Cristiano y el Moro pirata? Na bows del maga Espanyol warships el maga Jusietas ta para, el detras bien derecho como plancha y na di ila mano ta agara sila darkwood rosario (sigurro del silva di ila provincia, donde gray y reddish-black el tiera). El di ila maga sotana ta bula-bula na viento, o sino ba na aire de umo cuando el maga canyon ta rebenta. Kanila, ta cre sila que el di ila reso na rosario el oi el Dios y el dale victoria con el Cristiano naval. Y ta cre pa sila que el presencia di ila na media del quera naval, que ta dale mira sila nuay miedo con el maga bala del Moro, ta dale gran animo y inspirasion con el maga Espanyol y Indio marino. Pero de todo mas prominente presencia na maga Jusietas … ese gane di Padre Larracochea. Parao ta men ele na bow del flagship, y na su mano derecha ta agara le un grande Cross de palo del Crucified Christ. Ta apunta le se Cross director con Pirata Tagal na di suyo flagship garay tamen. Y sila dos ta man mirahan con todo rabia y hatred que hende tu pensa el puede sala na un Padre Jusuita, o cosa ba order; dol ta enpunyala sila dos con dagger, embes ta man stare lang sila dos. Masquin ta man stare ele con el Padre Larracochea, ta grita le con todo fuersa: “Ase, ase derecho con el garay: maga anak del baca de dose mama!” Y el di suyo maga oficial ta grita ta men ariba del sunor del canyon y fuego con el di ila slave rowers y guia (rudder man): “Para isquierda, para isquerda, taero di inyo tata y nana!” Mientras ta avansa el pirata flotilla, como ya man order si Datu Tagal, y ta ase derecho el garay, no sabe el datu que si Capitan Dn. Gonzales ya dale order que oposito del Pirata Tagal: este gane que icha pa costao, o broadside, el Espanyol fleet contra del pirata barco y menora el carera y despues man steady lang se. Y cuando ansina ya el di ila posision, ya empesa tira, mas doble y concentrao que con aquel tempranito tiro o fuego, na Moro flagship garay y di suyo maga escort y raiding canoes. Despues de para el maga barco de guerra del Espanyol, el di ila un dozena sailingcanoes ya man expand pa afuera na dos costao del maga barco de guerra y despues, con todo speed, usando el maga barco de guerra como di illa exis, ya embesa man surround

El PirataTagal

2

con el Pirata Tagal flotilla. Si puede tu imagina un grand tijeras, pues ansina el forma del fleet Espanyol mientras ese ta embrasa con el Moro pirata flotilla. Debe ‘bos un ciego para hende mira cosa ta pasa, pero si Datu Tagal aquel momento ciego ‘le de rabia: como un wild tamaraw ta sale na disuyo flat na naris pares de steamy exhilasion y su ojos coloraw y kiput de hatred. Si puede kita oi ariba del canyon y fuego, este le ta grita, particularmente con el Padre Larracochea, agarando un black wood Cross of the Crucified Christ na su mano, y el su braso, como ya mira kita temprano, alsaw ariba de su cabeza, como saludo de Nazi. Entre de ese synchronized y heavy bombardment del Cristiano naval fleet, el maga Moro piratas na quatro pancos y maga raiding outrigger canoes ya queda inutil y paralyzed. Temprano ta pecura sila ase apas para anda na aosilio del Datu Tagal garay. Ya puede teja na detras con este maga pancos y raiding canoes cuando si Datu Tagal na di suyo rabia ya manda salta con el di suyo maga hente y derecho navega incuentro del Cristiano naval fleet sin esperar el reste di suyo flotilla. Na primer fusillade pa lang, ya puede tupa cerca de dos siento piratas: siento dayon ya muri y el lordemas ya queda irido. Y cuando ya alsa el umo del maga canyones y bombardment, ya puede mira si Capitan Dn. Gonzales y de suyo officiales del Samboangan Voluntarios que uno pa del cuatro salisipan ya sumi, cuantos raiding outrigger canoes y otro panco tamen ya sumi; fuera con el ya sumi tiene tamen cuantos barcos y canoes ta quema, el di ila maga bela ta man umo y pedaso ya lang ta queda que hende pa quemao y el maga mast si hende tumpao ese ta men ta quema ya. Hunto con el maga barco y raiding canoes ya sumi el cosa ya man plunder y loot estos maga Moro piratas: silver, gold, precious stones del pueblo y iglesia, y tambien maga captivo Cristiano que nuay puede salta, kay amarao man sila na pies y mano o amarao na wooden stocks abajo na barco donde sila ta man row. Bien magulu gayot. Todo lugar ta puede tu mira maga piratas ta salta na di ila ta quema barco, y puerte gayot ta quema el maga Moro canoes, y tiene ta man banga-an kay nuay mas quien ta mira na rudder o el capitan ya abandona ya su barco. Y el mar dol grande basin que ta irbi de ta man lumos Moro (tiene ta men cuantos Cristiano marino), sumido barco, y maga mast y bela que ta quema masquin na agua ya. Y el gritos del maga marino y piratas … puede tu abla como gritos del maga condenao alma na infierno. Coneste situation, si Capitan Dn. Gonzales ta espera ya lang que dale le el ultimo golpe para acaba ya el Pirata Tagal. Sabe le que unabes el cera el dos flanks di suyo fleet con el maga Moro piratas, como pares de tijeras ese el curta pedaso a pedaso con el contraltrio. Pero embes de core Pirata Tagal, el ya avandia directo na flagship, que es symbolically el axis de ataca Cristiano. Por 'que? Sabe el capitan que nuay barco di suyo puede ase apas con Datu Tagal si ya dicidi le core y viaja para suyo sanctuary na Cotabato. (Na 1848 lang ya puede kita ese advantage de naval speed del maga Moro pirates cuando ya introdusi el maga naval Espanyol el maga steamships que asido na Germany.) Cosa nuay pensa si Capitan Gonzales que si Datu Tagal veterano de sien pirata raid y naval batalia. Y el aquel sien naval raid y peleya, nuay le proba ni uno perdision. Pues hende si Datu Tagal ta puede ole el odor de vanquished maskin umo ya lang areredor di suyo como ta quema di suyo maga pirada raiding canoes, y su mismo flaship inclinao ta core y mucho projectiles ya tupa ya. Avance y avance le para ase ban-ga con el flagship Espanyol. Y el maga Samboangan Voluntario sailing-canoes y ta precura ataja con el garay, ta ase ban-ga si Datu Tagal dol maga cajon de palo china lang sila.

El PirataTagal

1

Si Capitan Gonzales ya man order todo di suyo canyon y muskets tira con el Pirata Tagal para pa`ra con ese suicidal attack, kay si continua el carera de avante el pirata garay … nuay otro resulta si no el sumi sila dos. Ta puede mira si Capitan Dn. Gonzales ta bulo splinters de maga palo del caja del garay, pero ese pirata barco sigue siempre ta core para man ban-ga kanila. Dol aquel ele un grande whale, ya queda loco na irida del manada spears, ta man crash y quebra todo cosa adelante suyo: panco ba o maga sailing-canoes del Lutao. Y si na agua tiene Cristiano o Moro ba marino na di suyo path o camino, pisa se le con esos. Na flagship tiene mas de sincuenta Samboangan Volutanrio sharpshooters, y cuando ya dale el order tira con el Datu Tagal … sila ya embesa dayon tira con ele. Pero, masquin ta concentra sila el di ila tiro, y hende man sila lang ordinario musketeers pero maga sharpshooters pa gayot, dol nuay di ila ta tupa con ele: hende man ele ta tumba muerto o irido. “Tiene se anting-anting fuerte si Datu Tagal,” ya habla un sharpshooter. “Hoy, Cristiano ya ‘bos,” habla di su uban na di suyo costao. “Contra se na di aton nuevo religion … cre na superstision.” “Superstision? Yo ta cre cosa yo ta mira!” Hende lang ese un sharpshooter ta pensa que fuerte el anting-anting di Datu Tagal, sino maga otro tamen di su yo uban y otro maga sharpshooters. Pues ya entra na mucho di ila el duda que di ila maga bala el puede penetra con Datu Tagal. Despues de duda ya entra miedo kanila, y hende poco di ila ya perde el animo de pellar. Ta tira ya lang sila para tira, el malo kay tiene di ila ya para ya gayot tira y ta agara ya lang el di ila pusil. Dol nuay mas ya gayot cosa puede ase para con Datu Tagal. Con di suyo kris apuntao con el Padre Larracochea que parao na bow del flaship, el Pirata Tagal con el otro mano ya ase el senyas que el curta le el pescueso del padre. Si Padre Larracochea sigui de lansiar el grande Cross de palo del Crucified Christ na direction di Datu Tagal. Dol aquel ele ta cre que el anting-anting cosa el ta proteje con Datu Tagal, y nuay bala o lansa puede man contra con ese anting-anting si no el Cross ta agara le na di suyo mano; como un talisman. Ya man notis si Capitan Dn. Gonzales que ya queda poco selencio el fuego del maga di suyo sharpshooters. Ya hala le con uno de pelo y ya dale lel un golpe na cara; na otro que ta empesa era abandona su position na gunwale (?) ya tira le na cabeza y ya cay se muerto na costao de suyo canyon. Si tiene man idea maga otro ase similaridad cosa, el golpe na cara y tiro na cabeza ya cambia di ila pensamiento. Pero nuay mas sila puede bira na egual animo y valor como tempranito. Si puede el Pirata Tagal man crash na medio di ila, na axis del naval Cristiano, ta pensa si Captian Gonzales, el man collaps el di suyo strategy de ataque. Embes de el dos flanks del Samboanga Voluntarios war sailing-canoes el curta-curta pedaso-pedaso con el Maga piratas Moro --- kanila mismo ese el pasa. Por que despues de curtar y man crash con el axis de Espanyol naval fleet, el pirata garay y salisipans y raiding canoes el puede ya escapa con el trampa; cosa el dos flanks ya planya man sanwich nuay mas ala, y sila dos el man bang-gaan pa y embes del contrario sila mismo man tirahan. Ese el miedo di Capitan Dn. Gonzales. ❀

El otro que ya puede mira que dilicao el situasion di ila, ese si Senyor Felipe el Mayor. Ya mira le aqui y alla quien puede anda ausilya con el Capitan y salva el di ila

El PirataTagal

2

strategy de destrosa el maga Moro piratas. Su hermano menor, si Senyor Santiago el Mas Guapo ya mira le que ese na otro lao di suyo y del flagship. Grande el distansia di suyo para con el flagship di ila, como ta alla le na punta del otro ta cera flank. Nuay otro barco mas core y armao que con ele puede ayuda con Capitan Dn. Gonzales, sino el di suyo renovated warship. El di suyo plano entra ya lang le na medio del dos, el flagship Espanyol y el garay di Datu Tagal. Si hende le puede ase para con ese garay na canyon y musket tiro, el di suyo warship amo el para con ese. Kay nuay otro sino el icha le na camino del garay y man block con ese. El sumi man gane le, pero ta asecura le que el garay el para cuando ese el man bang-ga con ele, y una vez para se flagship di Datu Tagal el resto del Moro flotilla el para tamen. Sigue de gritar y curse si Datu Tagal con Padre Larracochea: “Ebos, padre del maga unbelievers! Con plomo na bola-bola. Taero de bos mal jingao puta madre!” “Satan! Mophisto! Misguided follower del hende deberas propheta. Este dia el man junto ‘bos con Satanas na infierno.” “El man una ‘bos con migo!” ya grita el Pirata Tagal, alsando di suyo kris. Tiene ya lang cuantos metres de agua ta separa kanila dos, y si Datu Tagal y di suyo maga piratas ta prepara ya salta na Espanyol flagship. Masquin si Capitan Dn. Gonzales ta grita warning con el padre para sale na bow del barco, si Padre Larracoshea hende ta ase caso o sino hende ele ta oi. Sigue que sigue lang le man wave el Cross del Crucified Christ con el Datu Tagal, dol aquel Cross el puede para el garay pirata o el kris di Datu Tagal. Con todo di ila emosion y concierne particular de cada uno, si Senyor Felix el Mayor ya puede entra cerca di ila sin ningun di ila ya puede mira. Cuando maga quince metros ya lang le na media del dos, el bow di Datu Tagal ta ensinya na sur y el flagship Espanyol na norte, si Senyor Felix el Mayor ya manda un fusillade de canyones y musketry con Datu Tagal y de suyo garay. Ensiguida el atension di Datu Tagal ya cambia de mirar con Padre Larracochea para na warship que ya mira le ta alla ya enfrente con ele. Y su mano alsao que ta agara el kris ya queda paralisao el momento ya conosce le con el Senyor Felix el Mayor; su ojos ya queda granda y el pares de agurejo de di suyo- naris ya man dilate rabia. Grita le con Datu Macombong the Elder con todo’l aire na di suyo pecho: “Puerquito de gran sow de doce mama; mal criado de gran traitor! Ebos que estaba Muslim, ta come el comida Este dia el mira ‘bos por ultima vez de bos mal criada madre Nayac!” Y na su pensamiento ele ta pensa: Ebos que estaba Muslim, ya come el comida di amun primo Sultan Bungsu, pero ahora de sinverguenza y nuay gratitude ta belya con di suyo mismio maga hermano para el fabor del invador Espanyol. Anak de familia royal de Jolo, ahora un muchacho ta lambe el buli del maga blanco chongco, Espanyol. Ay, un traitor de Islam … Antes de puede le salta na salisipan di Senyor Felix el Mayor (su una intension, que sabe kita, era na barco de guerra di Capitan Gonzales, donde parao el Padre Larracochea con el Cross del Crucified Christ que ta apunta le como talisman) para taya con ele con su kris, un lansa, como un bien derecho pana, ya entra abajo lang de su sobaco y derecho ya tumba el datu mierto enfrente di suyo garay.

El PirataTagal

1

Todo sila bien espantao, que el tado ya muri con un simple lansa lang, que maga bala y ulan de pana y lansa nuay puede ase tumba, sino un lansa nomas que ya tira el Senyor Felix Macombong el Mayor. Puede ser que no sabe si Senyor Felix que el anting-anting di Datu Tagal ta protreje todo su cuerpo, fuera lang abajo del di suyo sobaco. Suerte lang que alya gayot ya tupa el lansa di Senyor Felix! Si con migo pa, nuay se na su cabeza. Kay si sabe le antes ya pasa ‘se, mas temprano pa ya abisa ya era le con el maga Samboangan Voluntario sharpshooters donde na cuerpo, como el Greco heroe _____, solamente el fatal parte que puede mata con el datu pirata. Pues, el notorio pirata, hermano menor di Sultan Kudarat, que antes de un anyo, el maga pueblo y costal barrio de Visayas y Mindanao, el tembla de miedo (Tiene cuydao, ay Moros en la a playa!) na sorpresa de todo, especialmente commandante del Espanyol naval flotilla, como un troso ya tumba mierto. Este el fin del teror del maga Cristianos: todo suyo pirata flota sumido, y 300 piratas muerto y con el di ila ataud el mar de Sulawesi. Immedietamente, si Capitan Gonzales, el Padre Larrachochea, y el maestre de campo general Senyor Felix el Mayor ya embarca na garay. Quita sila el camisa, que como lang este un shirtless jacket, y talli pa el lansa clabao na cuerpo del Pirata Datu Tagal. Quiere sila sabe si nuay otro irida el Moro Pirata. Ningun di ila ta cre que con mas de siento Samboanga Voluntario ta ase apunteria con este pirata, nuay ni un bala o lansa o pana ba ya tupa con ele. El una entre di ela que ya explica antes del sin camisa Moro Pirata Tagal este gane si Padre Larrachochea, ta ase el senyas del Cross: “Jesus, Maria, y Jose: ampara ‘nos!” Kay ni un irida fatal, ni un marca de un bala o pana, que ya penetra, el puede mira na cuerpo di Tagal el Pirata. El tiene lang maga rastro, como golpe, o dinigrido parte, entero di su cuerpo. Nuay ni un tulo de sangre, afuera del aquel lansa na suyo sobaco. Abla si Capitan Gonzales, hende con poco espanto: “Ta mira ya yo, pero hende pa yo ta cre. Pa que modo, con todo el concentracion de fuego, nuay ‘le ni un irida. Cuanto ya yo batalyas ya pela .… si hende contra na di atun fe, cre yo que nuay otro cosa si no di suyo anting-anting.” “Si, Capitan Gonzales,” ya abla si Senyor Felix. “Nuay un datu, o warrior, que hende tiene anting-anting na su cuerpo para proteje con ele. Depende lang ese na fuerza del di suyo anting-anting.” Nuay si Senyor Felix Macombong abla que masquin ahora como un Cristiano ya ‘le despues del bautismo, tiene le un anting-anting amarao na di suyo cintura. Na aquel naval victorio ya puede recovera un gran y rico botín: cajas de armamento, jewelry de silver y oro, precioso piedras, que ya man saqueo na pueblo y iglesia, and 650 captivo Cristiano del maga pueblo y villa de Visayas, Cuyo, Mindoro, y Calamianes grupo de isla: este gane el despojos (loot) durante de ciete meses. ❀

Cuando ya bira sila na Nuevo Samboangan Establecimiento cerca de tres dias, bien grand welcome y celebration ya espera kanila. Y como ya lliga sila na bispera del Pascua, bien grande fiesta gayot ya tiene, y como ahora Cristiano ya el pueblo na Fuerza Real de San Jose Fortaleza, ya ofrese un gran misa el Padre Gutierez que ya bene del Jusuita residencia na Dapitan. Ya asisti con ele nuay otro sino si Padre Flavio

El PirataTagal

2

Larracochea, que ta actua como el missionario na fortaleza y aquel nuevo establecimiento. Pero el gran celebracion, el gran punto de ese, aquel gane ya colga un dosena de datu del Tagal el Pirata na gibbets ya planta al lado de camino para na fortaleza. Ya lliva con esos vivo para lang opuede kanila culga en frente del nuevo establacimieto del maga Subanos y Lutaos, para servir como un ijemplo cosa el pasa con el maga Moro pirata y infidel. Y para hende gayot escapa vista de nincun inhabitante, en frete del mismo fortaleza, ya icha sila el cabeza del Pirata Tagal na punta de un palo largo. Y como ya empesa ya man buloc el cabeza, enbolbido na un trapo, durante del tres dia de viaje, mas pronto ya exhibi sin tapar abajo del tropical sol. Y como nuay nada ya ta cncobri el ta man buloc cabeza … bien fuerte gayot el mal olor de decomposision. Y poco y poco, el maga carnivaroso pajaro de monte ya man nit picked pedaso y pedaso, bocado (morsel) a bocado el ta man buloc cabeza del Pirata Tagal: primero el ojos, naris, despues el orejas, y el laman de carne na carillo. Ese maga pajaro de monte ya albida ya maga inhabitantes aqui que ta vivi pa alla na terreno pontano. Cosa sila sabe que esos maga carnivoroso pajaro ta vivi ya alli na terreno pontano antes pa gayot que lliga el maga Espanyol. END