Yir Taggara

Yir Taggara Sүur: D. Messaoudi Tekcem Menεula үer texxamt-is taf argaz-is ibded үer yidis n usfaylu. Netta tuү la ittmuqul deffir n yegdilen d akessar mettwal axxam n unarag-is, Blannif. Blannif d yiwen urgaz d-yusan seg tmurt n waεraben akken ad ixdem deg tebḥirin ay sekren kra n yinesbaүuren iqbayliyen teүzi n yidisan n wasif n Summam. Dүa ayla amezwaru deg issuter axeddim d win n At-Nekkyan d-izgan deg temnaḍt n Uqbu, ddaw ubrid aүelnaw ittawin үer Bgayet. Blannif ittwaqbel ass-nni i lmend n tezmert-is iwatan aṭas tafellaḥt. Kra n wussan kan, iwwi-d tawacult-is үer ugerbi ay issebded ya deffir uzedduү n umεellem-is. Гas ulamma d tawacult meẓẓiyen, nettat la d-tettban d taεkemt үef uzagur n Blannif ur d-yufin deg ddunit wa үef ara iwṛet ula d kra. Laẓ, ijerbuben d wammus d tunt-nsen n yal ass. Tuẓ Menεula үer yidis n Nekcaf taf-it iүebbes deg wayen la iskad; ur d-yesli ula i tewwurt mi d-teldi. Tḍusa-t үef tayet dүa yuki-d s ufriwes u immuqel-d үer tama deg tella Menεula. Mlalent wallen-nsen dүa twala tmeggarut-a snat tregwa n yimeṭṭawen la dṭṭarent seg yeẓri n urgaz-is. “Acimi akk-a tettruḍ ?” Ay as-tenna s uүbel. Isked deg-s Nekcaf kra n wakud, sakin yeğğ-itt u iffeү-d s tүawla seg texxamt. Kra yekka wass Nekcaf la ittxemmim үef tmexluqt-nni iwala seg usfaylu n texxamtis үer tefragt n ugerbi n Blannif. Гer uүelluy n yiṭij, lidiw ad yali үer uxxam ad yečč imensi, netta yerra үer ttberna-nsen d-yezgan deg uzdir. Dinna, iṭṭef yiwet n ṭṭabla deg tesga, issuter kra n teqreεtin n lbirra ibdu la ittennaү d tedmiwin-is: “Amek akk-a a-ddin ṛṛeb, yiwen wačrab bu-telkin am wa үur-s tameṭṭut am tjeğğigt u nekk gganeү d tčawraүt-nni n Menεula ! Maca ccah deg-i, d nekk ay yefkan ṛṛay i yimawlan-iw deg wayen iceүben tameddurt-iw ”. Immekta-d Nekcaf ass-nni deg s-d-ibder baba-s taluft n zzwağ i tikelt tamezwarut. Qqimen-d deg kraḍ yid-sen, netta d yemma-s d baba-s, akken ad ččen imensi, dүa inṭeq umүar yini-y-as: “ Teẓriḍ a-mmi, aql-ak tura tessexdameḍ deg 33 iseggasen u nekk d yemma-k werεad nesεi w’ad aү-iqqaren ti d setti. Гef waya, үetseү ad ak-d-zewğeү aseggas-a ”. Ass-nni, Nekcaf ibүa ad isuү s tezmert n tgerjumt-is “Ala !” үer wudem n imawlanis; ibүa ad iwwet ifassen-is үef ṭṭabla d wad aten-ixebber belli үur-s ya yiwet n tmidiwt d-iger gar wallen-is i zwağ, maca issusem үer taggara, acku iẓra azayeḍ ara d-ikkren m’ur iqbil ṛṛay n baba-s. Ikemmel umүar inna: “Taqcict ay bүiү ad ak-tt-aүeү d yelli-s n yiwen umidiw-iw ay ssneү asmi lliү deg Paris. D netta iyi-iεawnen deg unadi n umahil usssan imezwura deg wwḍeү. Netta ilindi kan ay d-yuүal үer tmurt. Atan tura ittidir deg Burğ-Buε rireğ, anida ildi mennawt n tḥuna. Maca tcennef-as twenza deg tama-nniḍen, imi үur-s seddis n teqcicin үer wumi wer d-iṭṭif yiwen seg yebrayğiyen, seg-mi akk-n ttasmen deg-s u үuccen-t. I lmend n waya a-mmi, issefk fell-aү ad as-nessifsus taεkemt xersum ulamma s yiwet n tfesna”. Mi issuli ubabat ameslay-is, ikemmel Nekcaf učči-ines s tsusmi armi ifuk, sakin ikker yerr үer texxamt-is s wul iqebren s werrif. Zrin kra n wussan bdun At-Nekkyan la ttheggin i tmeүra ay bүan ad tili d tameqqrant u d tanesbaүurt am temүer d tbaүert n twacult-nsen. Asmi d-ittuhegga akk wayen iwatan, sensen At-Nekkyan үer Burğ-Buεrireğ awin-d tislit. Гer yiḍ, ikcem Nekcaf үer tmeṭṭut-is yaf-itt deg tugna-nni seg yugad ad tt-yaf : ur illi deg-s wayen isferqiqisen ul n umdan.

Гer wammas-n-yiḍ, yusa-d uqeddac n ttberna үer Nekcaf yini-y-as s ukukru : “Atan d asrag n tririt a-mas Nekcaf ”. Yuki-d unefḍam ameүbun seg tedmiwin-is, ixẓer-d anaxdamis s wallen ittmecruruqen, sakin ikker issuүel s uleүwi mettwal tawwurt n tuffүa. Mi iwweḍ үer ukunṭwar anida tqeddec yiwet n twehranit - acku ttberna-ya am waṭas n ttbernat n tmurt n Leqbayel ssexdament tullas ay d-ittasen seg utaram azzayri isseqwreb s yiḍudan-is ilemmasen yini-y-as s yiles uttil : “Xaṭi deg yiḍ-a, eh ”. Mti iwweḍ үer texxamt-is n yiḍes, yufa tameṭṭut-is teẓẓel am umettin үef wusu; ala ajexxer-is icban үer win n yilef ay d-issebganen belli d tamuddirt. Ibded Nekcaf kra n wakud di tlemmast n texxamt, lmendad n wusu, ittmuqul tin ay s-d-yuzen warezg-is, sakin yuẓ үer-s ibru i yiman-is үef yissaw. Illezlez wa-yi, dүa tenneḍran Menεula, issuqan ajexxer, tezzi-y-as-d azagur-is. Ṭṭsen akk-nni yal wa di tama-s, ur mḍusan, amzun ireṣṣa uүrab gar-asen. Azekka-nni, yuki-d Nekcaf үef lewhi n 10 n tṣebḥit. Tugna tamezwarut d-izrin sdat wallen-is d tinna n Melεar, tameṭṭut n Blannif, ay iwala iḍelli-nni tfesser icettiḍen үef ẓẓerb d-izzin i ugrebi-nsen. Гas ulamma d taqendurt timcerregt yellufḍan ay telsa, nettat tettban-d s talүa timgerrezt nezzeh : d tačurant, d taүezzfant, d timizwiүt n wudem u d tawraүt n umzur ; d tangellust. Inneḍran yixef n Nekcaf lewhi n usfaylu, dүa ikker yaẓ үer-s. Ur igir ula d tamawt belli tuү iṭṭes s yiselsa d warkasen. Iwexxer acemma asaber s ufus-is azelmaḍ ibdu ittgani tuffүa n Melεar. Deg yimir la ittṛağu, tlul-d deg wallaү-is yiwet n tekti taciṭanit ay d-isseflalin tumert deg wudem-is. Uqbel ad as-tettunefk tegnit ad iwali tinna izedүen allaү-is, teldi-d Melεuna tawwurt tini-y-as-d s taүect tarawsant : “Ad ak-qqar baba-k ader-d үer uṣalun, ḥwağeү-k ”. Inneqlab-d Nekcaf үer deffir yerr-as-d s taүect yeḍlan s zεaf : “In’as aql-iyi-n ! ”. Kra n wakud deffir mi truḥ Menεula, iḍfer-d Nekcaf itteddun isxermit. Mi iwweḍ үer uṣalun, yufa baba-s iqqim үer ṭṭabla үef issers akus n tẓemmit n čina. Si-Heffaf, baba-s n Nekcaf, tura d argaz n 66 iseggasen deg leεmer. Yunag үer Fṛansa deg 1968, yiwen umadlas kan deffir n zwağ-is wis ukkuẓ; acku netta tuү izweğ ya, yal ta iman-is, akked kraḍt n tlawin umi ibra, imi wer ttarewent үur-s. Ass-nni wer illi wa үef ittkel ad t-id-imager ; allalen ukriden үef ittkel d idrimen-is iwṛet seg baba-s amaүras innuүen үer tama n Fṛansa deg umgaru amaḍlan wis sin, d tutlayt tafṛansist ilmed asmi meẓẓi deg uүerbaz aṛumi. S wi-yi, issaweḍ ad iṭṭef taxxamt deg yiwen usensu bu-yiwen yetri deg wass amezwaru, u deg wass wis sin ikka akwass ittnadi amahil. Гer tmeddit, ikka-d s yiwet n tama deg ugten yigafa-friqiyen s usirem ad d-imlil krayan issen. Imi wer iwala ula d yiwen imir-nni, dүa issuүel үer tesga, iṭṭef yiwet n tdabut u ittrağu. Kra n wakud kan, ataya yiwen yilemẓi lewhi-ines. “Ssalam εlikum !” Ay as-d-inna, sakin iqqim udem үer wudem yid-s. Yerra-y-as Heffaf asuzel u itteddu ad t-iseqsi d acu ibүa, maca winna izwar-it үer umeslay : “Ana ğazayri. Wenta, ma ṛakc ğazayri, par hasard ?” Izmumeg-d Heffaf si tumert yini-y-as ih s umussu n yixef-is. “Ṛak nouveau hnaya ntaya; ṛak baṛk εageb menna wala ğit tḥewwes xedma ?” Ay t-id-issesten waεrabnni. “Ğit nḥewes lxedma” Ay as-yerra Heffaf s uүdebbu aqbayli. “Σla ḥsab l’accent ttaεek enta qbayli ” Ay d-issegmeḍ waεrab-nni. Issenguga Heffaf aqerruy-is belli d tidett. Dүa yuẓ-d waεrab armi d udem-is yini-y-as s taүect tarxayant : “Neqder nεawnek telga xedma, beccerṭ trandi li service”. Heffaf yiүil d idrimen үef tt-inadi, dүa yefka afus-is үer lğib-is isteqsi-t : “Cḥal tḥeb neεṭi lek ?” . Innecmumeḥ waεrab yerr-as : “Lala, maci drahem”. Immuqel-it-id Heffaf s wallen d-issebganen abati ameqqran. Uqbel ad d-yini ameslay, ikemmel waεrab awal-is : “Allah үaleb, blani Ṛebbi u ṛedd li nnefḥa lelluṛ ”. Ibda Heffaf la ittergigi, la ittuүal d azeggaү. Dүa ikker waεrab-nni, ijbed-d iccer n lkaүeḍ yuran s fṛansist , issers-it-id үef tdabut yini-y-as : “Haw l’adresse ttaεi fih ; ki telḥeg temma, seqsi εla Si-Yaṭeε. Laεreb ttaε l’quartier hadak gaε yεerfuni bhada lism ”. Iqqim Nekcaf үer tdabut, udem s udem netta d baba-s. Uqbel ad ibdu umүar awalis, iddem-d akus-nni n tẓemmit issew seg-s tajeqqimt , sakin issers-it irẓem tasiwelt : “Atan үetseү ad nebnu aseggas-a kra n tnezduүin iwulmen i yixeddamen-neү, acku aṭas

ay εetben fell-aү ”. Ingetwi wul n Nekcaf seg wayen isla yini deg iman-is s tumert tameqqrant :“D tayi ay d tagnit үef ttnadiү, a-ddin ṛṛeb ! ”. Ijүem Si-Heffaf kra si tẓemmit-is, sakin ikemmel tasiwelt-is : “Гef waya, issefk ad asen-tiniḍ i yixeddamen n tүerүert ad d-ssiwḍen angaten ilaqen үer tama deg izdeү Blannif, acku seg-s ara nebdu ”. Iflali wudem n Nekcaf seg wayen la isell; iẓra ta d tagnit deg ara ifaṛes akken ad issufeү tirga-s. “Maca anida ara rren s imir ara sen-nebnu axxam amaynut deg umkan n ugerbi-ihin ?” Ay issesten Nekcaf baba-s s yiwet n timmuүbent tameqqrant, zun d tawaүit ay d-үlin үef Blannif d twacult-is. Di tilawt, netta ibүa kan ad d-ismil baba-s үer tinnubga n at ugerbi-nni үer uzedduү-is, akken ad d-isseqreb tinna diger deg nnican. Ubeṣṣaḥ, amүar irekten ya tidmi-ya aṭas deg wallaү-is u yufa-tt teččur d-ilulүan, inṭeq yerra-y-as :“ Ad asen-nefk kra n wussan n tүimit deg zemren ad rzun үer yimidisen-nsen deg Burğ-Buε rireğ ”. Ixsef wudem n Nekcaf. “ Neε’ddin ğeddek !” Ay inna deg wul-is i baba-s d-as-yerwin targit-nni tamelḥant. Sakin ikker yini-y-as s taүect tamerẓut :“ Aql-i ihi ad rreү tura үur-sen akken ad ten-xebbreү ”. Deffir n kra n imadlasen, ifuk uxxam n Blannif s tiṣki d uslaү : deg-s kraḍ n texxamin d tefragt deg tezmer Melεar ad tsummer iṭij neү ad tsired icettiḍen ; d ayen iclewcen allen n imeүban-a asmi d-uүalen. Dүa aүilif-nsen amezwaru үef mmeslayen deg yiḍ-nni d anadi үef wamek ara rren tajmilt i wat Nekkyan ay asen-igan lxir ameqqran. Deg tṣebḥit n wass n tfaska n yiүras, deg wakud illa Nekcaf ibded deffir n usaber n usfaylu n texxamt-is, indeh Si-Heffaf , d-yuүalen ya si tmesgida, үef temүart-is:“ Awi-d akraren-nni ziү ! ” Tezzuүer-d temүart kraḍ n waxfiwen-nni d-yuү urgaz-is deg umadlas izrin, teqqen-iten meṛṛa үer yiwet n tagest, sdat n tewwurt tameqqrant, teqqim үef dekkant ad tesgunfu. Ifren-d seg-sen Si-Heffaf yiwen wufrik ameẓyan izlu-t i wat uxxam-is, yuzen alemmas i yixeddamen-is imburen izedүen d agraw deg uxxam amaynut ay aseniṣka deg wussan-a imeggura deg tama n wadda n wayla-s, sakin iṭṭef ameqran seg wacciwen yawi-t netta s timmad-is үer uxxam n Blannif. Isseqwreb Heffaf үef tewwurt, dүa tusa-d Melεar teldi-as-tt-id. Akken-kan ay mlalent tiṭṭawin-nsen, ibda wul n umүar amcum idderdik deg yedmaren-is am tallunt. “Blannif ṛah fe ddaṛ ? ” Ay tt-issesten amzun ur illi maḍi d netta ay d-as-innan iḍelli zeryen belli izmer ad d-ikkes ass n tfaska ayen iḥwağ n yigumma seg tebḥirt-is. “Lala, hada win raḥ iğib cwiyya lxeḍra fel’bḥira ltaḥtaniya ”. Ay d-as-d-terra Melεar s yiwen uzmumeg iskakḍen SiHeffaf ddaw tmiḍt. “Haw ğebt lkum bwac tfeṛṛḥu lewlad ” Ay d-as-inna d wallen-is reṣṣant am tgusa deg yedmaren n Melεar. “Iketter xirek, a-εemmi lḥağ ! Iketter xirek ! ” Ay d-astenna s tumert tameqqrant, sakin tekna-d tessuden aqerruy-is, neү εad anyir-is. S wakknni dүa, tettunefk-as tegnit ad iwali s leqreb iffan n Melεar, ad isriḥ tariḥt n tfekka-s d wad iḥulfu s telweү n tcenfirin-is timizwiүin. Tuzzel Melεar ad d-tesker arraw-is ay mazal ṭṭsen taṣebḥit-nni n tfaska, dүa ikcem SiHeffaf s wufrik armi d talemmast n tefragt. Dinna, ikbel aүersiw-nni, iүḍel-it үer tmurt, sakin ijbed-d ajenwi seg wammas-is. Imir-nni kan dүa, ffүen-d s tazzla si texxamt warraw n Melεar ay d-iḍefren s tumert ittmecruruqen үef wudem-is deg tzad thuski. “Cufu kifac ndebḥuh yawlad, cufu !” Ay inna i sin warrac-nni imeẓyanen ibedden lmendad-is, sdat yemmat-sen itturaren s yiḍudan-is s ucebbub-nsen yerwin. Ikna Si-Heffaf үer wufrik, iwelleh ixef-is lewhi n usammar, ikebber tikelt, sakin izla-t u ikker iwexxer akken ur ittames s yidammen. “Xelliweh imut bεeqlu; ki iği Blannif isselxu.” Ay iweṣṣa wid-nni mazal cexcen deg wayen d-asen-d-yuzen Ṛebbi ass-nni n tfaska, sakin issuүel mettwal taggurt n tuffүa. Imir-nni, Nekcaf illa la ittmuqul-d sdeffir n usaber. Maca, wer d-igir maḍi deg wallaүis tikti belli baba-s amүar, amẓallu, amḥağğu, ittnadi үef teḍfiwin timagdalin n ddaw tmiḍt. Yiүil d awway n wufrik-nni kan ay t-iḥettmen ad ikcem. Awway n wufrik ! Dүa wa d awal d-issasen үer wallaү-is yiwet n tikti tağihennamit s way izmer ad yaweḍ үer Melεar : Akka-d-asawen ad yuүal d ukrim u yal tikelt ara d-tezri tugna n tgellust-a sdat wallen-is, ad d-iddem asefk d wad as-t-yawi. Isefkan-a zemren ad ilin s talүa n tmečča neү n yiselsa i warrac d yemmat-sen, neү ula d babat-sen. Izmer ad ikcem yal tikelt d-as-ihwa;

ula mi illa Blannif deg uxxam. Dүa s wakk-nni ara izmer ad issefles medden nwis yenwa kan ad iεiwen tawacult-a taẓawalit. Zerrin wussan rennun d Nekcaf irezzu үer Melεar yal tikelt ara tt-id-iccihwi wul-is. Mti yufa dinna s ugacul argaz-is, ad yerr iman-is yusa-d үur-s akken ad as-indeh үef kra n tүawsiwin iqqnen үer tebḥirt ; mi yufa Melεar iman-is neү d warraw-is imecṭaḥ, ad issedhu wiyi s kra n yilellucen u ad izuүer yemmat-sen deg ufus үer texxamt deg illa yissaw-nni d-yuzen yiwen wass Si-Heffaf d-asefk. Akk-a ihi, ababat d mmi-s keccmen i sin үer yiwet n tmeṭṭut. Maca, wa s tuffra n wayeḍ, u yal wa yiүil d netta kan ay d-ittellүen tiḍfiwin si teүrast-nni n Melεar. Meccan, yiwet n tmeddit n unebdu, mti ibda islaf i Melεar iẓẓlen үef wusu ittwağğen irwi, inul-d Nekcaf s teүmert-is akemmus n tsura. Immeү iddem-itent-id, dүa inmeskal wudem n Melεar mi d-izzi үur-s s ubati. “Acu ay’d yuwin tid-a үer da ? ” Ay ttisteqsa s teqbaylit ay tfehhem ur tettutlay. Nettat tettmuqul-it-id kan. “Hada win xreğ menna, eh ? ” Ay irna isteqsa-tt үas ulamma wer d-iggri ucukku, acku immekta-d belli mi d-yuder үer ubrid ittawin үer tebḥirin, winna d-izrin үef uxxam n Blannif, imlal-d baba-s amcum itteddu-d d asawen. Imir-nni, Nekcaf yiүil deg usefqed ay d-ikka baba-s u wayi yiүil үer usefqed ay itteddu mmi-s. Ikker Nekcaf, umi tuүal teḍfi d tarẓagant, yazzel-d үer uzүar am win d-isxerra kra. Issuүel srid үer uxxam-nsen s yisuraf iүezzfanen, amzun ibүa ad igdel timlilit n yemsebriden meṛṛa, wi bүun ilin. Yuli tisunan үer wanneg deg izdeү. Mi iwweḍ үer texxamt-is, ildi tawwurt s tүawla temmager-it-id tugna wer yuḥtam : iwala tameṭṭut-is Melεuna tefser am tedkent ddaw n yiwen ilemẓi inehhten am uydi isreү yiṭij. Dduqqsen-d am yewtal n umadaү mi akk-n ay teldi tewwurt fell-asen, maca werεad myewexxaren ijbed-itt-id Nekcaf iṭṭfen s sin ifassen aqerruy-is deg simmal irekkem wallaү-is. “Ccah deg-i ! Ccah ! ” Ay iqqar irennu deg yiman-is d yiḍarren-is la ttalin tisunan mettwal aṭiras. D tidett, iүza-y-as Ṛebbi ! Acku dayem ittqiri-d deg yiman-is nwis deg ur-ilaq la isserwat, maca werğin iүtis ad yeg asadel i tnefsit-is tuzligt. Aṭas n yibekkiḍen umi iger irebbi : tissit n yiүisem, aḍfar n tullas, akeyyef n lkif d wayen nniḍen ittcemmiten irgazen, issenkaẓen deg wazal-nsen үas ulamma d-inesbaүuren. Mti iwweḍ үer uṭiras, irfed Nekcaf ixef-is u isked srid үer yifula n ufta afellay d-izrin s kra n yiүallen kan nnig uzedduү-nni icuban deg tehri, teүzi d tiddi үer tүermin-nni n unebdu deg zeddүen yemṛayen imeqqranen n tmurt. D ifula-ya deg treqq tmes n ğihennama ara isserүen tafekka-s ay tjegger tnefsit-is d-ittuṛebban deg tlemmast yumsen deg tuqa tidett d tigdi n Ugellid Ameqqran. Yuẓ Nekcaf armi d iri n uṭiras istwalan үer uxxam n Blannif, sakin ibded dinna, ddaw n yifula iẓruranen. Mmecrurqent wallen-is kra n wakud, sakin uragent-d am tliwa үef wudem-is. Tekcem-it tegdi. Isk ad isemmet tamettant-is ? D awezүi ! Issefk ad yeg taggara i tmeddurt-is tucmitt ass-a. S wakk-a daүen, zun yenүa akk wid ikkin deg ucemmet n tmeddurt-is. Ikukra Nekcaf kra n yimiren, sakin irfed asuүu issewḥacen u ineggez akin i yiri n uṭiras, d asawen үer yiwen ufilu aẓruran ay d-iger ddaw tүerdin-is. Yuzzel uḍru di tfekka n Nekcaf seg d-ffүen yifeṭṭiwjen, sakin seg taẓẓayt-is iqqrem-d ufilu-nni iddu-d d Nekcaf d akessar. Dүa imir-nni ay d-teffeү Melεar d-islan i tiẓẓafin seg texxamt-is. Akken-kan ay tsuү, mti akk-n twala amdan iүli-d үer tama tafellayt n ufrag, iүli-d үef tayet-is ufilu-nni ay tuү izger-d ula nnig uxxam n Blannif. Tergagi tfekka taleqqaqt n Melεar kra n yimiren, sakin trab am tεelğet n ucettiḍ үer tmurt. Uzzlen-d warraw-is үur-s wa s yimeṭṭawen wa s yisuүuten, bran i yiman-nsen үef tfekka n yemmat-sen ittfuṛṛun, mi akkn teẓẓel үef ufilu n ğihennama, dүa ikcem uḍru tifekkiwin-nsen u icwi-ten yir acway. Seg usfaylu n texxamt-is, temmuqel-d Melεuna, d-islan daүen i yisuүuten, twali tugna werğin twala; tugna n tmettant isserkaben tawliwin. Teckenteḍ deg usaber akken

ur tүelli, dүa wer tuḥtam armi d-iүli ger iḍarren-is warat-nni icuban үer uftat n uksum dittwakksen imir-nni kan seg tasilt. Amek ara tsellek ixef-is tura ? Ad t-tejmeε s yifassen-is d wad tawi ad as-tebru үer uүzu n tarda ? Ur үur-s tabүest ad t-tḍasi ula s uḍad-is. Ad traju ar d-awḍen medden ? Yax ẓran akw belli Nekcaf d iεiqer. Xaṭi, ur as-d-teggri ala yiwet n tefrat ; d yir tifrat, maca d tinna ay tuklal, acku ula d nettat d tucmitt. Kan-akken tneggi d idammen, teldi-d Melεuna asfaylu үef twexxer asaber-nni deg teckenter llina, tuli үef yiri-s, sakin tneggez akin, nnig n uүrab, үer tefragt n uxxam n Blannif. Teүli ged-ged үef tfekka n urgaz-is ay mazal ittfuṛṛu seg uḍru-nni la ittazzalen deg-s seg mi d-igla s ufilu aẓruran ittlen i yiүil-is. Mi mḍusant tfekkiwin-nsen, setүen degsent wusman, rgagint kra n wakud, sakin rekdent zun akken ad ğğent times ay tentizedүen ad tnadi yiwen yiwen iүsan-nsent ixnunsen u iglalzen deg yal ini n yihwah. Kra n dqiqat deqqal, ataya s tazzla Blannif ay d-islan i tiṛṛakin d yisuүuten si tebḥirin deg tuү la ittmahal. Mti d-iwweḍ үer tewwurt n ufrag-is, εerḍen kra n medden, inurag d yemsebriden, ad t-id-rren akken ur ittwali tugna-nni isxerrayen, amalah ! Issenser seg’fassen-nsen yazzel mentekref mettwal tarcilt-is d warraw-is iwala d tirect deg tmurt, kra n yisurifen sdat n texxamt n yiḍes. Ur isseqsa yiwen, ula d iman-is, amek mmuten, ur igir tamawt i ufilu aẓruran үef llan. Iwweḍ kan iger-asen irebbi, dүa illezlez kra n tesnatin, sakin inteḍ fell-asen am yidil n plastik ay tsumm tmes. Imir-nni, Zeddiga, yemma-s n Nekcaf, tuү tedha deg tẓallit n lεaser. Yerna daүen tasella-ines ẓẓayet. Гef waya, ur d-tesli maḍi i tiүwisin d yihiten ikkren deg uzүar. Tsuli kan taẓallit dүa ildi-d yiwen wağar tawwurt s tүawla yini-y-as s yiwet n taүect terkeb telwawaḍt : “Anida-t Dda Heffaf ?” Terra-y-as-d temүart belli argaz-is llina kan ay iruḥ үer Tezmalt, maca uqbel ad as-tettunefk tegnit ad t-tesseqsi acimi, ijbed-d urgaz-nni tawwurt yuүal-d үer terbat t-id-yuznen. Si terbat-a, illa yiwen unarag issnen amḍan n tilifun n tḥanutt icrek Si-Heffaf d yiwen di Tezmalt. Dүa yuzzel urgaz-a үer tberna n At-Nekkyan u issawel. Mi as-d-yerra awal Si-Heffaf s timmad-is, ixebber-it srid s wayen iḍran. Ibra umүar amcum i tilifun, irkeb-d takeṛṛust-is mettwal axxam-is. Nezmer ad d-nini asal-nni iүli-d am tegnewt үef uqerruy n Si-Heffaf, acku yuүal am win umi ijeqqeq wallaү ; ur iḥulfa s kra ay ttḍasin yiḍarren-is d yifassen-is, ur iskid s yeẓri-s wi illan sdat-s wala wi illan deffir-s. Zun d aradi n Ṛebbi ay d inehren. Kra n 500 n tmitratin akin i yeүrem n Tezmalt, abrid ukeṛṛus tuү tezri fell-as rraya n tmacint. Si-Heffaf ay tuү iṭṭeglelli seg mi isla s twaүit d-irzan fell-as, izerzef-d am teldunt lewhi n umkan-nni deg imlal ubrid n ukeṛṛus d win n tmacint. Ur isli i uklakṣuni la d-ittaẓen, ur iskid tafaragt iqqnen, deffir wanita tuү ttṛajunt tkeṛṛsin d yikamyunen. Izri үef yidis n uzerrarug n wi meṛṛa s uzerzef, iwwet tafaragt-nni iqeccem-itt, sakin imseqsaq u-Mercedes amcum d uqerruy n tmacint d-ikkan seg Bgayet. Ceεlen-d yifeṭṭiwjen gar-asen, sakin teṭṭerḍeq tkeṛṛust am tbumbiḍt u tekker deg-s tmes. Mti teḥbes tmacint kra n 20 n tmitratin akin i umkan n tyita, uzzlen-d medden seg yal tama afen amүar ixnunsen seg yidammen-is ireqq gar yiḥedren n wuzzal n uMercedes-is. S imir ay uzzlen kra n yimeskeṛṛusen wwin-d tisexsayin si tkeṛṛsin-nsen, teṭṭef tmes ugar deg u-Mercedes-nni deg tella tfekka tar iman n Si-Heffaf. Skud la ttbexxiren i tkeṛṛust tamcunt s yikufften isemmaḍen n tsexsayin-nni, skud la tzehher deg-s tmes, zun d asiwel ay d-tessawal i medden i wumi teqqar : “Ğğet-iyi ad skenfeү idisan-is, ğğet-iyi ! Yax dulaqrar d timsi ara iččen tafekka-s ”. Гer taggara, mi tekfa tmes tawuri-ines, texsa iman-is, dүa uẓen medden, maca ur ufin ar ad d-kksen akken ad as-semmin xersum amettin. Deg uxxam, Zeddiga tuү tella gar medden d-yusan ad tt-wansen deg twaүit d-irzan үer wid ukud tettidir. Ssnen-tt meṛṛa deg temnaḍt-nni d tameṭṭut zeddigen ; d tin ur issawalen tikerkas, ur ittegen tixidas. D tin iẓẓlen afus-is iččuren үer umattar. D tin igan aүbel i kra illan d amasar. Nezmer ad d-nini belli Zeddiga d tajeğğigt d-imүin deg wammas n ugudi. Teğğuğeg teččar azwu d-izzin s tariḥt ilhan d-ijebden medden ass-a.

Mti d-iwweḍ usal n tmettant n urgazl-is, tcehhed Zeddiga, terfed allen-is ismiṭṭiwen mettwal igenni d-ittbanen seg usfaylu n uṣalun, tini : “A-Ṛebbi a’wer iyi-d-tqiseḍ үef wayen ur giү !”, sakin tebra i tiṭṭawin-is tsusem. ______________________________

Dictionnaire: - abekkiḍ - afilu - afta - agacul - agdil - allal - aluleү - amaḍlan - amadlas - amahil - amasar - ambur - amettin - amgaru - amussu - anarag - anefḍam - anesbaүur - anga - anneg - arat - arawsan - arezg - asaber - asefk - asfaylu - asrag - ataram - azdir - azedduү - aẓruran - azwu - azүar - aүdebbu - aүersiw - aүrab - gdel - igumma - iman - imidis - issaw - krayan - lidiw - meccan - mennawt - nmeskal - nneḍran - nwis - rket - rẓem - segmeḍ - semmet - sesten - setti - steү - tabaүert - tadabut - taḍfi

- péché - file - tension - hasard - vitre - moyen, outil - risque - mondial - semaine - travail - nécessiteux - clibataire - un mort - guerre - mouvement - voisin - frustré - riche - matériel - étage - chose - neutre - chance - rideau - cadeau - fenêtre - heure - ouest - rez-de-chaussée - domicile - électrique - atmosphère - dehors - accent - animal - mur - éviter - légume - âme - un proche - lit - quelqu’un - au lieu de - cependant - plusieurs - se transformer - se retourner - que - pétrir, tourner - ouvrir - conclure - annuler - questionner - grand-mère - étinceler - richesse - table - plaisir

- tadmi - tafaska n yiүras - tafesna - tagnewt - tahuski - tallunt - tamagdalt - tamesgida - tamnaḍt - tangellust - tar - tarcilt - tasiwelt - tawuri - ti - timidiwt - timsi - tinnubga - tiṣki - tisunan - tiүerүert - tumert - ukrid - usman - үtes

- pensée - Grand Aïd - degré - foudre - beauté - tambour - illicite - mosquée - région - ange - sans (f) - épose - discussion - effet, travail - grand-père - amie - enfer - invitation - construction - escaliers - plate-forme - joie - unique - éclairs - décider

_________________________ Blog: http://thaqarvuzth.unblog.fr