Man Leh Mual.docx

Mizo Man Leh Mual Zoram dung leh vangah tihdan leh hmandan a lo thuhmun vek lem loh avangin N.E Parry ICS, Superintendent in dan a siam kha ani e. I Manbi : 1.Sailo man se sawm. 2.Zadeng,Thangluah, Palian,Rivung,Rokhum se riat. 3.Pachuau,Chuaungo,Hrahsel,Chhangte,Vanchhawng, Tochhawng,Hauhnar Se sarih 4.Chhakchhuak, Ralte Lelhchhun se ruk 5.Ralte hnahthlak leh hnamchawm dang reng reng se nga Hmanlai chuan pawisa a van em avangin sial chu tehkhawng pawimawh takah an lo hmang thin a, hetiangin 1. Se nufa – Cheng sawmruk hu a ngaih a ni. 2. Sepui – Cheng sawmli hu a ngaih a ni. 3. Tlaisial – Cheng sawmhnih hu a ngaih a ni. II Mantang: a) Sailo Mantang : 1.Pusum : Cheng sawmli (Sepui) 2.Pala : Cheng sawmhnih (Tlaisial) 3.Ni-ar : Cheng sawmhnih (Tlaisial) 4.Naupuakpuan: Cheng sawm 5.Thian man: Cheng sawmhnih a ni ber a, inbiakrem dan

b)Hnam dangte : 1.Pusum : Cheng ruk 2.Pala : Cheng nga 3.Ni-ar : Cheng nga 4.Naupuakpuan: Cheng li 5.Thian man: Inbiakrem dan ang ang 3. Sumfang malkaih : Mantang zinga sumfang tel ve hi pa chanpual liau liau a ni. Unau zawn nan midang a eitir thei. 4. Sumhmahruai : Mantang/Manbi-ah a tellova, a piang ve hrim hrim a ni. Pa-in a duh chuan a pianpui tuemaw a eitir ber.

Dantlangpuiin nula pangngai manbi hi mahni hnam dan bak chu tihsan a ni ngai lova, huasak vangin emaw hmelthat bik vangin emaw miin man lo tisang bik se “Man chuang ei an ni ngai” an ti a, fanau an tluang ngailo tih a ni thin. Mahse man hi pundan leh kiam theihdan a awm ve bawk a. A chhante chu:1. Thisen pal : Hmeichhe pasal nei a kir leh hi fa la neih hman loh chuan “Lengleh” an ni a, Pasal dang nei leh dawn se an man a kiam chuang lova.

Amaherawhchu pasal nei kir leh khan fa lo hring hman sela, a fa chu a dam emaw a thi emaw pawh nise “Thisen pal” an ti a, “Hringkir” an ti bawk a; Nuthlawi an nih avangin an man chu cheng sawmhnih (tlaisial) in a kiam tawh thin. 2. Lamthlang rapthla : Hmeichhia pasal sun hian thisen pal kher lo mahse mite hnualsuat an kai bik a, pasal vawihnih lo sun tawh phei chu pathum ngei ngei turah an ngai a, an thinhrik tawh thin. Pasal dang lo nei leh dawn ta sela an man chu tlaisialin a kiam tur a ni. 3.Sebomawh : i)Tlangvalin sawn thlak sela, a sawn thlakna nula chu nupuiah neita bawk sela, sawn manah cheng sawmli nilovin cheng sawmhnihah a tlahniam ang. Amaherawhchu man pangngai aiin cheng sawmhnihin a chawi tam tho tihna a nih chu. ii)Nulain tlangval lo fanin emaw lo inru sela, a tlangpui thuin hetianga lo mualpho tawhte chu nu leh paten an dal tawh ngailova, mahse hmingchhiat manah cheng sawmhnihin a pung thung ang. iii) Miin nula unau zinga a naupang lam nupuiah lo nei sela, charsut phawi manah cheng sawmhnihin man a pung ang. Heng sawn mante, infan/inruk, charsut phawi mante hi inthen thulhah pawh fanghma no ei a ei chi a ni a, chu chu ‘Sebomawh’ an ti.

Sum a van em avangin chengkhat hlutna pawh a sang a, chuvangin nupui man pe tlak thak thei chu an vang em em a. Dan naranin cheng sawmruk(se nufa) tlak thei an vang em em a, cheng sawmli(sepui) nei chin pawh an hmai a uang a. Mi-naran chuan cheng sawmhnih (Tlaisial)an tlin thei hram thin. Chutianga man leh mual inpek theih zat leh an bat dante chu hetiang hi a ni:1. Sum zan lut: Hei hi inneih ni a moneituin sum a pek theih zat kha a ni. Tlaisial pawh tlin zo lovin cheng sawm emaw lek a zakham thei hramte an awm a, chu chu tihelna ang deuhin “Puisawm sial” an tih sak thin. 2. Kawtchhiah : Inneihni khan cheng sawmli(Sepui) lo tlak thei hram sela, cheng sawmhnih(Tlaisial) chu mopa nauvin nupui a neihvena ngei a pek turin a hmeichhe pa khan “Tlaisialin ka kawtchhiah e” an ti thin. Hei hi “Nau hmakhalhna” an ti bawk. 3. Hmara se bu lo nghah : Nupui man kha chumi khami hunah kan tlak ang chu an ti a, inhnemna dang avang bawk si a. Hmeichhia chuan an pasalte in atangin an thawk chhuak ang a, fanu man mante an la nei ang a, pahriat sawn tal an la pai ang a, tih chu an innghahna ber ni ta se la, chu chu “Hmara sebu lo nghah an tih chu a ni. 4. Man aia chawm :Mi tu emaw chu chawmtu nei lo sela, a belh tur neih chhun chu a makpa chauh ni ta sela; intiamkamna fel tak siamin a makpa kha lo bel ta sela, a-nin lo chawm hlum ta sela. A makpa khan man ba a tlak bakah a pi leh pu ro zawng zawng pawh a khawm vek ang, chu chu “man aia chawm” an tih chu a ni. 5. Makpa hnamhrual chat : Mi tu emawin nupui lo sun se, nupui dang a neih leh hma chuan a nupui man bat kha pa pangngai chuan an thing duh ngai lova, “Makpa hnamhrual chat siala kan zawm sak zet loh chuan a dik ngai love” an lo ti thin a ni. Chutiang ni lova nupui-suna thawh chhuah hmasak lak sak tumtu kha chu khawtlangin an dem rawn thin.

Source: Hmanlai Mizo Nun by C.Lianthanga