Bma Aw: 29th April 2007

Editor: James CVL Thafamkima Jt. Editor : Madawnga Hauhnar Cir.Managers : Lalhriatpuii, Margaret L Fanai & Ruby Lalremruati

Vol XII Issue No. 16

An Official Organ Of The Bangalore Mizo Association. Registered Under Societies Act Of Karnataka No.415/85-86 Dated February 20, 1986. Bangalore Mizo Association Pathianni Tin Chhuak Chanchinbu

Pu R Lal Rinawma Chawimawina Hlan A Ni Hman atang daih tawh Rev K Lalrinmawia (Kungi Pa) (ani hi tuna ATC-a Lecturer ni mek khi a ni) te ho pawh tlangval an la nih lai, keini phei chuan nulat tlangval hi enge a awmzia pawh kan la hriat hma hauh atang tawh khan Bangalore Mizote tan hian theihtawp chhuahin hna a lo thawk tawh thin a. A tlatna mual a piangah Mizote tan hruaitu nih tling leh Leadership nei tha tak a ni. Tun hnai maiah pawh a sulhnu belhchian dawl tak tak chu Bangalore Mizote chanchinbu Chhinlung Vol XVIII-na (2006-07) leh BMA Website thar -ah te kan hmu a. Ram pawna mizo awmte tana a thil tha tih tawh avang te a chawimawi phu hliah hliah Pu R Lal Rinawma chu Pathianni hmasa (22.04.2007) khan Mysore-Mandya Mizo Congregation te chuan chawimawina an hlan a. Ani hi tunah hian BMA Patron a ni mek a, tin MysoreMandya Mizo Congregation-ah Patron a ni bawk. Mysore Mizo Aw-in Pu Rinawma chawimawina hlan a nih dan leh hlan anih chhan chu heti hian an ziak a : "Pu R.Lal Rinawma Chawimawina hlan a ni" Vawiin Mysore-Mandya Mizo Inkhawmah khan Pu.R.Lal Rinawma chu Mysore Mizo Zirlaiten a hna lo thawh thatna te, Ram leh Khawtlang leh Kohhrana a rawngbawlna ropui tak leh lehkhabu Ro tling, “Thalaite Hmasawn Nan Career Leh Zirna” tih chu Mysore a awmlaia a ziah avang te-in Chawimawina Thuziak an hlan a;Mysore Mizo Aw Editorial Staff chuan thinlung takin a lawmpui em em a ni. Pu Rinawma hi pa titi thiam leh kawm nuam tak, thalaite hmasawnna tur a nih phawt chuan tlanchhe ngai lo; thalaite bula awm nuam timi; mi zawng zawng ngainat a ni a; kum khat erh awrh a lo awm hnua-ah hmuh theihin Mysore leh Mandya-a zirlaite kan thang awk awk nghal a; Leilung pian tirh ata la awm ngai reng reng lo Joint Inkhawm kan neih theih phah hial a, mi huikhawm tura a thawhrimna hi a chhuanawm lawt lak a ni. Ram leh khawtlang leh Kohhran-a a inhmanna leh a nihna chelh zawng zawng hi kan sawi seng lova; a then a zar chauh kan han tarlang e:? ? ? ? ?

E-mail: [email protected] Phone: 988627194/9844389882 Website: www.bangaloremizo.info A man: Rs 15/- per month.

Khatla Veng (Aizawl) YMA Secretary-3 Terms Zamzo Magazine (Pune) Editor, 1980-81 Chhinlung (Bangalore) Editor, 1990-91, 2006-07 Founder Chairman,Pune Mizo Christian Fellowship: 1981-1986 Chairman (Tunah President an ti tawh), Bangalore Mizo Christian Fellowship, kum 7 chhung (1988-89 to 1994-95) ? Sr.Adviser, Bangalore Mizo association:1988-1996, 2006-2007 ? Vice Chairman, Bombay Mizo Christian Fellowship: 1996- 97 & 1997-98 (2yrs) ? Chairman, Bombay Mizo Christian Fellowship: 1998-99 to 2005-06 (8yrs) ? Vice President, Mumbai Mizo Association: 1996 - 97 & 1997-99 ? President, Mumbai Mizo Association: 1998-99 to 2005-06 ? Co-founder and Content Developer mumbaimizo.org website, estd: 2001 ? Moderator, bangaloremizo.info website, estd: January 1,2007 ? Adviser, Zawlbuk online group leh zawlbuk.net website enkawltu zinga mi. ? Board of Management member 1988-1990, Bishop Cotton School. ? Board of Governor,The Cathedral & John Connon School, Mumbai-ah 1999 atanga tun thlengin a la tel; Mizo zingah a hmasa ber a ni. ? Staff Selection Commission hna lakna-ah Interview Board member a ni tawh bawk. ? Tunah hian BMA Patron a ni mek a; BMCF Exe. Member a ni bawk a; Mysore-Mandya Mizo Congregation-ah kan Patron a ni mek bawk. (Pu RL Rinawma chawimawina hlan anih chungchangah BMA chuan lawmpuina a hlan mawlh mawlh a. Mysore lam zirlaite pawh a nachang an hriat avangin an fakawm hle a ni. Pu Rinawma duhsakna kan hlan a, hun lo la awm leh zel turah pawh Mizo Community tana thahnemngai tak a thawh zel theih nan leh a hna-ah te tluang taka a thawh chhoh zel nan hriselna tha leh hlimna kan duhsak tak meuh e)

Date: 29 April 2007

KEIMAHNI ** BMA AW Circulation Manager thar atan Nl Ruby Lalremruati chu ruat thar a ni a, ani hi UVCE-a Engineering zirlai mek a ni. Warm welcome to BMA AW… ** Kan member Pi Lalpianmawii chu nimin khan KC Hospital-ah a chhula bawk awm paih a ni a, hlawhtling taka zai a ni. A thatchhoh leh thuai kan duhsak tak meuh e. Ani hi Shalom Hostel neitunu a ni. ** Kan member Shalomi pa Pu Timothy Thanchungnunga, Lunglei khua chu Velloreah kal lam tha lo vangin a awm mek a. Tin, Pu Singthangpuia pawh khan that lam a pan hleithei meuh lo bawk a. Kan tawngtainaah damlote i hrereng ang u. ** Rev Vanlalthlana leh Nu Mapuii U Pu Zahmingthanga te chuan In lama inenkawl chhunzawm turin Vellore an chhuahsan ta a. Damlote tan leh an chhungte tan bang lova tawngtaina hlan zel turin kan inngen a ni. Rev Vanlalthlana hian Chemotherapy First Cycle kha a tizo lova, Second Cycle leh Third Cycle In lamah a han tihzawm anga, tichuan chumi zawhah Vellore lam an rawn pan leh dawn a ni. Damlo tawngtaipui ngai kan tarlan loh hria chuan a chunga phone number tarlanah khian min han hrilh thei ula kan lawm ngawt ang. ** Nimin 28th April khan Koramangala Police Ground-ah BMA leh Kuki ten Football an khel a. Inkhelh tan hma hian Pu K Lalrokima BMA President chuan thuchah tawi sawiin tawngtaina hun a hmang a.Inkhelh hi dar 4:15ah tan a ni a, BMA Team hian 7-2 in an hneh a ni.BMA lam tan pet goal tute hi Robert-a, Zaia, R-a, RK-a, Joar leh D.Dawnga te an ni. ** 26th April khan kan General Secretary Tv Laltlankima leh Nl Lalbiakliani Pautu te chuan Pathian hmaah "thih thlengin i tan" tiin, a nuam leh a hrehawm pawha indawm tawn zel turin "tiam tlat e" an ti ta a. May 9th hian Bangalore an thlengthla leh ang. A phur zualpuiin turu taka helamah pawh lawm tum a ni. BMCF INKHAWM PROGRAMME May 6th, 2007.

Hruaitu : Pi C Rothangpuii Tantu : Nl Jenny Lalawmpuii Pachuau Thilpek Hlantu : Tawngtai rual Special Item: Nl Mimi Renthlei Thuhriltu : Rev Dr K Sapthanga

Editorial Sawi tur avang em mai 'khawlum' chanchinin i sawi ang u. Mi zawng zawngin an buaipui leh an sawi huai huai a ni bawk a. Tun hnai maia India hmar thlang lam panga khawlumzia kha i lo hre ve em ? Hmun hrang hrangah kumin hian degree celcius 6 ngawt tein temperature a sang nia !! Hetiang a nih chhoh zel chuan khawvel hian rei a daih lo mai ang tih pawh hlauhawm khawp a ni tlat. Kum rei loteah khawvel hi chenna tlak loh khawpin a lum thei a ni tih hi i ngaihtuah ngai em ? Thingphun uar a hun a… Green Mizoram thawm hriat a van chakawm ve..

Dawn Tisei

(A hnuaia thu inziak hi chhiar la, I finphah sawt loh pawhin I mawl phah sawt chuang lovang) Zan khat chu zan reh tawh tak maiah hian America ram khawpui pakhat kawtthlerah hian pa pakhat leh a fapa naupangte mai hi muangchangin an rawn kal a. Indo lai a nih avangin chu kawtthlera tukverh hrang hrangah chuan an fapa indona-ah a kal ani tih lantir nan arsi an khai hlawm a. Chutia, tukverha arsi khai chuan an fapa chu ram tana thawk turin a penchhuak a ni tih a lantir a ni. Chutia tukverh tin deuh thaw a arsi inkhai a han hmuh chuan naupangte chu a hlim hle mai a. Tukverh thenkhat, arsi pakhat aia tam inkhaina a hmuh phei chuan rang takin a pa chu a kawhhmuh a, a kut te bengin a hlim tak zet a. Chutia an kal lai chuan In din hauh lohna lai hmun awl hi an rawn thleng ta a, chulaia an kal lai chuan naupang chu a han hawichhuak a, thim hlima arsi lo chhuak hmasa eng zet mai pakhat chu kawkin a pa chu a han kawhhmuh a, " Enteh ka pa, Pathian pawhin a fapa a pe ve a ni ngei ang, a tukverhah arsi a khai ve anih khi" a ti a. Vawiin hian hei hi hrenawn thar leh ila ka ti : "Pathianin khawvel a hmangaih em em a, a fapa mal neih chhun a pe ta a, tupawh, amah chu a ring apiang an boral lohva chatuana nunna an neih nan".

ZORAM LAM CHANCHIN ** Mizoram sorkar hnuaia 'Group 'A' officer-te chuan an lungawi lohna ching fel tura sorkar nen inremna an neih hnuah an thu dah, an hriatpui lova tidanglam lehah sorkar an puh. Hemi chungchanga thuchhuah, Inrinni-a Aizawla an siamah Group 'A' Officers Coordination Committee chuan he inremna, sorkar nen an siam fel hnu hian an thil phutte tipuitling turin sorkar chuan hma a la dawnah an ngai tih an tarlang a, amaherawhchu hetih lai hian sorkar chuan an hriat lohvin, Engineer Association lam a lo berawn a, a hma lama an thil sawiho bak, hamthat lehzualna Engineer-te

pek a tum niin an sawi. Group A Officer te chuan hei hi an ngaih thiam loh thu sawiin hemi chungchang ngaihtuah ho tur hian May ni 10 chawhnu dar 1-ah Agriculture Conference Hallah General Body meeting an ko tih an sawi bawk. ** Zirtawpni khan Rabung bul, Labour Camp-a awm hmeichhe pakhat chu misual pakhatin Ulhbun silai nena vauin a hruai chhuak a, hemi hnu hian mi thlama hruai-in a pawngsual zui ta a ni. Champhai-a Police hotute hnen atanga thu dawn danin, he hmeichhe hruai chhuaka pawngsualtu hi Rabung khua, V.Lalmalsawma a ni a, Police-te chuan a silai leh a chuanna Scooter nen hian Rabung-ah an man a, Khawzawl Police station-ah hruaiin pawngsual leh thubuai dang rit tak an siamsak a ni. He Labour camp-a awm, hmeichhe pakhat a hruai chhuah a, a pawngsual zui tak hi pasal nei lai a ni a, V. Lalmalsawma pawh hi nupui nei lai, fa pawh 3 nei a ni a, Police te hmaa a inpuan danin hetianga rawng tak leh zahthlak taka thil a tih na hhan hi a ruih vang niin a sawi a ni. ** Mara Autonomous District Council inthlanpui, kar leh Ningani-a neih tur atana campaign chuan a vawr tawp a thleng tan ta a, he inthlanna turah hian MNF chuan sorkar ngei tumin nasa takin tan a la mek a, Congress leh an thawhpui Mara Democratic Front (MDF) pawhin sorkar ngei tumin theihtawp an chhuah bawk a ni. Hetih lai hian Mizoram People Forum (MPF) pawhin inthlanna dik leh fel fai, sum hmanga vote lei awm lohna leh invauna leh thil diklo awm lova, thianghlim taka inthlanna neih theih nan tan an la chho reng a, hmun hrang hrangah Local Forum an din tawh a, heng mite hian thil tih dan fel lo awm thei an thlithlai reng a ni. Saiha District-ah MPF hi an President, Rev. P. Riabi, Senior Vice President, Dr. K. Beichhua, Vice President, Upa C. Zohupa leh Secretary Rev.Rammawipuia ten an kaihruai a, tun thlengin an thothang a tha-in thil pawimawh chi hrang hrang an bawhzui a, chung zingah chuan Party hrang hrang aiawhte kawm, Candidate ho kawm leh Inthlanna buaipuitu tur Returning Officer leh mi pawimawh dangte titipui chu an zo fel tawh a, hetah hian sum hmanga vote lei tum loh a tul thute, invau leh innawr luihna lam chi tel lova, mipuiten an duh dan ngeia thuneitu tur thlang tura chanvo leh dikna an neih an hman theih thute sawiin, an duh dan thlawp turin party hruaitute leh an mite an ngen a ni. ** Eptu Party 3, MPCC, MPC leh ZNP thalaiten Zirtawpni zing dar 5 atanga Mizoram pum huapa bandh an huaihawt avangin Zirtawpni khan Mizoram hmun hrang hrangah khawsak phung pangngai a khaihlak a. Aizawl khawpui leh District Hqrs hrang hrang leh Sub-divisional

ah te bandh hi mipuiten an thlawp tha hle a. Bandh neih chhung hian Aizawl khawpui, District Hqrs khawpui hrang hrang leh National Highway -ah te lirthei a tlan lova, Aizawl Silchar kawngpuiah pawh lirthei tlan a awm lo a ni. Bandh neihna hmun tinah Sorkar office, zirna In, Bank, Dawr leh sumdawnna hmunte khar vek a ni a, Bandh huaihawttu leh Dan leh thupek kengkawhtute tih loh chu khawlaiah hmuh tur an awm lova, Bazar pui leh thlai leh sa zawrhna hmunte pawh a ruak vek a ni. Bandh huaihawt anih nachhan hi Mizoram Inthlanpuiah tharum hmanga invauna lo awm thinte mipuiin an duhlohzia lantirna a ni.

FOOTBALL THLIRNA

Nizan lam inkhel result: Blackburn 4-1 Charlton Chelsea 2-2 Bolton Everton 2-4 Man Utd Man City 0-2 Aston Villa Middlesbro' 2-3 Tottenham Portsmouth 2-1 Liverpool Sheff Utd 1-0 Watford Wigan 0-3 West Ham EPL Fixture : Sunday, 29th April Arsenal vrs Fulham 16:00hrs Monday, 30th April New Castle vrs Reading 20hrs UEFA Champions League result : Man U 3-2 AC Milan Chelsea 1-0 Liverpool

KNOW YOUR MIZORAM

** Mizoram Chanchinbu chhuak hmasaber chu 'Mizo Chanchin Laisuih' tih a ni a, kum 1898-ah Capt J Shakespear-a kaihhruaina hnuaiah kutziak phek li laia tihchhuah thin a ni. A pahnihna chu 'Mizo leh Vai Chanchin" tih a ni a, thlatin chhuak chanchinbu tihchhuah hmasaber a ni a, Capt J Shakespear-a tihchhuah a ni. ** Tun dinhmuna Mizoram nitin chanchinbu copy tam ber chu Vanglaini a ni a, Editor hi K Sapdanga a ni. Kartin chanchinbu copy tam ber chu Lelte a ni a, C Dinthanga tihchhuah a ni. Lengzem (Editor Vanneihtluanga) leh Diktawn(Editor- Lalhmachhuana Zofa) te hi thlatin chanchinbu copy tam ber an ni.

w w w .h u a ta w ih loh .com .....

(a hua hua chuan in hua a ni mai..) ** Aizawl lam atanga vawksa rep thami Nl Teremi ta tur lo thleng chu chin hriat lohvin a bova, Nl Teremi hian FIR thehluh a tum mek niin thu kan dawng. ** Nimina pel goaltupa D.Dawnga of Wisdom Home hian KR Puram aia nuam a awm lo a ti e an ti……. ** Pu Rengpuia hian Kekawr a kawng 36, a sei lam pawh 36 bawk a ha e an ti - source Rev R Lalnunzira