Bma Aw: 24th May 2009

BMA AW An Official Organ of The Bangalore Mizo Association Registered Under Societies Act of Karnataka No.BLU-S188-2007-08 Date 7 May 2007

Vol. XV Issue No. 8

Bangalore Mizo Association Pathianni Tin Chhuak Chanchinbu

Mizo Thalaite leh Tunlai Khawvel Khiangte

- Laltlanzova

Old Trafford leh Anfield lo hre bel ve laklawh tawh tan chuan Lammual-a chhir khuk luih luih leh mahni vênga ball liam ûm luah luah chu a zia lo deuh tlat tawh a. Vai ram cinema hall lianpui puia Hollywood film chhuak thar en paha chânâ lo hmawm ve hmak hmak tawh tan cinema en tur neih ve miah loh chu a khawharthlak lo thei lo. India ram khawpui hrang hranga intihhlimna hmun hrang hrang lo chuan bel ve laklawh tawhte tân tlang chhipa han hawi thawven vûk vûk ringawt pawh a ’satisfaction’ a sang vak tawh lo maithei a ni.Miin Disney Land an tih laia City Park zimtea chhas-te nena lo vei nulh nulh chu tunlai chhanah a ‘nice’ tawh loin a lang si a, dai panin an han tlan chhuak ve vut vut a, khawtlang duty mit an tikham a, an lo hrâwk hrep si!Samsei lamin Fashion TV leh Korean Film an lo en ve laklawh tawh a, Paris leh Seoul khawpuia an thuamte an han entawn ve thuai a. Mahse le, fûr a lo ni a, lamlianah tui a tling piu piau a, an nalh tih ngaihtuah ve loin lirthei an lo khalh si a, an han chil per tlawrh mai a, ram danga han inpenparh daih chakna rilruin a fan rem rem awm e. Internet lama inbiak tawn an han ching chhuak a, pulpit tlânga lo sel tawk an awm a, sual hnathawha lo puhsak ta chiam chiam tawk lah bo lo! Intihhlimna dang zawnga ‘Pool’ an chin chhuah lahin sêlna ankâ an do zawh loh vang nge, an income-in a pha lo; an til tiak leh deuh duak a. "Lehkha i zir that peih loh chuan hlo i thlo mai ang," tia nu leh pate lo tihthaih fo, officer lian nih tum tura school leh vantlang inkhawm zawng zawnga fuihna thu lo dawng ve laklawh khan lehkha an han zirchhuak ta sap sap a, chuti ngawtin officer a lo nih theih reng reng loh! A officer hna bera kha a vang phauh mai a, post graduate vâl pawh an chuang ta phung mai a, thawh tur hre loin an tei suau suau a. An ram hruaitute chuan, "Hmun dangah hnâ thawk ngam rawh u," tiin an fuih a, "Ram danga kan thawh a ngaih lohna turin kan ramah hian hnathawh tur a siam theih ve lawm ni?" an han ti dek dek a, ram hruaitu fa nikhua vak lo neite leh thawh tur hre loa an tei rawlai hmutute’n, "Tunlai thalai mut nachang hre lo, thawh nachang hre lo," an ti zui hrep a, thla êng thlir voh voh chunga "van a duai mange" tih vung vung bak tihtur a tam tawh lo. Hlo han thlo dawn se, hlo thlo lo tura thluak suk hmin vek tawh an lo ni si a, hna hniam han thawk dawn se officer lian ni tura fuih an lo ni ve tawh si! Nu leh pate an lo pui vak bik lo nen; nupui neih a lo hun chho a, inneih hlimah nupuite’n thenawm khawvengah second hand an zuar kual a, nu leh pate pawisa dil duk duk a hrehawm si, pa viau a har tawh a ni. Mizo thalaite hian an ramah ngei hian harsatna an tawk nasa mange! Khawvel tukverha dâk pha turin fuihna an dawng a, khawvel tukverhah an ram a dâk pha si lo. Khawvel pang lehlama thil thleng hre lo thei loin media-in a umzui zêl tawh si a, an ramah khawvel pang lehlama thil thleng ang a thleng tlem si! Media thlipui tleh an tlanchhiatsan thei lo va, an beng an hup thei hek lo va, mi rama thil ropui tak takte an hmuh laiin an ramah chuan ‘awm’ aiin ‘awm lo’ a tam zawk si! Mi fate’n thian kawm na’na beer an thlit phuan suah suah leh an thlit sen phât phâtte media hmangin an hmu ve reng a, mahse anni chu an khawtlang nunin a permit ve lo. Park nuam taka nula tlangval lengho dial dial te, cinema chhuak thar ber ber an thlir dan te, Information Technology hmanga nunphung changkang tak an neih tawh te, khelmual tha pui puia an inel dan te, an khawpui thianghlim leh changkang tak te, hnathawh duh tan pawha ‘opportunity’ tamzia te, an changkanna leh hma an sawnna zawng zawngte an hmu ve vek a, mi tihdan tha an zir ve dawna a theih

Date: 24th May 2009

miau si loh chuan a chhelai an zir leh ngawt thin niin a lang. A thenin midumho hla chham leh an nundan nia an hriat uchuak deuhin an zir a, a thenin Paris khawpui vela model-ho khawsak dan nia an hriat, media-a an hmuh ang ang an zirchhawng a, a thenin khawchhak nula tlangval nun dan nia an hriat an zir mek bawk. An khawtlangin a zirtir tam ber chu Kohhrana inhman leh khawtlanga inhman a ni a, a tha viau; mahse, tam takin inkhawm reng an lo peih si lo va, chhun leh zan zawma khawtlanga inhman pawh an peih full thak lo va, engemaw tihtur an zawng lo thei lo va, an châk zawng tam tak chu an hmuh phak si loh avangin tam tak chu tihtur ber hre loin, ‘going where the wind blows’ an tih ang deuhin, thli chhemna lam lamah an phe kual ta vel mai mai a ni awm e. Youth Icon a lo lar a, an ngaihsak hum hum a. Mizo Idol a lo chhuak a, an buaipui leh dual a. Europe khawmualpuiah leh khawvel pumah inkhel lar deuh a awm chuan buaipui leh dual a ni mai a, mobile phone, computer leh lirtheite pawh tangkai taka hmang ai mahin an nun za tihrehna atan an hmang nasa niin a lang a, hetiang khawpa Mizo thalai tam takin nun innghahna nghet (principle) an neih loh chhan leh kawngdik an zawh loh chhan hi vei tham a tling ta. A duhthawh deuh keini ang phei chuan hman deuh atang khan mipat hmeichhiatna hman sual te, sex video te, sex photo-te a lo lar chhoh chungchangah hian rin dan kan lo nei a, ngaihdan hrang nei theuh kan nih avangin hnial duh tan pawh a hnial theih ang. Chu chu hei hi a ni. ‘Mizo thalaite tan an thisen lum tihrehna tur hi an ramah a vang em a, nula tlangval leng khawthawng duhte torchlight nena umzuite kan ching a, Valentino Rossi-te leh Michael Schumacher-te lo ngaisang ve tumhrang tawhte tan lah khawpui chhunga bike leh car-a lo intlansiak ve vak a rem si lo; picnic leh party lah a nawlpuiin kan hnualsuat ropui si a, zu leh beer-te lah dan ang chuan vana rah ang a ni si a, thiante nena cinema en dal dalna tur leh han len za hona tur park nuam ve deuh takte lah a awm bawk si lo; a rethei deuh phei chu han intihlim ve dawn se; picnic spot leh huan nuam deuh lah mi hausate ta a ni deuh thup vek si; restaurant-a chaw han eikhawm dal dal dawnin nu leh pate chawm tawk tawk thalaite tan chuan tlin reng chi a ni si lo; an tha za bawk si hi man nei lo hlimna lam hi an um ta ruak ruak mai a ni lo maw? A ruk a rala mipat hmeichhiatna hmang turin sum pai a ngai tam tawh der mai si lo va, porn movie leh Hollywood film-a an khawsak dan zawng zawng hre ve vek thalaite hi kan um chep phak tawh lohnaah an hmuh leh hriat ang hi an practice tan ta a ni mai lo maw?Mipat hmeichhiatna hman sual hi Pathian duh loh zawng, natna tha lo tidarh theitu a ni tih kan hre theuh a, thalaite he lama an tlan chiam lohna tur hian Kohhrana inhmang tur leh khawtlang tana inhmang tura fuih zel hi a tawk em? Anmahni kohkhawma zilh hau leh hauh chiam ai chuan an thalai thisen lum tihreh vena tur zawnpui a sawt zawk ang em? A zilh hautu apiangin an that lai hun leh tunlai thalaite tehkhina dem chiam ringawt mai te, thalai zawng zawng nikhua tawh loa ngaih fai puk mai te, tunlai khawvel sual tawhzia sermon chiam chiamte hian thalaite hi kawng dikah a hruai meuh em ni le? An mamawh hriatpuia phuhruk dan zawnpui a sawt zawk lo maw? Thalai zawng zawngin khelmual tha an buaipui vek emaw ti tlat pawlte pawh an awm a, khawvel hmasawn dan mila hmasawnpuitu leh zirtirna tha ziktluak pe theitu ram hruaitu leh nu leh pa an mamawh ngawih ngawih a ni. Thalaite fuihpawrh theih tawka ngai te, khelmual tha hmanga tihlungawi tawka ngai te, eng commission emaw hmanga hruai dik tumte pawh an awm a, mahse Mizo thalaite hian an hmuh leh an benga an hriat khawvel changkang chho zel mila an ram hi a kal ve an mamawh tawpkhawk tawh zawk a ni. Mizo thalaite’n ram hmasawn an mamawh e. www.emizoram.com

Vol. XV Issue No. 8

Bangalore Mizo Association Pathianni Tin Chhuak Chanchinbu

Editorial Bangalore Mizo te kum 25 lai mai helai hmunah pawl angin kan lo awm ve ta reng mai. Rual u zawk te titi atangin mi tam vak lo Mizote chu he pawl din hma pawh hian Bangalore ah lehkha zir / hnathawkin an awm nual tawh a. Khawvel zau zawk han thlir pawhin Zofate hian hmun tin, kil tin hi kan lo mawi ve fur tawh mai.Hmasawnna ropui tak ani. Bangalore ah Mizote pawh kum tinin kan lo pung, chhiatni thatni te pawh kan tawng fo ta a, pawl hruaitute tan pawh rorelna tur a pung chho zel ani. Mizoram House/ Tribal Reseach Centre te neih tum mah ila, hun a la ngaih rei hmel si.Bangalore Mizote hian engmaw hmun/in pakhat rent tur ang chi tal pawh hian kan mamawh hle mai. Amaherawhchu member te inpekna leh thanhnemngaihna lo chuan kan nei theilo, hetiang lama rilru seng peih leh inpe te kan awm anih chuan hruaitute nen i sawiho thin ang u! Ram leh hnam tan I thawk zel ang!

v

Tv. Malsawmkima, damlohna avanga Mandya atanga lo phei pawh Pathian khawngaihna a zar ah that lam a pan zel a, tunah chuan exam te a hnaih tawh avangin dawmdawiin atanga chhuakin Mandya lam ah a phei leh ta.

v

Kar hmasa Sunday inkhawm ban khan Pu B. Kapthuama te chhungkua chuan an nu Pi Thangliani damlohna ata Pathianin chakna thar a pe leh chu lawmawm an tiin ,Pathianh hnenah leh Bangalore Mipuite thatna leh khawngaihna avanga lawmthu sawi nan thingpui hmeh tui tak - Chicken Burger leh Chocolate Cake in inkhawm kal zawng zawng te puar takin min hrai hneh hle.

v

Kan member hlun Tv. Joel Sailo chu tunlai Phone Company lar tak Vodafone chuan a lem ziak dangdai tak mai chu an lei sak a, tunlai hian he lem hi Vodafone Advertisement hrang hrang atan an hmang mek ani .Tin, Joel a hian khawvel company hrang hrang tan thil tam tak a lo design tawh a. LEE company tan te pawha lo thawk tawh ani. Tv. Joel-a kan chhuang hle.

v

Nl.Mimi Hrahsel, Grace Home chuan IIM Bangalore ah MBA zir thei turin seat a hmu fel ta. Kan hriat theuh angina IIMB chu India rama Management zirna tha ber te zinga mi niin, seat hmuh harsa ber te zinga mi ani.Mizo hmeichhia ah chuan IIMB a tling hmasa ber anih hial a rinawm. Kan lawmpuiin a zir zelna turah Pathianin hruai zel rawh se.

v

Rev. H. Hrangkhuma leh an nu Pi Chhawnkimi te pawh US atanga an lo hawn hnu in in lam ah taksa hrisel tawklohna avangin an in enakwl mek zel a.Hma an sawn zel ani tih thu kan dawng. Tunah hian a ahma a an awmna SAIACS lam ah an awm mek ani.Vawiin hian an fanu te chhungkua Kolkata lam atangin anmahni lo kan turin an rawn chhuk dawn tih thu kan dawng bawk.

v

Pi Tetei w/o Pu Athang Leivom te pawh an naute damlohna pawhin thatlam a pan zel e.

v

Tv.Tetea s/o Rev.C.Vanlaldika pawh in lam ah in enkawl zel in hma a sawn zel e.

v

Pi Machhungi te chhungkua pawh Aprill 28 khan Benson Town lam ah an rawn insawn phei a, ani pawh thatlam a pan zel a, vawiin hian Santosh Hospital ah treatment a lak chhunzawm ang. Pi Machhungi fanu lian ber Bobo-i pawhin Class 10 Distinction ah passed in Mt. Carmel College ah a zirna a chhunzawm ang.

v

Pi Seni Cancer natna avanga in enkawl mek pawhin Treatment la zo tawhin, in check up leh mai chiah a hmabak tawh tih thu kan dawng a, Pi Seni hian amah tawntaipuitute chung ah lawmthu a sawi tak meuh meuh. Damlo dang te – Pi Rita leh Nl.Saizami te pawh an tha zel a, kan member damlote hi tawngtaina ah i hre zel ang. Tawngtaina hi kan in tanpui theihna ropui leh tha ber ani tih I hrereng ang u.

v

BMA Exec.Committee member Tv.Amos-a pa, Rev. Roger-a pawh tunlai hian Bangalore ah hna tul pawimawh tiin a lo zin. Pu Josiah L.Ralte pawh Zoram lam ah hna tul tiin a thang mek.

TUALCHHUNG NEWS v

BMA Executive Committee chu nimin tlai dar 3 khan Rev. Dr. K. Sapthanga in, Koramangala ah neih ani a, member pawh an kal kim tha hle.

v

Ningani kal ta khan ZONET Cable, Aizawl chuan Zoram pawna awm mi hrang hrang te a kawm a, Bangalore lam atangin BMA aiawhin Nl.Blessy Sailo – BMA Treasurer leh Tv. Hminga Pachuau - UTC a BD zirlai te an tel.Nizan khan Telecast ani. He inkawmkhawmna hi mipuiin an hlut hle tih hriat ani. Enge Bangalore mipui te’n kan mamawh tih zawhna chu kan aiawih kal te hian Mizoram House anih thu mipui hma ah thahnemngai takin an sawi.

v

v

Shalom Hostel neitu, Pi Pianmawii te chhungkua chu Vasanthnagar a kum 5 zen zawn an awm hnu in Kalyan Nagar (CMR college bul) ah tun kar liamta khan an in sawn phei. Mizo tlangval zaithiam leh lar em em Michael M Sailo chu tunkar Nilaini kalta khan Bangalore ah Fusion Lounge anniversary a zai tura sawm anihna angin a rawn zin a, thu kan hriat dan in Michael hian Radio Indigo – 91.9 FM Bangalore ah job offer a hmu a, amah pawhin rawn awm a chak hle ani tih thu kan dawng mahse he hna hi a thawk dawn em tih erawh a la sawi chiang thei rih lo.BMA Member a rawn ni thuai maithei ani.

v

MSA, Bangalore in kum tina a lo tih thin angina Zilai harsa te chhawmdawl hna pawh Session thar atan thla thar June atangin a tan leh dawn ta.Kan Mizopui zirlai harsa te tanpui chakna nei chuan mahni remchan dan leh inhuam dan ang zelin MSA hruaitute biak theih reng ani e.

v

BMA Exe. Committee member Pu. Josiah L. Ralte pawh Ningani kalta khan hna tul pawimawh tak ti turin Aizawl lam panin a chho, June ni 7 ah lo chhuk leh a tum niin thu kan dawng.

v

May 15 khan kan member Tv.Lalnuntluanga Renthlei (Kawngtea) chuan Tuikhuahtlang Presbyterian Biakin ah Nl. Amy Ralte nupui ah a nei. BMA chuan kan lawmpui takzet ani.An hun kal zel tu turah duhsakna kan hlan nghal e.June 7 hian kan member Nl. Zothanpuii pawh Benjamin Abraham nen St.Thomas Catholic Church, Kutch Gujarat ah an innei dawn bawk. Duhsakna kan hlan e.

Date: 24th May 2009

Tunkar Changvawn: “Lungchhiate chu a tidam a, An hliamnate chu a tuam thin a. - Sam 147:3

Vol. XV Issue No. 8

Bangalore Mizo Association Pathianni Tin Chhuak Chanchinbu

v

Kan member ni thin Tv Zorina Pautu chuan June 19 hian B. Lalbiaksiami chu Chaltlang Lily Veng Prsbyterian biakinah 'tiam tlat e' a tihpui dawn. Kan Cultural Secretary hian a han semi-fianl pui mai thei e.

v

Vice President Pu Pca chuan car tha tak mai a nei thar. Family-a inkhawm hi a ngaipawimawh a.Kan lawmpui a che.

v

Kan Cultural Secretary pawhin a Bike chu thlak a duh ta a, monday lam chuan bike thar ngeia nula han rim vel a tum nghet ta bur mai.

v

Kan member lo ni tawh thin Tv. Solo chuan zin khawthawn pahin May 20 khan B'lore a rawn chuang kai leh ta.

AWM DAN MAWI : BIAKIN AH Biak ina awm dan mawi tawi tein han tarlang ila – 1. Zah takin Biakin ah hian luh tur ani. 2. Zuk leh hmuam tih miah loh tur ani. A rim pawh nam loh tur ani. 3. Thlahdah taka thut leh tawngtai laia bawp khawkherh chin te hi a mawi lo. 4. Phun sur sur leh nuih vur vur te hi chin loh a tha hle. 5. Taksa leh thawmhnaw fai nen inkhawm a mawi. 6. Bible chhiar uluk tur ani. 7. Boruak lum leh vawh dan azira thawmhnaw inbel a mawi. 8. Thuthlenga ke hlan kai loh a tha. 9. Mi thusawi laia lehkhabu lo chhiar loh a tha. 10. Biakin chhung ah hian muang lutuk lo, rang lutuk lova chet a mawi. ( Pastor K . Lalpiangthara lehkhabu atanga lakchhuah ani)

Michael M Sailo …Fusion Lounge, Bangalore a a zai lai.

Nl.Mimi Hrahsel IIMB –a zir tur.

Mr & Mrs Lalnuntluanga Renthlei

Date: 24th May 2009

CHUNGLAM MALSAWMTU THU ANG ZELIN… ( Dr. H.T Sangliana kawmna thu tawi)

“Supercop” ti a hriat lar, Bangalore Mizo te tana “Pa” nih tling zo tak, “Pathian thu ang zel ni rawh se” ti thei tu BMA Sr. Adviser ni mek, tun Lok Sabha MP Inthlannaa Bangalore Central Constituency a Congress ticket-a ding amaherawhchu a khingpui BJP Candidate P.C. Mohan umpha ta lo, Dr. H.T.Sangliana, BMA AW Editor nen an inkawmna thu tawi… Mipuite nghahfak anih laia engvanga tling lo ta mai nge ani??? Enge a hmalam hun? Thlirin han bihchiang teh le… Tlinlohna chhan tlangpui ni a lang te - “ Central Constituency hi a thar leh lar chho tur ani a, Government Office pawimawh zawng zawng leh Commercial Location ani. Candidate nih tum kha Congress atang ringawt pawhin paruk lai kan awm . High command in min han pek tak ah chuan lungawilo kha an awm ta a, anticurrent (anti-congress) in an beichho ta ani.Abikin Muslim candidate dangte avang chuan minority vote chu nasa takin a in thendarh ta a, JDS ah a kal ta vak a. Deve Gowda in withdraw tura an tih pawhin Jaffer Sharieff nen tang dunin vote 1,60,000 ngawt mai chu Congress vote a ei a tih theih.Vote 35218 in ka khingpui P.C.Mohan kha ka pha lova, amaherawhchu Bangalore Rural, Central, North leh South a Congress candidate tling ta lo te nena khaikhin chuan ka margin a te ber ani”. Tin, money factor hi ani leh a. Janatha & BJP te kha billionaire an ni a, pawisa hi tui angin an hmang mai si ani. Time Factor – Candidate hming an announce tlai hle mai a keini Congress lam khan, an han announce chuan ni 15 chiah awm tawh a . JDS & BJP te erawh chu thla hnih lai la awm ah khan candidate tur an puang tawh a.Chuvang chuan in tin an lo cover hman a, kei atan chuan 3000 sq.kms leh 20 Lacs voters han luhchhuah hmanna a awm ta lova, hei hian ansa takin min nghawng bawk. Christian hming leh Muslim hming tam tak kha BJP ni ngei tura rin te’n an lo thaichhia a. Voter’s ID Adddress / hming or pa hming diklo te an lo dah ngei niin kan hria a. Pu Byre Gowda chuan Bangalore leh a chhehvel ah ringawt vote 80,000 – 1 Lac an khawih chingpen ngei ani ati.Nimin khan booth pakhat ( Shivaji nagar) ah vote pakhat chiah a tla tih te kan hrethar a. Thil diklo a awm ngei ani tih chu a hriat ani. Lawmthu sawina : “ Min vote tu te, tawngtaipui tute leh duhsaktu te zawng zawng chungah rilru chhungril ber atangin lawmthu ka sawi e. Thuchah duh: A bikin Mizo mipuite chunga ka sawi duh chu election alo awm apiangin theih tawpa kan participate ve hi a pawimawhin , puitlinna ze pawimawh tak ani tih hi hre theuh turin ka duh tak zet. Politics hi kan nun dan kalphung hriltu pakhat ani si a. Hmabak : Tun anga Christian ( Denomination hrang hrang ) te tanrualna tha hi India State ah ala awm ngai lo a, involvement a nasa hle a, Corruption nasat vang hian Christian mi tam tak an lungawilo a, mipui nawrna a nasa a, “ Zam suh , ti zel rawh , kan mamawh a che” tiin, “ Christian te hmalak sak turin, I politics kum te pawh a la tlai love” tiin mi tam tak ten min hrilh ani. Pathian remruat dan kawng te a lo inherchhuak zel ang chu.All India Level a thil thlir mi te chuan N.E. ah chho la, N.E. than chhoh zel nan I pawimawh ani, Bangalore hi chhuahsan la, N.E. hmasawnna atan kawng sut pui rawh , Mizoram khi base ah hmang la , N. E represent turin I pawimawh ani tiin min hrilh tu an awm nual.Mahse hei hi ka ti hlawhtling dawn em tih chu Sorkar hi han thu nghet se , Chunglam malsawmtu thu ang zelin ni rawh se ...”

Vol. XV Issue No. 8

Bangalore Mizo Association Pathianni Tin Chhuak Chanchinbu

MIZORAM NEWS §

§ §

Chief minister Pu Lalthanhawla chuan, NLUP tih hlawhchham tum ngar ngar tu party dang mi thenkhat chu he tanpuina hi pek an ni lovang a ti.He thu hi nimina Lunglei District Village Council Seminar – cum – Training-a hmanpuinaah sawiin, Chief minister chuan, rethei leh hausa inkar hla tawh lutuk siamthatna tur leh miretheite khaichhuak turin NLUP tanpuina sem a ni dawn a ni a ti a, he tanpuina kalpuina turah VC te an pawimawh dawn a, khua leh tui dik tak ten an dawn theih nan Village Register an vawng vek tur a ni a ti bawk. Mizo Tlangval Capt. Samuel Lalrintluanga (Indian Army) chu Mizo zinga Mt. Everest lawn chhuak hmasa ber ani ta. Hmar People’s Convention (HPC) Gen. Hqrs. President, Lalrosiem chuan tunhnaia an hriatpuina leh remtihna tel lova Ex-Hmar Volunteer Association (Ex-HVA) ten chanchinbu thenkhata HPC Gen. Assembly tun thla May ni 27-28-a Saipum a a koh chu dan bawhchhiatna leh dan kalh a ni tiin a \ul anga hmalak sak turin Aizawl SP hnenah FIR a thehlut. (Courtesy AIR Aizawl)

LAWRKHAWM •

•

•

•

Sum nei nia mi a inngaih hrim hrim hian chak niin a inhria a, mi pawhin pawm riau niin a inhre thin bawk niin zirchianna chuan a sawi.Sun Yat-Sen University-a research beitu Xinyue Zhou chuan sum han khawih vel hian miin engah mah ngai lo leh chuang nia inhriatna a bo a, taksa pawh chak ta riau nia inhriatna a awm thin niin a hmuchhuak. Mahse, sum khawhral dan hi a dik lo a nih chuan rilru a tina hle thin thung."Sum hian mahni inrintawkna, chakna leh hna tlinna te hi a titho thin a ni," tiin zirchiangtu chuan a sawi.Psychologist Zhou chuan hemi chungchanga a ngaihdan siam tur hian zirlai zingah en chhinna 10 chuang zet a nei a, zirlai te hi a changin 72 te, 108 te an ni thin. CBI chuan Tata Memorial Hospital (TMH), Parel-a cancer damdawi chang vaibelchhe tel man hralh ruk a nih dan an chhui chhuak niin an sawi. CBI (western zone) joint director Rishi Raj Singh chuan he damdawi hralh ruk hi kum nga chhung zet lo kalpui tawh a nih avang leh cancer damdawi hi a to em avangin sum chingpen hi cheng vaibelchhe 100 hu zet ni turin a chhut. West Bengal-a Andal-ah zirtirtu thinrimin zirlai pakhat kum 10 mi duster-in a vawm a, a chal fuhin a thi.Zirlai hi Babli Ghosh a ni a, zirtirtuin a vawm fuh hnu lawk khan a classroom-ah a luak zui nghal a ni. Babli vawmtu zirtirtu hi Rekha Bhakat a ni a, zawn mek a ni. American Idol 2009 atan kum 23 a upa Kris Allen, Conway, AR chu tunkar kalta khan thlan a ni. Zirlai leh Hnathawk Tan PG Nuam Tak Near 10th BTS Bus Depot Hennur Main Road, Kammanahalli Contact : 98865 27194 / 97418 92145

Editor: Thaarie Hnamte – (Mb) 9886145877 Jt.Editor - Madawnga Hauhnar Cir.Managers –Amos Lalremtluangi, R.Lalremruata & Sawmtei Khawlhring Email:[email protected] / www.bangaloremizo.info I lo bengvar lehzual nan sms JOIN BloreMizo type la, 567678 ah thawn rawh le. I lo fin deuh deuh nan BMA AW chhiar thin bawk ang che. Thla 3 lak man Rs.50/-

Date: 24th May 2009

HRIATTIRNA 1. FRESHERS SOCIAL – BMA Member thar te lawmna st chu 1 August 2009 hian kum tina kan lo neih thin angin hman leh ani dawn. A Hmun - Goodwill Girl's High School. Programme tan hun - Chhun dar 12 ah lunch ei a ni anga, 1:30pm ah programme tan a ni ang. 2. BMA Football Tournament (HVLT Mawia Memorial Trophy) chu August 14 ah khelh leh tura ruahman a ni. Sub committee siam a ni a, hma an la thuai ang. Infiammite lo inbuatsaih leh tawh rawh u le. 3 .Vangpui Kut: A hun - 19th September 2009. A Hmun Goddwill Girls H/S. Tun tum chu Section hrang hrang ten hengah te hian inelna an nei tawh ang. Debate, Solo (boys & girls), Lengkhawm zai leh Chheihlam. 4.Vawiin inkhawm ban atang hian Zirlaite tan Scholarship Form Rs. 20 a lei theihin Biakin kawtah zawrh tan ani e. 5.BMA Membership Form fill up a hun leh ta. Biakin kawt ah Rs.5 /- zelin lei theih ani. I ngaipawimawh theuh ang u.

( Hriselna Huang ) "Taima takin hnathawk la—a hlawhchhuah chu hlawhtlinna a ni.Fimkhur takin thil ngaihtuah la—chakna hnar a ni.Infiam hlim nan hun hmang la—tar harna a ni.Lehkkha chhiar nan hun hmang la—hriatna tizau tu a ni.Nuihza leh intihhlim nan hun hmang la—nunna atan hla mawi a ni.Tawngtai nan hun hmang la—Kristiante nunna thaw a ni.""Kal kawng i zawn duh chuan Pathian zawng la—nun hlim tak leh hlawhtling i neih duh chuan Pathian thu awih rawh." "Ka fapa, ka thu ngaithla la, ka thu sawiah i beng dawh rawh. I mithmuh ata kal chhuah tir suh; I thinlung lai takah pai rawh. A hmutute tan nunna a ni a, an tisa zawng zawng tan hriselna a ni si a." (Thufingte 4:20-22) ---------------------------------------------------------------------------------

rd

BMA Executive Committee Meeting : 23 May 2009 Senior Advisers : Dr. HT Sangliana, Dr Rini Ralte, BMCF President Rev.Dr.K.Sapthanga & BMCF Secy Pu P.S.Chhuasa te’n Committee an uap tha hle. BMCF INKHAWM PROGRAMME DATE: 31.05.2009 Hruaitu : Tv.Madawnga Hauhnar Tantu : Nl.Philia L.Khiangte Thawhlawm hlan : Nl.Zaithanmawii Thusawitu : Rev.C.Lalmuankima Special Number : Nl.Chuauzikpuii